1. Kungani siphendula emihlanganweni yebandla?

 KUNGANI sisiya emihlanganweni yebandla? Isizatho esiqakathekileyo esenza sihambe emihlanganweni le yikuthi sifuna ukudumisa uJehova. (Hubo. 26:12; 111:1) Esinye isizatho ngesokuthi sifuna ukukhuthazana njengoba siphila ezikhathini ezinzima. (1 Thes. 5:11) Izinto lezi singenelisa ukuzenza ngokuphendula emihlanganweni yebandla.

2. Kunini lapho esingaphendula khona emihlanganweni yebandla?

² Iviki ngayinye silamathuba okuphendula emihlanganweni yebandla. Ngokwesibonelo, singaphendula esifundweni se-Nqabayokulinda esenziwa ngempelaviki. Ikanti emihlanganweni yaphakathi kweviki singenelisa ukuphendula engxenyeni yokuchwayisisa iMibhalo, eSifundweni SeBhayibhili Sebandla lakwezinye ingxenye ezilemibuzo.

3. Kuyini okungabanzima nxa sifuna ukuphendula njalo uHebheru 10:24, 25 angasinceda njani?

³ Sonke siyafuna ukudumisa uJehova lokukhuthaza labo esikhonza labo. Kodwa kwezinye izikhathi kungaba nzima nxa sifuna ukuphendula ngenxa yokuthi singabe sisesaba kumbe sifuna ukuphendula kanengi kodwa singaqanjwa. Manje kuyini okungasinceda? Okunye okungasinceda kutholakala emazwini omphostoli uPhawuli awabhalela amaKhristu angamaHebheru. Wathi ewatshela ngokuthi kuqakathekile ukuhlangana  ndawonye wagcizelela ukuthi kumele ‘akhuthazane.’ (Bala uHebheru 10:24, 25.) Asisoze sesabe kakhulu ukuphendula nxa singakhumbula ukuthi izimpendulo zethu lanxa zizimfitshane ziyabakhuthaza abanye futhi ziluqinise ukholo lwabo. Lanxa singaqanjwanga kanengi ngendlela ebesifisa ngayo kungasithokozisa ukuthi sinike abanye ithuba lokuthi baphendule.—1 Phet. 3:8.

4. Yiphi imicijo emithathu esizaxoxa ngayo esihlokweni lesi?

⁴ Esihlokweni lesi sizaqala sixoxe ngokuthi singabakhuthaza njani abanye ngezimpendulo zethu nxa sisebandleni elilabamemezeli abalutshwana. Sizaphinda sixoxe langokuthi singabakhuthaza njani abanye ebandleni elilabantu abanengi abayabe befuna ukuphendula. Sizacina ngokuxoxa ngokuthi singenzani ukuze izimpendulo zethu zibakhuthaze abanye.

5. Singakhuthazana njani nxa sisebandleni elincane?

⁵ Ebandleni elincane kungaba labantu abalutshwana abaphakamisa izandla. Kwezinye izikhathi kungadingeka ukuthi umqhubi amelele ukuthi izandla ziphakame. Lokho kungenza imihlangano idonse icine ingasamnandi. Pho ungenzani nxa usebandleni elinjalo? Zimisele ukuphakamisa isandla kanengi. Ungenza njalo abanye labo bangacina sebephakamisa kanengi.

6-7. Kuyini okungasinceda ukuthi singesabi kakhulu nxa sifuna ukuphendula?

⁶ Ungenzani nxa usesaba ukuphendula? Banengi abesabayo sibili. Kodwa nxa ufuna ukukhuthaza abafowenu labodadewenu kungaba kuhle ukuthi udinge indlela ezakunceda ukuthi wehlise uvalo nxa usuphendula. Ungakwenza njani lokho?

⁷ Okunye okungakunceda yikukhangela amanye amacebo esawaphiwa ku-Nqabazokulinda ezadlulayo. b Ngokwesibonelo, lungiselela okuzwayo. (Zaga. 21:5) Nxa uyazi futhi uyizwisisa indaba okukhulunywa ngayo kuba lula ukuthi uphendule. Zama lokuthi izimpendulo zakho zibe mfitshane. (Zaga. 15:23; 17:27) Nxa impendulo yakho imfitshane awusoze wesabe kakhulu. Kulula ukuthi abafowethu labodadewethu bakhumbule impendulo yakho emfitshane mhlawumbe elomutsho owodwa kumbe emibili kulokukhumbula ende futhi elemicijo eminengi. Nxa impendulo yakho imfitshane futhi usebenzisa amazwi akho kuzakhanya ukuthi ulungiselele okuzwayo lokuthi uyayizwisisa indaba okuxoxwa ngayo.

