1. UMatthew watshengisa njani ukuthi uyakholwa ukuthi abafileyo bazavuswa sibili?

 UMFANA okuthiwa nguMatthew ulomkhuhlane omubi owenza ukuthi acine e-opharethwa kanengi. Ngelinye ilanga eseleminyaka eyisikhombisa yena labangakibo babebukele uhlelo lwe-JW Broadcasting^®. Kwakulengoma eyayitshengisa abantu besamukela abantu abavusiweyo. b Kwathi i-JW Broadcasting isiphelile uMatthew walanda abazali bakhe wafika wababamba izandla wasesithi: “Mama lobaba hanti liyabona ukuthi ngingaze ngife ngizaphinda ngivuswe! Lizangamukela hanti?” Ucabanga ukuthi abazali laba bezwa njani bezibonela ukuthi umntanabo uyakholwa sibili ukuthi abantu abafileyo bazavuswa?

2-3. Kungani kukuhle ukuthi sicabangisise ngethemba lokuthi abantu abafileyo bazavuswa?

² Kuhle ukuthi sihlale sicabangisisa ngesithembiso esiseBhayibhilini esokuthi abafileyo bazavuswa. (Joh. 5:28, 29) Kungani kumele senze njalo? Ngoba impilo ingaphongutshintsha sizithole sesigulela ukufa kumbe sifelwe ngumuntu esimthandayo singakhangelelanga. (Umtshu. 9:11; Jak. 4:13, 14) Ithemba lokuthi abantu abafileyo bazavuswa lizasinceda nxa sesehlelwe zinhlupho ezinjalo. (1 Thes. 4:13) IMibhalo isenza singathandabuzi ukuthi uBaba wethu osezulwini usazi mhlophe lokuthi uyasithanda kakhulukazi. (Luk. 12:7) Phela uJehova uNkulunkulu wethu kuyabe kumele abekwazi konke ngathi ukuze aphinde asivuse silobuntu esasilabo futhi sikhumbula izinto ezake zenzakala kithi. UJehova usinike ithuba lokuthi siphile kuze kube nini lanini futhi lanxa singafa uzasivusa. Konke lokhu kutshengisa ukuthi uyasithanda kakhulu!

³ Esihlokweni lesi sizaqala ngokuxoxa ngokuthi kuyini okwenza sikholwe sibili ukuthi abafileyo bazavuswa. Ngemva kwalokho sizaxoxa ngendaba eqinisa ukholo etholakala eBhayibhilini. Yikho okuthethwe khona amazwi esihloko lesi athi: “Umfowenu uzavuka.” (Joh. 11:23) Sizaphetha ngokuxoxa ngokuthi singenzani ukuze singathandabuzi ukuthi abantu abafileyo bazavuswa.

4. Kuyini okungasinceda sikholwe esikuthenjiswayo? Nika umzekeliso.

⁴ Ake sithi indlu yakho idilizwe yisiphepho esilamandla. Umngane wakho abesekuthembisa ukuthi uzakuncedisa ukuyakha. Kaqambi manga njalo awuthandabuzi ukuthi uyafuna sibili ukukuncedisa. Nxa engumakhi oyingcitshi futhi elawo amathuluzi uyabukwazi ukuthi uyenelisa ukuwenza umsebenzi lo njalo uyahle uthembe ukuthi uzakwenza lokho akuthembisileyo. Yikho okungenza sikholwe esiyabe sikuthenjisiwe yikuba leqiniso lokuthi lowo muntu uyafuna sibili lokuthi ulamandla okuthi agcwalise lokho ayabe ekuthembisile. Thina singasikholwa yini isithembiso sikaNkulunkulu sokuthi abafileyo bazavuswa? UNkulunkulu uyafuna yini ukukwenza lokho futhi ulawo yini amandla akhona?

5-6. Kuyini okwenza singathandabuzi ukuthi uJehova uyafuna ukuvusa abafileyo?

