1. Ungenzani ukuze ube ngumngane oseduze lomuntu othile?

NXA ufuna ukuba ngumngane oseduze lomuntu othile kufanele uzinike isikhathi sokuba laye. Ukuxoxelana elikucabangayo lendlela elizizwa ngayo kuzakwenza libe ngabangane. Kodwa ukuba ngumngane kaJesu khona akulula ngezinye izikhathi. Ngenxa yani?

2. Yibuphi ubunzima bokuqala esihlangana labo?

² Ubunzima bokuqala yikuthi kasikaze simbone uJesu. AmaKhristu amanengi aphila ngesikhathi sabaphostoli lawo kawazange ambone. Loba kunjalo umphostoli uPhetro wathi: “Lanxa lingazange limbone liyamthanda. Lakhathesi kalimboni, kodwa litshengisa ukuthi lilokholo kuye.” (1 Phet. 1:8) Yikho kuyenzakala sibili ukuthi sibe ngabangane bakaJesu lanxa singakaze simbone.

3. Yibuphi ubunzima besibili esihlangana labo?

³ Ubunzima besibili yikuthi kasenelisi ukukhuluma loJesu. Phela nxa sikhuleka siyabe sikhuluma loJehova. Kuliqiniso sibili ukuthi sikhuleka ngebizo likaJesu kodwa lokhu akutsho ukuthi siyabe sikhuluma laye. Vele uJesu kafuni sikhuleke kuye. Ngenxa yani? Ukuthandaza yindlela yokukhonza futhi uJehova nguye yedwa okumele akhonzwe. (Mat. 4:10) Lanxa kunjalo singenelisa ukutshengisa ukuthi siyamthanda uJesu.

4. Yibuphi ubunzima besithathu esihlangana labo futhi sizaxoxa ngani esihlokweni lesi?

 ⁴ Ubunzima besithathu yikuthi uJesu uhlala ezulwini yikho kasenelisi ukuba laye. Lanxa kunjalo singenelisa ukwazi okunengi ngaye. Esihlokweni lesi sizaxoxa ngezinto ezine esingazenza ukuze siqinise ubungane bethu laye. Kodwa kasiqaleni ngokuhlola ukuthi kungani kuqakathekile ukuthi sibe ngabangane bakaKhristu.

5. Kungani kumele sibe ngabangane bakaJesu? (Khangela ibhokisi elithi “ Ukuba Ngabangane BakaJesu Kwenza Sibe Ngabangane BakaJehova” lelithi “ Bona UJesu Ngendlela Eqondileyo.”)

⁵ Kumele sibe ngabangane bakaJesu ukuze sibe ngabangane bakaJehova. Kungani kunjalo? Cabanga ngezizatho ezimbili. Esokuqala, uJesu watshela abafundi bakhe wathi: “UBaba uyalithanda kakhulu ngoba lina lingithandile.” (Joh. 16:27) Waphinda wathi: “Kakho ongeza kuBaba ngaphandle kokuthi eze ngami.” (Joh. 14:6) Ukuzama ukuba ngabangane bakaJehova singazange sibe ngabangane bakaJesu kufanana lokuzama ukungena esakhiweni ungasebenzisi umnyango. UJesu wasebenzisa umzekeliso ohambelanayo ngesikhathi esithi yena ‘ulisango izimvu ezingena ngalo.’ (Joh. 10:7) Isizatho sesibili yikuthi uJesu walingisela ubuntu bukaYise ngendlela epheleleyo. Wathi kubafundi bakhe: “Loba ngubani ongibonileyo usembonile loBaba.” (Joh. 14:9) Enye indlela engcono yokwazi uJehova yikufunda ngempilo kaJesu. Sizamthanda kakhulu uJesu nxa singaqhubeka sifunda okunengi ngaye. Nxa ubungane bethu laye bukhula, sizamthanda kakhulu uYise.

6. Yisiphi esinye isizatho sokuthi sibe ngabangane bakaJesu? Chasisa.

 ⁶ Kumele sibe ngabangane bakaJesu ukuze imithandazo yethu iphendulwe. Lokhu kutsho ukuthi akwanelanga ukuphonguthi “ngebizo likaJesu” ekupheleni kwemithandazo yethu. Kufanele sizwisise lendlela uJehova asebenzisa ngayo uJesu ukuthi aphendule imithandazo yethu. UJesu wathi kubaphostoli: “Loba yini eliyicela ngebizo lami ngizayenza.” (Joh. 14:13) Lanxa uJehova kunguye ozwa imithandazo yethu futhi ayiphendule, uJesu nguye ophiwe amandla okwenza lokho uNkulunkulu akukhethileyo. (Mat. 28:18) Ngakho nxa uNkulunkulu engakayiphenduli imithandazo yethu, uqala akhangele ukuthi siyasisebenzisa yini iseluleko esasinikwa nguJesu. Ngokwesibonelo, uJesu wathi: “Nxa lithethelela abantu iziphambeko zabo, uYihlo osezulwini laye uzalithethelela; kodwa nxa lingabathetheleli abanye iziphambeko zabo, loYihlo kasoze alithethelele iziphambeko zenu.” (Mat. 6:14, 15) Yikho kuqakathekile sibili ukuthi siphathe abanye ngendlela uJehova loJesu abasiphatha ngayo.

