1-2. Nika umzekeliso otshengisa ukuthi singawalandela njani amanyathelo kaJesu.

ZIBONE wena labanye lidabula phakathi kwegusu elimnyama eliyingozi. Phambi kwenu kulomuntu olikhokhelayo onguye oyaziyo indlela. Nxa ehamba utshiya amanyathelo etshebetshebeni. Lithi lisithi mehlo suka linanzelele ukuthi kalisamboni, kodwa kalitshaywa luvalo ngoba lenza konke elingakwenza ukuthi lilandele amanyathelo akhe eduze.

² Umhlaba lo omubi esiphila kuwo unjengegusu elimnyama eliyingozi, futhi amaKhristu eqiniso anjengabantu abadabula phakathi kwalo. Kodwa kasitshaywa luvalo ngoba uJehova usinike umkhokheli opheleleyo oyazi kuhle indlela, iNdodana yakhe uJesu Khristu, okumele silandele amanyathelo ayo eduze. (1 Phet. 2:21) Elinye ibhuku elichasisa iBhayibhili lithi uPhetro wafanisa uJesu lomkhokheli kumbe umuntu ohamba phambili esitshengisa indlela. Nxa umuntu lo ehamba, uyabe etshiya amanyathelo. UJesu laye wasitshiyela amanyathelo esingawalandela. Kasixoxeni ngemibuzo emithathu emayelana lokulandela amanyathelo kaJesu. Owokuqala, kutshoni ukulandela amanyathelo kaJesu? Owesibili, kungani kumele siwalandele? Owesithathu, singawalandela njani?

3. Kutshoni ukulandela amanyathelo omunye umuntu?

³ Kutshoni ukulandela amanyathelo omunye umuntu? EBhayibhilini ibala elithi ‘ukuhamba’ lelithi ‘inyawo’ lingatsho indlela umuntu aphila ngayo. (Zaga. 3:23; Zaga. 4:26) Indlela umuntu aphila ngayo ingafaniswa lamanyathelo awatshiyayo  nxa ehamba. Yikho ukulandela amanyathelo omuntu kutsho ukulandela isibonelo sakhe kumbe ukumlingisela.

4. Kutshoni ukulandela amanyathelo kaJesu?

⁴ Kutshoni-ke ukulandela amanyathelo kaJesu? Kutsho ukulandela isibonelo sakhe kumbe ukumlingisela. Embhalweni okuthethwe kuwo isihloko sethu, umphostoli uPhetro ukhuluma ngokuthi uJesu wasitshiyela isibonelo ngoba waqinisela ngesikhathi ehlutshwa. Kodwa kulendlela ezinengi esingamlingisela ngazo uJesu. (1 Phet. 2:18-25) Iqiniso yikuthi konke uJesu akutshoyo lakwenzayo kuyisibonelo okumele sisilandele.

5. Abantu abalesono bangenelisa yini ukulingisela isibonelo sikaJesu ngendlela epheleleyo? Chasisa.

⁵ Kambe singenelisa yini ukulingisela isibonelo sikaJesu njengoba silesono? Ye singenelisa. Phela uPhetro kazange athi silandele amanyathelo kaJesu ngendlela epheleleyo, wathi ‘siwalandele eduze.’ Nxa singenza konke okusemandleni ethu ukuthi silandele amanyathelo kaJesu lanxa silesono, siyabe silalela amazwi omphostoli uJohane athi: ‘Qhubekani lihamba ngendlela uJesu ayehamba ngayo.’—1 Joh. 2:6.

6-7. Kungani sisithi ukulandela amanyathelo kaJesu kuzasisondeza kuJehova?

⁶ Ukulandela amanyathelo kaJesu kuzasisondeza kuJehova. Kungani sisitsho njalo? Okokuqala, uJesu wayephila ngendlela ethokozisa uNkulunkulu. (Joh. 8:29) Yikho nxa singalandela amanyathelo akhe, lathi sizathokozisa uJehova. Kanti njalo kasithandabuzi ukuthi uBaba wethu osezulwini uzasondela kulabo abazama ngamandla ukuthi babe ngabangane bakhe.—Jak. 4:8.

