1. Kuyini esingakuthandabuziyo?

 SINGABANTU bakaJehova futhi siyakwazi ukuthi uyasithanda lokuthi ufuna sikholise impilo. (Rom. 8:35-39) Asithandabuzi lokuthi ukwenza lokho okutshiwo liBhayibhili kuhlala kusinceda. (Isaya. 48:17, 18) Manje singenzani nxa singehlelwa zinhlupho ebesingazilindelanga?

2. Yiziphi inhlupho ezingasehlela futhi singazibuza yiphi imibuzo?

² Akulamuzi ongathunqi ntuthu, bonke abantu bakaJehova behlelwa zinhlupho ezitshiyeneyo. Ngokwesibonelo, omunye emulini angenza into engasidanisa. Singabe singenelisi ukwenzela uJehova okunengi ngenxa yokuthi siyagula. Singehlelwa ngumonakalo ongasitshiya sigula kumbe singaselalutho. Kumbe singahlukuluzwa ngenxa yokuthi sikhonza uJehova. Nxa singehlelwa yizinto ezinjalo singacina sizibuza imibuzo le: ‘Kungani lokhu kwehlele mina? Kambe ukuthi kulento embi engiyenzileyo? Kambe ukuthi uJehova usengitshiyile yini?’ Wake wazibuza imibuzo enjalo yini? Nxa wake wazibuza imibuzo leyo ungapheli amandla. Zinengi kakhulu inceku zikaJehova ezithembekileyo ezake zazizwa njalo.—Hubo. 22:1, 2; Hab. 1:2, 3.

3. Sifundani kuHubo 34:19?

³ Bala iHubo 34:19. Nanzelela imicijo emibili esevesini le. Owokuqala, abantu abalungileyo labo behlelwa zinhlupho. Owesibili, uJehova uyasincedisa nxa sisehlelwa zinhlupho. Usincedisa njani? Ngokusifundisa ukuthi sibone izinto zinjengoba  nje zinjalo. Siyakwazi sibili ukuthi ukukhonza uJehova kwenza sithokoze kodwa kasithembisi ukuthi impilo izahlala itshelela. (Isaya. 66:14) UJehova usikhuthaza ukuthi sicabange ngempilo enhle futhi engapheliyo asithembise yona emhlabeni omutsha. (2 Khor. 4:16-18) Kodwa okwakhathesi usikhuthaza ukuthi siqhubeke simkhonza sithembekile.—Izili. 3:22-24.

4. Sizaxoxa ngani esihlokweni lesi?

⁴ Khathesi asixoxeni ngokuthi sifundani ezincekwini zikaJehova ezithembekileyo okukhulunywa ngazo eBhayibhilini. Sizaphinda sixoxe ngezinye izinceku zikaJehova zangesikhathi sethu. Sizabona ukuthi leyethu impilo ingaphonguthi phendu. Kodwa nxa simthemba uJehova kasoze asilahlise. (Hubo. 55:22) Ngesikhathi sixoxa ngabantu laba zibuze ukuthi: ‘Aluba kwakuyimi ngangizakwenza njani? Okwenzakala ebantwini laba kunginceda njani ukuthi ngiqhubeke ngimthemba uJehova? Ngingabalingisela njani abantu laba?’

5. Yiziphi inhlupho uJakhobe ahlangana lazo? (Khangela umfanekiso ongaphandle.)

⁵ Banengi abantu okukhulunywa ngabo eBhayibhilini abahlangana lenhlupho ababengazilindelanga. Ake sixoxe ngoJakhobe. Uyise wamtshela ukuthi aye kuLabhani ukuze athathe omunye wamadodakazi akhe. Phela uLabhani wayekhonza uJehova. UJakhobe wakwenza lokhu futhi wayengathandabuzi ukuthi uJehova wayezambusisa. (Gen. 28:1-4) UJakhobe waya eKhenani emzini kaLabhani owayelamadodakazi amabili uLeya loRasheli. UJakhobe wabona indodakazi encane kaLabhani uRasheli, yamthatha umoya, wasevuma ukuthi asebenzele uyise okweminyaka eyisikhombisa ukuze amthathe abe ngumkakhe. (Gen. 29:18) Kodwa akusahambanga ngendlela uJakhobe ayeyikhangelele. ULabhani waqila uJakhobe ngokumnika indodakazi yakhe endala uLeya. ULabhani watshela uJakhobe ukuthi nxa wayefuna uRasheli kwakuzamele asebenze eminye iminyaka eyisikhombisa, wasemnika uRasheli ngemva kweviki eyodwa. (Gen. 29:25-27) ULabhani waphinda waqila uJakhobe lasendabeni zebhizimusi. Wamqila okweminyaka engu-20!—Gen. 31:41, 42.

