1. Kungani abantu abanengi bephithene amakhanda?

KULAMASONTO amanengi azithi ngawesiKhristu futhi athi akhonza uNkulunkulu ngendlela emthokozisayo. Lokhu kutshiya abantu abanengi bephithene amakhanda! Bayazibuza ukuthi, “Kambe kulenkolo yeqiniso eyodwa yini kumbe zonke ziyamthokozisa uNkulunkulu?” Thina oFakazi bakaJehova siyaqiniseka yini ukuthi sifundisa iqiniso lokuthi indlela esikhonza ngayo uJehova yiyo yodwa emthokozisayo? Bukhona yini ubufakazi obusenza siqiniseke ngalokhu? Ake sibone.

2. Kungani umphostoli uPhawuli wayengathandabuzi ukuthi lokho ayekukholwa kwakuliqiniso? (U-1 Thesalonika 1:5)

² Umphostoli uPhawuli wayengathandabuzi lakancane ukuthi lokho ayekukholwa kuliqiniso. (Bala u-1 Thesalonika 1:5.) Okwamenza wakholwa yikuthi wayekukhuthalele ukutaditsha iLizwi likaNkulunkulu hatshi ukuthi wayenguthathekile. Wayekholwa ukuthi “yonke iMibhalo iphefumulelwe nguNkulunkulu.” (2 Tim. 3:16) Kuyini akufundayo eMibhalweni? Wathola ubufakazi obucacileyo bokuthi uJesu nguye uMesiya owayethenjisiwe kodwa abakhokheli abangamaJuda bakhetha ukungabi lendaba lobufakazi lobo. Abakhokheli benkolo labo ababengabazenzisi babesithi bafundisa abantu ngoNkulunkulu kodwa besenza izinto azizondayo. (Tit. 1:16) UPhawuli wayengafanani lamadoda la, yena wayengakhethi ukuthi yikuphi azakukholwa eLizwini likaNkulunkulu lokuthi yikuphi ayengasoze akukholwe. Wayezimisele ukufundisa lokulandela ‘konke okuyintando kaNkulunkulu.’—ImiSeb. 20:27.

3. Sekumele sibe lazo zonke izimpendulo zemibuzo esilayo yini ukuze siqiniseke ukuthi esikukholwayo kuliqiniso? (Khangela lebhokisi elithi “ Imicabango KaJehova Kanye Lemisebenzi Yakhe ‘Minengi Ngokweqileyo Ukuyibalisa.’”)

³ Abanye bacabanga ukuthi inkolo yeqiniso kumele yenelise  ukuphendula yonke imibuzo, ngitsho laleyo engelani leBhayibhili. Umcabango onjalo uqondile yini? Ake sixoxe ngalokho okwatshiwo nguPhawuli. Wakhuthaza amaKhristu ukuthi ‘ahlolisise zonke izinto,’ kodwa wavuma ukuthi kwakulezinto ezinengi laye ayengazizwisisi. (1 Thes. 5:21) Wabhala wathi: “Ulwazi esilalo kaluphelelanga.” Waphinda wathi: “Kasiboni kuhle ngesibuko sensimbi.” (1 Khor. 13:9, 12) UPhawuli wayengakuzwisisi konke njengoba nje lathi singazwisisi konke. Kodwa wayelizwisisa iqiniso eliyisisekelo elimayelana loJehova. Khonokho ayekwazi kwakumenza angathandabuzi ukuthi lokho ayekukholwa kuliqiniso.

4. Singenzani ukuze singathandabuzi ukuthi esikukholwayo kuliqiniso njalo sizafundani mayelana lamaKhristu eqiniso?

⁴ Okunye esingakwenza ukuze singathandabuzi ukuthi esikukholwayo kuliqiniso yikuqathanisa indlela yokukhonza esayitshengiswa nguJesu lalokho okwenziwa ngoFakazi bakaJehova lamuhla. Esihlokweni lesi sizafunda ngokuthi amaKhristu eqiniso awakhonzi izithombe, ahlonipha ibizo likaNkulunkulu, ayalithanda iqiniso njalo athandana ngenhliziyo yonke.

