1. Kungani kumele sizinikele kuJehova ngenhliziyo yonke?

KUMELE sizinikele kuJehova ngenhliziyo yonke ngoba unguMdali wethu futhi nguye owasinika ukuphila. (Isam. 4:11) Lanxa simthanda futhi simhlonipha uJehova, kungaba lezinto ezingasiphambanisa sicine singasazinikelanga kuye ngenhliziyo yonke. Kuyabe sekutheni? Singakaphenduli umbuzo lo asiqaleni ngokuxoxa ngokuthi kutshoni ukuzinikela kuJehova ngenhliziyo yonke.

2. Ngokwalokho okutshiwo kuMathewu 4:10, sizakwenzani nxa sizinikele kuJehova ngenhliziyo yonke?

² Nxa iBhayibhili lisithi sizinikele kuNkulunkulu liyabe lisitsho ukuthi kumele simthande kakhulu. Nxa sizinikele kuJehova ngenhliziyo yonke sizakhonza yena kuphela. Asisoze sithande omunye umuntu loba enye into ukwedlula yena.​—Bala uMathewu 4:10.

3. Kungani ukuzinikela kwethu kuJehova kungayisikho okokuphonguthatheka nje?

³ Ukuzinikela kwethu kuJehova ayisikho okokuphonguthatheka nje. Kodwa sizinikele kuye ngenxa yalokho esesikufundile ngaye. Siyabuthanda ubuntu bakhe obuhle. Siyakwazi lokho akuthandayo lakuzondayo futhi lathi siyakuthanda akuthandayo njalo siyakuzonda akuzondayo. Siyazwisisa ukuthi injongo kaNkulunkulu ngabantu ngeyokuthi benze intando yakhe futhi bamkhonze bethokoza kuze kube nini lanini, yikho siphila ngendlela ayifunayo. Kuyisibusiso sibili ukuthi uyasivumela sibe ngabangane bakhe. (Hubo. 25:14) Konke esikufunda ngoMdali wethu kwenza sisondele kuye.​—Jak. 4:8.

4. (a) Kuyini uDeveli akusebenzisayo ukuze asenze singazinikeli kuJehova ngenhliziyo yonke? (b) Sizaxoxa ngani esihlokweni lesi?

 ⁴ UDeveli nguye obusa umhlaba lo futhi uyawusebenzisa ukuze asenze siqakathekise kakhulu izinto esizifunayo njalo kube nzima kakhulu ukuthi silwisane lezifiso ezimbi. (Efe. 2:1-3; 1 Joh. 5:19) Akufunayo yikuthi sithande ezinye izinto kulokuthi sithande uJehova kuphela. Sizaxoxa ngendlela ezimbili uDeveli azisebenzisayo ukuze akwenze lokhu. Okokuqala, uyasilinga ukuthi sigijimise inotho. Okwesibili, uzama ukusenza sikhethe ukuzilibazisa okubi.

5. Kungani kumele sinanzelele singacini sesithanda imali?

⁵ Sonke siyakufuna ukudla okweneleyo, impahla zokugqoka kanye lendawo yokuhlala. Kodwa kumele sinanzelele singacini sesithanda imali. Abantu abanengi bomhlaba kaSathane ‘bathanda imali’ kanye lenotho. (2 Tim. 3:2) UJesu wayekwazi ukuthi abalandeli bakhe babengalingeka ukuthi bathande imali kanye lenotho. Wathi: “Kakho ongaba yisigqili samakhosi amabili ngoba uzazonda enye athande enye, kumbe uzanamathela kwenye adelele enye. Ngeke libe yizigqili zikaNkulunkulu lezeNotho.” (Mat. 6:24) Umuntu okhonza uJehova ngapha eqeda isikhathi esinengi lamandla ezama ukubuthelela inotho yomhlaba lo ufanana lomuntu ozama ukusebenzela amakhosi amabili. Uyabe engasazinikelanga kuJehova ngenhliziyo yonke.