⁵ UJehova uyafuna yini ukuvusa abafileyo? Asithandabuzi ukuthi uyafuna sibili ngoba waphefumulela abalobi beBhayibhili abanengi ukuthi babhale ngesithembiso sokuthi abafileyo bazavuswa. (Isaya. 26:19; Hos. 13:14; Isam. 20:11-13) Kanti njalo uJehova kayekeli ukugcwalisa loba yini ayithembisileyo. (Josh. 23:14) Ukulindele ngabomvu ukuvusa abafileyo. Kungani sisitsho njalo?

⁶ Akucabange ngamazwi kaJobe. UJobe wayeleqiniso lokuthi lanxa wayengafa uJehova wayefuna kumbe efisa sibili ukumbona futhi. (Job. 14:14, 15) UJehova uyafuna sibili ukuphinda abone abangane bakhe abafayo. Uzimisele ukubavusa beqine saka futhi bethokoza. Manje kuzakwenzakalani ngamabhiliyoni abantu afa engatholanga ithuba lokufunda iqiniso ngoJehova? UNkulunkulu wethu olothando uyafuna ukubavusa. (Imiseb. 24:15) Ufuna bathole ithuba lokuba ngabangane bakhe besebephila phakade emhlabeni. (Joh. 3:16) Kuyakhanya-ke ukuthi uJehova uyafuna sibili ukubavusa abafileyo.

7-8. Kuyini okungenza singathandabuzi ukuthi uJehova ulawo amandla okuvusa abafileyo?

⁷ UJehova ulawo yini amandla okuvusa abantu abafileyo? Ye ulawo sibili! Phela ‘unguSomandla.’ (Isam. 1:8) Lokhu kutsho ukuthi ulamandla okunqoba loba yisiphi isitha, ngitsho lokufa. (1 Khor. 15:26) Ukwazi lokho kuyasiqinisa futhi kuyasiduduza. Ake sixoxe ngokwenzakala kudadewethu okuthiwa ngu-Emma Arnold. Ngesikhathi seMpi Yomhlaba Yesibili yena lemuli yangakibo behlelwa yibunzima obukhulu obabunganyikinya ukholo lwabo. Bathi sebefelwe yizihlobo zabo enkambeni yokuhlutshwa yamaNazi, u-Emma waduduza indodakazi yakhe esithi: “Nxa kuyikuthi abantu abafileyo abasoze baphinde baphile kutsho ukuthi ukufa bekuyabe kulamandla ukwedlula uNkulunkulu kodwa akunjalo.” Vele akulalutho olulamandla ukwedlula uJehova! UNkulunkulu uSomandla owadala abantu ulawo amandla okuvusa abantu abafileyo baphinde baphile.

⁸ Okunye okwenza sikholwe ukuthi uNkulunkulu uyenelisa ukubavusa abafileyo yikuthi ingqondo yakhe ibanzi, uyenelisa ukukhumbula yonke into. Ubiza inkanyezi ngayinye ngebizo layo. (Isaya. 40:26) Ngakho uyabakhumbula bonke abantu abafayo. (Job. 14:13; Luk. 20:37, 38) Akumthwalisi nzima ukukhumbula konke okumayelana labantu azabavusa ngoba ukwazi konke ngabo. Uyakwazi ukuthi babenjani,  uyabazi ubuntu babo, lokwenzakala ezimpilweni zabo kanye lakho konke okwakusezingqondweni zabo.

9. Kuyini okwenza ukholwe ukuthi uJehova uzabavusa abafileyo?

⁹ Kulengqondo ukukholwa ukuthi uJehova uzabavusa abantu abafileyo ngoba ulesifiso sokubavusa futhi ulawo amandla okukwenza. Esinye isizatho esenza sikukholwe ukuthi uNkulunkulu uzabavusa abantu abafileyo yikuthi sewake wakwenza lokho. Wake wanika amanye amadoda ayethembekile amandla okuthi avuse abantu abafileyo. Omunye wabo kwakunguJesu. Asihloleni indaba ekuJohane isahluko 11 eyomuntu owavuswa nguJesu.

