USTEFANE wayemi phambi kweqembu lamadoda ayezonde ephuphuma. Amadoda la ayengamalunga omthethwandaba omkhulu wako-Israyeli owawubizwa ngokuthi yiSanihedrini. Wawubunjwa ngabahluleli abangu-71 ababengamadoda ayethenjiwe futhi elamandla esizweni. Ayebuthaniswe nguMphristi Omkhulu uKhayifasi owayekhokhele umthethwandaba lo lapho ukhipha isigwebo sokuthi uJesu abulawe ezinyangeni ezedlulayo. (Mat. 26:57, 59; ImiSeb. 6:8-12) Ngesikhathi kuthonisiswa uStefane, ofakazi bamanga babengena bentshintshana emthethwandaba kodwa iSanihedrini yananzelela ukuthi ubuso bakhe “babufanana lobuso bengilosi.”—ImiSeb. 6:13-15.

Kuyini okwenza uStefane wahlaliseka njalo wangesabi lanxa wayesekhangelane lokufa? Engakahanjiswa eSanihedrini, uStefane wayetshiseka emsebenzini ayewuphathiswe ebandleni futhi wayekhokhelwa ngumoya kaNkulunkulu. (ImiSeb. 6:3-7) Ngesikhathi ethonisiswa, umoya lo yiwo owawuphezu kwakhe umduduza njalo umkhumbuza iMibhalo. (Joh. 14:16) KumiSebenzi isahluko 7 sithola ukuthi uStefane wafakaza ngesibindi futhi umoya ongcwele wamsiza ukuthi akhumbule iMibhalo YesiHebheru engedlula 20. (Joh. 14:26) Kodwa ukholo lwakhe lwaqina kakhulu lapho esebona umbono kaJesu emi esandleni sokudla sikaNkulunkulu.—ImiSeb. 7:54-56, 59, 60.

Lathi kwelinye ilanga singethuselwa futhi sihlukuluzwe. (Joh. 15:20) Nxa sifuna ukuthi umoya kaJehova usebenze kithi kumele sihlale sibala iLizwi lakhe nsuku zonke njalo sitshiseke ekutshumayeleni. Lokhu kuzasinceda ukuthi singesabi futhi sihlaliseke nxa siphakathi kobunzima.—1 Phet. 4:12-14.