1. Yisiphi isinqumo esihle kulazo zonke umuntu angasenza?

IZIKHATHI ezinengi izinqumo ezenziwa ngabazali ziyabanceda loba zibalimaze abantwababo futhi impumela yakhona ingahlala isikhathi eside. Nxa bengenza izinqumo ezimbi abantwababo bangathwala nzima kodwa nxa bangenza ezinhle bazathokoza. Lanxa kunjalo abantwana labo kumele benze izinqumo ezinhle. Isinqumo esihle kulazo zonke umuntu angasenza ngesokukhonza uBaba wethu olothando uJehova.—Hubo. 73:28.

2. Yiziphi izinqumo ezinhle ezenziwa nguJesu labazali bakhe?

² Abazali bakaJesu babezimisele ukuncedisa abantwababo ukuthi bakhonze uJehova. Izinqumo abazenzayo zatshengisa ukuthi babeqakathekisa ukumkhonza ukwedlula loba yini. (Luk. 2:40, 41, 52) UJesu laye wenza izinqumo ezamnceda ukuthi enze intando kaJehova. (Mat. 4:1-10) Waba yindoda elomusa, eqotho njalo elesibindi. Bonke abazali abathanda uJehova bangazigqaja futhi bathokoze ngokuba lendodana enjalo.

3. Sizaxoxa ngani esihlokweni lesi?

³ Esihlokweni lesi sizaxoxa ngemibuzo elandelayo: Yiziphi izinqumo ezinhle uJehova azenzayo ngokuphathelane loJesu? Abazali abangamaKhristu bangafundani kulokho okwenziwa ngabazali bakaJesu? Abantwana abangamaKhristu bona bafundani kulokho okwenziwa nguJesu?

4. Yisiphi isinqumo esiqakathekileyo uJehova asenzayo ngokuphathelane leNdodana yakhe?

⁴ UJehova wakhethela uJesu abazali abahle kakhulu.  (Mat. 1:18-23; Luk. 1:26-38) Amazwi kaMariya asuka enhliziyweni alotshwe eBhayibhilini atshengisa ukuthi wayemthanda kakhulu uJehova kanye leLizwi lakhe. (Luk. 1:46-55) Lendlela uJosefa alalela ngayo lokho uJehova amtshela khona itshengisa ukuthi wayemthanda futhi efuna ukumthokozisa.—Mat. 1:24.

5-6. Yiziphi izinto uJehova avumela uJesu ukuthi zimehlele?

⁵ UJehova kazange akhethele uJesu abazali abanothileyo. Umhlatshelo owenziwa nguJosefa loMariya ngemva kokuzalwa kukaJesu uveza ukuthi babengabayanga. (Luk. 2:24) Kungenzakala uJosefa wayelokuyindawana eceleni komuzi wakhe eNazaretha lapho ayesenzela khona umsebenzi wokubaza. Kumele ukuthi babengelamali enengi kumbe izinto ezinengi njengoba bacina sebelabantwana abayisikhombisa kumbe abedlula lapho.—Mat. 13:55, 56.

⁶ UJehova wavikela uJesu kwezinye izingozi kodwa kazange amvikele kubo bonke ubunzima obamehlelayo. (Mat. 2:13-15) Ngokwesibonelo, uJesu wayelezihlobo ezazingelakholo kuye. Kufanele ukuthi kwamdanisa ukuba lamalunga emuli aqalisa engakholwa ukuthi unguMesiya. (Mak. 3:21; Joh. 7:5) Kanti njalo kumele ukuthi wezwa ubuhlungu bokufelwa nguyise uJosefa. Lokhu kwakungabe kusitsho ukuthi njengezibulo kwasekumele enze umsebenzi owawusenziwa nguyise. (Mak. 6:3) Wathi esekhulakhulile wafunda ukunakekela imuli yangakibo futhi kumele ukuthi wayesebenza nzima ukuze bathole ababekudinga. Ngakho wayekwazi ukuthi kunjani ukudinwa ngemva kokusebenza ilanga lonke.

7. (a) Yiphi imibuzo okumele abazali kanye lalabo abatshadileyo abafuna ukuba labantwana bazibuze yona? (b) Abazali bangamsebenzisa njani uZaga 2:1-6 ukuze bafundise abantwababo?

⁷ Nxa litshadile futhi lifuna ukuba labantwana zibuzeni: ‘Singabantu abathobekileyo yini abamthandayo uJehova leLizwi lakhe? UJehova angasikhetha yini ukuthi sondle usana oluligugu?’ (Hubo. 127:3, 4) Nxa ungumzali zibuze: ‘Ngiyabafundisa yini abantwabami ukuqakatheka kokuthi basebenze nzima?’ (UmTshu. 3:12, 13) ‘Ngenza konke okusemandleni ami ukuthi ngibavikele kuloba yini engabalimaza emhlabeni lo kaSathane?’ (Zaga. 22:3)  Ngeke wenelise ukuvikela abantwabakho kubo bonke ubunzima obungabehlela. Kodwa ungabancedisa ukuthi babulungele ngokuqhubeka ubafundisa ngendlela elothando ukuthi bathembele eLizwini likaNkulunkulu. (Bala iZaga 2:1-6.) Ngokwesibonelo, nxa isihlobo singakhetha ukutshiya uJehova, sebenzisa iBhayibhili ukuze ubancede babone ukuthi kungani kumele bahlale beqotho kuJehova. (Hubo. 31:23) Nxa kungafa isihlobo kumbe umngane, batshengise amavesi angabaduduza futhi abenze bahlaliseke.—2 Khor. 1:3, 4; 2 Tim. 3:16.