10. Kwenzakalani eBhethani ngesikhathi uJesu etshumayela ngaphetsheya kukaJodani futhi uJesu wenzani? (UJohane 11:1-3)

¹⁰ Bala uJohane 11:1-3. Akuzicabange useBhethani umnyaka ka-32 C.E., ususiyaphela. Yikho okuhlala khona abangane bakaJesu abathathu, uLazaro labodadewabo ababili uMatha loMariya. (Luk. 10:38-42) Kodwa uLazaro usuka agule, futhi odadewabo bakhathazekile. Bathumela ilizwi kuJesu ongaphetsheya komfula uJodani futhi uhambo lwakhona lungathatha amalanga angaba mabili. (Joh. 10:40) Kodwa kuyadanisa ukuthi umbiko wokugula kukaLazaro ufika kuJesu uLazaro esefile. Lanxa uJesu ekwazi ukuthi umngane wakhe usefile uqeda amanye amalanga amabili engakayi eBhethani. UJesu ufika eBhethani sekulamalanga amane uLazaro efile. Kulento uJesu afuna ukuyenza ezanceda abangane bakhe futhi ikhazimulise uNkulunkulu.—Joh. 11:4, 6, 11, 17.

11. Indaba le isifundisani ngokuba ngabangane beqiniso?

¹¹ Kukhona esingakufunda endabeni le ngokuba ngabangane beqiniso. Nanzelela ukuthi ngesikhathi uMariya loMatha bethumela ilizwi kuJesu kabazange bamcele ukuthi abuye eBhethani. Ababekufuna yikutshela uJesu ukuthi umngane wakhe uyagula. (Joh. 11:3) Phela ngesikhathi uLazaro esefile uJesu wayengamvusa engazange aye eBhethani. Kodwa wakhetha ukuthi aye eBhethani ukuze abe labangane bakhe uMariya loMatha. Wena ulaye yini umngane ozimisele ukukunceda ungazange umcele? Nxa ulaye umngane onjalo ungamthemba “ngezikhathi zobunzima.” (Zaga. 17:17) Lathi asilingiseleni uJesu sibe ngabangane abanceda abanye. Asibuyeleni eBhethani sibone ukuthi kwenzakalani.

12. UJesu umthembisani uMatha futhi kuyini okungenza akukholwe lokho amthembisa khona? (UJohane 11:23-26)

¹² Bala uJohane 11:23-26. UMatha wathi esizwa ukuthi uJesu useduze leBhethani wahle waphuma wayamhlangabeza. Wafika wathi kuye: “Nkosi, aluba ubukhona ngabe umfowethu kafanga.” (Joh. 11:21) UJesu ubengamelapha sibili uLazaro. Kodwa kulokunye okumangalisayo uJesu afuna ukukwenza. Uthembisa uMatha athi: “Umfowenu uzavuka.” Kodwa uJesu kapheleli lapho, uphinda amtshele amazwi azamenza akholwe isithembiso asanda kumtshela  sona. Uthi: “Ngiyikuvuka kwabafileyo lokuphila.” UNkulunkulu umnike amandla okuvusa abantu abafileyo. UJesu wayeke wavusa inkazana encane eyayisanda kufa. Wake wavusa lelinye ijaha njalo kukhanya walivusa ngelanga elalife ngalo. (Luk. 7:11-15; 8:49-55) Kodwa wayengamvusa yini umuntu owayeselamalanga amane efile futhi lomzimba wakhe usuqalisile ukubola?