5. Sifundani kuJesu mayelana lendlela eqondileyo yokukhonza uNkulunkulu futhi singakusebenzisa njani akufundisayo?

⁵ UJesu wayemthanda kakhulu uJehova, yikho wakhonza yena kuphela ngesikhathi esezulwini lalapho esemhlabeni. (Luk. 4:8) Wafundisa abafundi bakhe ukuthi labo bakhonze uJehova kuphela. UJesu labafundi bakhe abathembekileyo abazange bake basebenzise izithombe ekukhonzeni. Phela uNkulunkulu unguMoya, yikho akulamuntu ongenza loba yini efanana laye! (Isaya. 46:5) Kodwa kuthiwani ngokwenza izithombe zabantu okuthiwa  bangcwele besesithandaza kuzo? Emthethweni wesibili owaphiwa uMosi, uJehova wathi: ‘Ungazenzeli izithombe ezifana lezinto ezisezulwini kumbe phansi emhlabeni. Ungakhothameli izithombe.’ (Eks. 20:4, 5) Labo abazimisele ukuthokozisa uNkulunkulu bawazwisisa kuhle amazwi la.

6. OFakazi bakaJehova lamuhla balandela yiphi indlela yokukhonza?

⁶ Abezembali bathi ngesikhathi sabaphostoli amaKhristu ayekhonza uNkulunkulu kuphela. Ngokwesibonelo elinye ibhuku lezembali lithi amaKhristu la ayengeke akwamukele ukuba lezithombe endaweni lapho ayekhonzela khona. Lalamuhla oFakazi bakaJehova balingisela amaKhristu akuqala. Asithandazi ezithombeni zalabo okuthiwa bangcwele kumbe ezingilosini; loJesu ngokwakhe asithandazi kuye. Kanti njalo kasiyisaluthi ifulegi kumbe senze loba yini engakhanya angani sesikhonza ilizwe esihlala kulo. Kumnyama kubomvu sizimisele ukulalela amazwi kaJesu athi: “NguJehova uNkulunkulu wakho okumele umkhonze.”—Mat. 4:10.

7. Yiwuphi umehluko okhona phakathi kwaboFakazi bakaJehova lamanye amasonto?

⁷ Abantu abanengi lamuhla bathanda ukulandela abafundisi abadumileyo. Babathanda kakhulu okokuthi sekungani bayabakhonza. Abantu bagcwala phamu emasontweni abo, bathenge lamabhuku abo njalo babanika imali enengi kumbe banikele ukuze basekele izinhlanganiso zabafundisi laba. Abanye bayakukholwa konke abakutshelwa ngabafundisi babo. Bayabaqakathekisa kakhulu okokuthi kuyabe kungani babona uJesu ngokwakhe. Kodwa labo abakhonza uJehova ngeqiniso abalabo abafundisi. Lanxa sibahlonipha labo abakhokhelayo ebandleni siyalalela amazwi kaJesu athi: “Lina lonke lingabafowabo bomunye lomunye.” (Mat. 23:8-10) Thina asikhonzi abantu, kungaba ngabafundisi benkolo kumbe abakhokheli bezombusazwe. Asibasekeli abafundisi kumbe abakhokheli bezombusazwe. Kodwa senza konke okusemandleni ethu ukuthi singazingeni ezomhlaba. Konke lokhu esesixoxe ngakho kwenza sitshiyane kakhulu lamanye amasonto azithi ngawesiKhristu.—Joh. 18:36.

8. Sazi njani ukuthi uJehova ufuna ibizo lakhe likhazinyuliswe lokuthi sitshele abantu bonke ngalo?

⁸ Ngelinye ilanga uJesu wathandaza wathi: “Baba khazimulisa ibizo lakho.” UJehova ngokwakhe wawuphendula umthandazo lo ngelizwi elikhulu livela ezulwini ethembisa ukuthi uzalikhazimulisa ibizo lakhe. (Joh. 12:28) Ngesikhathi esenza inkonzo yakhe, uJesu walikhazimulisa ibizo likaYise. (Joh. 17:26) Yikho amaKhristu eqiniso ekubona kuyisibusiso ukusebenzisa ibizo likaNkulunkulu lokutshela abanye ngalo.

9. Ngesikhathi sabaphostoli, amaKhristu atshengisa njani ukuthi ayalihlonipha ibizo likaNkulunkulu?

⁹ Ngesikhathi sabaphostoli kusanda kubunjwa ibandla lamaKhristu, uJehova ‘wanaka abezizweni ukuze athathe abantu bebizo lakhe phakathi kwabo.’ (ImiSeb. 15:14) AmaKhristu la ayekuthanda ukusebenzisa ibizo likaNkulunkulu lokutshela abantu ngalo. Ayelisebenzisa kanenginengi nxa etshumayela lalapho ebhala amabhuku eBhayibhili. * Ngokwenza njalo, atshengisa ukuthi ayalihlonipha ibizo likaNkulunkulu.—ImiSeb. 2:14, 21.

