1. Kungani sisithi ukwenza abafundi ngumsebenzi osindisa ukuphila?

UKWENZA abafundi ngumsebenzi osindisa ukuphila. Kungani sisitsho njalo? UJesu wanika abafundi bakhe umlayo okuMathewu 28:19, 20, othi: ‘Hambani liyekwenza abantu babe ngabafundi, libabhabhathize.’ Kuqakatheke ngani ukubhabhathizwa? Kumele sibhabhathizwe nxa sifuna ukusindiswa. Umuntu ofuna ukubhabhathizwa kumele akholwe ukuthi umhlatshelo kaJesu lokuvuswa kwakhe yikho kuphela okungenza asindiswe. Yikho umphostoli uPhetro watshela amaKhristu wathi: ‘Ubhabhathizo lulisindisa ngokuvuswa kukaJesu Khristu.’ (1 Phet. 3:21) Ngakho nxa umfundi omutsha ebhabhathizwa uyabe eselethemba lokusindiswa.

2. U-2 Thimothi 4:1, 2 uthi kumele sibe ngabafundisi abanjani?

² Ukuze senze abafundi kumele sibe ‘zingcitshi zokufundisa.’ (Bala u-2 Thimothi 4:1, 2.) Lokhu kungenxa yokuthi uJesu wasinika umlayo othi: ‘Hambani liyekwenza abantu babe ngabafundi, libafundise.’ Umphostoli uPhawuli wathi ‘siphikelele’ emsebenzini lo ‘ngoba singenza njalo sizazisindisa thina kanye lalabo abasilalelayo.’ Waphinda wathi ‘siqaphele zikhathi zonke ukufundisa kwethu.’ (1 Tim. 4:16) Njengoba kumele sifundise abantu ukuze babe ngabafundi, kufanele sibe zingcitshi ekufundiseni.

3. Sizaxoxa ngani esihlokweni lesi?

³ Sifundisa amamiliyoni abantu iqiniso eliseBhayibhilini. Kodwa njengoba sifundile esihlokweni esidlulileyo, sifuna  ukwazi ukuthi singabancedisa njani abanengi babo ukuthi babe ngabafundi bakaJesu Khristu ababhabhathiziweyo. Esihlokweni lesi sizaxoxa ngezinye izinto ezinhlanu okumele zenziwe ngofundisayo ukuze ancedise umfundi athuthuke aze abhabhathizwe.

4. Kungani ofundisayo kumele azibambe nxa efundisa umuntu iBhayibhili? (Khangela lamabala angaphansi.)

⁴ Siyakuthanda lokho esikufundisayo okuseLizwini likaNkulunkulu yikho singafuna ukukhuluma kakhulu ngakho. Kodwa umuntu owenzisa iSifundo Se-Nqabayokulinda, iSifundo SeBhayibhili Sebandla kumbe oqhuba isifundo seBhayibhili akumelanga akhulume kakhulu. Ofundisayo kumele azibambe angazami ukukhuluma konke akwaziyo ngevesi ethile kumbe ngendaba ethile ukuze avumele iBhayibhili lifundise. * (Joh. 16:12) Qathanisa ulwazi lweBhayibhili owawulalo ngesikhathi ubhabhathizwa lalolo osulalo khathesi. Kumele ukuthi wawukwazi izimfundiso eziyisisekelo kuphela. (Heb. 6:1) Ngakho ungazami ukugqiba umfundi omutsha ngolwazi ngoba lawe kukuthethe iminyaka ukuthi uze ube lolwazi osulalo khathesi.

5. (a) Ngokwalokho okutshiwo ku-1 Thesalonika 2:13, sifuna umuntu esimfundisayo aboneni? (b) Singenzani ukuze umfundi akhulume akucabangayo ngalokho akufundayo?

