ISIFUNDO 19
Singenzani Ukuze Siqhubeke Sikholwa Ukuthi Umhlaba Omutsha Uzakuba Khona?
“Kambe [uJehova] angakhuluma ulutho angalwenzi yini?”—NANI. 23:19.
INGOMA 142 Ukubambelela Ethembeni Esilalo
ESIZAKUFUNDA a
1-2. Kuyini okumele sikwenze sisalindele umhlaba omutsha?
SIYAMBONGA kakhulu uJehova ngoba usithembisa ukuthi uzakhipha umumo lo wezinto abeseletha umhlaba omutsha olokulunga. (2 Phet. 3:13) Lanxa singakwazi ukuthi umhlaba omutsha uzakuba khona nini, kulobufakazi obutshengisa ukuthi sekuseduze ukuthi ube khona.—Mat. 24:32-34, 36; Imiseb. 1:7.
2 Kodwa kumele siqhubeke sikholwa ukuthi esikuthenjiswayo kuzagcwaliseka kungelani lokuthi silesikhathi esinganani singoFakazi. Lokhu kuqakathekile ngoba ukholo lwethu lungaxega. Phela umphostoli uPhawuli wathi ukungabi lokholo ‘yisono esisithandela lula.’ (Heb. 12:1) Kumele siqhubeke sihlola ubufakazi obutshengisa ukuthi sekuseduze ukuthi umhlaba omutsha ube khona ukuze ukholo lwethu luhlale luqinile.—Heb. 11:1.
3. Sizaxoxa ngani esihlokweni lesi?
3 Esihlokweni lesi sizaxoxa ngezinto ezintathu esingazenza ukuze siqhubeke sikholwa ukuthi umhlaba omutsha uzakuba khona. Okokuqala okumele sikwenze yikucabangisisa ngenhlawulo. Okwesibili yikunakana ngamandla kaJehova. Okwesithathu yikwenza izinto ezizasinceda ukuthi sisondele kuJehova. Ngemva kwalokho sizaxoxa ngokuthi amazwi uJehova awatshela uHabakhukhi aluqinisa njani ukholo lwethu namuhla. Asiqaleni ngokuxoxa ngokuthi kuyini okungenzakala okungadinga ukuthi sibe lokholo oluqinileyo lokuthi isithembiso somhlaba omutsha sizagcwaliseka.
KUNGANI KUMELE SIBE LOKHOLO OLUQINILEYO?
4. Yiziphi izinqumo ezidinga ukuthi sibe lokholo oluqinileyo?
4 Nsuku zonke zinengi izinqumo esingazenza ezidinga ukuthi sibe lokholo oluqinileyo. Ngokwesibonelo kulendaba yokukhetha abangane, ezokuzilibazisa, imfundo lomsebenzi. Kanti njalo kungadinga ukuthi senze izinqumo ezimayelana lomtshado labantwana. Kuqakathekile ukuthi sizibuze imibuzo le: ‘Engikukhethayo kuyatshengisa yini ukuthi ngikwazi mhlophe ukuthi umumo lo wezinto uyadlula lokuthi sekuseduze ukuthi uNkulunkulu alethe umhlaba omutsha? Engikukhethayo kuyafanana yini lokwenziwa ngabantu abakholwa ukuthi siphilela elalamuhla kuphela?’ (Mat. 6:19, 20; Luk. 12:16-21) Nxa singaqhubeka sikholwa ukuthi umhlaba omutsha ususeduze sizakwenza izinqumo ezinhle.
5-6. Kungani kumele sibe lokholo oluqinileyo nxa sisebunzimeni? Nika umzekeliso.
5 Okunye okungadinga ukuthi sibe lokholo oluqinileyo yibunzima esingaba phakathi kwabo. Singahlukuluzwa, sihlaselwe ngumkhuhlane omubi kumbe kwenzakale okunye okungasiqeda amandla. Singaqalisa sizimisele sibili ukuqinisela ebunzimeni esiyabe sikubo. Kodwa ubunzima bujayele ukuthatha isikhathi eside. Yikho nxa isikhathi silokhu sitshova kungelalutho olutshintshayo kuyabe sekumele sibe lokholo oluqinileyo ukuze siqinisele njalo siqhubeke sikhonza uJehova sithokoza.—Rom. 12:12; 1 Phet. 1:6, 7.
