Umphostoli uPhawuli wabhalela amaKhristu aseThesalonika wathi: “Nxa ekhona ongakulaleliyo esikutshoyo encwadini le, mbekeni uphawu.” (2 Thes. 3:​14, amabala angaphansi) Kuqala sasisithi ivesi le itshela abadala lokho okumele bakwenze. Nxa kwakulomuntu oyabe eseyelulekwe kanengi kodwa engafuni ukulandela imithetho eseBhayibhilini abadala babengenza inkulumo yokuxwayisa ibandla. Ngemva kwalokho abamemezeli babezehlukanisa laye.

Kodwa indlela esesizwisisa ngayo ivesi le isitshintshile. Kukhanya umphostoli uPhawuli wayekhuluma ngalokho okumele kwenziwe ngumKhristu ngamunye. Ngakho akulasidingo sokuthi abadala benze inkulumo yokuxwayisa ibandla. Kungani sesitshintshe indlela esizwisisa ngayo ivesi le? Asiqaleni sibone ukuthi uPhawuli wayevele ekhuluma ngani.

UPhawuli wathi ebandleni kwakulabanye ‘ababephila ngendlela engahlelekanga.’ Babengalaleli lokho ayebatshela khona okwakuvela eLizwini likaNkulunkulu. Ngesikhathi ebavakatshele wayebatshele wathi: “Nxa umuntu engafuni ukusebenza, kangadli.” Kodwa abanye babelokhu bengafuni ukusebenza lanxa babeqinile. Kanti njalo babengenela izinto ezingaqondananga labo. Manje amaKhristu kwakumele abaphathe njani abantu labo?—2 Thes. 3:​6, 10-12.

UPhawuli wathi “mnanzeleleni” kumbe ‘limbeke uphawu’ umuntu onjalo. Ibala lesiGrikhi elisetshenziswe lapha litsho ukuthi umuntu lo angaba yingozi acine esephambanisa abanye. Amazwi la uPhawuli wayewatshela ibandla lonke hatshi abadala kuphela. (2 Thes. 1:1; 3:6) Ngakho umKhristu owayengabe enanzelele ukuthi omunye umKhristu kafuni ukulalela iseluleko esiseLizwini likaNkulunkulu wayengakhetha ukuthi ‘angabi lobudlelwano’ laye.

Manje lokhu kwakusitsho ukuthi umuntu lo wayephathwa njengomuntu osusiweyo yini? Hatshi, ngenxa yokuthi uPhawuli wathi: “Qhubekani limeluleka njengomfowethu.” Ngakho amaKhristu ayengaxoxa lomuntu lo emihlanganweni loba ekutshumayeleni kodwa ayengasoze akwejise laye nxa ezilibazisa. Ayeyabe ekwenzelani lokho? UPhawuli wathi kwakusenzelwa ukuthi umuntu lo “ayangeke.” Nxa umKhristu lo owayephila ngendlela engahlelekanga wayengananzelela ukuthi usebekwe uphawu wayengayangeka acine esetshintsha indlela aphila ngayo.—2 Thes. 3:​14, 15.

AmaKhristu angakusebenzisa njani okwatshiwo nguPhawuli? Okokuqala, kumele sibe leqiniso lokuthi umuntu esifuna ukumbeka uphawu uphila ngendlela “engahlelekanga” yini sibili. Lapha uPhawuli wayengakhulumi ngabantu abakhetha ukwenza izinto ezitshiyene lalezo esizikhethayo endabeni umuntu angazikhethela zona esebenzisa umzwangedwa wakhe kumbe abantu abathanda izinto ezitshiyene lesizithandayo. Kanti njalo wayengakhulumi ngabantu abayabe besiphathe kubi. Wayekhuluma ngalabo abangasilaleli ngabomo iseluleko esiseBhayibhilini.

Lamuhla nxa singananzelela ukuthi omunye umKhristu esikhonza laye kafuni ukulalela ngabomo, a siyayekela ukudlelana laye nxa sikwejisa kumbe sizilibazisa. Kodwa akumelanga sihambe sesitshela abanye ngalokho esiyabe sikhethe ukukwenza ngaphandle kwalabo esiyabe sihlala labo. Siyabe silokhu sixoxa laye umuntu lo nxa sisemihlanganweni yebandla lasekutshumayeleni. Kodwa nxa angatshintsha siyabe sesingaba lobudlelwano laye kukho konke.