8. Ngokwalokho okutshiwo kuDutheronomi 6:6, 7, kuyini okwenziwa nguJosefa loMariya?

⁸ UJosefa loMariya bancedisa uJesu ukuthi enze izinto ezithokozisa uNkulunkulu ngoba balandela lokho akutshela abazali. (Bala uDutheronomi 6:6, 7.) Babemthanda sibili uJehova futhi ababekuqakathekisa kakhulu yikuncedisa abantwababo ukuthi labo bamthande.

9. Yisiphi isinqumo esiqakathekileyo esenziwa nguJosefa loMariya?

⁹ UJosefa loMariya bakhetha ukuhlala bekhonza uJehova belabantwababo. Akuthandabuzwa ukuthi maviki wonke babesiya esinagogeni eNazaretha futhi minyaka yonke babesiya eJerusalema ukuyananza iPhasika. (Luk. 2:41; 4:16) Kumele ukuthi besendleleni besiya eJerusalema babefundisa uJesu labanawakhe ngembali yabantu bakaJehova, futhi bedlula bebona ezinye indawo okukhulunywa ngazo eMibhalweni. Njengoba imuli yabo yayilokhu ikhula, kufanele ukuthi kwakusiba nzima ukuthi bahlale besenza izinto eziphathelane lokukhonza. Kodwa kabazange bayekele yikho uJehova wababusisa. Imuli yabo yahlala iseduze loJehova ngenxa yokuthi babeqakathekisa ukumkhonza.

10. Abazali abangamaKhristu bafundani kulokho okwenziwa nguJosefa loMariya?

¹⁰ Abazali abathanda uJehova bafundani kulokho okwenziwa nguJosefa loMariya? Okuqakatheke kakhulu yikuthi batshengise abantwababo ngalokho abakutshoyo labakwenzayo ukuthi bayamthanda sibili uJehova. Isipho esingcono kakhulu abangasinika abantwababo yikubancedisa ukuthi bathande uJehova. Okunye okuqakatheke kakhulu abangakwenza yikubafundisa  ukuthi bahlale betaditsha iBhayibhili, bethandaza, besiya emihlanganweni yebandla njalo betshumayela. (1 Tim. 6:6) Kanti njalo kumele babanike abakudingayo. (1 Tim. 5:8) Kodwa okufanele bakukhumbule yikuthi okuzakwenza abantwababo basinde futhi bangene emhlabeni omutsha yibungane babo loJehova hatshi imali kumbe izinto abalazo. *—Hez. 7:19; 1 Tim. 4:8.

11. (a) U-1 Thimothi 6:17-19 angabanceda njani abazali ukuthi benze izinqumo ezinhle nxa bekhulisa abantwababo? (b) Yiziphi izinto elingazenza liyimuli futhi yiziphi izibusiso elizazithola? (Khangela ibhokisi elithi “ Elingakwenza.”)

¹¹ Kuyathokozisa kakhulu ukubona abazali abanengi abangamaKhristu bekhetha ukwenza izinto ezizanceda abantwababo ukuthi basondele kuJehova. Bahlala besenza izinto eziphathelane lokukhonza beyimuli. Bayahamba emihlanganweni yebandla lemikhulu futhi bayatshumayela. Ezinye imuli zitshumayela endaweni okungajayelanga ukutshunyayelwa kuzo. Ezinye zivakatshela emawofisini amagatsha kumbe zincedise emisebenzini eyenziwa ezakhiweni zenhlanganiso. Izimuli ezikhetha ukwenza izinto lezi zisebenzisa imali futhi zingahlangana lobunye ubunzima. Kodwa uJehova uzazibusisa ngenxa yalokho ezikwenzayo. (Bala u-1 Thimothi 6:17-19.) Izikhathi ezinengi abantwana abakhulela emulini ezinje baqhubeka besenza izinto ezinhle abazifundiswayo lanxa sebekhulile njalo bayathokoza ngendlela abazali babo ababakhulisa ngayo. *—Zaga. 10:22.

12. UJesu kwakumele enzeni esekhulile?

¹² UYise kaJesu osezulwini uhlala esenza izinqumo ezinhle futhi labazali bakhe basemhlabeni benza izinqumo ezinhle. Kodwa uJesu wathi esekhulile kwasekumele azenzele ezakhe izinqumo. (Gal. 6:5) Wayelenkululeko yokuzikhethela njengathi sonke. Wayengakhetha ukuzenzela akufunayo kulokuthi enze intando kaNkulunkulu. Kodwa wakhetha ukwenza izinto ezithokozisa uJehova. (Joh. 8:29) Abantwana bafundani kuye?

