Isifungo ‘ngamazwi aqakathekileyo kumbe isithembiso sokwenza ulutho oluthile futhi umuntu osenzayo ujayele ukuthi uNkulunkulu ungufakazi wakhe.’ Singakhulunywa kumbe sibhalwe phansi.

Abanye abantu bacabanga ukuthi akumelanga senze izifungo ngenxa yokuthi uJesu wathi: ‘Lingaqali ukufunga. Ilizwi lenu elithi “Yebo” kalibe nguyebo, lelithi “Hatshi” kalibe nguhatshi, ngoba okwedlula lokho kuvela komubi.’ (Mat. 5:33-37) UJesu wayekwazi ukuthi uMthetho wawusithi ama-Israyeli enze izifungo ngezinye izikhathi lokuthi ezinye izinceku zikaNkulunkulu zazike zazenza. (Gen. 14:22, 23; Eks. 22:10, 11) Wayekwazi lokuthi uJehova wayeke wenza izifungo. (Heb. 6:13-17) Yikho uJesu wayengatsho ukuthi akusamelanga sifunge kodwa wayetshela abantu ukuthi bangaphongufunga lasezintweni ezingatsho lutho lezingancediyo. Kumele sigcine izifungo zethu ngenxa yokuthi lokhu yikho uJehova afuna sikwenze.

Kumele wenzeni nxa ungacelwa ukuthi wenze isifungo? Okokuqala, woba leqiniso lokuthi uzenelisa ukukwenza lokho okusesifungweni. Nxa uthandabuza kungcono ungasenzi isifungo leso. ILizwi likaNkulunkulu lisixwayisa lisithi: “Kungcono ukungafungi kulokwenza isifungo ungabe usasigcwalisa.” (UmTshu. 5:5) Okwesibili, dinga izimiso ezingakunceda ubususenza isinqumo usebenzisa umzwangedwa wakho oqeqetshwe liBhayibhili. Nanzi ezinye zakhona.

Ezinye izifungo aziphikisani lalokho uNkulunkulu akufunayo. Ngokwesibonelo, oFakazi bakaJehova bayazenza izifungo nxa betshada. Bayathembisa phambi kukaNkulunkulu labofakazi ukuthi bazathandana, baqakathekisane njalo bahloniphane ingqe nje bonke besaphila. (Abanye abawatsho amazwi la nxa betshada kodwa bayafunga phambi kukaNkulunkulu.) Ngemva kwalokho bayabe sebeyindoda lomfazi njalo akumelanga behlukane. (Gen. 2:24; 1 Khor. 7:39) Ukwenza isifungo somtshado kuqondile njalo kuvumelana lalokho uNkulunkulu akufunayo.

Ezinye izifungo ziphikisana lalokho uNkulunkulu akufunayo. UmKhristu akumelanga enze isifungo esinjengesokuya empini ukuze avikele ilizwe lakhe kumbe esokwekela ukuba nguFakazi. Lokhu yikwephula imithetho kaNkulunkulu. AmaKhristu ‘kawasiwo omhlaba’ yikho kawangeneli ezingxabanweni lasezimpini zawo.—Joh. 15:19; Isaya. 2:4; Jak. 1:27.

 Ezinye izifungo ziya ngomzwangedwa womKhristu. Ngezinye izikhathi singakenzi isinqumo kungadinga ukuthi sicabangisise ngamazwi kaJesu athi ‘sibuyisele okukaKhesari kuKhesari, kodwa okukaNkulunkulu kuNkulunkulu.’—Luk. 20:25.

Ake sithi umKhristu ufuna ukuba yisizalwane selizwe elithile kumbe ukuthatha iphaspothi abe esetshelwa ukuthi kumele aqale enze isifungo. Nxa ukwenza isifungo lesi kusitsho ukuthi uzakwephula umthetho kaNkulunkulu umzwangedwa wakhe oqeqetshwe liBhayibhili awungeke umvumele ukuthi asenze. Kodwa uhulumende angamvumela ukuthi atshintshe amanye amazwi esifungo ukuze umzwangedwa wakhe umvumele ukusenza.

Nxa umKhristu esenza isifungo lesi uyabe elalela amazwi akuRoma 13:1 athi: “Wonke umuntu kazehlise kuziphathamandla.” Yikho umKhristu angabona kungelalutho olubi ngokwenza isifungo ngenxa yokuthi siyabe sivumelana lalokho uNkulunkulu athi amaKhristu akwenze.

Kuqakathekile lokulalela umzwangedwa nxa sicelwa ukuthi sisebenzise kumbe senze ulutho oluthile nxa sisenza isifungo. AmaRoma lamaSikhethiya ayefunga ngenkemba ezazimela unkulunkulu wabo wempi ukuze batshengise ukuthi lokho ababekutsho kuliqiniso. AmaGrikhi wona ayephakamisa isandla nxa esenza isifungo. Lokhu kutshengisa ukuthi babenanzelela ukuthi kulonkulunkulu ozwayo lokho abakutshoyo abone labakwenzayo ababezalandisa kuye.

Inceku kaJehova ayingeke ikhothamele ifulegi kumbe ifunge ngolunye uphawu lwesizwe. Kodwa ake sithi ucelwa ukuthi ufake isandla sakho phezu kweBhayibhili ubusufunga ukuthi uzakhuluma iqiniso. Nxa kunjalo ungakwenza lokho njengoba iMibhalo isitshela ngabantu abathembekileyo abenza okuthile ngesikhathi besenza isifungo. (Gen. 24:2, 3, 9; 47:29-31) Kumele ukhumbule ukuthi nxa usenza isifungo esinjalo ufunga phambi kukaNkulunkulu ukuthi uzakhuluma iqiniso. Kumele uzimisele ukukhuluma iqiniso kuloba yiwuphi umbuzo ongawubuzwa.

Asifuni loba yini iphambanise ubungane bethu loJehova. Yikho kumele sithandaze futhi sicabangisise singakenzi isifungo ukuze umzwangedwa wethu uhlale uhlanzekile njalo singephuli izimiso eziseBhayibhilini. Nxa ungakhetha ukwenza isifungo woba leqiniso ukuthi uyasigcina.—1 Phet. 2:12.