⁵ Sifuna umuntu esimfundisayo abone ukuthi lokho akufundayo kuvela eLizwini likaNkulunkulu eliphefumulelweyo. (Bala u-1 Thesalonika 2:13.) Singakwenza njani lokho? Mkhuthaze ukuthi atsho ukuthi ucabangani ngalokho akufundayo. Mcele ukuthi laye achasise amanye amavesi kulokuthi kube nguwe ohlala umchasisela. Mncedise abone ukuthi lokho akufunda eLizwini likaNkulunkulu angakusebenzisa njani empilweni yakhe. Mbuze imibuzo ezamenza aveze indlela azizwa ngayo lalokho akucabangayo ngevesi ayibalileyo. (Luk. 10:25-28) Ngokwesibonelo, ungathi: “Yibuphi ubuntu bukaJehova okukhulunywa ngabo evesini le?” “Lokho osanda kukubala kungakunceda njani?” “Uthini ngalokho osanda kukubala?” (Zaga. 20:5) Okuqakatheke kakhulu yikuthi umfundi uyakuthanda futhi uyakusebenzisa akufundayo, hatshi ukuthi kunganani akwaziyo.

6. Kunceda ngani ukuhamba lommemezeli oyingcitshi nxa sisiyaqhuba isifundo?

⁶ Nxa uyake uhambe labamemezeli abazingcitshi usiyaqhuba isifundo seBhayibhili ungababuza ukuthi babona angani ufundisa njani lokuthi uyalivumela yini iBhayibhili lifundise. Kumele uthobeke  nxa ufuna ukuba yingcitshi ekufundiseni. (Khangela imiSebenzi 18:24-26.) Ungabuza ummemezeli oyingcitshi ukuthi ubona angani umfundi uyakuzwisisa yini akufundayo. Ungamcela lokuthi asale efunda lomfundi wakho nxa kuyikuthi uzabe ungekho. Lokhu kuzenza umfundi angeqisi ukufunda futhi abone ukuthi kuqakatheke kanganani ukuthi enze njalo. Ungazitsheli ukuthi umuntu ofunda laye ngumfundi wakho wedwa lokuthi kakula omunye ongafunda laye. Phela ufuna ukwenza lokho okuzanceda umfundi wakho ukuze aqhubeke efunda okunengi.

7. Kuyini okunganceda umfundi ukuthi akuthande akufundayo?

⁷ Umfundi kumele abone ukuthi uyatshiseka lokuthi uyaqiniseka ngalokho okufundiswa liBhayibhili. (1 Thes. 1:5) Lokhu kungenza akuthande akufundayo. Mhlawumbe ungamtshela ukuthi iBhayibhili likuncede njani empilweni yakho. Ungenza njalo, uzabona ukuthi lingamnceda laye.

8. Kuyini okunye ongakwenza ukuze uncede umfundi wakho futhi kuzamnceda ngani ukwenza njalo?

⁸ Ngesikhathi lifunda, xoxela umfundi wakho ngabanye abafowethu labodadewethu ababelenhlupho ezinjengezakhe futhi bazinqoba. Ungahamba lomunye ummemezeli ongamnceda kumbe umtshengise indaba engamkhuthaza eku-jw.org ngaphansi kwengxenye ethi “IBhayibhili Liyamntshintsha Umuntu.” * Izihloko ezinje lamavidiyo kuzakwenza umfundi wakho abone ukuthi iBhayibhili lingamnceda empilweni yakhe.

9. Ungamkhuthaza njani umfundi wakho ukuthi axoxele abangakibo labangane bakhe lokho akufundayo?

⁹ Nxa umfundi wakho etshadile, umkakhe laye uyafunda yini? Nxa engafundi, mcele abekhona nxa lifunda. Khuthaza umfundi wakho ukuthi axoxele abangakibo labangane bakhe lokho akufundayo. (Joh. 1:40-45) Ungakwenza njani lokho? Ungambuza uthi: “Ungabachasisela njani abangakini umcijo lo?” kumbe uthi, “Yiwuphi umbhalo ongawusebenzisa ukuze ucacisele umngane wakho umcijo lo?” Ungenza njalo uyabe ufundisa umfundi wakho ukuthi laye enelise ukufundisa abanye. Ngokuhamba kwesikhathi nxa esefanele angaqalisa ukutshumayela lebandla. Ungambuza ukuthi ukhona yini omunye  amaziyo ofuna ukufunda iBhayibhili. Nxa ekhona ungahle uthintane laye ubusumcela ukuthi lifunde. Mbukelise ividiyo ethi Kwenzakalani Esifundweni SeBhayibhili? *