10. Yibuphi ubufakazi obutshengisa ukuthi oFakazi bakaJehova yibo kuphela abatshela abantu ngebizo lakhe?

¹⁰ Lamuhla abakhokheli benkolo abanengi  bazama ngazo zonke izindlela ukuthi bafihlele abantu iqiniso lokuthi uNkulunkulu ulebizo. Bayalikhipha ibizo likaNkulunkulu nxa behumutsha amaBhayibhili abo futhi kwamanye amasonto bayala ukuthi kusetshenziswe ibizo likaNkulunkulu ezinkonzweni zabo. * OFakazi bakaJehova bona benza abantu babelazi ibizo likaNkulunkulu yini? Ye. Nampu ubufakazi. Senza konke okusemandleni ethu ukuthi senze khona kanye okutshiwo libizo lethu, ukufakaza ngoJehova. (Isaya. 43:10-12) Sesiphrinte amaBhayibhili adlula 240 miliyoni e-Nguqulo Yomhlaba Omutsha, elebizo likaNkulunkulu ezindaweni lapho elakhitshwa khona ngabanye abahumutshi beBhayibhili. Kanti njalo sesiphrinte amabhuku asekelwe eBhayibhilini ngezindimi ezedlula 1 000 futhi emabhukwini la ibizo likaNkulunkulu litholakala kanengi. Kusegcekeni ukuthi oFakazi bakaJehova yibo kuphela abatshengisa ukuthi bayalihlonipha kakhulu ibizo likaNkulunkulu. Akula enye inkolo etshela abantu ngebizo likaNkulunkulu ukwedlula thina.

11. AmaKhristu akuqala atshengisa njani ukuthi ayalithanda iqiniso?

¹¹ UJesu wayelithanda iqiniso elimayelana loNkulunkulu lalokho ahlose ukukwenza. Indlela ayephila ngayo itshengisa ukuthi wayelazi iqiniso futhi watshela abanye ngalo. (Joh. 18:37) Abalandeli bakhe labo  babelithanda kakhulu iqiniso. (Joh. 4:23, 24) Yikho umphostoli uPhetro wathi ekhuluma ngokukhonza kwamaKhristu wathi ‘kuyindlela yeqiniso.’ (2 Phet. 2:2) AmaKhristu akuqala ayelithanda kakhulu iqiniso. Lokhu kwenza angamukeli izimfundiso zenkolo, amasiko kanye lemibono yabantu okwakuphikisana leqiniso. (Kol. 2:8) Lalamuhla amaKhristu eqiniso azimisele ‘ukuqhubeka ehamba eqinisweni’ ngokusekela konke akukholwayo eLizwini likaNkulunkulu langokuphila ngendlela evumelana lalo.—3 Joh. 3, 4.

12. IQula Elibusayo lenzani nxa lingananzelela ukuthi indlela esizwisisa ngayo okuthile kumele itshintshe futhi kungani lisenza njalo?

¹² OFakazi bakaJehova bayavuma ukuthi abahlali bezwisisa konke okuseBhayibhilini. Kwezinye izikhathi bayaphambanisa endleleni abachasisa ngayo lokho okutshiwo liBhayibhili kumbe ekuhleleni indlela izinto ezenziwa ngayo enhlanganisweni. Lokho akumelanga kusimangalise ngoba iMibhalo ikwenza kucace ukuthi indlela abantu abazwisisa ngayo iqiniso iqhubeka ithuthuka ngokuhamba kwesikhathi. (Kol. 1:9, 10) UJehova uveza iqiniso kancane kancane, yikho kumele sizimisele ukubekezela njengoba ukukhanya kweqiniso kuqhubeka kukhula. (Zaga. 4:18) Nxa iQula Elibusayo lingananzelela ukuthi kumele sitshintshe indlela esizwisisa ngayo kumbe esenza ngayo okuthile, lihle liphangise lenze njalo. Lamuhla amasonto amanengi atshintsha izimfundiso zawo ngenxa yokuthi afuna ukuthabisa amalunga awo kumbe abantu bomhlaba. Kodwa oFakazi bakaJehova bona benza utshintsho ngenxa yokuthi bafuna ukusondela kuNkulunkulu futhi bamkhonze ngendlela abayitshengiswa nguJesu. (Jak. 4:4) Nxa sisenza utshintsho ayisikho ukuthi siyabe silandela imibono yabantu bomhlaba esitshintshile kodwa siyabe sesilizwisisa ngcono iBhayibhili. Siyalithanda sibili iqiniso!—1 Thes. 2:3, 4.

