1. Abanye benzani ukuze benze okunengi ekukhonzeni uJehova?

 SILOMSEBENZI omnengi okumele siwenze njengoba ukuphela komumo lo sekuseduze. (Mat. 24:14; Luk. 10:2; 1 Phet. 5:2) Sonke sifuna ukwenza okusemandleni ethu ekukhonzeni uJehova. Abanengi bathuthukisa inkonzo yabo, abanye bafuna ukuba ngamaphayona, abanye ukuya eBhetheli futhi abanye bafuna ukuncedisa emsebenzini wokwakha izakhiwo zenhlanganiso. Kanti njalo abafowethu abanengi balalamela ukuba zinceku ezikhonzayo kumbe abadala. (1 Tim. 3:1, 8) Kumele ukuthi kuyamthokozisa uJehova ukubona abantu bakhe bezinikela kangaka.—Hubo. 110:3; Isaya. 6:8.

2. Singezwa njani nxa sisehluleka ukwenza lokho esifuna ukukwenza ekukhonzeni uJehova?

² Kodwa singadana nxa kungadlula isikhathi eside lokho esifisa ukukwenza enhlanganisweni kaJehova kungakenzakali. Okunye okungasidanisa yikuthi iminyaka yethu kumbe ezinye izimo azisivumeli ukuthi senze eminye imisebenzi loba ezinye izinto enhlanganisweni kaJehova. (Zaga. 13:12) Lokhu yikho okwenzakala kuMelissa. * Uyafisa ukuyasebenza eBhetheli kumbe ukungena iSikolo Sabavangeli BoMbuso kodwa uthi: “Sengadlulisa iminyaka efunakalayo. Kimi sokuliphupho nje. Kwezinye izikhathi lokhu kungenza ngidane.”

3. Kuyini abanye okungadingeka ukuthi bakwenze ukuze bafanele ukwenza imisebenzi ethile ekukhonzeni uJehova?

³ Abanye abasesebatsha futhi abalempilakahle kungadingeka ukuthi bathuthuke ekukhonzeni njalo babe lobunye ubuntu  ukuze bafanele ukwenza eminye imisebenzi enhlanganisweni. Ngokwesibonelo, abanye bangabe bekhaliphile, besenelisa ukwenza izinqumo masinyane njalo bezimisele ukusebenza. Kodwa kungadingeka ukuthi bafunde ukubekezela, ukwenza umsebenzi wabo ngonanzelelo lokuhlonipha abanye. Nxa ungasebenza nzima ukuthi ube lobuntu obuhle, ungathola umsebenzi wenkonzo ungakawucabangeli. Cabanga ngalokho okwenzakala kuNick. Wathi eleminyaka engu-20 wadana kakhulu ngoba kazange abe yinceku ekhonzayo. Uthi, “Ngabona angani kulento engiyiphambanisayo.” Kodwa uNick kazange akhalale. Wenza konke okusemandleni akhe ebandleni lasemsebenzini wokutshumayela. Khathesi ulilunga leKhomithi Yegatsha.

4. Sizaxoxa ngani esihlokweni lesi?

⁴ Udanile yini ngenxa yokuthi awukawutholi umsebenzi wenkonzo ofisa ukuwenza enhlanganisweni kaJehova? Nxa kunjalo khuleka umtshele indlela ozizwa ngayo. (Hubo. 37:5-7) Okunye ongakwenza yikubuza abafowethu abaqinileyo ekukhonzeni ngalokho ongakwenza ukuze uthuthuke ubusuzama ngamandla akho wonke ukwenza lokho abakutshela khona. Ungenza njalo ungawuthola umsebenzi owufisayo. Kodwa njengoMelissa esike sakhuluma ngaye, mhlawumbe akuvumi ukuthi wenze umsebenzi wenkonzo ofisa ukuwenza. Manje ungenzani ukuze uqhubeke uthokoza? Esihlokweni lesi sizaphendula umbuzo lo ngokuxoxa ngokuthi ungayithola ngaphi intokozo, ngokuthi ungenzani ukuze uthokoze kakhulu lokuthi kuyini ongahlela ukukwenza okuzakunceda ukuthi uthokoze.