6. Sifundani emazwini uJesu awatshela ibandla laseLawodikheya?

⁶ AmaKhristu ayesebandleni laseLawodikheya ayezigqaja esithi: “Nginothile, sengazitholela inotho njalo kangisweli lutho ngitsho.” Kodwa uJehova loJesu babewabona ‘ezihawulela futhi ezwisa usizi,  engabayanga, eyiziphofu njalo enqunu.’ UJesu kanikanga amaKhristu la iseluleko ngoba enothile kodwa okwenza waweluleka yikuthi ukuthanda inotho kwasekuphambanisa ubungane bawo loJehova. (Isam. 3:14-17) Nxa singananzelela ukuthi sesiqalisa ukuthanda imali kumele sihle silungise indlela esicabanga ngayo. (1 Tim. 6:7, 8) Phela singayekela ukwenza njalo sizaqalisa ukuthanda ezinye izinto kulokuthi sithande uJehova kuphela. Singaqalisa ukuthanda ezinye izinto kasoze akwamukele ukukhonza kwethu ngoba yena ufuna ‘simthande ngenhliziyo yonke.’ (Mak. 12:30) Kuyini okungabangela ukuthi sicine sesiqakathekisa kakhulu imali?

7-9. Ufundani kulokho okwenzakala kumdala webandla okuthiwa nguDavid?

⁷ UDavid ngumdala webandla okhutheleyo ohlala eMelika. Wayeyisisebenzi esikhutheleyo ngesikhathi eqhatshwe kwenye inkampani. Waphiwa isikhundla esiphezulu futhi elizweni lelo wayengomunye wababezingcitshi emsebenzini ayewenza. Uthi: “Ngalesosikhathi ngangibona angani konke lokho kwakutshengisa ukuthi uJehova uyangibusisa.” Kodwa nguJehova yini owayemenza aphumelele?

⁸ UDavid waqalisa ukunanzelela ukuthi umsebenzi wakhe wawusuphambanisa ubungane bakhe loJehova. Uthi: “Nxa ngangisemihlanganweni yebandla lasekutshumayeleni ngangicabanga ngezinto ezazingahambi kuhle emsebenzini. Ngangihola imali enengi sibili kodwa ngangilokhu ngikhathazeka kakhulu futhi umtshado wami wawusulezinhlupho.”

⁹ UDavid wabona ukuthi kwasekumele akhethe ukuthi kuyini okuqakatheke kakhulu kuye. Uthi: “Ngazimisela ukuthi ngilungise izinto empilweni yami.” Wayesefuna  ukusebenza amahola amalutshwana yikho watshela umqhatshi wakhe lokho ayesehlele ukukwenza. Kwahamba njani? Umsebenzi wamphelela. Wasesenzani? Uthi: “Ngelanga elalandelayo ngahle ngagcwalisa ifomu lokuba liphayona elisizayo eliqhubekayo.” Ngemva kwesikhathi waba liphayona lesikhathi sonke futhi lomkakhe wacina esephayona. Baqalisa ukwenza umsebenzi wokuklina ezakhiweni ezinkulu. Bakhetha ukwenza umsebenzi okhangelelwa phansi kodwa ukuthi benza msebenzi bani ayisikho okuqakathekileyo kubo. Lanxa sebethola imali encane kulakuqala, nyanga zonke bathola eyeneleyo ukuthi babhadale izindleko zabo. Bafuna ukuqakathekisa ukukhonza uJehova futhi bayazibonela ngawabo ukuthi uyabanakekela labo abafuna kuqala uMbuso.​—Mat. 6:31-33.

10. Singenzani ukuze silinde inhliziyo zethu?

¹⁰ Kungelani lokuthi ulemali enganani kumele ulinde inhliziyo yakho. Lokhu ungakwenza ngokungaqali ukuthanda inotho langokungaqakathekisi kakhulu umsebenzi wakho kulokukhonza uJehova. Ungabona njani ukuthi yikho osukwenza? Nansi imibuzo ongazibuza yona: ‘Ngihlala ngicabanga ngomsebenzi wami yini nxa ngisemihlanganweni yebandla loba ekutshumayeleni? Ngihlala ngikhathazeka yini ngokuthi ngizaba lemali eyeneleyo esikhathini esizayo? Imali kanye lenotho sekubangela ukuthi ngingazwanani lomkami yini? Ngingazimisela yini ukwenza umsebenzi okhangelelwa phansi kodwa ongivumela ukuthi ngibe lesikhathi esinengi sokukhonza uJehova?’ (1 Tim. 6:9-12) Nxa sicabangisisa ngemibuzo le kumele sikhumbule ukuthi uJehova uyasithanda futhi uthembisa labo abazinikele kuye esithi: “Kangisoze ngikutshiye loba sekutheni, njalo kangisoze ngikulahle loba sekutheni.” Yikho umphostoli uPhawuli wabhala wathi: “Indlela eliphila ngayo kayingabi ngeyokuthanda imali.”​—Heb. 13:5, 6.

