1-2. IHubo 34:8 lithi singenzani ukuze sibone ukuthi uJehova muhle?

AKE sithi omunye umuntu ukunika ukudla ongakaze ukudle. Ungafunda okuthile ngokudla lokho ngokukukhangela, ngoqhatshi lwakho, ngokubuza ukuthi kuphekwa njani kumbe ngokubuza abanye ukuthi kumnandi yini. Kodwa akulandlela engcono yokwazi ukuthi kumnandi yini ukwedlula ukukunambitha.

² Singafunda ngobuhle bukaJehova ngokubala iBhayibhili lamabhuku ethu langokuzwa abanye bekhuluma ngezibusiso abazinikwe nguJehova. Kodwa ukuze sizwisise kuhle ukuthi uJehova muhle kangakanani, kumele ‘sizinambithele.’ (Bala iHubo 34:8, NWT.) * Nansi isibonelo sendlela esingakwenza ngayo lokho. Ake sithi ufuna ukuba senkonzweni yesikhathi sonke. Kodwa ukuze ukwenze lokho kumele utshiye ezinye izinto. Mhlawumbe ujayele ukubala isithembiso sikaJesu sokuthi nxa singafuna kuqala uMbuso, uJehova uzasinika esikudingayo. Lanxa kunjalo kawukaze usibone sigcwaliseka kuwe. (Mat. 6:33) Kodwa ngenxa yokuthi uyasikholwa isithembiso sikaJesu, uyazama ukuphungula izindleko, unciphise isikhathi osiqeda emsebenzini wokuziphilisa njalo wenze konke okusemandleni akho emsebenzini wokutshumayela. Nxa usenza njalo, uyazibonela sibili ukuthi uJehova uyakunika lokho okudingayo. Uyabe ‘usuzinambithela’ ubuhle bakhe.

3. Ngokwalokho okutshiwo kuHubo 16:1, 2, uJehova unika obani izinto ezinhle?

³ UJehova “muhle kubo bonke,” ngitsho lakulabo abangamaziyo. (Hubo. 145:9, NWT; Mat. 5:45) Kodwa labo abamthandayo  futhi abamkhonza ngenhliziyo yonke ubanika izinto ezinengi ezinhle. (Bala iHubo 16:1, 2.) Asixoxeni ngezinye izinto ezinhle uJehova asinike zona.

4. UJehova ubatshengisa njani ubuhle bakhe labo asebeqalise ukusondela kuye?

⁴ Sonke isikhathi nxa sisebenzisa esikufundiswa nguJehova siyabona ukuthi kuyasinceda empilweni zethu. Ngesikhathi sifunda ngaye futhi siqalisa ukumthanda, wasincedisa ukuthi sitshiye imicabango lemikhuba angayithandiyo. (Kol. 1:21) Sathi sesizinikele kuye njalo sabhabhathizwa, waphinda wasinika lezinye izinto ezinhle njengomzwangedwa omuhle lesibusiso sokuba ngabangane bakhe abaseduze.—1 Phet. 3:21.

5. UJehova usitshengisa njani ubuhle bakhe nxa sisekutshumayeleni?

⁵ Sihlala sibubona ubuhle bukaJehova nxa sisekutshumayeleni. Ungumuntu olenhloni yini? Abantu bakaJehova abanengi banjalo. Engxenye ungakabi nguFakazi wawucabanga ukuthi ngeke wenelise ukuqoqoda emnyango womuntu ongamaziyo ubusuqalisa ukuxoxa laye ngeBhayibhili. Kodwa khathesi lokho yikho kanye ohlala ukwenza futhi uJehova usekuncedise ukuthi uwukholise umsebenzi wokutshumayela. Ukuncedise langezinye izindlela. Ngokwesibonelo, ukuncedise ukuthi ungavuki ngolaka nxa uphikiswa ekutshumayeleni lokuthi ukhumbule wona kanye umbhalo ofuna ukuwubalela umuntu ozimisele ukukulalela. Uphinde wakunika amandla okuthi uqhubeke utshumayela lanxa abantu bengafuni ukukulalela.—Jer. 20:7-9.