6. Yiziphi ezinye inhlupho uJakhobe ahlangana lazo?

⁶ Kulezinye futhi inhlupho uJakhobe ayelazo. Wayelemuli enkulu futhi amadodana akhe ayehlala ehluphana. Bathengisa lomfowabo uJosefa ukuthi ayekuba yisigqili. Amadodana akhe uSimiyoni loLevi enza ihlazo elenza imuli yabo yathwala nzima futhi bangcolisa lebizo likaJehova. Esathi ukubonile lokhu waphinda wafelwa ngumkakhe ayemthanda kakhulu uRasheli ngesikhathi ebeletha indodana yabo yesibili. Kanti njalo, lanxa uJakhobe wayeselixhegu kwasekumele athuthele eGibhithe ngenxa yokuthi indlala yayisibhahile eKhenani.—Gen. 34:30; 35:16-19; 37:28; 45:9-11, 28.

7. UJehova watshengisa njani ukuthi wayelokhu emthanda uJakhobe?

⁷ Lanxa uJakhobe wehlelwa zinhlupho zonke lezi wayelokhe emthemba uJehova futhi ekholwa ukuthi uzazigcwalisa izithembiso zakhe. UJehova watshengisa ukuthi wayelokhu emthanda uJakhobe. Ngokwesibonelo, lanxa uLabhani wayemqila, uJehova waqhubeka embusisa. Akucabange ukuthi uJakhobe wambonga njani uJehova ngesikhathi ephinda ebona uJosefa indodana yakhe ayesecabanga ukuthi kudala yafa! Okwanceda uJakhobe ukuthi aphumelele ukulwisana lezilingo zonke lezi yikuthi wayelobungane  obuqinileyo loJehova. (Gen. 30:43; 32:9, 10; 46:28-30) Nxa lathi singahlala singabangane bakaJehova sizaphumelela ukulwisana lenhlupho ezisehlela singalindelanga.

8. INkosi uDavida yayifuna ukwenzani?

⁸ INkosi uDavida kayizange yenze konke eyayifisa ukukwenzela uJehova. Ngokwesibonelo, uDavida wayekufuna ngenhliziyo yonke ukwakhela uNkulunkulu wakhe ithempeli. Yikho watshela umphrofethi uNathani lokho ayefisa ukukwenza. UNathani wasemphendula wathi: “Yenza loba yini esenhliziyweni yakho ngoba uNkulunkulu weqiniso ulawe.” (1 Imilan. 17:1, 2) Ubona angathi uDavida wezwa njani esizwa amazwi la? Mhlawumbe wahle waqalisa ukulungiselela umsebenzi lo omkhulu owawuphambi kwakhe.

9. UDavida wenzani lapho etshelwa ukuthi ayisuye owayezakwakha ithempeli?

⁹ Kungakayi ngaphi umphrofethi kaJehova wabuyela kuDavida elendaba ezidanisayo. “Ngalobobusuku” uJehova watshela uNathani ukuthi uDavida kayisuye owayezamakhela ithempeli kodwa lalizakwakhiwa ngomunye wamadodana akhe. (1 Imilan. 17:3, 4, 11, 12) Kwamphatha njani uDavida lokhu? Kazange akhalale kodwa wahle waqalisa ukuqoqa izimali kanye lezinto ezazizasetshenziswa yindodana yakhe uSolomoni ekwakheni ithempeli.—1 Imilan. 29:1-5.

