Esasezulwini, uJesu wafunda ukuba lobuntu obabuzamnceda ukuthi asebenze kuhle labanye esesemhlabeni. Singamlingisela njani? Nxa singahlola lokho akwenzayo sizathola izinto ezintathu ezingasinceda ukuthi sisebenze kuhle labanye futhi simanyane labafowethu labodadewethu.

Umuntu osebenza kuhle labanye uthobekile. Kaziboni engcono kulabo. UJesu wakufunda kuYise ukuba ngumuntu othobekileyo. Lanxa uJehova enguye yedwa ofanele ukubizwa ngokuthi Mdali, ufuna abanye bazi ngomsebenzi oqakathekileyo owenziwa yiNdodana yakhe. Yikho wakhuluma amazwi athi: “Asenze umuntu ngesimo sethu.” (Gen. 1:26) UJesu wabona ukuthi uYise uthobekile sibili ngesikhathi uJehova ekhuluma amazwi la.—Hubo. 18:35.

Esesemhlabeni, laye wayethobekile. Lapho abantu bemdumisa ngalokho ayekwenzile, yena wayedumisa uNkulunkulu. (Mak. 10:17, 18; Joh. 7:15, 16) UJesu wenza konke ayengakwenza ukuze kuhlale kulokuthula phakathi kwakhe labafundi bakhe futhi wayebaphatha njengabangane bakhe hatshi izigqili. (Joh. 15:15) Waze wabagezisa inyawo ukuze abafundise ukuba ngabantu abathobekileyo. (Joh. 13:5, 12-14) Lathi kumele siqakathekise esisebenza labo kulokuqakathekisa lokho okufunwa yithi. Kunengi esizaphumelela ukukwenza nxa ‘singabahlonipha’ abanye futhi singazihluphi  ngokuthi ngubani ozadunyiswa.—Rom. 12:10.   

Umuntu othobekileyo uyananzelela ukuthi ‘amaqhinga ayaphumelela ngabeluleki abanengi.’ (Zaga. 15:22) Kungelani lokuthi silolwazi olunganani kumbe sizingcitshi okunganani, kumele sikhumbule ukuthi akulamuntu okwazi yonke into. LoJesu ngokwakhe wavuma ukuthi kulezinto ayengazazi. (Mat. 24:36) Kanti njalo wayevumela abafundi bakhe ukuthi batsho abakwaziyo kumbe abakucabangayo ngendaba ethile. (Mat. 16:13-16) Yikho babekhululeka nxa belaye. Lathi nxa sithobekile, sikhumbula ukuthi asazi yonke into futhi silalela amacebo abanye, kuba lokuthula phakathi kwethu futhi lokho esikwenzayo ‘kuyaphumelela.’

Kuqakathekile sibili ukuthi abadala bebandla bathobeke njengoJesu nxa besebenza ndawonye. Kumele bakhumbule ukuthi umoya ongcwele ungenza loba nguphi umdala akhulume okuthile okuzabanceda ukuthi benze isinqumo esihle. Nxa bangazama ukwenza ukuthi wonke umuntu akhululeke ukutsho lokho akucabangayo ngesikhathi besenza imihlangano yabo, bazakwenza izinqumo ezizanceda ibandla lonke.

Umuntu ozwisisayo usebenza kuhle labanye. Kakhangelelanga ukuthi izinto zihlale zisenziwa ngendlela yakhe kodwa uyavuma ukulandela okutshiwo kumbe okwenziwa ngabanye. Akuthandabuzwa ukuthi uJesu wambona kanengi uYise etshengisa ukuthi uyazwisisa. Ngokwesibonelo, uJehova wamthuma emhlabeni ukuze azosindisa abantu okwakufanele bagwetshelwe ukufa.—Joh. 3:16.

Ngezinye izikhathi uJesu wayesenza izinto ayengahlelanga ukuzenza kumbe okwakungakhangelelwanga ukuthi azenze. Lokhu wayekwenza nxa kwakudingeka ukuthi enze njalo loba kungelanto embi ngokuzenza. Ngokwesibonelo, lanxa wayethunywe kwabako-Israyeli welapha indodakazi yowesifazana ongumFenikhiya. (Mat. 15:22-28) Kanti njalo watshengisa ukuthi uyazwisisa ngendlela ayephatha ngayo abafundi bakhe. Wamxolela umngane wakhe uPhetro owayemphike phambi kwabantu. Ngokuhamba kwesikhathi wamnika imisebenzi eqakathekileyo. (Luk. 22:32; Joh. 21:17; ImiSeb. 2:14; 8:14-17; 10:44, 45) Okwenziwa  nguJesu kuyasitshengisa sibili ukuthi ngezinye izikhathi kumele senze okufunwa ngabanye ukuze ‘kwaziwe ngabantu bonke ukuthi singabantu abazwisisayo.’—Flp. 4:5.

