AMA-ISRAYELI ayekuthanda kakhulu ukuhlabela lokutshaya amachacho. EBhayibhilini kulamavesi amanengi akhuluma ngamachacho ababewatshaya kanye lengoma ababezihlabela. Kuphinda kube lamabhuku azingoma, ngokwesibonelo ibhuku lamaHubo, iNgoma Yezingoma, kanye leZililo. Elinye ibhuku elithi Music in Biblical Life lithi ama-Israyeli ayewusebenzisa kakhulu umculo nxa esenza izinto ezitshiyeneyo nje empilweni.

Babesebenzisa umculo nsuku zonke. Ama-Israyeli ayetshaya amachacho aphinde ahlabele ukuze aveze ukuthi ayesizwa njani. (Isaya. 30:29) Nxa kwakubekwa inkosi kumbe kulemikhosi, loba nxa babenqobile empini, abesifazana babetshaya amathamborini ngapha abantu behlabela, bethokoza futhi begida. (Abahlu. 11:34; 1 Sam. 18:​6, 7; 1 Amakho. 1:​39, 40) Kanti njalo ama-Israyeli ayehlabela ingoma zokulila nxa efelwe. (2 Imilan. 35:25) ICyclopedia kaMcClintock loStrong ithi akuthandabuzwa ukuthi “amaHebheru ayewuthanda sibili umculo.”

Babesebenzisa umculo ezigodlweni zamakhosi. Amakhosi ako-Israyeli ayewuthanda kakhulu umculo. INkosi uSawuli yabiza uDavida esigodlweni sayo ukuze ayitshayele ihabhu. (1 Sam. 16:​18, 23) Ngemva kwesikhathi uDavida wathi eseyinkosi, wenza amachacho amatsha, wabhala ingoma ezimnandi futhi wahlela lamaqembu ayezahlabela ethempelini likaJehova. (2 Imilan. 7:6; Amos. 6:5) INkosi uSolomoni yayilabahlabeleli besilisa labesifazana esigodlweni sayo.—Umtshu. 2:8.

Babesebenzisa umculo ekukhonzeni uJehova. Okuqakatheke kakhulu yikuthi ama-Israyeli ayesebenzisa umculo nxa ayekhonza uJehova. Phela kwakulabantu abangu-4 000 ababehlabela futhi betshaya iziginci ethempelini leJerusalema. (1 Imilan. 23:5) Babetshaya amasimbali, leziginci, lamahabhu kanye lamacilongo. (2 Imilan. 5:12) Kodwa ayisibo bahlabeleli kuphela ababesebenzisa umculo nxa bekhonza uJehova. Kukhanya ama-Israyeli amanengi ayehlabela iNgoma zemiQanso nxa esiya emikhosini eyayisenziwa minyaka yonke eJerusalema. (Hubo. 120-134) Imibhalo yamaJuda ithi ama-Israyeli ayehlabela amaHubo okudumisa a ngesikhathi esidla iPhasika.

Lalamuhla abantu bakaJehova lokhu bewuqakathekisa umculo. (Jak. 5:13) Sidumisa uJehova ngokuhlabela. (Efe. 5:19) Ukuhlabela kwenza simanyane labafowethu labodadewethu. (Kol. 3:16) Kanti njalo umculo uyasiqinisa nxa sisebunzimeni. (Imiseb. 16:25) Nxa sihlabela siyabe sitshengisa ukuthi siyamthanda uJehova lokuthi silokholo kuye.