10. UJehova wambusisa njani uDavida?

¹⁰ UDavida wathi esanda kutshelwa ukuthi kayisuye owayezakwakha ithempeli, uJehova wenza laye isivumelwano. Wamthembisa ukuthi omunye wosendo lwakhe wayezabusa kuze kube nini lanini. (2 Sam. 7:16) Akucabange ukuthi uDavida uzathokoza njani emhlabeni omutsha ngesikhathi sokubusa kukaJesu kweminyaka eyinkulungwane esesizwa ukuthi iNkosi le yavela kusendo lwakhe! Indaba le isinceda sibone ukuthi lanxa singeke senelise ukwenza konke ebesingabe sifisa ukukwenzela uJehova, yena angasibusisa ngendlela ebesingayikhangelelanga.

11. UJehova wawabusisa njani amaKhristu okuqala lanxa uMbuso ungazange ufike ngesikhathi ababekhangelele ngaso? (ImiSebenzi 6:7)

¹¹ AmaKhristu okuqala lawo ahlangana lenhlupho ayengazilindelanga. Ngokwesibonelo, ayekulindele ngabomvu ukufika koMbuso kaNkulunkulu kodwa engakwazi ukuthi uzafika nini. (Imiseb. 1:6, 7) Manje enzani? Kawazange athwale imikhono ekhanda kodwa aqhubeka etshumayela. Azibonela ukuthi uJehova wayekubusisa konke ayekwenza ngoba izindaba ezinhle zaqhubeka zisabalala.—Bala imiSebenzi 6:7.

12. AmaKhristu okuqala enzani ngesikhathi sendlala?

¹² Kulesikhathi lapho okwake kwaba khona lendlala enkulu “emhlabeni wonke.” (Imiseb. 11:28) Indlala le yahlasela lamaKhristu okuqala. Kumele ukuthi kwakunzima kakhulu sibili. Abazali bangabe babekhathazeka ngokuthi bazazondla ngani izimuli zabo. Pho kwabaphatha njani lokhu abasakhulayo ababecabanga ukwenza okunengi emsebenzini wokutshumayela? Mhlawumbe basuka bacabanga ukuthi bake bame indlala ize idlule. Kodwa amaKhristu la avumelana lezimo, aqhubeka esenza akwenelisayo emsebenzini wokutshumayela futhi ayesabelana izinto ayelazo labazalwane abaseJudiya.—Imiseb. 11:29, 30.

13. Yiziphi izibusiso ezatholwa ngamaKhristu ngesikhathi sendlala?

¹³ Yiziphi izibusiso ezatholwa ngamaKhristu ngesikhathi sendlala? Azibonela ukuthi uJehova wayewasekela ngoba athola uncedo. (Mat. 6:31-33) Kumele ukuthi abathanda kakhulu abazalwane laba ababewancedisile. Kanti njalo labo abawancedisa ngezinto ezitshiyeneyo bathokoza ngoba babesipha abanye.  (Imiseb. 20:35) UJehova wababusisa bonke ngenxa yokuthi bavumelana lezimo.

14. Kuyini okwenzakala kuBhanabha lomphostoli uPhawuli futhi uJehova wababusisa njani? (ImiSebenzi 14:21, 22)

¹⁴ AmaKhristu okuqala ayeke ahlukuluzwe engalindelanga. Akucabange ngokwenzakala kuBhanabha lomphostoli uPhawuli ngesikhathi betshumayela eListra. Abantu beListra babeqale babemukela kuhle futhi babalalela ngesikhathi bebatshumayeza. Kodwa abanye ‘bayenga abantu’ njalo abanye abantu ababesexukwini lelo bakhanda uPhawuli ngamatshe baze bamtshiya becabanga ukuthi usefile. (Imiseb. 14:19) Kodwa uBhanabha loPhawuli basuka bayatshumayela kweyinye indawo. UJehova wababusisa yini? Ye, ngoba benza ‘abafundi abanengana’ basebeqinisa abanye ngababekutsho lababekwenza. (Bala imiSebenzi 14:21, 22.) Abanengi kwabaqinisa kakhulu ukubona uBhanabha loPhawuli bengakhalali lanxa babehlukuluzwa. Lathi uJehova uzasibusisa nxa singaqhubeka sisenza umsebenzi asiphe wona.