8. UJehova ukubona njani konke esikwenzayo?

⁸ Ungenzani nxa kuyikuthi usuzame wonke amacebo lawa esesixoxe ngawo kodwa ulokhe usesaba ukuphendula? Hlala ukhumbula ukuthi uJehova uyakuqakathekisa konke okwenzayo. (Luk. 21:1-4) Kakhangelelanga ukuthi wenze okungaphezu kwamandla akho. (Flp. 4:5) Wena cabanga ngalokho ongenelisa ukukwenza, ubusuhlela ukuthi uzakwenza njani futhi ucele ukuthi uJehova akuncedise ungakhulelwa luvalo. Mhlawumbe ungaqalisa ngokuphendula kanye kuphela emhlanganweni ngamunye.

9. Kuyini okungenza kube nzima ukuphendula emabandleni amakhulu?

⁹ Kungenzakala ukuthi lawe ulolunye uhlupho nxa kuyikuthi ebandleni lenu kulabamemezeli abanengi. Mhlawumbe ebandleni lenu kulabantu abanengi abaphendulayo besekusenza  ukuthi kube kalutshwana ukuthi wena bakuqambe. Ake sixoxe ngodadewethu okuthiwa nguDanielle. c Uthi uyakuthanda kakhulu ukuphendula emihlanganweni yebandla ngoba yindlela yokukhonza uJehova, eyokukhuthaza abanye leyokugxilisa iqiniso enhliziyweni yakhe. Wathi esethuthele ebandleni elikhulu wayengasaqanjwa kanengi njengakuqala. Kweminye imihlangano wayephuma engaphendulanga. Uthi: “Ukungaqanjwa emihlanganweni kwakungizwisa ubuhlungu, ngangisizwa kulento engilahlekeleyo. Nxa imihlangano ingalandelana belokhe bengakuqambi ungacina ucabanga ukuthi bakuqophile.”

10. Singenzani ukuze sithole amathuba amanengi okuphendula?

¹⁰ Nxa kuyikuthi okwenzakala kuDanielle sokwake kwenzakala lakuwe ungacina usubona kungcono ukufika uzihlalele nje emihlanganweni yethu ungasazihluphi ngokuphakamisa isandla. Kodwa ungakhalali. Ungenzani ukuze bacine bekuqambile? Okunye okungakunceda yikulungiselela izimpendulo ezinengi. Nxa bengakukhutha umhlangano uqalisa uyabe ukwazi ukuthi ngeke uphele bengakuqambanga. Nxa ulungiselela isifundo se-Nqabayokulinda zama ukubona ukuthi indima ngayinye ingenelana njani lesihloko. Ungenza njalo uzenelisa ukuphendula kuloba yiphi indima. Mhlawumbe okunye ongakwenza yikuphakamisa endimeni leziyana ezingathi zijiyile. (1 Khor. 2:10) Ngenxa yani? Ngoba balutshwana abantu abajayele ukuphakamisa endimeni lezo. Ake sithi usukwenzile lokhu esesixoxe ngakho kodwa imihlangano isize yalandelana ulokhe ungaqanjwa. Ungenzani? Mhlawumbe ungabona kungcono ukulanda oqhubayo umhlangano ungakaqalisi ubusumtshela ukuthi ufuna ukuphendula ngaphi kwakhona.

11. UFiliphi 2:4 usikhuthaza ukuthi senzeni?

¹¹ Bala uFiliphi 2:4. Umphostoli uPhawuli wakhuthaza amaKhristu ukuthi aqakathekise okufunwa ngabanye. Singakusebenzisa njani lokhu emihlanganweni yethu? Kumele sikhumbule ukuthi abafowethu labodadewethu labo bayafuna ukuphendula njengathi.

12. Yiphi eyinye indlela esingakhuthaza ngayo abafowethu labodadewethu emihlanganweni? (Khangela lomfanekiso.)

 ¹² Ake sikubeke ngale indlela: Nxa ulabangane bakho nguwe yini ohlala ukhuluma kumbe labo uyabanika ithuba lokuthi bake batsho abakucabangayo? Kuyafanana lasemihlanganweni yebandla, asifuni kube yithi kuphela esitshonela ukuphendula. Eyinye indlela engcono kakhulu yokukhuthaza abafowethu labodadewethu yikubanika ithuba lokuthi labo baphendule, sizwe bezikhulumela ngokholo lwabo. (1 Khor. 10:24) Manje singakwenza njani lokhu?

13. Singenzani ukuze abanengi bathole ithuba lokuphendula emihlanganweni yethu?

¹³ Okunye esingakwenza yikugcina izimpendulo zethu zizimfitshane ukuze sinike abanye ithuba lokuphendula. Abadala bebandla lalabo asebelesikhathi eside bekhonza kumele babe yizibonelo ezinhle endabeni le. Zama ukuthi ungakhulumi ngemicijo eminenginengi lanxa impendulo yakho imfitshane. Nxa ungahle uthathe konke okusendimeni abanye bazaswela okokutsho. Ngokwesibonelo, endimeni le kulemicijo emibili, owokuqala ngowokugcina izimpendulo zakho zizimfitshane, owesibili yikungakhulumi izinto ezinenginengi. Nxa kunguwe oqanjwe ukuthi uphendule kuqala endimeni le zama ukuthi ukhulume ngomcijo owodwa kuphela.