7. Ngobani abazancedwa yinhlawulo kaJesu?

⁷ Abangane bakaJesu yibo kuphela abazancedwa yinhlawulo. Sikwazi njani lokho? UJesu wathi ‘uzanikela ngokuphila kwakhe ngenxa yabangane bakhe.’ (Joh. 15:13) Abantu abathembekileyo abaphila uJesu engakabuyi emhlabeni kuzamele bafunde ngaye njalo bamthande. Amadoda labesifazana abagoqela u-Abrahama, uSara, uMosi loRahabi bazavuswa. Kodwa kuzafanele babe ngabangane bakaJesu ukuze bathole ukuphila okungapheliyo.—Joh. 17:3; ImiSeb. 24:15; Heb. 11:8-12, 24-26, 31.

8-9. Ngokwalokho okutshiwo kuJohane 15:4, 5, ukuba ngabangane bakaJesu kusinceda ukuthi senzeni? Kungani kumele sihlale simunye loJesu?

⁸ Kuyisibusiso ukusebenza loJesu emsebenzini wokutshumayela izindaba ezinhle zoMbuso lokufundisa abantu ngazo. Ngesikhathi uJesu esemhlabeni wayefundisa futhi kusukela wabuyela ezulwini ubelokhu eqondisa umsebenzi wokutshumayela lokufundisa njengoba eyinhloko yebandla. Uyakubona futhi uyakuqakathekisa okwenzayo ukuze uncedise abantu abanengi ukuthi bamazi yena kanye loYise. Phela vele ukuze siphumelele emsebenzini lo sidinga ukuncediswa nguJehova loJesu.—Bala uJohane 15:4, 5.

⁹ ILizwi likaNkulunkulu lisitshela ukuthi kumele sibe ngabangane bakaJesu futhi siqhubeke siyibo ukuze sithokozise uJehova. Yikho kasixoxeni ngezinto ezine okumele sizenze ukuze sibe ngabangane bakaJesu.

10. Yikuphi okokuqala okumele sikwenze ukuze sibe ngabangane bakaJesu?

¹⁰ (1) Woba mazi uJesu. Lokhu singakwenza ngokubala uMathewu, uMakho, uLukha loJohane. Ukucabangisisa ngendaba eziseBhayibhilini ezisitshela ngempilo kaJesu kuzasenza simthande futhi simhloniphe ngenxa yendlela enhle ayephatha ngayo abantu. Ngokwesibonelo, lanxa wayeyiNkosi yabafundi bakhe, kazange abaphathe njengezigqili. Kodwa wayebatshela lokho ayekucabanga lendlela ayezizwa ngayo. (Joh. 15:15) Wayebuzwa ubuhlungu ababebuzwa njalo wayekhala labo. (Joh. 11:32-36) Lababemphikisa babevuma ukuthi wayengumngane walabo ababemlalela. (Mat. 11:19) Nxa  singalingisela uJesu endleleni ayephatha ngayo abafundi bakhe, ubungane bethu labanye buzaqina, sizasuthiseka, sithokoze njalo sizamthanda kakhulu uJesu futhi simhloniphe.

11. Yikuphi okwesibili okumele sikwenze ukuze sibe ngabangane bakaJesu futhi kungani kuqakathekile?

¹¹ (2) Lingisela indlela uJesu ayecabanga layesenza ngayo. Nxa singayazi kuhle indlela ayecabanga ngayo njalo siyilingisele, ubungane bethu laye buzaqina. (1 Khor. 2:16) Singamlingisela njani uJesu? Ake sixoxe ngendlela eyodwa. UJesu wayeqakathekisa kakhulu ukunceda abanye kulokuzithokozisa. (Mat. 20:28; Rom. 15:1-3) Lokhu kwenza waba ngumuntu ozidelayo futhi othethelelayo. Wayengaphonguzondiswa yilokho abantu ababekukhuluma ngaye. (Joh. 1:46, 47) Wayengavumeli ukuthi amaphutha abanye ababewenze kudala amenze acabange izinto ezimbi ngabo. (1 Tim. 1:12-14) UJesu wathi: “Nxa lithandana, abantu bonke bazakwazi ukuthi lingabafundi bami.” (Joh. 13:35) Zibuze, “Ngizama ngamandla wonke yini ukulingisela uJesu ukuze kube lokuthula phakathi kwami labafowethu labodadewethu?”