13. Yibuphi ubuntu obabukhanya kakhulu kumaKhristu akuqala futhi bukhanya njani kuboFakazi bakaJehova lamuhla?

¹³ AmaKhristu akuqala ayesaziwa ngokuba lobuntu obuhle kodwa ubuntu obabukhanya kakhulu luthando. UJesu wathi: “Nxa lithandana, abantu bonke bazakwazi ukuthi lingabafundi bami.” (Joh. 13:34, 35) Lamuhla oFakazi bakaJehova emhlabeni wonke bayathandana futhi bamanyene. Sitshiyene kakhulu lamanye amasonto ngoba thina siyimuli lanxa sivela emazweni atshiyeneyo njalo silamasiko atshiyeneyo. Kuyakhanya ukuthi siyathandana sibili nxa sisemihlanganweni yethu yebandla, eyeziqinti leyezabelo futhi lokhu kwenza singathandabuzi ukuthi sikhonza uJehova ngendlela emthokozisayo.

14. Ngokwalokho okutshiwo kuKholose 3:12-14, singatshengisa njani ukuthi siyathandana kakhulu?

¹⁴ IMibhalo isikhuthaza ukuthi ‘sithandane kakhulu.’ (1 Phet. 4:8) Okunye esingakwenza ukuze sitshengise ukuthi siyabathanda abanye yikubathethelela lokubabekezelela nxa besiphambanisa. Kanti njalo siyazama ukuba ngabantu abaphanayo futhi abalomusa kubo bonke abasebandleni kuhlanganise lalabo abangabe besiphambanisile. (Bala uKholose 3:12-14.) Ukwenza njalo kuyatshengisa sibili ukuthi singamaKhristu eqiniso.

15. Kuyini esikwenzayo ukuze silandele indlela yokukhonza efanana leyamaKhristu akuqala?

¹⁵ Lathi silokhu silandela indlela yokukhonza efanana laleyo eyayilandelwa ngamaKhristu akuqala. Ngokwesibonelo, indlela esihlelwe ngayo iyafanana leyamaKhristu lawo. Lathi  silababonisi abahambelayo, abadala lezinceku ezikhonzayo. (Flp. 1:1; Tit. 1:5) NjengamaKhristu akuqala, siyayihlonipha imithetho kaJehova emayelana lokutshada, ukuya emacansini kanye legazi futhi siyalivikela ibandla kulabo abangafuni ukulandela imithetho kaNkulunkulu.—ImiSeb. 15:28, 29; 1 Khor. 5:11-13; 6:9, 10; Heb. 13:4.

16. Sifundani ku-Efesu 4:4-6?

¹⁶ UJesu wathi abanengi bazakuthi bangabalandeli bakhe kodwa ayisibo bonke abazabe bengabeqiniso. (Mat. 7:21-23) IMibhalo yaphinda yasixwayisa ukuthi ezinsukwini zokucina abanengi ‘bazakhanya angathi bayamesaba uNkulunkulu.’ (2 Tim. 3:1, 5) Lanxa kunjalo iBhayibhili liyakutsho ngokucacileyo ukuthi ‘kulokholo olulodwa’ olwamukelwa nguNkulunkulu.—Bala u-Efesu 4:4-6.

17. Ngobani abangabalandeli bakaJesu lamuhla futhi abakhonza uNkulunkulu ngendlela ayamukelayo?

¹⁷ Ngobani abakhonza uNkulunkulu ngendlela ayamukelayo lamuhla? Impendulo isegcekeni. NgoFakazi bakaJehova kuphela! Ubufakazi sibutholile. Sihlole indlela yokukhonza kweqiniso eyafundiswa nguJesu njalo yalandelwa ngamaKhristu akuqala. Kuyisibusiso esikhulu ukuba ngomunye wabantu bakaJehova lokulazi iqiniso ngaye langalokho ahlose ukukwenza. Sengathi singaqhubeka siligagadlele iqiniso futhi singakuthandabuzi lakancane lokho esikukholwayo!