11. Ukuzilibazisa umuntu akukhethayo kungenzani?

¹¹ UJehova ufuna sikholise ukuphila futhi ukuzilibazisa kwenza sikholise. ILizwi lakhe liyakusekela lokho ngoba lithi “akukho okungcono emuntwini ngaphandle kokuthi adle, anathe njalo azuze ukusuthiseka ngomsebenzi wakhe.” (UmTshu. 2:24) Kodwa okokuzilibazisa okunengi okusemhlabeni lo kungasiphambanisa. Kwenza  abantu abanengi baziphathe kubi njalo kubakhuthaza ukuthi bavumele loba bathande izinto iLizwi likaNkulunkulu elithi zimbi.

12. Ngokwalokho okutshiwo ku-1 Khorinte 10:21, 22, kungani kumele sikhethe kuhle esizilibazisa ngakho?

¹² Sifuna ukuzinikela kuJehova ngenhliziyo yonke yikho asingeke sidle “etafuleni kaJehova lasetafuleni yamadimoni.” (Bala u-1 Khorinte 10:21, 22.) Izikhathi ezinengi ukudla lomunye umuntu kutshengisa ukuthi lingabangane. Nxa singakhetha ukuzilibazisa ngezinto ezilodlakela, isidimoni, ukuziphatha okubi loba okunye okwenza sibe lezifiso lemicabango emibi kuyabe kufanana lokuthi sidla lezitha zikaNkulunkulu ukudla ezikuphekileyo. Lokhu kuzasilimaza kuphinde kuphambanise ubungane bethu loJehova.

13-14. Ngokwalokho okutshiwo kuJakhobe 1:14, 15, kungani kumele sinanzelele ezokuzilibazisa esizikhethayo? Nika umzekeliso.

¹³ Ezokuzilibazisa zifanana njani lokudla? Nxa sisidla siyakhetha esikufaka emlonyeni. Kodwa nxa sesiginyile asingeke sikhethe ukuthi ukudla kuzakwenzani emizimbeni yethu. Ukudla okwakha umzimba kwenza sibe lempilakahle kodwa okungawakhiyo kuyawulimaza. Lokhu ngeke kuhle kwenzakale khonapho kodwa kuzakhanya ngokuya kwesikhathi.

¹⁴ Kuyafanana lasendabeni yokuzilibazisa. Nxa sikhetha esizilibazisa ngakho siyabe sikhetha esikufaka engqondweni zethu. Ngemva kwalokho izinto esikhethe ukuzilibazisa ngazo zingasinceda loba ziphambanise inhliziyo lengqondo zethu. Ukuzilibazisa ngezinto ezinhle kuyasinceda kodwa ukuzilibazisa ngezinto ezimbi kuyasilimaza. (Bala uJakhobe 1:14, 15.) Akusoze kuhle kukhanye khonapho ukuthi esizilibazisa ngakho kusilimaza njani kodwa kuzavela ngemva kwesikhathi. Yikho iBhayibhili lisixwayisa lisithi: “Lingayengwa: UNkulunkulu ngeke aqilwe. Loba yini umuntu ayihlanyelayo uzavuna yona futhi, ngoba lowo ohlanyela ehlose ukuthokozisa inyama yakhe uzavuna ukonakala enyameni yakhe.” (Gal. 6:7, 8) Kuqakathekile sibili ukuthi sixwaye konke ukuzilibazisa okulezinto ezizondwa nguJehova.​—Hubo. 97:10.