14. Kuyini okungasinceda sibone ukuthi singasiphakamisa kangaki isandla? (Khangela lomfanekiso.)

¹⁴ Kumele sinanzelele ukuthi sikhetha ukusiphakamisa kangaki isandla sethu. Singamthwalisa nzima oqhubayo nxa isandla sethu singahlala siphezulu ngoba uyabe esezaqamba thina khona kulabanye abayabe bengakaphenduli. Lokhu kungabenza bacine bekhalala ukuphakamisa.—Umtshu. 3:7.

15. (a) Kumele senze njani nxa singaqanjwanga? (b) Abaqhubayo bangenzani ukuze banike wonke umuntu ithuba lokuphendula? (Khangela ibhokisi elithi “ Nxa Kunguwe Oqhubayo.”)

¹⁵ Nxa abantu abanengi bangaphakamisa izandla befuna ukuphendula singacina  singaphendulanga kanengi ngendlela ebesifisa ngayo. Kungenzakala ukuthi ngesinye isikhathi oqhubayo angasiqambi futhi lokho kungasidanisa. Kodwa akumelanga sizonde sicabange ukuthi umuntu lowo usiqophile.—Umtshu. 7:9.

16. Singabakhuthaza njani abayabe bephendulile?

¹⁶ Nxa ungaqanjwanga kanengi ngendlela obufisa ngayo, lalelisisa ngesikhathi abanye bephendula ukuze ubancome nxa isifundo sesiphelile. Abafowethu labodadewethu bazakhuthazwa ngamazwi akho okubancoma njengoba nje bebengakhuthazwa zimpendulo zakho. (Zaga. 10:21) Phela ukuncoma abanye ngeyinye indlela yokubakhuthaza.

17. (a) Abazali bangabancedisa njani abantwababo ukuthi balungiselele impendulo? (b) Yiziphi izinto ezine eziqanjwe kuvidiyo ezingakunceda ulungiselele ukuphendula emihlanganweni? (Khangela lamabala angaphansi.)

¹⁷ Yiziphi ezinye indlela esingakhuthazana ngazo emihlanganweni yethu yebandla? Nxa ungumzali ncedisa abantwabakho ukuthi balungiselele izimpendulo zabo kusiya ngeminyaka yabo. (Mat. 21:16) Lanxa ngezinye izikhathi emihlanganweni yethu kuxoxwa ngendaba ezimayelana lenhlupho zomtshado kumbe indaba zokuziphatha, kungaba lendima eyodwa kumbe ezimbili lapho umntanakho  angaphendula khona. Khumbuza abantwabakho ukuthi kungenzakala bengaqanjwa lanxa bengabe bephakamisile. Lokhu kuzabanceda ukuthi bangadani nxa kuqanjwa abanye.—1 Thim. 6:18. d

18. Kuyini okumele sikunanzelele nxa siphendula? (IZaga 27:2)

¹⁸ Ngamunye wethu angalungiselela izimpendulo ezizakwenza ukuthi uJehova adunyiswe njalo zikhuthaze abafowethu labodadewethu. (Zaga. 25:11) Lanxa kungakubi ukuthi lapha lalaphayana sikhulume ngezinto ezake zenzakala empilweni yethu kumele sinanzelele singacini sesihlala sikhuluma ngathi. (Bala iZaga 27:2; 2 Khor. 10:18) Kumele sizimisele ukukhuluma kakhulu ngoJehova langeLizwi lakhe langabantu bakhe. (Isam. 4:11) Kodwa nxa umbuzo ufuna ukuthi uveze okwenzakala kuwe akukubi ukuthi ukukhulume. Silesibonelo salokhu endimeni elandelayo.

19. (a) Kuzakwenzakalani nxa singaba lendaba lomuntu wonke obuyileyo emihlanganweni? (URoma 1:11, 12) (b) Kuyini wena okukholisayo ngokuphendula emihlanganweni yethu?

¹⁹ Lanxa kungelamithetho eminengi yokuthi singaphendula njani emihlanganweni yethu, sonke kumele sizimisele ukuthi sikhuthaze abanye. Lokho kungatsho ukuthi kumele siphendule kanengi. Kumbe kungatsho ukuthi kumele sisuthiseke ngamathuba amalutshwana esiyabe siwatholile ukuze sinike abanye ithuba lokuthi labo baphendule. Nxa singaqakathekisa okufunwa ngabanye emihlanganweni yethu yebandla sonke ‘sizakhuthazana.’—Bala uRoma 1:11, 12.