⁷ Okwesibili, uJesu walingisela uYise ngendlela epheleleyo, yikho wathi: “Loba ngubani ongibonileyo usembonile loBaba.” (Joh.  14:9) Kufanele silingisele ubuntu bukaJesu lendlela ayephatha ngayo abanye. Ngokwesibonelo, wayizwela usizi indoda eyayilobulephero, wazwela owesifazana owayelomkhuhlane omubi njalo waba lesihawu kwababefelwe. Nxa silingisela uJesu, siyabe silingisela loJehova. (Mak. 1:40, 41; 5:25-34; Joh. 11:33-35) Sizasondela kakhulu kuJehova nxa singaqhubeka simlingisela.

8. Chasisa ukuthi ukulandela amanyathelo kaJesu kusinceda njani ukuthi ‘siwunqobe’ umhlaba.

⁸ Ukulandela amanyathelo kaJesu kusinceda ukuthi singaphanjaniswa ngumhlaba lo omubi. Ngobusuku bokucina uJesu engakabulawa wathi: “Mina ngiwunqobile umhlaba.” (Joh. 16:33) Wayesitsho ukuthi kazange avumele ukucabanga kwabantu bomhlaba, inhloso zabo kanye lezenzo zabo kumphambanise. Kazange akhohlwe ukuthi isizatho sakhe sokubuya emhlabeni sasingesokulwela ubukhosi bukaJehova. Thina ke? Emhlabeni lo zinengi izinto ezingasiphambanisa. Kodwa nxa singalingisela uJesu ngokuqakathekisa ukwenza intando kaJehova, lathi ‘sizawunqoba’ umhlaba.—1 Joh. 5:5.

9. Kumele senzeni ukuze sihlale sisendleleni eyisa ekuphileni okungapheliyo?

⁹ Ukulandela amanyathelo kaJesu kuyisa ekuphileni okungapheliyo. Ngesikhathi ijaha elinothileyo libuza uJesu ukuthi lingenzani ukuze lithole ukuphila okungapheliyo, waliphendula wathi: ‘Buya uzokuba ngumlandeli wami.’ (Mat. 19:16-21) Watshela amanye amaJuda ayengakholwa ukuthi unguKhristu wathi: ‘Izimvu zami ziyangilandela. Ngizinika ukuphila okungapheliyo.’ (Joh. 10:24-29) Watshela uNikhodemu owayelilunga leSanihedrini njalo owayefuna ukufunda okunengi ngalokho ayekufundisa ukuthi labo ‘abatshengisa ukuthi balokholo kuye bazathola ukuphila okungapheliyo.’ (Joh. 3:16) Sitshengisa ukuthi silokholo kuJesu ngokusebenzisa lokho akutshoyo langokulingisela akwenzayo. Nxa singakwenza lokho, sizahlala sisendleleni eyisa ekuphileni okungapheliyo.—Mat. 7:14.

10. Kuyini okumele sikwenze ukuze ‘simazi’ ngcono uJesu? (UJohane 17:3)

¹⁰ Kumele siqale simazi uJesu ukuze silandele amanyathelo akhe eduze. (Bala uJohane 17:3.) ‘Ukumazi’ ngeke kwenzakale ngelanga elilodwa, kumele siqhubeke sisiba mazi. Kufanele siqhubeke sifunda ngobuntu bakhe, ngendlela ayecabanga ngayo layeziphatha ngayo. Kungelani lokuthi silesikhathi esinganani singoFakazi bakaJehova, kufanele siqhubeke sisiba mazi uJehova leNdodana yakhe.

11. AmaVangeli amane amumetheni?

¹¹ UJehova watshengisa ukuthi uyasithanda ngokufaka amaVangeli amane eLizwini lakhe ukuze siyazi iNdodana yakhe. AmaVangeli la  asitshela ngempilo lenkonzo kaJesu. Asitshela ngalokho akutshoyo layekwenza njalo aveza lendlela ayezizwa ngayo. Asinceda lokuthi ‘sicabangisise’ ngesibonelo sakhe. (Heb. 12:3) Singathi amumethe amanyathelo uJesu awatshiyayo, yikho ukutaditsha amaVangeli kusinceda simazi ngcono uJesu. Nxa singakwenza lokho, sizawalandela eduze amanyathelo akhe.