15. Yisiphi isipho esisiphiwe nguJehova?

¹⁵ Abantu bakaJehova abanengi bayakukholisa ukubukela i-JW Broadcasting^®. Lesi yisititshi sethu se-TV esiku-inthanethi esilezinto ezisincedayo. Udadewethu okuthiwa nguMarilyn wathi: “I-JW Broadcasting ingenze ngathokoza kakhulu njalo ngingabukela konke okutholakala lapho ngoba kuyanginceda. Nxa ngilesizungu kumbe ngidanile ngiyabukela inkulumo ekhuthazayo kumbe uhlelo loKukhonza Kwekuseni. Lokhu kwenza ngisondele kakhulu kuJehova lasenhlanganisweni yakhe. I-JW Broadcasting iyintshintshe kakhulu impilo yami.” Wena uyasiqakathekisa yini isipho lesi esivela kuJehova? Nyanga zonke kulohlelo olutsha oluphuma ku-JW Broadcasting futhi kulamavidiyo lokulalelwayo kanye lezingoma ezikhuthazayo ongazilalela loba nini.

16-17. Kungani kumele sinanzelele isikhathi esisisebenzisa sizilibazisa njalo singakwenza njani lokho?

¹⁶ Akumelanga sinanzelele kuphela izinto esizilibazisa ngazo kodwa kumele sinanzelele lokuthi sizilibazisa okwesikhathi esinganani. Nxa singayekela ukwenza njalo singacina sizilibazisa okwesikhathi eside besesisala silesikhathi esincane sokwenza izinto eziphathelane lokukhonza. Kwabanengi kunzima ukuthi bazikhuze endabeni  yesikhathi abasiqeda bezilibazisa. Udadewethu oleminyaka engu-18 okuthiwa ngu-Abigail uthi: “Ukubukela i-TV kuyangiphumuza ingqondo nxa ngidiniwe. Kodwa ngingayekela ukunanzelela ngicina sengiyibukele okwesikhathi eside.” Umzalwane osakhulayo okuthiwa nguSamuel uthi: “Kwezinye izikhathi ngibukela amavidiyo amanengi amafitshane ku-inthanethi. Ngiyabe ngisithi ngizabukela eyodwa kodwa ngiqabuke sengibukele okwamahola amathathu kusiya kwamane.”

¹⁷ Ungenzani ukuze ungaqedi isikhathi eside kakhulu uzilibazisa? Qala ngokubona ukuthi vele uzilibazisa okwesikhathi esinganani. Kuzame lokhu okweviki eyodwa. Bhala kukhalenda isikhathi osiqeda ubukele i-TV, uku-inthanethi kumbe udlala imidlalo efonini loba ku-tablet. Nxa ungabona ukuthi uqeda isikhathi eside kakhulu ezintweni lezi, zama ukwenza uhlelo. Faka izinto eziqakathekileyo kuqala ubusuhlela lesikhathi sokuzilibazisa. Ngemva kwalokho cela uJehova akuncedise wenze njengoba uhlelile. Nxa ungenza njalo uzaba lesikhathi kanye lamandla okutaditsha iBhayibhili, okwenza ukukhonza kwemuli, okungena imihlangano lokutshumayela. Kawusoze uzithonisise ngesikhathi osisebenzisa uzilibazisa.

18-19. Singatshengisa njani ukuthi sizinikele kuJehova ngenhliziyo yonke?

¹⁸ Ngemva kokubhala ngokuphela komhlaba kaSathane langomhlaba omutsha ozayo umphostoli uPhetro wathi: “Bathandekayo, njengoba lilindele izinto lezi, yenzani konke okusemandleni enu ukuthi ekucineni alithole lingelasici, limsulwa njalo lilokuthula.” (2 Phet. 3:14) Nxa singalalela iseluleko lesi futhi senze okusemandleni ethu ukuthi siphile njalo sikhonze uJehova ngendlela ayifunayo siyabe sitshengisa ukuthi sizinikele kuye ngenhliziyo yonke.

¹⁹ USathane kanye lomhlaba wakhe bazaqhubeka bezama ukusenza siqakathekise ezinye izinto kulokukhonza uJehova. (Luk. 4:13) Kodwa asisoze sithande omunye umuntu loba eyinye into ukwedlula uJehova. Sizimisele ukuzinikela kuye ngenhliziyo yonke ngoba vele kumele senze njalo.