6. Indlela uJehova asifundisa ngayo itshengisa njani ukuthi muhle?

⁶ UJehova uphinde wasitshengisa ubuhle bakhe ngokusifundisa ukuthi siwenze njani umsebenzi wokutshumayela. (Joh. 6:45) Emihlanganweni yaphakathi kweviki, kuba lezingxoxo ezingasetshenziswa esikhuthazwa ukuthi sizisebenzise nxa sisekutshumayeleni. Ekuqaliseni kungaba nzima ukuthi sisebenzise indlela lezo ezintsha, kodwa nxa singazisebenzisa, singamangala sibona ziphumelela ensimini yethu. Okunye esikukhuthazwa emihlanganweni emikhulu lemincane yikuthi sizame izindlela ezitshiyeneyo zokutshumayela. Lokhu lakho singakubona kunzima, kodwa nxa singakuzama, uJehova uzasibusisa. Khathesi sizaxoxa ngezinye izinto ezinhle uJehova azasinika zona nxa singamthemba njalo sizame izindlela zokwenza okunengi ekumkhonzeni kungelani lezimo zethu. Ngemva kwalokho sizaxoxa ngokuthi singenzani ukuze senze okunengi ekukhonzeni.

7. Yisiphi isibusiso esisitholayo nxa sisenza okunengi enkonzweni?

⁷ Sisondela kakhulu kuJehova. Ake sixoxe ngomdala webandla okuthiwa nguSamuel * lomkakhe abahlala eColombia. Babekukholisa ukuphayona besebandleni ababekulo kodwa babefuna ukwenza okunengi enkonzweni ngokuyancedisa ibandla elalilabamemezeli abalutshwana. Kwakumele bayekele ukwenza ezinye izinto ababethanda ukuzenza ukuze bakwenze lokho. USamuel uthi: “Senza okutshiwo kuMathewu 6:33 sayekela ukuthenga izinto esingazidingiyo. Kodwa okwabanzima kakhulu yikusuka endlini yethu. Sasiyithanda indlela eyayakhiwe ngayo njalo sasingelasikwelede sayo.” Bathi sebesebandleni elitsha bananzelela ukuthi basebephila ngemali encane kakhulu kulaleyo ababephila ngayo kuqala. USamuel uthi: “Sibonile uJehova esisekela njalo ephendula imithandazo yethu.  Khathesi sesikubona kakhulu ukuthi uyathokoza ngathi lokuthi uyasithanda.” Kukhona yini ongakwenza ukuze uthuthukise inkonzo yakho? Nxa ungakwenza, uzasondela kakhulu kuJehova futhi uzakunika konke okudingayo.—Hubo. 18:25.

8. Ufundani kulokho okwatshiwo ngu-Ivan loViktoria?

⁸ Siyayikholisa inkonzo yethu. U-Ivan lomkakhe uViktoria, abangamaphayona eKyrgyzstan babephila bengelazinto ezinengi ukuze benelise ukuyancedisa loba ngaphi, kuhlanganise lasemsebenzini yokwakha. U-Ivan uthi: “Sasisebenza ngamandla ethu wonke kuloba yiwuphi umsebenzi esasiwuphiwa. Lanxa sasitshayisa sidiniwe, sasithokoza ngoba sasikwazi ukuthi besisebenzela uJehova. Okunye okwenza sathokoza, ngabangane abanengi esabatholayo lezikhathi ezimnandi esaba lazo.”—Mak. 10:29, 30.