13. Yisiphi isinqumo esiqakathekileyo uJesu asenza esesemncane?

¹³ UJesu wakhetha ukulalela abazali bakhe esesemncane. Kazange azitshele ukuthi wazi okunengi kulabo kodwa “waqhubeka ezehlisa kubo.” (Luk. 2:51) Wayelizibulo yikho kwakulezinto ezinengi okwakukhangelelwe ukuthi azenze. Akuthandabuzwa ukuthi wenza konke  okusemandleni akhe ukuthi azenze lezozinto. Wasebenza nzima ngesikhathi efundiswa ukubaza nguyise uJosefa ukuze ancedise ekunakekeleni imuli yangakibo ngalokho ekudingayo.

14. Sikwazi njani ukuthi uJesu wayekukhuthalele ukutaditsha iLizwi likaNkulunkulu?

¹⁴ Kungenzakala abazali bakaJesu bamtshela ngokuzalwa kwakhe okuyisimangaliso lalokho izithunywa zikaNkulunkulu ezazikutshilo ngaye. (Luk. 2:8-19, 25-38) Kodwa uJesu waphinda wataditsha iMibhalo eyedwa. Wayekukhuthalele lokhu ngoba eleminyaka engu-12 kuphela abafundisi eJerusalema “babelokhu bemangaliswa yikuzwisisa kwakhe lezimpendulo zakhe.” (Luk. 2:46, 47) Ngalesosikhathi wayevele esekwazi ukuthi uJehova nguYise.—Luk. 2:42, 43, 49.

15. UJesu watshengisa njani ukuthi wayekhethe ukwenza intando kaYise?

¹⁵ UJesu wathi esekwazi lokho uJehova ayefuna akwenze, wakhetha ukukwenza. (Joh. 6:38) Wayekwazi ukuthi abantu abanengi bazamzonda. Lanxa wayengafuni ukuthi bamzonde, wakhetha ukulalela uJehova. Wathi esebhabhathiziwe ngo-29 C.E., ayekuqakathekisa kakhulu yikwenza intando kaJehova. (Heb. 10:5-7) Langesikhathi esesifa esigodweni sokuhlutshwa, wayelokhu ezimisele ukwenza intando kaYise.—Joh. 19:30.

16. Abantwana bafundani kuJesu?

¹⁶ Lalela abazali bakho. Abazali bakho balesono njengoJosefa loMariya. Kodwa yibo uJehova abanike umsebenzi wokuthi bakuvikele futhi bakufundise. Nxa ungabalalela njalo ubahloniphe ‘kuzakuhambela kuhle.’—Efe. 6:1-4.

17. Ngokwalokho okutshiwo kuJoshuwa 24:15, yisiphi isinqumo okumele senziwe ngabantwana?

¹⁷ Khetha ukuthi uzakhonza bani. Kumele umazi kuhle uJehova, uyazi intando yakhe njalo uyenze. (Rom. 12:2) Ungenza njalo, uzakwenza isinqumo esiqakatheke kulazo zonke sokukhonza uJehova. (Bala uJoshuwa 24:15; UmTshu. 12:1) Nxa ungabala iBhayibhili nsuku zonke futhi ulitaditshe, uzamthanda kakhulu uJehova njalo ukholo lwakho luzaqina.

18. Abantwana kumele bakhethe ukwenzani futhi kuzakwenzakalani nxa bengenza njalo?

¹⁸ Qakathekisa ukwenza intando kaJehova ukwedlula loba yini. Umhlaba kaSathane  uthembisa ukuthi uzathokoza nxa ungasebenzisa iziphiwo zakho ukuze uqakathekise okufunayo. Kodwa iqiniso yikuthi labo abagijimisa inotho bazigwaza “yonke indawo ngezinhlungu ezinengi.” (1 Tim. 6:9, 10) Nxa ungalalela uJehova uqakathekise ukwenza intando yakhe ukwedlula loba yini uzathokoza njalo “uzaphumelela.”—Josh. 1:8.

19. Abazali kumele bakhumbuleni?

¹⁹ Bazali, yenzani konke okumandleni enu ukuthi lincedise abantwabenu bakhonze uJehova. Thembani uJehova, uzalincedisa ukuthi lenze izinqumo ezinhle. (Zaga. 3:5, 6) Khumbulani ukuthi okuzanceda kakhulu abantwabenu yilokho elikwenzayo ukwedlula lokho elikutshoyo. Ngakho yenzani izinqumo ezizabanceda bathokozise uJehova.

20. Yiziphi izibusiso ezizatholwa ngabantwana nxa bangakhetha ukukhonza uJehova?

²⁰ Bantwana, abazali benu bangalincedisa ukuthi lenze izinqumo ezinhle empilweni. Kodwa kukini ukuthi lizazenza yini izinqumo lezo ukuze lithokozise uNkulunkulu. Yikho lingiselani uJesu likhethe ukukhonza uYihlo osezulwini olothando. Nxa lingenza njalo lizakukholisa ukuphila khathesi. (1 Tim. 4:16) Kanti njalo esikhathini esizayo lizathokoza kakhulu!