12. Singenzani ukuze sifunde okunengi emaVangelini?

¹² Nxa sifuna ukufunda okunengi emaVangelini, kakumelanga siphonguwabala nje, kumele siwataditshe okuzwayo njalo sicabangisise ngalokho esikubalayo. (Khangela uJoshuwa 1:8.) Khathesi kasixoxeni ngezinto ezimbili ezingasinceda ukuthi sicabangisise nxa sibala amaVangeli futhi sikusebenzise esikubala kuwo.

13. Ungenzani ukuze ukubone ngelihlo lengqondo okubalayo?

¹³ Kubone ngelihlo lengqondo obala ngakho. Zama ukubona okwakusenzakala, uzwe lemisindo yakhona, uzame lokuzwisisa ukuthi kwakungabe kunjani. Chwayisisa emabhukwini esiwanikwa yinhlanganiso kaJehova ukuze wenelise ukukwenza lokhu. Hlola izehlakalo ezingemva laphambi kwendaba obala ngayo. Dinga okunengi ngabantu langendawo okukhulunywa ngazo endabeni oyibalayo. Qathanisa indaba oyibalayo lefanana layo ekwelinye iVangeli. Ngezinye izikhathi omunye umlobi weVangeli angakhuluma okunye okwatshiywa ngomunye umlobi weVangeli.

14-15. Kuyini okungakunceda ukuthi ukusebenzise okubala ngoJesu?

¹⁴ Kusebenzise okubalayo. (Joh. 13:17) Zibuze imibuzo le nxa usutaditshe indaba eseVangelini elithile: ‘Kukhona yini okusendabeni le engingakusebenzisa empilweni yami? Ngingakusebenzisa njani engikubale kuyo ukuze ngincede omunye?’ Zama ukucabanga ngomuntu ongancedwa yilokho okubalileyo, ubusumtshela khona ngendlela elothando futhi elomusa.

 ¹⁵ Khathesi kasixoxeni ngokuthi singayisebenzisa njani imicijo le emibili. Kasihloleni indaba yomfelokazi ongumyanga owabonwa nguJesu ethempelini.

16. Chasisa okwenzakala kuMakho 12:41.

¹⁶ Kubone ngelihlo lengqondo okubalayo. (Bala uMakho 12:41.) Kubone okwenzakalayo. Kumhlaka 11 ngenyanga kaNisani ngo-33 C.E., * futhi sekusele insukwana ukuthi uJesu abulawe. Uqede phose ilanga lonke efundisa ethempelini futhi abakhokheli benkolo bebemphikisa, abanye bake bambuza ukuthi uwathatha ngaphi amandla okwenza izinto azenzayo. Abanye bona bambuze imibuzo akade becabanga ukuthi ngeke enelise ukuyiphendula. (Mak. 11:27-33; 12:13-34) Khathesi uJesu usesukile lapho akade ekhona, futhi kungenzakala ukuthi usesendaweni ebizwa ngokuthi Liguma Labesifazana, lapho asesenelisa khona ukubona amabhokisi eminikelo. Uthi esehlezi phansi abukele abantu bephosela iminikelo yabo emabhokisini la. Ubona abanengi abanothileyo bephosela inhlamvu zemali ezinengi. Mhlawumbe useduze okokuthi uyawuzwa umsindo wemali ephoselwa emabhokisini eminikelo.

17. Umfelokazi ongumyanga okukhulunywa ngaye kuMakho 12:42 wenzani?

¹⁷ Bala uMakho 12:42. Kuthi sekudlule isikhathi, uJesu abone “umfelokazi oswelayo.” (Luk. 21:2) Uyazidubekela, kungenzakala uthwala nzima ukuthenga izinto azidingayo empilweni. Lanxa kunjalo, uqonda kwelinye lamabhokisi eminikelo afike aphosele okuzinhlamvu kwemali okubili okungatsho lutho, okungenzakala akwenzi lamsindo nxa ekuphosela. UJesu uyakwazi ukuthi uphosele amalephuthoni amabili, okuzinhlamvu kwemali okuncane kulazo zonke. Imali le kayithengi ngitsho lentaka eyodwa, engeyinye yezinyoni ezitshiphe kulazo zonke ezithengiswayo.