5. Kumele senzeni ukuze sithokoze? (UmTshumayeli 6:9)

⁵ UmTshumayeli 6:9 uyasitshela ukuthi singayithola ngaphi intokozo. (Bala, The Holy Bible in Ndebele.) * Umuntu osuthiswa ‘ngakubonayo’ uyakuqakathekisa lokho alakho, ngokwesibonelo lokho ayenelisa ukukwenza khathesi. Kodwa lowo oxotshana lezinkanuko zakhe uhlala efisa izinto angasoze afa aba lazo. Sifundani? Nxa sifuna ukuthokoza kumele sicabange ngalokho esilakho khathesi, singazihluphi ngalokho esingeke saba lakho.

6. Sizaxoxa ngawuphi umzekeliso futhi sizafundani kuwo?

⁶ Kungenzakala yini ukuthi usuthiseke ngalokho olakho? Abantu abanengi bacabanga ukuthi ngeke kwenzakale ngoba sihlala sifuna ukufunda ukwenza izinto ezintsha. Kodwa iqiniso yikuthi kungenzakala. Singathokoza sibili ngezinto esilazo khathesi. Njani? Asixoxeni ngomzekeliso kaJesu wamathalenta otholakala kuMathewu 25:14-30 ukuze sibone ukuthi singakwenza njani lokhu. Sizafunda ngokuthi singayithola njani intokozo lokuthi singenzani ukuze sithokoze kakhulu kulokhu esikwenzayo khathesi.

7. Finqa umzekeliso kaJesu wamathalenta.

⁷ Emzekelisweni kaJesu, indoda ethile yayisizathatha uhambo. Yathi ingakasuki yabiza izinceku zayo, yanika ngayinye amathalenta okwenza ibhizimusi. * Yayisazi ukuthi ngayinye yenelisa ukwenzani, yikho yanika inceku yokuqala amathalenta amahlanu, eyinye yayinika amabili leyinye yayinika elilodwa. Inceku zokuqala ezimbili zayisebenzela ngamandla inkosi yazo. Kodwa inceku yesithathu kayenzanga lutho ngethalenta eyayiliphiwe yikho yaxotshwa.

8. Kuyini okwakungenza inceku yakuqala esemzekelisweni ithokoze?

 ⁸ Kumele ukuthi inceku yokuqala yathokoza kakhulu ngenxa yokuthi inkosi yayo yayiyinike amathalenta amahlanu. Yayinikwe imali enengi kakhulu futhi lokhu kwakutshengisa ukuthi inkosi yayo iyayithemba kakhulu. Kodwa kuthiwani ngenceku yesibili? Yayingadana njengoba yayinikwe amathalenta amalutshwana kulawenceku yakuqala. Kodwa yona yenzani?

9. Kuyini uJesu angazange akutsho ngenceku yesibili? (UMathewu 25:22, 23)

⁹ Bala uMathewu 25:22, 23. UJesu kazange athi inceku yesibili yazonda njalo yezwa ubuhlungu ngokuthi yayiphiwe amathalenta amabili kuphela. Kanti njalo kazange athi yakhonona isithi: ‘Ngithole amathalenta amabili kuphela? Phela lami ngisebenza nzima njengenceku le ethole amathalenta amahlanu. Nxa inkosi yami ingakuqakathekisi engiyenzela khona kungcono ngigqibele amathalenta la amabili ngizenzele okwami.’

10. Inceku yesibili yenzani ngamathalenta ayo?

¹⁰ Inceku yesibili yaqakathekisa umsebenzi eyayiwuphiwe njalo yasebenzela inkosi yayo ngamandla njengenceku yakuqala. Lokhu kwenza ukuthi ithole amathalenta amabili phezu kwalawo eyayiwaphiwe. Inkosi yayinika umvuzo inceku le ngenxa yokusebenza kwayo nzima. Yathokoza ngayo futhi yayibona ifanele ukuthi iphiwe eminye imisebenzi.