6 Nxa sisebunzimeni singabona angani umhlaba omutsha awusoze ubuye. Kambe lokho sekusitsho ukuthi ukholo lwethu seluxega? Hatshi. Cabanga ngomzekeliso lo. Nxa kuqanda kakhulu usizwa umqando ukungena emathanjeni ungabona angani akusoze kwafa kwatshisa. Lanxa kunjalo, ukutshisa kuyabe kuzafika loba sekutheni. Lathi nxa sithwele amagabha avuzayo singabona angani umhlaba omutsha awusoze wafa wafika. Kodwa nxa ukholo lwethu luqinile asisoze sithandabuze ngitsho lakancane ukuthi izithembiso zikaNkulunkulu zizagcwaliseka. (Hubo. 94:3, 14, 15; Heb. 6:17-19) Lokhu kuzasinceda ukuthi siqhubeke siqakathekisa ukukhonza uJehova ukwedlula loba yini.
7. Kuyini okumele sikuqaphele?
7 Umsebenzi wokutshumayela lawo uyadinga ukuthi sibe lokholo oluqinileyo. Abantu abanengi babona angathi ‘izindaba ezinhle’ ezimayelana lomhlaba omutsha esiwuthenjiswa nguNkulunkulu yinto engeke yenzakale. (Mat. 24:14; Hez. 33:32) Asifuni ukubalingisela sicine sithandabuza izinto esizifundiswa nguJehova. Yikho kumele siqhubeke siqinisa ukholo lwethu. Ake sixoxe ngezinto ezintathu ezingasinceda ukuthi sikwenze lokho.
CABANGISISA NGENHLAWULO
8-9. Ukucabangisisa ngenhlawulo kuzasinceda njani?
8 Enye indlela esingaqinisa ngayo ukholo lwethu yikucabangisisa ngenhlawulo. Inhlawulo yenza siqiniseke ukuthi izithembiso zikaNkulunkulu zizagcwaliseka. Ukuzinika isikhathi sokucabangisisa ngokuthi kungani kwaba lenhlawulo lokuthi yabhadalwa njani kuyasinceda ukuthi siqhubeke sikholwa ukuthi isithembiso sikaNkulunkulu sempilo engapheliyo emhlabeni omutsha sizagcwaliseka loba sekutheni. Kungani sisitsho njalo?
9 Inhlawulo yabhadalwa njani? UJehova wathuma izibulo lakhe ayelithanda kakhulu ukuthi lisuke ezulwini libuye emhlabeni beselizalwa lingumuntu ongelasono. UJesu wathi esesemhlabeni wahlangana lobunzima obutshiyeneyo. Ngemva kwalokho wahlupheka wasesifa kabuhlungu. UJehova wasihlawulela ngendlela enkulu kakhulu! Kambe ukuthi uNkulunkulu wethu osithandayo wayengavumela ukuthi iNdodana yakhe ihlupheke futhi ife nxa kuyikuthi wayefuna sikholise impilo okwesikhatshana nje kuphela? (Joh. 3:16; 1 Phet. 1:18, 19) Phela uJehova walahlekelwa kakhulu ukuze asihlenge. Yikho uzakuba leqiniso lokuthi siyayithola impilo engapheliyo emhlabeni omutsha.
NAKANA NGAMANDLA KAJEHOVA
10. U-Efesu 3:20 uthi kuyini uJehova enelisa ukukwenza?
10 Indlela yesibili esingaqinisa ngayo ukholo lwethu yikucabangisisa ngamandla kaJehova. Ulawo amandla okugcwalisa konke akuthembisayo. Abantu bangabona angani yinto engeke yenzakale ukuthi baphile kuze kube nini lanini emhlabeni omutsha. Kodwa izikhathi ezinengi izinto esizithenjiswa nguJehova abantu abangeke benelise ukuzenza ngoba phela yena unguSomandla. (Jobe. 42:2; Mak. 10:27) Manje kungamehlula yini ukuthi athembise izinto abantu abangeke benelise ukuzenza?—Bala u-Efesu 3:20.
11. Yiziphi ezinye izinto uJehova azithembisayo ezazikhanya angathi ngeke zenzakale? (Khangela ibhokisi elithi “ Izithembiso Ezagcwalisekayo Ezazikhanya Angathi Ngeke Zigcwaliseke.”)
11 Akucabange ngezinye izinto uJehova azithembisa abantu bakhe endulo ezazikhanya angathi ngeke zenzakale. Wathembisa u-Abrahama loSara ukuthi babezakuba lendodana lanxa basebegugile. (Gen. 17:15-17) Waphinda watshela u-Abrahama ukuthi izizukulwane zakhe zazizaphiwa ilizwe leKhenani. Kwakungakhanya angani isithembiso leso ngeke sigcwaliseke njengoba abako-Israyeli ababeyizizukulwane zika-Abrahama basebeleminyaka leminyaka beyizigqili eGibhithe. Kodwa sacina sigcwalisekile. Ngokuhamba kwesikhathi, uJehova watshela u-Elizabethi ukuthi uzakuba lomntwana lanxa wayeseluphele. Waphinda watshela uMariya owayeyintombi egcweleyo ukuthi wayezakuba lendodana. Lokhu kwakugcwalisa isithembiso uJehova ayesenze kudaladala ensimini yase-Edeni.—Gen. 3:15.