15. Ufundani kumfowethu u-A. H. Macmillan?

¹⁵ Kulezinto abantu bakaJehova ababekhangelele ukuthi zizakwenzakala kungakafiki u-1914. Ake sixoxe ngomunye umfowethu okuthiwa ngu-A. H. Macmillan. Umfowethu lo wayecabanga njengabanye ngalesosikhathi ababesithi sekuseduze ukuthi baphiwe umvuzo wabo wokuya ezulwini. Wathi esenza inkulumo yakhe ngoSeptember 1914 wathi: “Kungenzeka ukuthi le yinkulumo yami yokucina.” Kodwa le ayizange ibe yinkulumo yakhe yokucina. Umfowethu uMacmillan wabhala wathi: “Abanye bethu besikhuthe ugatsha sizitshela ukuthi sesizahamba ezulwini.” Waphinda wathi: “Osekumele sikwenze yikuqhubeka sisebenza nzima emsebenzini weNkosi.” Lakanye umfowethu uMacmillan waqhubeka etshiseka. Wayekhuthele emsebenzini wokutshumayela. Wakhuthaza abazalwane abanengi ababebotshiwe ngenxa yokwala ukungena esisotsheni. Waqhubeka engena yonke imihlangano yebandla lalapho eseluphele. Kwamnceda ngani umfowethu uMacmillan ukusebenzisa kuhle isikhathi sakhe esalindele umvuzo wakhe? Nanka amazwi awakhulumayo ngo-1966 engakafi: “Ukholo lwami lulokhu luqinile lanamuhla.” Kwangathi sonke singalingisela okuhle okwenziwa ngumfowethu uMacmillan ikakhulu nxa sesilesikhathi eside sibekezelela uhlupho esiphakathi kwalo.—Heb. 13:7.

16. Yibuphi ubunzima obehlela umfowethu uHerbert Jennings lomkakhe bengalindelanga? (UJakhobe 4:14)

¹⁶ Sebebanengi abantu bakaJehova abahlaselwe yimikhuhlane bengalindelanga. Ngokwesibonelo umfowethu uHerbert Jennings b wakhuluma ngokuthi yena lomkakhe babewukholisa umsebenzi wabo wokuba ngabanali eGhana. Kodwa ngokuhamba kwesikhathi wabanjwa umkhuhlane owawumthwalise nzima. Umfowethu uJennings wathi ekhuluma ngomkhuhlane lo wacupha amazwi akuJakhobe 4:14 akhuluma ‘ngekusasa’ echaza ukuthi umkhuhlane lo babengawulindelanga. (Bala.) Wabhala wathi: “Sabona ukuthi sasingaselanto esingayenza. Kwasekumele sisuke eGhana sitshiye labangane bethu abanengi sibuyele eCanada [ukuze ngiyekwelatshwa].” UJehova wanceda umfowethu uJennings lomkakhe ukuthi baqhubeke bemkhonza bethembekile lanxa behlelwa yibunzima.

17. Okwenziwa ngumfowethu uJennings kwabanceda njani abanye?

 ¹⁷ Indaba yokuphila kamfowethu uJennings incede abantu abanengi. Omunye udadewethu wathi: ‘Indaba kamfowethu uJennings yangithinta kakhulu. Ukwazi ukuthi umfowethu uJennings wacina etshiya umsebenzi wakhe wenkonzo ngenxa yokugula kwanginceda ukuthi ngingakhathazeki kakhulu ngohlupho lwami.’ Omunye umfowethu yena wathi: ‘Ngaba ngumdala webandla okweminyaka elitshumi kodwa ngacina ngiyekela umsebenzi wami lo ngoba ngasengigula ingqondo. Ngazitshela ukuthi okwami sekuphelile futhi ngakhathazeka kakhulu. Ngasengisehluleka lokubala indaba zokuphila. Kodwa ukubala ngokubekezela kukamfowethu uJennings kwangikhuthaza kakhulu.’ Lokhu kusikhumbuza ukuthi indlela esiqinisela ngayo nxa sisehlelwa zinhlupho esingazilindelanga ingabakhuthaza abanye. Lanxa izinto zingahamba ngendlela ebesingayikhangelelanga, singanceda abanye ukuthi babe lokholo oluqinileyo futhi baqhubeke beqinisela.—1 Phet. 5:9.

