Hatshi. Okwabhalwa nguDavida kwakuliqiniso futhi kungasiphupho.

Ake sikhangele akubhalayo evesini le lakwamanye ahambelana layo: “Ngizahlabela ngidumise ibizo lakho kuze kube nini lanini, ngigcwalise izifungo zami usuku ngosuku.” “Ngikudumisa ngenhliziyo yami yonke Jehova Nkulunkulu wami, ngizakhazimulisa ibizo lakho kuze kube nini lanini.” “Ngizalidumisa ibizo lakho kuze kube nini lanini.”—Hubo. 61:8; 86:12; 145:1,2.

UDavida wayengaphuphi, ecabanga ukuthi kasoze afe. Wayekwazi ukuthi uJehova wayetshilo ukuthi isono sasizabangela ukuthi abantu bafe njalo wavuma ukuthi laye uyisoni. (Gen. 3:3, 17-19; Hubo. 51:4, 5) Wayekwazi lokuthi amadoda athembekileyo anjengo-Abrahama, u-Isaka loJakhobe lawo acina efile. Kanti njalo uDavida wayekwazi ukuthi laye wayezakufa. (Hubo. 37:25; 39:4) Kodwa amazwi akhe atholakala kuHubo 61:8 atshengisa isifiso esikhulu ayelaso kanye lokuthi wayezimisele ukudumisa uNkulunkulu kuze kube nini lanini, okutsho ukuthi ingqe nje esaphila.—2 Sam. 7:12.

Ezinye izinto uDavida abhala ngazo zazimayelana lalokho okwenzakala empilweni yakhe njengoba sibona kuzethulo zeHubo 18, 51 lo-52. UDavida wayengumalusi. KuHubo 23 wathi uJehova ungumalusi osikhokhelayo, osivuselelayo losivikelayo. Yikho wayefuna ukukhonza uNkulunkulu ‘zonke izinsuku zokuphila kwakhe.’—Hubo. 23:6.

Khumbula ukuthi uJehova nguye owaphefumulela uDavida ukuthi abhale konke akubhalayo. Wabhala leziphrofetho ezazimayelana lezinto ezizakwenzakala esikhathini esizayo. Ngokwesibonelo kuHubo 110 uDavida wabhala ukuthi iNkosi yakhe ‘yayizahlala esandleni sokudla sikaNkulunkulu’ ezulwini iphiwe amandla amakhulu. Amandla la ayengawokuthi inqobe izitha zikaNkulunkulu ‘lokuthi ijezise izizwe.’ UDavida wayezakuba ngukhokho kaMesiya owayezabusa esezulwini njalo abe ‘ngumphristi kuze kube nini lanini.’ (Hubo. 110:1-6) UJesu wathi isiphrofetho esikuHubo 110 sasimayelana laye njalo sasizagcwaliseka esikhathini esizayo.—Mat. 22:41-45.

Kuyacaca-ke ukuthi uDavida waphefumulelwa ukuthi abhale ngezinto ezenzakala ngesikhathi sakhe lezinto ezazizakwenzakala esikhathini esizayo lapho azavuswa khona akholise ukudumisa uJehova kuze kube nini lanini. Lokhu kusinceda sibone ukuthi iHubo 37:10, 11 lo-29 lingabe lisitsho isimo esasikhona ko-Israyeli, liphinde likhulume ngezinto ezizabakhona esikhathini esizayo emhlabeni wonke lapho uJehova esegcwalise izithembiso zakhe.—Khangela indima 8 esihlokweni esithi “Uzakuba Lami EPharadayisi” esiku-Nqabayokulinda le.

Yikho-ke iHubo 61:8 lamanye amavesi ahambelana lalo atshengisa ukuthi uDavida wayefuna ukudumisa uJehova ko-Israyeli aze ayekufa. Liphinda litshengise lokho uDavida azakwenelisa ukukwenza esikhathini esizayo uJehova esemvusile.