12. Sifundani kuJoshuwa 23:14 lo-Isaya 55:10, 11?
12 Ukucabanga ngezithembiso uNkulunkulu azenzileyo lokuthi uzigcwalise njani kusenza sikholwe sibili ukuthi ulamandla okuletha umhlaba omutsha. (Bala uJoshuwa 23:14; u-Isaya 55:10, 11.) Lokhu kwenza senelise ukuncedisa abanye bangathandabuzi ukuthi umhlaba omutsha esiwuthenjiswayo awusilophupho nje kumbe into engeke yenzakale. UJehova wathi ekhuluma ngamazulu amatsha lomhlaba omutsha wathi: “Amazwi la athembekile futhi aliqiniso.”—Isam. 21:1, 5.
YENZA IZINTO EZIKUSONDEZA KUJEHOVA
IMIHLANGANO YEBANDLA
Ukuya emihlanganweni yebandla kungaluqinisa njani ukholo lwakho? (Khangela indima 13)
13. Imihlangano yebandla ingaluqinisa njani ukholo lwethu? Chasisa.
13 Indlela yesithathu esingaqinisa ngayo ukholo lwethu yikuzinika isikhathi sokwenza izinto ezisisondeza kuJehova. Imihlangano yethu yebandla iyasinceda kakhulu. Ngokwesibonelo u-Anna b oseleminyaka eminengi esenza imisebenzi etshiyeneyo enkonzweni yesikhathi sonke uthi: “Imihlangano iyaluqinisa ukholo lwami. Lanxa umuntu oyabe esenza inkulumo engayisiyo ngcitshi ekufundiseni kumbe kungelalutho olutsha alukhulumayo, izikhathi ezinengi engikuzwayo kuyanginceda ukuthi ngizwisise kuhle iqiniso eliseBhayibhilini besekuqinisa ukholo lwami.” Okunye okuqinisa ukholo lwethu zimpendulo zabafowethu labodadewethu.—Rom. 1:11, 12; 10:17.
UKUTSHUMAYELA
Ukutshumayela kungaluqinisa njani ukholo lwakho? (Khangela indima 14)
14. Ukutshumayela kuluqinisa njani ukholo lwethu?
14 Okunye okuqinisa ukholo lwethu yikutshumayela. (Heb. 10:23) UBarbara oseleminyaka edlula 70 ekhonza uJehova uthi: “Ukutshumayela kuyaluqinisa ukholo lwami. Nxa ngilokhu ngitshela abanye ngezithembiso zikaJehova ezimangalisayo ukholo lwami luyabe lulokhu luqina ngamandla.”
UKUTADITSHA
Ukutaditsha uwedwa kungaluqinisa njani ukholo lwakho? (Khangela indima 15)
15. Ukutaditsha kuluqinisa njani ukholo lwethu? (Khangela lemifanekiso.)
15 Ukuzinika isikhathi sokutaditsha lakho kuyasinceda ukuthi siqinise ukholo lwethu. Udadewethu okuthiwa nguSusan uncedwa yikuhlela ukuthi abe lesikhathi sokutaditsha. Uthi: “NgeSonto ngilungiselela isifundo se-Nqabayokulinda yeviki elandelayo. NgoMvulo langoLwesibili ngilungiselela umhlangano waphakathi kweviki. Kwamanye amalanga aseleyo ngiyataditsha okunye engiyabe ngifuna ukuba kwazi.” USusan uqhubeka eqinisa ukholo lwakhe ngoba ulohlelo lokutaditsha alulandelayo. U-Irene oseleminyaka eminengi esebenza emawofisini ethu amakhulu uthi ukutaditsha iziphrofetho eziseBhayibhilini kuyaluqinisa ukholo lwakhe. Uthi: “Kuyangimangalisa ukuthi konke okwakhulunywa nguJehova kuyagcwaliseka, ngitsho lokuncane kwakhona.” c
‘KUZAGCWALISEKA LOBA SEKUTHENI’
16. Amazwi uJehova awatshela uHabakhukhi ayasinceda yini lamuhla? Chasisa. (UHebheru 10:36, 37)
16 Ezinye izinceku zikaJehova sezilesikhathi eside zilindele ukuphela komumo lo wezinto. Ngokubona kwabantu, isithembiso sikaNkulunkulu singakhanya siphuza ukugcwaliseka. Kodwa kulamazwi aqinisayo uJehova awatshela umphrofethi uHabakhukhi athi: “Umbono uzagcwaliseka ngesikhathi sawo esibekiweyo, njalo lesosikhathi silokhu sisondela ngokuphangisa, sizafika loba sekutheni. Lanxa singaphuza, hlala usilindele! Ngoba umbono uzagcwaliseka loba sekutheni. Kawusoze uphuze!” (Hab. 2:3) UNkulunkulu wakhuluma amazwi la ukuze ancede uHabakhukhi kuphela yini? Kambe ukuthi ayasinceda yini lathi lamuhla? Umphostoli uPhawuli waphefumulelwa ukuthi atshele amaKhristu alindele umhlaba omutsha amazwi ayetshelwe uHabakhukhi. (Bala uHebheru 10:36, 37.) Lanxa kungakhanya angathi izithembiso zikaNkulunkulu ziyaphuza singaba leqiniso lokuthi ‘zizagcwaliseka loba sekutheni. Kazisoze ziphuze!’