13. UJohane 11:32-35 uthi uJesu wenzani ngesikhathi ebona uMariya labanye bekhala? (Khangela lomfanekiso.)

¹³ Bala uJohane 11:32-35. Kubone ngelihlo lengqondo okulandelayo. Khathesi kuphuma uMariya omunye udadewabo kaLazaro esiyahlangabeza uJesu. Laye uphinda amazwi akhulunywe ngudadewabo athi: “Nkosi, aluba ubulapha ngabe umfowethu kafanga.” Yena lalabo ahamba labo badabukile. UJesu uthi ebabona bekhala, azwe ubuhlungu. UJesu uyabazwela abangane bakhe laye acine esekhala. Uyazwisisa sibili ukuthi ukufelwa ngumuntu omthandayo kubuhlungu kakhulu. Ngakho sekumphuzele ukuthi aqede lokho okwenza bakhale!

14. Okwenziwa nguJesu ngesikhathi ebona uMariya ekhala kusifundisani ngoJehova?

¹⁴ Lokho okwenziwa nguJesu ngesikhathi ebona uMariya ekhala kusifundisa ukuthi uJehova nguNkulunkulu olozwelo olukhulu. Kungani sisitsho njalo? Njengoba sifundile esihlokweni esidlulileyo, indlela uJesu acabanga ngayo lenza ngayo iyafanana lekaYise. (Joh. 12:45) Yikho nxa sibala ngokuthi uJesu wabazwela kakhulu abangane bakhe ababedanile waze wakhala sifunda ukuthi uJehova laye uyasizwela nxa esibona sikhala ngenxa yobuhlungu esibuzwayo. (Hubo. 56:8) Ukwazi lokhu kwenza sifune ukusondela kakhulu kuNkulunkulu wethu olozwelo.

15. UJohane 11:41-44 uthi kuyini okwenzakalayo ethuneni likaLazaro? (Khangela lomfanekiso.)

¹⁵ Bala uJohane 11:41-44. UJesu ufika ethuneni likaLazaro abesecela ukuthi ilitshe elivale ithuna lisuswe. Kodwa uMatha uyala esithi kumele ukuthi isidumbu sesilephunga. UJesu umtshela athi: “Angikutshelanga yini ukuthi nxa ukholwa uzabona inkazimulo kaNkulunkulu?” (Joh. 11:39, 40) UJesu ukhangela ezulwini abesethandaza abantu bemlalele. Ufuna abantu badumise uJehova ngalokho asezakwenza.  Ngemva kwalokho uyamemeza athi: “Lazaro, phuma!” Lakanye uLazaro aphume ethuneni! UJesu wenze isimanga abantu abakade bengasicabangeli.—Khangela umcijo wokutaditsha ku-Nguqulo Yomhlaba Omutsha yesiNgisi kuJohane 11:17.

16. Indaba ekuJohane isahluko 11 isinceda njani ukuthi sikukholwe ukuthi abafileyo bazavuswa?

¹⁶ Indaba ekuJohane isahluko 11 yenza singathandabuzi ngitsho lakancane ukuthi abafileyo bazavuswa. Kungani sisitsho njalo? Khumbula ukuthi uJesu wathembisa uMatha wathi: “Umfowenu uzavuka.” (Joh. 11:23) UJesu laye uyafuna sibili ukuvusa abantu abafileyo njengoYise futhi ulawo amandla okukwenza. Ukukhala kukaJesu kusifundisa ukuthi ulesifiso esikhulu sokubavusa lokususa ubuhlungu obuzwiwa ngabantu nxa befelwe. Ukuphuma kukaLazaro ethuneni kwaphinda kwatshengisa ukuthi uJesu ulawo amandla okuvusa abafileyo. Khumbula lokuthi uJesu wathini kuMatha, wathi: “Angikutshelanga yini ukuthi nxa ukholwa uzabona inkazimulo kaNkulunkulu?” (Joh. 11:40) Silazo sibili izizatho zokusikholwa isithembiso sikaNkulunkulu sokuthi uzabavusa abantu abafileyo. Kodwa kuyini okunye esingakwenza ukuze singathandabuzi ukuthi lokhu kuzakwenzakala sibili?