Nxa singabantu abazwisisayo sizenelisa ukusebenza ngokuthula labantu bonke lanxa belobuntu obutshiyeneyo. UJesu wabaphatha kuhle abanye okokuthi izitha zakhe ezazilomhawu zamsola zisithi ‘ungumngane wabathelisi lezoni.’ (Mat. 11:19) Lathi singamlingisela yini uJesu ngokusebenza kuhle labantu abatshiyene lathi? Umfowethu uLouis owasebenza labantu abatshiyeneyo ngesikhathi engumbonisi wesiqinti lalapho eseseBhetheli uthi: “Ukusebenza ndawonye labanye abantu abalesono kufanana lokwakha umduli ngamatshe angalinganiyo. Lokho akulula kodwa ungazama ngamandla wonke ukuwafaka kuhle, umduli uzaphuma uqondile. Ngizame ukwenza utshintsho endleleni engibona ngayo lengenza ngayo izinto ukuze ngisebenze ngokuthula labanye futhi siwenze kuhle umsebenzi.” Wenza kuhle kakhulu umfowethu!

Kunini lapho esingatshengisa khona ukuthi siyazwisisa ebandleni? Singakwenza lokho nxa siphume ekutshumayeleni labanye abaseqenjini lethu. Singatshumayela labamemezeli abalezimo ezitshiyene lezethu kumbe esingalingani labo. Singatshintsha yini ijubane esihamba ngalo kumbe indlela esitshumayela ngayo ukuze labo bakholise ekutshumayeleni?

Umuntu osebenza kuhle labanye ‘uzimisele ukwabelana’ labo. (1 Tim. 6:18) Ngesikhathi uJesu esebenza loYise, kumele ukuthi wananzelela ukuthi uYise wayengamfihleli lokho ayekwenza. Lapho uJehova ‘ehlela kuhle amazulu’ uJesu ‘wayekhona’ yikho wayengafunda kuye. (Zaga. 8:27) Ngesikhathi uJesu esesemhlabeni, wayezimisele ukwabelana labafundi bakhe izinto ayezitshelwe nguYise. (Joh. 15:15) Singalingisela uJehova ngokutshela abafowethu labodadewethu lokho esesikufundile. Umuntu osebenza kuhle labanye kayekeli ukubatshela izinto ezizabanceda esenzela ukuthi abe ngcono kulabo. Uyakuthanda ukutshela abanye izinto ezinhle azifundileyo.

Okunye esingakwenza yikukhuthaza esisebenza labo. Akuthandabuzwa ukuthi siyathokoza nxa abanye benanzelela esikwenzayo njalo besincoma ngenhliziyo yonke. UJesu wayebancoma ayesebenza labo ngokuhle ababekwenza. (Khangela uMathewu 25:19-23 loLukha 10:17-20) Waze wabatshela lokuthi ‘babezakwenza imisebenzi emikhulu’ kuleyakhe. (Joh. 14:12) Ngobusuku bokucina engakabulawa, wancoma abaphostoli bakhe abathembekileyo wathi: “Lina kalizange lingilahle ebunzimeni bami.” (Luk. 22:28) Kumele ukuthi amazwi la abakhuthaza sibili futhi enza bazimisela ukuqhubeka besenza okuhle. Lathi nxa singahlala sibancoma esisebenza labo bazathokoza njalo bakhuthale emsebenzini.

Umfowethu okuthiwa nguKayode uthi: “Umuntu osebenza kuhle labanye angaphambanisa ngezinye izikhathi. Lanxa kunjalo, wenza asebenza labo bathokoze futhi umsebenzi ube lula.” Wena usebenza njalo yini labanye? Mhlawumbe ungabuza abanye abafowenu labodadewenu ukuthi bona bakubona njani. Nxa bangathi bayakukholisa ukusebenza lawe njengoba nje abafundi babekukholisa ukusebenza loJesu, ungatsho ukhululekile njengomphostoli uPhawuli uthi: “Sisebenza lani ukuze lithokoze.”—2 Khor. 1:24.