Hatshi. Akhuluma ngomuntu owayo ngenxa yokwehlelwa zinhlupho ezinengi abesevuka ngokuqhubeka eqinisela.

Ake sikhangele amanye amavesi akuZaga isahluko 24.“Ungacathameli indlu yomuntu olungileyo sengathi uyisigebengu, ungawuhlaseli umuzi wakhe; ngoba loba angaze awe kakhombisa umuntu olungileyo uyavuka futhi, kodwa ababi bazabhazalaliswa yizinhlupheko. Ungaqumbaqumbeki ngokuwa kwesitha sakho; nxa sikhubeka ungavumeli inhliziyo yakho ithokoze.”—Zaga. 24:15-17.

Abanye bacabanga ukuthi uvesi 16 ukhuluma ngomuntu owenza isono abesephenduka aphinde abe ngumngane kaNkulunkulu. Ngokwesibonelo, abafundisi ababili beNgilandi babhala bathi abatshumayeli bakudala labalamuhla bayichasisa njalo ivesi le. Abafundisi laba baphinda bathi ingcazelo le iveza ukuthi “kuyavuma ukuthi umuntu olungileyo enze isono esikhulu kodwa aqhubeke emthanda uNkulunkulu futhi engumngane wakhe ngenxa yokuthi uyabe ephendukile.” Ingcazelo le ingathokozisa umuntu ongafuni ukulwisana lesono ngoba angacabanga ukuthi lanxa angaze enze isono kanenginengi uNkulunkulu uzahlala emthethelela.

Kodwa lokho ayisikho okutshiwo nguvesi 16.

Ibala lesiHebheru elihunyutshwe ngokuthi ‘ukuwa’ kuvesi 16 lo-17 lisetshenziswa ngendlela ezitshiyeneyo. Lingatsho ukuwa bhu phansi. Ngokwesibonelo, inkabi ingawela phansi endleleni, umuntu angawa ephahleni lwendlu kumbe uhlamvu lwamabele lungawela phansi. (Dute. 22:4, 8; Amos. 9:9) Kodwa ibala leli lingaphinda libe lomunye umutsho, njengakuHubo 37: 23, 24 othi: “Nxa uJehova ethokoziswa yikuhamba komuntu, uyaqinisa izinyathelo zakhe; loba angakhubeka, kayikuwa, ngokuba uJehova uyamsekela ngesandla sakhe.”—Zaga. 11:5; 13:17; 17:20.

Nanzelela okwatshiwo nguSikhwicamfundo u-Edward H. Plumptre. Wathi: “Ibala lesiHebheru elithi [“ukuwa”] kalikaze lisetshenziswe nxa kukhulunywa ngokuwela esonweni.” Esinye isikhwicamfundo sichasisa uvesi 16 ngale indlela: “Akuncedi ukuphatha kubi abantu bakaNkulunkulu ngoba bazahlala bephumelela kodwa abantu ababi abasoze baphumelele.”

Lokhu esesixoxe ngakho kutshengisa ukuthi iZaga 24:16 azitsho ukuwela esonweni kodwa zitsho ukwehlela zinhlupho kanenginengi. Emhlabeni lo omubi esiphila kuwo umuntu olungileyo angagula kumbe ehlelwe ngobunye ubunzima loba angahlukuluzwa nguhulumende ngenxa yokholo lwakhe. Kodwa uyathemba ukuthi uNkulunkulu uzamsekela amncedise ukuthi aqinisele njalo aphumelele. Engxenye lawe sewake wananzelela ukuthi izikhathi ezinengi abantu bakaNkulunkulu bayenelisa ukulwisana lobunzima. Lokhu kungenxa yokuthi “uJehova uyabaxhasa bonke labo abawayo abaphakamise bonke labo abacubayo.”—Hubo. 41:1-3; 145:14-19.

“Umuntu olungileyo” kathokozi nxa abanye abantu besehlelwa zinhlupho. Kodwa uthokoziswa yikwazi ukuthi kuzabalungela ‘labo abamesabayo uNkulunkulu, abazithobayo kuNkulunkulu.’—UmTshu. 8:11-13; Jobe. 31:3-6; Hubo. 27:5, 6.