17. Kuyini okumele sikukhumbule nxa sibala izindaba zokuvuswa kwabantu eziseBhayibhilini?

¹⁷ Bala izindaba eziseBhayibhilini ezimayelana lokuvuswa kwabantu abafileyo futhi ucabangisise ngazo. EBhayibhilini kukhulunywa ngabantu abangu-8 abavuswa kwabafileyo. c Zinike isikhathi sokuhlolisisa indaba lezo. Ekubaleni kwakho khumbula ukuthi amadoda labesifazana kanye labantwana obubala ngabo bake baphila sibili. Cabangisisa ngokuthi okubalayo kukufundisani. Zama ukubona ukuthi ukuvuswa komuntu ngamunye obubala ngaye kutshengisa njani ukuthi uJehova uyafuna ukuvusa abafileyo  futhi ulamandla okukwenza. Kumele ucabangisise langokuvuswa kukaJesu ngoba kuqakatheke kakhulu. Phela banengi abantu abambona ngawabo uJesu esevusiwe. Lokhu kuyaluqinisa kakhulu ukholo lwethu.—1 Khor. 15:3-6, 20-22.

18. Ungenzani ukuze ududuzwe zingoma ezikhuluma ngokuvuswa kwabantu abafileyo? (Khangela lamabala angaphansi.)

¹⁸ ‘Izingoma zokukhonza’ ezimayelana lokuvuswa kwabantu abafileyo zingakududuza. d (Efe. 5:19) Izingoma lezo zenza singakuthandabuzi ukuthi abafileyo bazavuswa sibili futhi zisinceda ukuthi sikubone ngelihlo lengqondo lokho kusenzakala. Zinike isikhathi sokulalela izingoma lezi, uziphrakthize futhi lixoxe ngokuthi amazwi azo atshoni ekukhonzeni kwenu kwemuli. Zama ukuzibamba ngekhanda futhi uvumele ukuthi zingene zithophele enhliziyweni yakho. Nxa kungenzakala ukuthi ukuphila kwakho sekusengozini kumbe ufelwe ngumuntu omthandayo, umoya kaJehova uzakunceda ukuthi ukhumbule izingoma lezi besezikududuza futhi zikuqinise.

19. Kuyini okungafika engqondweni zethu nxa sicabanga ngokuvuswa kwabantu abafileyo? (Khangela ibhokisi elithi “ Uzababuzani?”)

¹⁹ Zibone ngelihlo lengqondo usepharadayisi. UJehova usidale sisenelisa ukuzibona sisemhlabeni omutsha. Omunye udadewethu wathi: “Ngihlala ngizibona ngisemhlabeni omutsha kuze kube angani ngibona amaluba amahle eqhakaza futhi ngiwezwe enukelela.” Akuzibone ngelihlo lengqondo uhlangana lamadoda labesifazana abathembekileyo okukhulunywa ngabo eBhayibhilini. Ngubani ofisa kakhulu ukumbona? Yiphi imibuzo ozambuza yona? Ucabanga ukuthi uzezwa njani usubona abantu obathandayo abafayo sebevusiwe? Akuzibone umgijimela usiyamgona ngapha zisehla ezentokozo. Kuyini ozaqalisa ukumtshela khona?

20. Kuyini okumele sizimisele ukukwenza?

²⁰ Simbonga singaqedi uJehova ngethemba asinike lona elokuthi abafileyo bazavuswa! Asithandabuzi ngitsho lakancane ukuthi lokhu kuzakwenzakala ngoba uJehova uyafuna futhi ulamandla okugcwalisa isithembiso sakhe. Asizimiseleni ukuqhubeka siqinisa ukholo lwethu ethembeni leli eliligugu. Singenza njalo sizasondela kakhulu kuNkulunkulu wethu othembisa ngamunye wethu ukuthi, ‘Abantu obathandayo bazavuka!’