10. Ngokwalokho okutshiwo ku-1 Thesalonika 2:7, 8, ofundisayo angamlingisela njani uPhawuli?

¹⁰ Abafundisayo kumele batshengise ukuthi balendaba labafundi babo. Phela abafundi bangaba ngabafowethu kumbe odadewethu. (Bala u-1 Thesalonika 2:7, 8.) Kakulula ukuthi batshiyane labangane akade belabo lokuthi batshintshe indlela abaphila ngayo ukuze bakhonze uJehova. Yikho kufanele sibancede bathole abangane beqiniso ebandleni. Woba ngumngane womfundi wakho ngokuzinika isikhathi sokuba laye, hatshi nxa lifunda kuphela kodwa langezinye izikhathi. Ungatshengisa ukuthi ulendaba laye ngokumfonela, ngokumthumezela imeseji langokumvakatshela ngelinye ilanga elingayisilo elifunda ngalo.

11. Sifuna abantu esifunda labo iBhayibhili batholeni ebandleni njalo kungani?

¹¹ Kulesitsho esithi: “Umntwana ozalelwe ebantwini uphathwa ngabantu.” Ngendlela efananayo singathi: “Umfundi wenziwa libandla lonke.” Yikho abamemezeli abazingcitshi ekufundiseni bancedisa abafunda labo iBhayibhili ukuthi bajayelane labanye ebandleni abazabakhuthaza ukuthi basondele kuJehova futhi babancede nxa belenhlupho. Sifuna umfundi ngamunye azizwe ekhululekile ebandleni njalo azibone elilunga lemuli yabantu abakhonza uJehova. Sifuna ahawukele ukuba phakathi kwabafowethu labodadewethu abalothando. Lokhu kuzakwenza kube lula ukuthi atshiyane labantu abangasoze bamncede ukuthi athande uJehova. (Zaga. 13:20) Nxa abantu akade bengabangane bakhe bemninela khatshana, kasoze akhathazeke ngoba uyabe ekwazi ukuthi uzathola abangane beqiniso enhlanganisweni kaJehova.—Mak. 10:29, 30; 1 Phet. 4:4.

12. Kungani kumele sikhulume lomfundi wethu ngokuqakatheka kokuzinikela lokubhabhathizwa?

¹² Hlala ukhuluma ngokuthi kuqakatheke kakhulu ukuthi umuntu azinikele kuJehova njalo abhabhathizwe. Phela inhloso yethu yokufunda lomuntu iBhayibhili yikumncedisa ukuthi abe ngumfundi obhabhathiziweyo. Nxa umfundi esefunde okwezinyanga ezithile futhi eseqalisile ukungena imihlangano yebandla, kumele  azwisise ukuthi inhloso yethu yokufunda laye yikumsiza ukuthi abe nguFakazi kaJehova.

13. Kuyini umfundi akwenzayo ukuze abhabhathizwe?

¹³ Kulezinto ezinengana umfundi azenzayo ukuze abhabhathizwe. Ubamazi uJehova, amthande futhi abe lokholo kuye. (Joh. 3:16; 17:3) Kanti njalo uba ngumngane wakhe lowabafowethu labodadewethu ebandleni. (Heb. 10:24, 25; Jak. 4:8) Ngokuhamba kwesikhathi uyatshiya izinto ezimbi akade ezenza njalo aphenduke. (ImiSeb. 3:19) Uyatshela labanye lokho asekukholwa. (2 Khor. 4:13) Ngemva kwalokho uyazinikela kuJehova njalo abhabhathizwe. (1 Phet. 3:21; 4:2) Lelo lilanga elithokozisa kakhulu kubo bonke! Kumele ube umncoma umfundi nxa esenza konke lokhu njalo umkhuthaza ukuthi aqhubeke ekwenza.