9. Omunye udade ophakathi kobunzima wenzeni ukuze athuthukise inkonzo yakhe futhi yiziphi izibusiso azitholileyo?

⁹ Kuyasithokozisa ukwenza umsebenzi kaJehova lanxa siphakathi kobunzima. Ngokwesibonelo, umfelokazi okuthiwa nguMirreh ohlala eWest Africa njalo owayengudokotela wathi esekhulile wama ukusebenza waqalisa ukuphayona. UMirreh ulomkhuhlane wamathambo owenza kube nzima ukuhamba futhi wenelisa ukutshumayela endlini ngendlu okwehola elilodwa kuphela. Kodwa uyenelisa ukuqeda isikhathi eside etshumayela enqoleni futhi ulempindela lezifundo zeBhayibhili ezinengi. Ezinye zakhona ufunda lazo esebenzisa ifoni. Kuyini okwenza uMirreh afune ukwenza okunengi enkonzweni yakhe? Uthi: “Ngiyamthanda kakhulu uJehova loKhristu uJesu futhi ngihlala ngithandazela ukuthi uJehova angincedise ngenze konke engingakwenza enkonzweni yakhe.”—Mat. 22:36, 37.

10. Ngokwalokho okutshiwo ku-1 Phetro 5:10, kuyini okutholwa yilabo abazimisele ukwenzela uJehova okunengi?

¹⁰ UJehova uyasiqeqetsha ngezinye izindlela. UKenny oliphayona eMauritius waqeqetshwa nguJehova. Wathi esefunde iqiniso watshiya iyunivesithi, wabhabhathizwa, waseqalisa ukuphayona. Uthi: “Ngiyazama ukuba njengomphrofethi u-Isaya owathi: ‘Ngilapha. Thuma mina!’” (Isaya. 6:8) UKenny usencedise emisebenzini eminengi yokwakha enhlanganisweni lasekuhumutsheni amabhuku asekelwe eBhayibhilini ngolimi lwakhe. Uthi: “Ngaqeqetshwa ukuze ngenelise ukwenza imisebenzi engangiyiphiwa.” Kodwa kazange afundele ukwenza imisebenzi kuphela. Uphinda athi, “Ngafunda ukuthi kulezinye izinto engingenelisi ukuzenza lokuthi yibuphi ubuntu okwakumele ngibe labo ukuze ngenze okunengi ekukhonzeni uJehova njalo ngincedise abafowethu labodadewethu.” (Bala u-1 Phetro 5:10.) Mhlawumbe lawe kukhona ongakwenza ukuze uJehova akuqeqetshe ngendlela ezitshiyeneyo.

11. Kuyini okwenziwa ngodade abathathu eSouth Korea ukuze bathuthukise inkonzo yabo futhi lokho kubancede njani? (Khangela lomfanekiso ongaphandle.)

¹¹ Ngitsho labanye asebeleminyaka eminengi bengoFakazi bayancedakala nxa bezama ezinye izindlela zokutshumayela. Ngesikhathi somkhuhlane we-COVID-19, abadala kwelinye ibandla eliseSouth Korea babhala bathi: “Khathesi abanye abamemezeli ababengaphumi kanengi ekutshumayeleni ngenxa yokuthi abaphilanga kuhle, sebetshumayela zikhathi zonke besebenzisa ezempucuko. Odade abathathu abaleminyaka edlula 80 bafunda ukusebenzisa ezempucuko futhi khathesi sebetshumayela ngazo phose nsuku zonke.” (Hubo. 92:14, 15) Lawe uyafuna yini ukuthuthukisa inkonzo yakho ukuze ubunambithe  ubuhle bukaJehova? Asixoxe ngokunye ongakwenza ukuze ukwenze lokho.

12. UJehova ubathembisani labo abathembela kuye?

¹² Funda ukuthembela kuJehova. Uthembisa ukuthi uzasithululela izibusiso nxa singamthemba futhi senze konke okusemandleni ethu ekumkhonzeni. (Mal. 3:10) Udadewethu okuthiwa nguFabiola ohlala eColombia wabona uJehova esigcwalisa isithembiso lesi empilweni yakhe. Wayefuna ukuba liphayona lesikhathi sonke esanda kubhabhathizwa. Kodwa kwakumele asebenze ukuze ancedise ukunakekela imuli yakhe. Yikho kwathi sekufike isikhathi sokuthi athathe impentsheni, wathandaza ngenhliziyo yonke ecela ukuthi uJehova amncedise. Uthi: “Kujayele ukuthatha isikhathi eside ukuthi imali yempentsheni iphume, kodwa eyami yaphuma ngemva kwenyanga eyodwa nje ngiyicelile. Kwakuyisimanga sibili!” Ngemva kwenyanga ezimbili waqalisa ukuphayona. Khathesi useleminyaka edlula 70 njalo sephayone okweminyaka edlula 20. Sencedise abantu abayisitshiyagalombili ukuthi babhabhathizwe. Uthi: “Lanxa kwezinye izikhathi ngizizwa ngingaselamandla, uJehova uyangincedisa nsuku zonke ukuthi ngiqhubeke ngiphayona.”

