Ubuzibala yini izihloko ezisanda kuphuma ku-Nqabayokulinda? Nxa kunjalo, ungenelisa yini ukuphendula imibuzo elandelayo?

Kumele sibaphathe njani abagcotshiweyo?

Kumele silingisele ukholo lwabo kodwa akumelanga sibaqakathekise kakhulu. Siyaxwaya ukubancoma kakhulu. (Juda. 16) Akumelanga sibabuze ukuthi bagcotshwa njani.—w20.01, ikhasi 29.

Kuyini okukwenza uqiniseke ukuthi uJehova uyakwazi sibili?

IBhayibhili litshengisa ukuthi wakubona ungakazalwa lokuzalwa njalo uyayilalela imithandazo yakho. Uyakwazi okusenhliziyweni yakho lalokho okucabangayo futhi okwenzayo kungamthokozisa kumbe kumdanise. (1 ImiLan. 28:9; Zaga. 27:11) Ukudonsele kuye.—w20.02, ikhasi 12.

Kumele sikhulume nini futhi sithule nini?

Kumele sihlale sikulungele ukukhuluma ngoJehova. Kufanele sikhulume nxa sibona omunye esenza ulutho oluzabangela ukuthi enze iphutha elikhulu kakhulu. Abadala bebandla kumele bakhulume nxa bebona ukuthi kulomunye okufanele anikwe iseluleko. Kumele sithule nxa silingeka ukuthi sikhulume kumbe sibuze ngokuthi umsebenzi wethu wenziwa njani emazweni lapho ongavunyelwa khona. Kumele sithule nxa sisazi izinto eziyimfihlo.—w20.03, ikhasi 20-21.

Yiwuphi umehluko okhona phakathi kwentethe okukhulunywa ngazo kuJoweli isahluko 2 lakuSambulo isahluko 9?

UJoweli 2:20-29 uthi uNkulunkulu uxotshela khatshana intethe futhi uthembisa ukuhlawula ngenxa yomonakalo wazo. Ngemva kwalokho uNkulunkulu uthulula umoya wakhe. Lokhu kwagcwaliseka ngesikhathi abaseBhabhiloni behlasela ama-Israyeli langemva kwalokho. ISambulo 9:1-11 sifanisa abagcotshiweyo lezintethe ngoba bamemezela izahlulelo zikaNkulunkulu ezizakwehlela umhlaba lo omubi futhi lokhu kwenza abawusekelayo bangakhululeki.—w20.04, ikhasi 3-6.

Ngubani oyinkosi yasenyakatho lamuhla?

YiRussia labangane bayo. Bahlasele abantu bakaNkulunkulu, bavimba umsebenzi wokutshumayela njalo batshengise ukuthi bayabazonda oFakazi. Inkosi yasenyakatho ibizama ukuba lamandla kulenkosi yaseningizimu.—w20.05, ikhasi 13.

Zikhona yini ezinye “izithelo zomoya” ngaphandle kwalezo eziqanjwe kuGalathiya 5:22, 23?

Ye. Umoya ongcwele usinceda ukuthi sibe lobunye ubuntu obuhle njengokulunga. (Efe. 5:8, 9)—w20.06, ikhasi 17.

Ingaphi ingozi yokufaka izinto ezimayelana lawe kwezokuxhumana?

Okufaka kwezokuxhumana kwenza abanye bacabange ukuthi uyaziphakamisa hatshi ukuthi uthobekile.—w20.07, ikhasi 6-7.

Kuyini abamemezeli boMbuso abangakufunda kubagoli benhlanzi abazingcitshi?

Abagoli basebenza ngesikhathi lasendaweni lapho abangathola khona inhlanzi. Basebenzisa izinto zokugola eziyizo njalo balesibindi sokusebenza lanxa umumo utshintsha. Lathi kumele senze okufananayo emsebenzini wokutshumayela.—w20.09, ikhasi 5.

Singabancedisa njani esifunda labo iBhayibhili ukuthi bamthande kakhulu uJehova?

Kumele sibakhuthaze ukuthi babale iBhayibhili nsuku zonke futhi bacabangisise ngabakubalayo. Kufanele sibafundise lokuthandaza.—w20.11, ikhasi 4.

Amazwi kaPhawuli athi “kuKhristu bonke bazakwenziwa baphile” agoqela labobani?—1 Khor. 15:22.

Umphostoli uPhawuli wayengatsho ukuthi bonke abafileyo bazavuswa. Lapho esithi “bonke” wayegoqela lamaKhristu agcotshiweyo ‘ayengcweliswe aba munye loKhristu uJesu.’ (1 Khor. 1:2; 15:18)—w20.12, ikhasi 5-6.

Abagcotshiweyo bazakwenzani ngemva ‘kokutshintshwa ngokucwayiza kwelihlo ngesikhathi sokukhala kwecilongo lokucina’?—1 Khor. 15:51-53.

BeloKhristu bazelusa abantu ngentonga yensimbi. (Isam. 2:26, 27)—w20.12, ikhasi 12-13.