14. Ofundisayo angahlola njani ukuthi umfundi wakhe uyathuthuka?

¹⁴ Kumele sibekezele nxa sincedisa umfundi ukuthi athuthuke aze abhabhathizwe. Kodwa kuzamele sihlole ukuthi uyafisa yini ukukhonza uJehova uNkulunkulu. Kukhona yini akwenzayo okutshengisa ukuthi uyazama ukulalela imilayo kaJesu kumbe ukholisa ukufunda izinto eziseBhayibhilini kuphela?

15. Kuyini okuzanceda ofundisayo abone ukuthi umfundi wakhe uyathuthuka?

¹⁵ Hlola ukuthi umfundi uyathuthuka yini. Ngokwesibonelo, uyatsho yini ukuthi uyamthanda uJehova? Uyathandaza kuJehova yini? (Hubo. 116:1, 2) Uyakuthanda yini ukubala iBhayibhili? (Hubo. 119:97) Uhlala eyingena yini imihlangano yebandla? (Hubo. 22:22) Usetshintshile yini indlela abephila ngayo? (Hubo. 119:112) Useqalisile yini ukuxoxela abangakibo labangane bakhe lokho akufundayo? (Hubo. 9:1) Okuqakatheke kakhulu, uyafuna yini ukuba nguFakazi kaJehova? (Hubo. 40:8) Nxa kungakhanyi ukuthi uyathuthuka, zama ukuzwisisa ukuthi kubangelwa yini ubusuxoxa laye ngomusa kodwa ungambhodi. *

16. Kuyini okungatshengisa ukuthi sekumele uyekele ukufunda lomuntu?

 ¹⁶ Kumele uhlole ukuthi uzaqhubeka yini ufunda lomuntu. Zibuze: ‘Umfundi uyalungiselela yini? Uyafuna yini ukubuya emihlanganweni yebandla? Usetshiyile yini imikhuba emibi? Usetshiyile yini inkolo yamanga?’ Nxa imibuzo le uyiphendule ngohatshi, ukuqhubeka ufunda lomuntu onjalo kuyabe kufanana lokuzama ukufundisa umuntu ukubhukutsha yena engafuni ukuba manzi! Kambe uyabe ufundelani lomuntu ongakuqakathekisiyo akufundayo njalo ongazimiselanga ukutshintsha indlela aphila ngayo?

17. Ngokwalokho okutshiwo ku-1 Thimothi 4:16, bonke abafundisa iBhayibhili kumele benzeni?

¹⁷ Siyawuqakathekisa kakhulu umsebenzi wethu wokwenza abafundi futhi sifuna ukuncedisa esifunda labo ukuthi bathuthuke baze babhabhathizwe. Yikho sizavumela iBhayibhili lifundise njalo sizafundisa ngentshiseko futhi sitshengise ukuthi siyaqiniseka. Sizakhuthaza umfundi ukuthi abe labangane ebandleni. Kanti njalo sizagcizelela ukuqakatheka kokuzinikela lokubhabhathizwa futhi sihlole ukuthi umfundi uyathuthuka yini. (Khangela ibhokisi “ Okumele Kwenziwe Ngofundisayo Ukuze Ancedise Umfundi Abhabhathizwe.”) Kuyasithokozisa kakhulu ukwenza umsebenzi lo osindisa ukuphila! Ngakho kasizimiseleni ukwenza konke okusemandleni ethu ukuncedisa esifunda labo iBhayibhili ukuthi bathuthuke baze babhabhathizwe.