13-14. Yiziphi izibonelo ezingasinceda ukuthi sithembele kuJehova njalo senze okunengi ekumkhonzeni?

¹³ Funda ezibonelweni zalabo abathembela kuJehova. IBhayibhili lilezibonelo ezinengi zabantu abasebenza nzima ekukhonzeni uJehova. Izikhathi ezinengi wazibusisa  izinceku lezi ngemva kokuba sezenze okuthile okutshengisa ukuthi ziyamthemba. Ngokwesibonelo, uJehova wabusisa u-Abrahama ngemva kokuba esetshiye umuzi wakhe “lanxa wayengakwazi ukuthi uya ngaphi.” (Heb. 11:8) UJakhobe laye wabusiswa ngemva kokulwisana lengilosi. (Gen. 32:24-30) Ngesikhathi isizwe sako-Israyeli sesizangena eLizweni Lesithembiso, abantu benelisa ukuchapha uMfula uJodani ngemva kokuba inyawo zabaphristi sezithinte amanzi omfula.—Josh. 3:14-16.

¹⁴ Singafunda okunengi lakuboFakazi abathembela kuJehova njalo benza okunengi ekumkhonzeni. Ngokwesibonelo, umfowethu okuthiwa nguPayton lomkakhe uDiana babekholisa ukubala izindaba ezimayelana labafowethu labodadewethu abenza okunengi ekukhonzeni, njengalezo ezazitholakala kuzihloko ezazihlala ziphuma ezithi “Bazinikela Ngokuthanda Kwabo.” * UPayton uthi: “Ngesikhathi sibala indaba lezo kwakungani sibukele umuntu odla ukudla okumnandi. Ukuqhubeka sizibala kwenza safuna kakhulu ‘ukunambitha sibone ukuthi uJehova muhle.’” Ngokuhamba kwesikhathi uPayton loDiana bathuthela endaweni eyayilabamemezeli abalutshwana. Sowake wazibala yini izihloko lezi? Wake wayibukela yini ividiyo yesiZulu ethi Ukushumayela Emajukujukwini—E-Australia lethi Witnessing in Isolated Territory—Ireland eku-jw.org? Konke lokhu kungakunceda ukuthi uthole indlela ongathuthukisa ngazo inkonzo yakho.

15. Ukukhetha kuhle abangane kuzasinceda njani?

¹⁵ Khetha kuhle abangane. Kulula ukuthi udle ukudla ongakaze ukudle nxa ujayele ukuba labantu abakuthandayo ukudla lokho. Lathi nxa singajayelana labafowethu labodadewethu abaqakathekisa ukukhonza uJehova, kuzakuba lula ukuthi sithuthukise inkonzo yethu. Lokhu yikho okwenziwa nguKent lomkakhe uVeronica. UKent uthi: “Abangane bethu labangakithi basikhuthaza ukuthi sizame ukwenza eminye imisebenzi yenkonzo. Sananzelela ukuthi ukuba labangane abafaka uMbuso kuqala, kwenza saba lesibindi sokwenza eminye imisebenzi yenkonzo.” Khathesi uKent loVeronica bangamaphayona aqakathekileyo eSerbia.