18. Ufundani kulokho okwenzakala kumfelokazi waseNigeria? (Khangela umfanekiso.)

¹⁸ Imikhuhlane enjengaboCOVID-19 isiyenze impilo yabantu bakaJehova abanengi yaba nzima kakhulu. Ngokwesibonelo omunye umfelokazi waseNigeria wayesesele lokudla okulutshwana kakhulu. Ngelinye ilanga ekuseni indodakazi yakhe yambuza ukuthi bazakudlani njengoba basebesele lokulihetshezana kwerayisi. Udadewethu watshela indodakazi yakhe ukuthi babengaselamali lokuthi ukudla kwabo kwasekuphelile. Wathi kwasekumele balingisele umfelokazi waseZarefathi, bapheke ukudla kwabo kokucina futhi bathembe uJehova ngenhliziyo yonke. (1 Amakho. 17:8-16) Bengakacabangi lakucabanga ukuthi babezakudlani ngalelolanga emini, bathola ukudla okwakuvela kubafowethu labodadewethu. Ukudla lokhu kwakungabathatha isikhathi esedlula amaviki amabili.  Udadewethu lo wathi wayengazange ananzelele ukuthi uJehova wayekuzwile konke ayekutshele indodakazi yakhe. Lokhu kutshengisa ukuthi nxa singathembela kuJehova inhlupho ezisehlela singalindelanga zingenza sisondele kuye.—1 Phet. 5:6, 7.

19. Yiziphi inhlupho ezehlele u-Aleksey Yershov?

¹⁹ Eminyakeni esanda kwedlula abafowethu labodadewethu abanengi bahlukuluzwe ngendlela akade bengayicabangeli. Cabanga ngomunye umfowethu okuthiwa ngu-Aleksey Yershov ohlala eRussia. Abantu bakaJehova eRussia babezikhonzela bekhululekile ngesikhathi umfowethu uYershov ebhabhathizwa ngo-1994. Kodwa ngokuhamba kwesikhathi izinto zatshintsha. Ngo-2020 umfowethu uYershov wangenelwa ngabantu endlini yakhe, baguduza izinto njalo impahla yakhe enengi yathathwa. Ngemva kwezinyanga ezithile wetheswa amacala nguhulumende. Okwaba buhlungu kakhulu yikuthi wayemangalelwe kusetshenziswa amavidiyo ayethethwe ngumuntu owayeselesikhathi esedlula umnyaka ezenza yena ozimiseleyo ukufunda iBhayibhili. Umuntu lo wamthengisa sibili.

20. Umfowethu uYershov wenzeni ukuze aqinise ubungane bakhe loJehova?

²⁰ Ukuhlukuluzwa kukamfowethu uYershov kwamnceda njani? Khathesi usesondele kakhulu kuYise uJehova. Uthi: “Mina lomkami sikhuleka kanengi. Aluba uJehova ubengangincedisi bengingeke ngenelise ukubekezelela inhlupho lezi. Ukutaditsha ngingedwa kuyanginceda ukuthi ngingadani kakhulu. Ngiyazinika isikhathi sokucabangisisa ngezinceku zikaNkulunkulu ezazithembekile. Kulezindaba ezinengi eziseBhayibhilini ezitshengisa ukuthi kuqakathekile ukuthi sihlaliseke futhi sithembe uJehova lanxa siphakathi kwenhlupho.”

21. Sifundeni esihlokweni lesi?

²¹ Sifundeni esihlokweni lesi? Sibonile ukuthi impilo yethu ingaphongutshintsha singakhangelelanga. Lanxa kunjalo, uJehova uhlala ebasekela bonke abamthembayo. Aliqiniso sibili amazwi asembhalweni okusekelwe kuwo isihloko lesi. Athi: “Zinengi inhlupho ezingehlela umuntu olungileyo, kodwa uJehova uyamkhulula kuzo zonke.” (Hubo. 34:19) Kasingavumeli ukuthi inhlupho esihlangana lazo zisiqede amandla kodwa kasiqhubekeni sikhangele kuJehova ukuthi asincedise. Singenza njalo amazwi akhulunywa ngumphostoli uPhawuli azakuba liqiniso lakithi. Athi: “Ngilamandla okwenza zonke izinto ngenxa yalowo ongipha amandla.”—Flp. 4:13.