12. Yikuphi okwesithathu okungasinceda sibe ngabangane bakaJesu futhi singakwenza njani?

¹² (3) Sekela abafowabo bakaKhristu. UJesu ubona lokho esikwenzela abafowabo abagcotshiweyo angathi sikwenzela yena. (Mat. 25:34-40) Indlela eqakatheke kulazo zonke yokusekela abagcotshiweyo yikwenza konke okusemandleni ethu emsebenzini esawuphiwa nguJesu wokutshumayela lokufundisa abanye. (Mat. 28:19, 20; ImiSeb. 10:42) Abagcotshiweyo badinga ukuncediswa ‘ngabezinye izimvu’ ukuze benelise ukwenza umsebenzi wokutshumayela owenziwa emhlabeni wonke. (Joh. 10:16) Nxa ungowezinye izimvu owenza umsebenzi lo, utshengisa ukuthi uyabathanda abagcotshiweyo kanye loJesu.

13. Singawalalela njani amazwi kaJesu akuLukha 16:9?

¹³ Okunye okungenza sibe ngabangane bakaJehova loJesu yikunikela ngemali ezancedisa emsebenzini abawuqondisayo. (Bala uLukha 16:9.) Ngokwesibonelo singanikela ukuze sisekele umsebenzi owenziwa emhlabeni wonke futhi iminikelo le isetshenziswa ukuncedisa emsebenzini wokutshumayela owenziwa lasezindaweni ezikhatshana. Iphinda isetshenziswe ukuthi kwakhiwe futhi kunakekelwe amaWolu oMbuso lezinye izakhiwo zenhlanganiso. Kanti njalo isetshenziswa ukuncedisa labo abehlelwe ngumonakalo wemvelo loba omunye nje umonakalo. Singanikela ukuze kubhadalwe izindleko zebandla futhi sincedise labo esikwaziyo ukuthi badinga uncedo. (Zaga. 19:17) Lezi ngezinye indlela esingasekela ngazo abafowabo bakaKhristu.

14. Ngokwalokho okutshiwo ku-Efesu 4:15, 16, yikuphi okwesine okumele sikwenze ukuze sibe ngabangane bakaJesu?

¹⁴ (4) Sekela inhlelo ezenziwa yinhlanganiso kaJehova. Ubungane bethu loJesu inhloko yebandla buzaqina nxa sibambisana lalabo ababekwe ukuthi basikhokhele. (Bala u-Efesu 4:15, 16.) Ngokwesibonelo khathesi sesizama ukuba leqiniso lokuthi amaWolu oMbuso asetshenziswa kuhle. Yikho amanye amabandla ebanjaniswe lamanye futhi lensimu zawo zancitshiswa kumbe zengezelelwa. Lokhu kwenze inhlanganiso yonga imali enengi kakhulu enikelweyo. Kodwa abanye abamemezeli  kudingakale ukuthi bajayele izimo ezintsha. Abamemezeli labo abathembekileyo bangabe bangena lelinye ibandla okweminyaka eminengi njalo baba labangane kulo. Kodwa khathesi sebecelwa ukuthi bayengena lelinye ibandla. UJesu uyathokoza kakhulu nxa ebona abafundi labo abaqotho bebambisana lenhlelo lezi.

15. Ubungane bethu loJesu buzakuba njani esikhathini esizayo?

¹⁵ Labo abagcotshwe ngomoya ongcwele balethemba lokuba loJesu kuze kube nini lanini bebusa laye eMbusweni kaNkulunkulu. Bazambona njalo bakhulume laye. (Joh. 14:2, 3) UJesu uzatshengisa lalabo abalethemba lokuphila emhlabeni ukuthi uyabathanda. Lanxa bengasoze bambone, ubungane babo laye buzaqina kakhulu ngesikhathi bekholisa ukuphila abakulungiselelwe nguJehova loJesu.—Isaya. 9:6, 7.

16. Yiziphi izibusiso esizitholayo ngokuba ngabangane bakaJesu?

¹⁶ Sithola izibusiso ezinengi nxa sivuma ukuba ngabangane bakaJesu. Ngokwesibonelo, uyasithanda futhi uyasisekela njalo silethemba lokuphila kuze kube nini lanini. Kanti njalo okuqakatheke kakhulu yikuthi ukuba ngabangane bakaJesu kuzakwenza sibe lobungane obuligugu kulabo bonke, ubungane loYise uJehova. Kuyisibusiso sibili ukubizwa ngokuthi singabangane bakaJesu.