11. Singenzani ukuze sithokoze kakhulu?

¹¹ Lathi sizathokoza kakhulu nxa singenza konke okusemandleni ethu kuloba yiwuphi umsebenzi esiwuphiweyo enhlanganisweni  kaJehova. Sebenza gadalala emsebenzini wokutshumayela lasebandleni. (ImiSeb. 18:5; Heb. 10:24, 25) Lungiselela kuhle imihlangano yebandla ukuze ukhuthaze abanye ngezimpendulo zakho. Qakathekisa loba yisiphi isabelo osiphiwayo emihlanganweni yaphakathi kweviki. Nxa ungacelwa ukuthi wenze umsebenzi othile ebandleni, fika ngesikhathi njalo uthembeke. Ungacabangi ukuthi umsebenzi owuphiweyo kawutsho lutho lokuthi akumelanga usebenzise isikhathi sakho esinengi uwenza. Zama ukuba yingcitshi emsebenzini owuphiweyo. (Zaga. 22:29) Nxa ungasebenzela uJehova ngamandla akho wonke, ubungane bakho laye buzaqina futhi uzathokoza kakhulu. (Gal. 6:4) Kanti njalo kuzaba lula ukuthi uthokoze nxa abanye bethola imisebenzi yenkonzo obufisa ukuyenza.—Rom. 12:15; Gal. 5:26.

12. Kuyini okwenziwa nguMelissa loNick ukuze bathokoze kakhulu?

¹² Usamkhumbula yini uMelissa esike sakhuluma ngaye owayefuna ukuya eBhetheli kumbe ukungena iSikolo Sabavangeli BoMbuso? Lanxa engenelisi ukukwenza lokhu uthi: “Ngenza konke engingakwenza ekuphayoneni futhi ngiyazama ukusebenzisa zonke izindlela zokutshumayela. Lokhu kwenze ngathokoza okwamagama.” UNick yena wenzani esedaniswe yikuthi kazange abekwe ukuba yinceku ekhonzayo? Uthi: “Ngasebenza ngamandla kulokho engangisenelisa ukukwenza, njengokutshumayela lokunika izimpendulo ezikhuthazayo estadi. Ngafila lefomu leBhetheli njalo ngabizwa ngomnyaka owalandelayo.”

13. Kuzakwenzakalani nxa ungasebenza ngamandla wonke emsebenzini wenkonzo olawo khathesi? (UmTshumayeli 2:24)

¹³ Nxa ungasebenza nzima emsebenzini wenkonzo owenzayo khathesi, uzathola yini eminye esikhathini esizayo? Kungenzakala uyithole njengoNick. Lanxa ungayitholanga njengoMelissa, ungathokoza kakhulu ngalokho okwenzela uJehova khathesi. (Bala umTshumayeli 2:24.) Kanti njalo uzathokoza okwamagama ngoba uyabe usazi ukuthi uthokozisa iNkosi yethu uJesu Khristu.

14. Kuyini okumele sihlale sikukhumbula nxa sicabanga ngesikhetha ukukwenzela uJehova?

¹⁴ Nxa sisenza konke esingakwenza ekukhonzeni uJehova khathesi, sokusitsho yini ukuthi akusamelanga sizame ukwenza okunye? Hatshi. Kumele sihlele ukwenza izinto ezizasinceda ukuthi sithuthuke ekutshumayeleni lasekufundiseni lasekuncedeni abafowethu labodadewethu. Sizaphumelela ukwenza esikuhlelileyo nxa singaqakathekisa ukuncedisa abanye kulokwenza okufunwa yithi.—Zaga. 11:2; ImiSeb. 20:35.

15. Kuyini ongahlela ukukwenza okuzakunceda ukuthi uthokoze kakhulu?

¹⁵ Kuyini ongahlela ukukwenza? Cela uJehova akuncedise ukuthi ubone lokho ongenelisa ukukwenza. (Zaga. 16:3; Jak. 1:5) Ungahlela yini ukwenza lokho esikhulume ngakho  endimeni yokuqala, ukuba liphayona elisizayo, elesikhathi sonke, ukusebenza eBhetheli loba ukuncedisa ekwakheni izakhiwo zenhlanganiso? Mhlawumbe ungafundela olunye ulimi kumbe uyetshumayela kwenye indawo. Nxa ufuna ukuthola okunengi ngalokho ongahlela ukukwenza, khangela isahluko 10 sebhuku elithi, Sihlelelwe Ukwenza Intando KaJehova njalo ukhulume labadala abasebandleni okulo. * Nxa ungazama ukukwenza lokho  okuhlelileyo, abantu bazabona ukuthi uyathuthuka sibili njalo uzathokoza kakhulu.

