Ubuzibala yini izihloko ezisanda kuphuma ku-Nqabayokulinda? Nxa kunjalo, ungenelisa yini ukuphendula imibuzo elandelayo?

Ukuzinika isikhathi sokukhuluma loJehova lesokumlalela lesokucabangisisa ngaye kuzasinceda njani?

Sizakwenza izinqumo ezinhle, sifundise kuhle, sibe lokholo oluqinileyo njalo simthande kakhulu uJehova.—w22.01, ikhasi 30-31.

Kuzasinceda njani ukufunda ukuthemba uJehova labantu abasebenzisayo?

Khathesi kumele sifunde ukuthemba indlela uJehova enza ngayo izinto ukwedlula loba nini ngokungathandabuzi esikutshelwa ngabadala lezinqumo abazenzayo. Nxa ukuhlupheka okukhulu kuqalisa, siyabe sizimisele ukulalela lanxa esikutshelwayo kungazwisiseki kumbe kukhanya kungasebenzi.—w22.02, ikhasi 4-6.

Yayisitshoni ingilosi lapho itshela uZakhariya ngoMbusi uZerubhabheli “ephethe intambo yokuqondisa”? (Zak. 4:8-10)

Umbono lo waqinisekisa abantu bakaNkulunkulu ukuthi ithempeli elingamangalisiyo elalisakhiwa lalizaphela lokuthi uJehova wayezathokoza ngalo.—w22.03, ikhasi 16-17.

Sitshengisa njani ukuthi ‘siyizibonelo ekukhulumeni’? (1 Thi. 4:12)

Sikhuluma ngomusa langenhlonipho ekutshumayeleni, sihlabela ngenhliziyo yonke njalo sihlala siphendula emihlanganweni yebandla. Sikhuluma iqiniso lezinto ezakha abanye njalo asikhulumi amazwi okuthethisa.—w22.04, ikhasi 6-9.

Kungani izitho ezikuzilo ezine (imibuso) okukhulunywa ngazo kuDanyeli isahluko 7 zikusilo esisodwa kuSambulo 13:1, 2?

Isilo okukhulunywa ngaso kuSambulo 13 asimeli umbuso owodwa nje, ngokwesibonelo umbuso weRoma. Simela yonke imibuso ebibusa abantu kusukela kudala kuze kube khathesi.—w22.05, ikhasi 9.

Yiphi indlela engcono kulazo zonke esitshengisa ngayo ukuthi siyayithemba indlela uJehova ahlulela ngayo?

Nxa othile esithethisile loba esicaphulile kumbe esonele, siyazama ukungaqhubeki simzondele futhi asimbambeli isikhwili. Siyayitshiyela kuJehova indaba, yena uzalungisa wonke umonakalo obangelwe yisono.—w22.06, ikhasi 10-11.

Kuyini okumele kukhunjulwe ngumzalwane ocelwe ukuthi athandaze emihlanganweni yethu?

Umthandazo akumelanga usetshenziswe ukunika ibandla iseluleko kumbe ukwenza izaziso. Akudingeki ukuthi umzalwane othandazayo asebenzise “amazwi amanengi” ikakhulu emthandazweni wokuvula. (Mat. 6:7)—w22.07, ikhasi 24-25.

Atshoni amazwi athi ‘labo ababesenza izinto ezimbi bazavukela ukwahlulelwa’? (Joh. 5:29)

Abantu laba abasoze bajeziswe ngenxa yalokho ababekwenza bengakafi. Bazahlolwa ukuze kubonakale ukuthi bayatshintsha yini nxa sebevusiwe.—w22.09, ikhasi 18.

Yiwaphi amazwi avusa usinga uJ. F. Rutherford awatsho emhlanganweni omkhulu owabakhona ngoSeptember 1922?

Emhlanganweni owawuseCedar Point, e-Ohio eMelika wathi: “INkosi isibusa! Lina liyizisebenzi zayo eziyikhankaselayo. Ngakho-ke memezelani, memezelani, memezelani iNkosi loMbuso wayo!”—w22.10, ikhasi 3-5.

U-Isaya isahluko 30 ukhuluma ngaziphi indlela ezintathu uJehova asincedisa ngazo ukuthi siqinisele?

Isahluko lesi sitshengisa ukuthi uyayilalela futhi ayiphendule imithandazo yethu, uyasikhokhela, uyasibusisa khathesi futhi uzasibusisa esikhathini esizayo.—w22.11, ikhasi 9.

Kungani singaphetha ngokuthi amazwi akuHubo 37:10, 11, 29 agcwaliseka kudala futhi azagcwaliseka esikhathini esizayo?

UDavida wayekhuluma ngokuthula okwakukhona ko-Israyeli, ngokwesibonelo lokho okwabakhona ngesikhathi kubusa uSolomoni. UJesu wakhuluma ngePharadayisi elalizabakhona esikhathini esizayo njalo watsho amazwi akuvesi 11. (Mat. 5:5; Luk. 23:43)—w22.12, ikhasi 8-10, 14.