16. Ngokwalokho okutshiwo emzekelisweni kaJesu okuLukha 12:16-21, kungani kumele sizimisele ukutshiya ezinye izinto?

¹⁶ Tshiya ezinye izinto ukuze wenze okunengi ekukhonzeni uJehova. Akudingeki ukuthi size sitshiye zonke izinto esizithandayo ukuze sithokozise uJehova. (UmTshu. 5:19, 20) Kodwa nxa singayekela ukwenza okunengi ekukhonzeni ngenxa yokuthi asifuni ukutshiya ezinye izinto esizithandayo, singacina sesifanana lendoda esemzekelisweni kaJesu. Yasebenza nzima ukuze ibe lezinto ezinengi ezinhle kodwa kayizange izihluphe ngoNkulunkulu. (Bala uLukha 12:16-21.) Umzalwane ohlala eFrance okuthiwa nguChristian uthi, “Ngangisenza okulutshwana ekukhonzeni njalo ngangingatholi isikhathi esinengi sokuba lemuli yami.” Yena lomkakhe babona kungcono ukuthi baphayone. Kodwa kwakumele batshiye imisebenzi yabo ukuze bakwenze lokhu. Baqalisa ibhizimusi encane yokuklina izindlu lamawofisi njalo bafunda ukusuthiseka ngemali encane abasebeyithola. Bayathokoza yini ngalokho abakwenzayo? UChristian uthi, “Khathesi sesikholisa ngoba sesisenza okunengi ekutshumayeleni futhi kuyasithokozisa ukufundisa abantu ngoJehova.”

17. Kuyini okwanceda omunye udade ukuthi azame enye indlela yokutshumayela?

 ¹⁷ Zimisele ukuzama ezinye indlela zokutshumayela. (ImiSeb. 17:16, 17; 20:20, 21) Udadewethu oliphayona ohlala eMelika okuthiwa nguShirley kwasekumele atshintshe indlela atshumayela ngayo sokulomkhuhlane we-COVID-19. Ekuqaliseni wayesesaba ukutshumayela ngefoni. Kodwa wathi esekufundisiwe ngesikhathi umbonisi wesiqinti evakatshele ibandla labo, wayesehlala etshumayela ngendlela le. Uthi: “Ekuqaliseni ngangisesaba kodwa khathesi sengikukholisa sibili futhi sesitshumayeza abantu abanengi kulalapho sitshumayela endlini ngendlu.”

18. Kuyini okungasinceda nxa singahlangana lobunzima obungasivimba ukuthi sithuthukise inkonzo yethu?

¹⁸ Hlela ozakwenza futhi ukwenze. Nxa sisebunzimeni siyathandaza sicela ukuthi uJehova asincedise besesicabangisisa ngokuthi singenzani. (Zaga. 3:21) USonia oliphayona eqenjini lesiRomany e-Europe uthi: “Ngithanda ukubhala engifuna ukukwenza ephepheni besengifaka iphepha lelo egcekeni. Etafuleni yami ngilomdwebo wemigwaqo emibili eya endaweni ezitshiyeneyo. Nxa kumele ngenze isinqumo, ngiyayikhangela imigwaqo le besengicabanga ukuthi isinqumo engizasenza sizangisa ngaphi.” USonia uyazama ukungakhathazeki kakhulu ngobunzima obumehlelayo. Uthi: “Nxa ngingahlangana lobunzima, kumele ngikhethe ukuthi ngizabubona njengomduli ongivimba ukuthi ngenze lokho engifuna ukukwenza kumbe njengebhriji elingangichaphisa ukuze ngenze lokho engifuna ukukwenza.”

19. Kumele sizimisele ukwenzani?

¹⁹ UJehova usibusisa ngezindlela ezinengi. Sitshengisa ukuthi siyambonga ngezibusiso lezi ngokwenza konke esingakwenza ukuthi simdumise. (Heb. 13:15) Lokhu kuhlanganisa ukwenza izinto ezitshiyeneyo ekumkhonzeni. Nxa singazenza sizathola ezinye izibusiso. Nsuku zonke, asidingeni izindlela ‘esinganambitha ngazo sibone ukuthi uJehova muhle.’ Nxa sisenza njalo siyabe silingisela uJesu owathi: “Ukudla kwami yikwenza intando yalowo ongithumileyo lokuqeda umsebenzi wakhe.”—Joh. 4:34.