16. Ungenzani nxa khathesi kungavumi ukwenza umsebenzi wenkonzo othile?

¹⁶ Kodwa kuthiwani nxa khathesi kungavumi ukuthi wenze imisebenzi yenkonzo esikhulume ngayo? Zama ukuhlela ukwenza ongakwenelisa. Asixoxeni ngokunye kwakhona.

17. Ngokwalokho okutshiwo ku-1 Thimothi 4:13, 15, umzalwane angenzani ukuze afundise kuhle?

¹⁷ Bala u-1 Thimothi 4:13, 15. Nxa ungumzalwane obhabhathiziweyo, ungazama ukuthuthukisa indlela ofundisa ngayo. ‘Ukuzinikela’ ekubaleni lasekufundiseni kuzabanceda kakhulu labo abakulalelayo. Hlela ukutaditsha lokusebenzisa okusesifundweni ngasinye sebhukwana elithi Khuthalela Ukubala Lokufundisa. Taditsha isifundo ngasinye, uphrakthize kakhulu usesengekhaya njalo wenze okufundileyo nxa usenza izinkulumo. Cela ukuncediswa ngumeluleki oncedisayo kumbe ngabanye abadala “abasebenza nzima befundisa futhi bekhuluma.” * (1 Tim. 5:17) Sebenzisa okusesifundweni ngasinye sebhukwana leli njalo uncedise abakulaleleyo ukuthi baqinise ukholo lwabo kumbe ukuthi bakusebenzise abakufundayo. Ungenza njalo, wena labakulaleleyo lizathokoza kakhulu.

18. Kuyini okungakunceda ukuthi wenze konke ongakwenza ekutshumayeleni?

¹⁸ Sonke siphiwe umsebenzi wokutshumayela lokwenza abafundi. (Mat. 28:19, 20; Rom. 10:14) Uyafuna yini ukuba yingcitshi emsebenzini lo wokwenza abafundi? Taditsha ibhukwana elithi Khuthalela Ukubala Lokufundisa ubusuhlela ongakwenza okungakunceda ukuthi ukusebenzise okufundayo. Ungathola  amanye amacebo azakunceda ku-Gwalo Lomhlangano Wempilo Lenkonzo lakumavidiyo ezingxoxo ezingasetshenziswa esiwabukela emihlanganweni yaphakathi kweviki. Zama izindlela ezitshiyeneyo ukuze ubone esebenza ngcono kulazo zonke ensimini yenu. Nxa ungawasebenzisa amacebo la akuthandabuzwa ukuthi uzaba yingcitshi ekufundiseni njalo uthokoze kakhulu.—2 Tim. 4:5.

19. Ungenzani ukuze ube lobuntu obuthokozisa uNkulunkulu?

¹⁹ Akumelanga sikhohlwe ukuthi okunye okuqakatheke kakhulu esingakwenza yikuba lobuntu obuthokozisa uNkulunkulu. (Gal. 5:22, 23; Kol. 3:12; 2 Phet. 1:5-8) Singakwenza njani lokhu? Ake sithi ufuna ukuba lokholo oluqinileyo. Ungabala izihloko ezisemabhukwini ethu ezilamacebo angakunceda ukuthi ukwenze lokhu. Akuthandabuzwa ukuthi kuzakunceda ukubukela amavidiyo aku-JW Broadcasting^® akhuluma ngendlela abafowethu labodadewethu abatshengisa ngayo ukholo oluqinileyo ngesikhathi besebunzimeni. Nxa usuwabukele, zama ukudinga izindlela ongabalingisela ngazo empilweni yakho.

20. Singenzani ukuze singadani kakhulu kodwa sithokoze okwamagama?

²⁰ Akuthandabuzwa ukuthi sonke sifisa ukuthi ngabe senzela uJehova okunengi kulalokho esimenzela khona khathesi. Emhlabeni omutsha sizenelisa ukumkhonza ngendlela epheleleyo. Asenzeni konke okusemandleni ethu kulokho esenelisa ukukwenza. Nxa singenza njalo kasisoze sidane kakhulu kodwa sizathokoza. Okuqakathekileyo yikuthi sizadumisa ‘uNkulunkulu wethu othokozayo’ uJehova. (1 Tim. 1:11) Ngakho asithokozeni emsebenzini wenkonzo esiwenzayo khathesi.