18. Ngokwalokho okutshiwo kuMakho 12:43, 44, uJesu wathini ngomnikelo womfelokazi?

¹⁸ Bala uMakho 12:43, 44. Okwenziwa ngumfelokazi kuyamthinta kakhulu uJesu, yikho ubiza abafundi bakhe abesesithi kubo: “Umfelokazi lo ongumyanga unikele okwedlula bonke abanye.” Uchasisa esithi: “Bonke [ikakhulu abanothileyo] bacuphe enothweni yabo, kodwa yena lanxa eswela, ufake konke abelakho, konke obekumele aphile ngakho.” Ngesikhathi umfelokazi lo othembekileyo ephosela okuyimadlana kokucina ayelakho, wayetshengisa ukuthi uthemba uJehova ukuthi uzamnakekela.—Hubo. 26:3.

19. Yisiphi isifundo esiqakathekileyo esisithola emazwini kaJesu amayelana lomfelokazi ongumyanga?

¹⁹ Kusebenzise okubalayo. Zibuze, ‘Ngifundani kulokho okwatshiwo nguJesu ngomfelokazi oswelayo?’ Cabanga ngomfelokazi lo. Akuthandabuzwa ukuthi wayefisa ukunika uJehova okunengi. Lanxa izimo zazingamvumeli ukuthi enze njalo, wamnika konke ayelakho, futhi uJesu wayekwazi ukuthi umnikelo wakhe uligugu kuYise. Nansi isifundo esiqakathekileyo: UJehova uyathokoza nxa simnika konke esilakho, okutsho ukumkhonza ngenhliziyo langomphefumulo wonke. (Mat. 22:37; Kol. 3:23) Uyajabula sibili nxa esibona sisebenzisa isikhathi sethu lamandla ethu ekumkhonzeni, ngokwesibonelo nxa sisekutshumayeleni kumbe emihlanganweni yebandla.

20. Ungakusebenzisa njani okufunda endabeni emayelana lomfelokazi ukuze uncede abanye? Nika isibonelo.

²⁰ Ungakusebenzisa njani okufunda endabeni emayelana lomfelokazi ukuze uncede abanye? Cabanga ngabantu ongabakhuthaza  nxa ungabatshela ukuthi uJehova uyathokoza ngalokho abenelisa ukumenzela khona. Ngokwesibonelo, ukhona yini udade osekhulile omaziyo, ozibona engasimuntu walutho ngenxa yokuthi kasaphilanga kuhle emzimbeni njalo kasenelisi ukwenza okunengi enkonzweni? Ukhona yini umfowethu olomkhuhlane obuhlungu aphila lawo odaniswa yikuthi kasenelisi ukungena yonke imihlangano eWolu yoMbuso? Bakhuthaze ‘ngamazwi amahle futhi ayakhayo.’ (Efe. 4:29) Batshele isifundo esiduduzayo esisithola endabeni yomfelokazi ongumyanga. Obatshela khona kungabaqinisekisa ukuthi uJehova uyathokoza nxa simnika konke okusemandleni ethu. (Zaga. 15:23; 1 Thes. 5:11) Nxa ungancoma abanye ngokuthi banika uJehova konke abangamnika khona lanxa kukuncane, uyabe ulandela amanyathelo kaJesu eduze.

21. Uzimisele ukwenzani?

²¹ Siyambonga sibili uJehova ngokusinika amaVangeli asitshela okunengi ngempilo kaJesu ukuze senelise ukumlingisela kumbe ukulandela amanyathelo akhe eduze. Kungaba njani nxa ungahlola amaVangeli ngesikhathi utaditsha uwedwa kumbe eKukhonzeni Kwemuli? Kufanele sikhumbule ukuthi okuzasinceda sifunde okunengi emaVangelini yikukubona ngelihlo lengqondo esikubalayo futhi sikusebenzise ezimpilweni zethu. Kumele silingisele lokho uJesu akwenzayo njalo silandele lokho akutshoyo. Esihlokweni esilandelayo sizaxoxa ngokuthi sifundani emazwini uJesu awatsho esesigodweni sokuhlutshwa.