17. Omunye udadewethu wawasebenzisa njani amazwi uJehova awatshela uHabakhukhi?
17 Izinceku zikaJehova ezinengi sezileminyaka leminyaka zilandela amazwi la awakhulumayo athi, “Hlala usilindele!” Ngokwesibonelo uLouise owaqalisa ukukhonza uJehova ngo-1939 uthi: “Ngalesosikhathi ngangicabanga ukuthi i-Amagedoni izafika ngingakaqedi isikolo. Kodwa lokhu akuzange kwenzakale. Eminyakeni yonke le bengikubona kunceda ukubala ngabantu okukhulunywa ngabo eBhayibhilini abalindela umvuzo wabo ovela kuJehova abanjengoNowa, u-Abrahama, uJosefa labanye okwakumele balinde isikhathi eside bengakawutholi. Ukuhlala ngilindile sekuncede mina labanye sangathandabuzi ukuthi sekuseduze ukuthi umhlaba omutsha ufike.” Labanye asebelesikhathi eside bekhonza uJehova bangavumelana loLouise.
18. Ukubuka izinto ezidaliweyo kungasinceda njani ukuthi singathandabuzi ukuthi umhlaba omutsha uzakuba khona?
18 Umhlaba omutsha awukafiki sibili. Kodwa kulezinye izinto ezikhona khathesi ezazingekho kuqala ngokwesibonelo izinkanyezi, izihlahla, izinyamazana kanye labantu. Akulamuntu ongathandabuza ukuthi izinto lezi zikhona lanxa kwakulesikhathi ezazingekho khona. Zikhona ngenxa nje yokuthi uJehova wazidala. (Gen. 1:1, 26, 27) UNkulunkulu wethu usithembisa lokuthi uzaletha umhlaba omutsha futhi uzasigcwalisa lesosithembiso. Emhlabeni omutsha abantu bazakholisa impilo engapheliyo beqine saka. Ngesikhathi sikaNkulunkulu asibekileyo, umhlaba omutsha uzakuba khona njengoba nje ezinye izinto wazidala zaba khona.—Isaya. 65:17; Isam. 21:3, 4.
19. Ungenzani ukuze uqinise ukholo lwakho?
19 Okwakhathesi yenza konke ongakwenza ukuze uqinise ukholo lwakho. Hlala umbonga uJehova ngenxa yenhlawulo. Nakana ngamandla kaJehova. Hlala usenza izinto ezikusondeza kuNkulunkulu. Ungenza njalo, uzaba phakathi kwalabo “abathola ilifa lezithembiso ngokuba lokholo langokubekezela.”—Heb. 6:11, 12; Rom. 5:5.
INGOMA 139 Zibone Lapho Konke Sekukutsha
a Abantu abanengi abasikholwa isithembiso esiseBhayibhilini sokuthi kuzakuba lomhlaba omutsha. Bacabanga ukuthi liphupho nje, inganekwane kumbe into engeke yenzakale. Kodwa thina asithandabuzi ukuthi konke esikuthenjiswa nguJehova kuzagcwaliseka. Lanxa kunjalo kumele siqhubeke siqinisa ukholo lwethu ukuze singacini sesithandabuza. Singakwenza njani lokhu? Sizaxoxa ngakho esihlokweni lesi.
b Amanye amabizo atshintshiwe.
c Izihloko ezinengi ezikhuluma ngeziphrofetho eziseBhayibhilini zitholakala eBhukwini Lokuchwayisisa LaboFakazi BakaJehova ngaphansi kwesihloko esithi “Isiphrofetho.” Ngokwesibonelo khangela isihloko esithi “Ngubani Ongakhuluma Iqiniso Ngekusasa” esiku-Nqabayokulinda kaMay 1, 2014.
