Kungani uJesu wathi esezakufa wakhuluma amazwi kaDavida akuHubo 22:1?

UJesu wathi esezakufa wakhuluma amazwi atholakala kuMathewu 27:46 athi: “Nkulunkulu wami, Nkulunkulu wami, ungitshiyeleni na?” Lapho uJesu esitsho njalo wayegcwalisa amazwi omhubi uDavida abhalwe kuHubo 22:1. (Mak. 15:34) Kuyabe kungaqondanga ukuphetha ngokuthi okwenza uJesu watsho amazwi la yikuthi uJehova wayemdanisile kumbe ukuthi waphelelwa lukholo okwesikhatshana. UJesu wayekwazi mhlophe ukuthi kungani kwakumele afe njalo wayezimisele ukwenza njalo. (Mat. 16:21; 20:28) Wayekwazi lokuthi langesikhathi esezakufa, uJehova wayezabe esekhiphile ‘uthango’ lokumvikela. (Jobe. 1:10) Yikho uJehova kazange amvikele uJesu ukuze kukhanye ukuthi wayezahlala ethembekile kungelani lendlela ebuhlungu ayezabulawa ngayo.—Mak. 14:35, 36.

Pho kungani uJesu wakhuluma amazwi akuHubo 22:1? Kasikwazi sibisibili, kodwa kasikhangeleni ezinye izizatho ezingabe zabangela ukuthi awatsho. *

Mhlawumbe uJesu watsho amazwi la ukuze agcizelele ukuthi uJehova wayengasoze amvikele ekufeni. UJesu kwakumele abhadale inhlawulo engancediswanga nguJehova. Kwakumele afe ukuze “ezwe ukufa ngenxa yabantu bonke.”—Heb. 2:9.

 Ngesikhathi uJesu ekhuluma amazwi akuhubo lelo, wayengabe efuna abantu bacabange ngesahluko sonke. Ngensuku lezo kwakujayelekile ukuthi amaJuda abambe amahubo amanengi ngekhanda. Nxa ayesizwa ivesi eyodwa ayengahle acabange ngehubo lonke. Nxa kuyikuthi lokho yikho uJesu ayefuna abantu bakwenze, wayezabe encede abalandeli bakhe abangamaJuda ukuthi bakhumbule iziphrofetho ezinengi ezikuhubo leli ezimayelana lokufa kwakhe. (Hubo. 22:7, 8, 15, 16, 18, 24) Kanti njalo babengakhumbula ukuthi amavesi okucina ehubo leli adumisa uJehova njalo athi uyiNkosi ebusa phezu komhlaba wonke.—Hubo. 22:27-31.

Kungenzakala ngesikhathi uJesu ekhuluma amazwi atshiwo nguDavida wayeveza ukuthi kalacala. UJesu engakafi wathonisiswa ngokungekho emthethweni kwasekuthiwa ulecala lokuthuka uNkulunkulu. (Mat. 26:65, 66) ISanihedrini yabuthana isiphangephange phakathi kobusuku yamthonisisa ingalandelanga imithetho yokuthonisisa. (Mat. 26:59; Mak. 14:56-59) Ngesikhathi uJesu ebuza umbuzo othi, “Nkulunkulu wami, Nkulunkulu wami, ungitshiyeleni na?” wayengabe eveza ukuthi kalacala lokuthi kwakungelasizatho sokuthi abulawe.

Ngesikhathi uJesu ekhuluma amazwi kaDavida wayengabe ekhumbuza abantu ukuthi uJehova wayelokhu emamukela. UJehova wavumela uDavida ukuthi ahlupheke kodwa lokhu kwakungatsho ukuthi kasamamukeli. Umbuzo owabuzwa nguDavida wawungatsho ukuthi kalakholo. Phela wathi esewubuzile wathi wayekholwa sibili ukuthi uJehova uzabasindisa abantu bakhe futhi uJehova waqhubeka embusisa. (Hubo. 22:23, 24, 27) Lokuhlupheka kukaJesu “iNdodana kaDavida” esigodweni sokuhlutshwa kwakungatsho ukuthi uJehova kasamamukeli.—Mat. 21:9.

Kungenzeka amazwi kaJesu ayeveza ubuhlungu obukhulu ayebuzwa ngenxa yokuthi uJehova wayekhiphe isivikelo sakhe ukuze kukhanye sibili ukuthi uqotho. Kwakungayisiyonhloso kaJehova ukuthi iNdodana yakhe ihlupheke njalo ife. Kodwa ngenxa yokona kuka-Adamu lo-Eva, lokho kwasekumele kwenzakale. Lanxa uJesu wayengonanga lutho, kwakumele ahlupheke njalo afe ukuze kuphendulwe imibuzo kaSathane njalo kubhadalwe inhlawulo yokubuyisela okwakulahlwe ngu-Adamu. (Mak. 8:31; 1 Phet. 2:21-24) Kodwa lokho kwakuzakwenzakala kuphela nxa uJehova wayengayekela ukuvikela uJesu okwesikhatshana futhi lokhu kwakuzabe kungokokuqala ngqa.

UJesu wayengabe efuna ukunceda abalandeli bakhe bacabange ngokuthi kungani uJehova wayevume ukuthi afele esigodweni sokuhlutshwa. * UJesu wayekwazi ukuthi ukubulawa ngokubethelwa esigodweni njengesigebenga kwakuzakhuba abanengi. (1 Khor. 1:23) Nxa abalandeli bakhe babengacabangisisa ngesizatho esiyiso esenza wabulawa, babezazwisisa ukuthi kungani kwakuqakathekile. (Gal. 3:13, 14) Lokho kwakuzenza bambone enguMsindisi, hatshi isigebenga.

Kungelani lokuthi kuyini okwenza uJesu watsho amazwi la, wayekwazi ukuthi wayesenza intando kaNkulunkulu ngokuhlupheka aze afe esigodweni sokuhlutshwa. Eqeda ukuwatsho wathi: “Sekwenzakele!” (Joh. 19:30; Luk. 22:37) Yikho uJehova wayekela ukumvikela uJesu okwesikhatshana ukuze enelise ukwenza konke ayethunywe ukuthi akwenze emhlabeni. Lokhu kwenza lokuthi enelise ukugcwalisa zonke izinto ezabhalwa ngaye “eMthethweni kaMosi lakubaPhrofethi kanye lakumaHubo.”—Luk. 24:44.