1. UJesu wathini esigebengeni esasiseceleni kwakhe engakafi? (ULukha 23:39-43)

 UJESU lezigebenga ezazibethelwe laye babefuthelwa sebezakufa. (Luk. 23:32, 33) Kusegcekeni ukuthi izigebenga lezo zazingayisibo bafundi bakaJesu ngenxa yokuthi zazikhuluma kubi ngaye. (Mat. 27:44; Mak. 15:32) Kodwa esinye satshintsha sathi: “Jesu, ungikhumbule nxa ufika eMbusweni wakho.” UJesu waphendula wathi: “Ngikutshela iqiniso lamuhla ngithi, uzakuba lami ePharadayisi.” (Bala uLukha 23:39-43.) Akulabufakazi obutshengisa ukuthi isigebenga lesi sasiwamukele amazwi amayelana ‘loMbuso wezulu’ uJesu ayetshumayela ngawo. Kanti njalo uJesu kazange athi indoda le izangena eMbusweni. (Mat. 4:17) UJesu wayekhuluma ngePharadayisi elalizakuba khona emhlabeni. Kungani sisitsho njalo?

2. Kuyini okutshengisa ukuthi isigebenga esasesiphendukile sasingumJuda?

² Kumele ukuthi isigebenga esasesiphendukile sasingumJuda. Sathi komunye waso: “Kanti awumesabi ngitsho uNkulunkulu? Awuboni yini ukuthi sonke sithole isigwebo esifananayo?” (Luk. 23:40) AmaJuda ayekhonza uNkulunkulu oyedwa kodwa abezinye izizwe babekhonza onkulunkulu abanengi. (Eks. 20:2, 3; 1 Khor. 8:5, 6) Aluba izigebenga lezi zazingabantu bezinye izizwe, esabuzayo sasizakuthi, “Kanti awubesabi ngitsho onkulunkulu?” Kanti njalo uJesu kazange athunywe ebantwini bezizweni kodwa wathunywa ‘ezimvini ezilahlekileyo zesizwe sako-Israyeli.’ (Mat. 15:24) UNkulunkulu wayevezele ama-Israyeli ukuthi uzavusa abafileyo. Isigebenga esasesiphendukile sasingabe sikwazi lokho njalo amazwi aso atshengisa ukuthi sasikholwa ukuthi uJehova uzavusa uJesu ukuthi ayebusa eMbusweni kaNkulunkulu. Kukhanya sasithemba ukuthi laso sizavuswa nguNkulunkulu.

3. Kuyini okungabe kwacatshangwa yisigebenga esasesiphendukile ngesikhathi uJesu ekhuluma ngePharadayisi? Chasisa. (UGenesisi 2:15)

³ Kumele ukuthi isigebenga esasesiphendukile sasikwazi ngo-Adamu lo-Eva kanye lePharadayisi uJehova ayebafake kulo njengoba sasingumJuda. Yikho kungenzeka sasikholwa ukuthi iPharadayisi uJesu ayekhuluma ngalo kwakuyinsimu enhle eyayizakuba lapha emhlabeni.—Bala uGenesisi 2:15.

4. Lokho uJesu akutshela isigebenga esasesiphendukile kumele kusenze sicabange ngani?

⁴ Amazwi uJesu awatshela isigebenga esasesiphendukile kumele asenze sicabange ngokuthi impilo izabe injani ePharadayisi. Okungasinceda sicabangisise ngalokho yikuhlola ukuthi kwakunjani ko-Israyeli ngesikhathi kubusa iNkosi uSolomoni. Kwakulokuthula njalo singakhangelela ukuthi uJesu, yena omkhulu kuloSolomoni, uzaletha izibusiso ezinengi emhlabeni encediswa yilabo azabusa labo. (Mat. 12:42) Yikho kumele ‘abezinye izimvu’ benze okuthile ukuze baphile kuze kube nini lanini ePharadayisi.—Joh. 10:16.

5. Ubona angani izabe injani impilo ePharadayisi?

⁵ Kufikani engqondweni nxa ucabanga ngokuthi kuzabe kunjani ePharadayisi? Engxenye ucabanga ngephakhi enhle enjengensimu yase-Edeni. (Gen. 2:7-9) Ungabe ukhumbula isiphrofetho sikaMikha esithi “wonke umuntu uzahlala ngaphansi kwesihlahla sakhe samagilebisi langaphansi kwesihlahla sakhe somkhiwa.” (Mik. 4:3, 4) Ungacabanga langamavesi eBhayibhili athi kuzakuba lokudla okunengi. (Hubo. 72:16; Isaya. 65:21, 22) Yikho ungazibona uhlezi endaweni enhle, kuletafula egcwele izibiliboco. Ungazizwa ubethwa ngumoya omnandi, uhogela umoya wamaluba anukelelayo njalo usizwa izihlobo labangane beluqhunsa uhleko bezikwejisele bendawonye labanye abavusiweyo. Ayisiwo maphupho lawo. Asithandabuzi ukuthi izinto ezinje zizakwenzakala emhlabeni. Kodwa okunye okuzabe kukhona ePharadayisi yimisebenzi esizayikholisa.

6. Yiphi imisebenzi esizayenza ePharadayisi? (Khangela umfanekiso.)

⁶ UJehova wathi esidala wayefuna sikholise imisebenzi esiyenzayo. (Umtshu. 2:24) Sizabe silomsebenzi omnengi ngesikhathi sokubusa kukaKhristu kweminyaka eyinkulungwane. Abazasinda ekuhluphekeni okukhulu lezigidi ezizavuswa bazabe befuna okokugqoka lokudla kanye lendawo yokuhlala. Kuzamele sisebenze okuzwayo ukuze bazithole izinto lezo njalo sizabe siwukholisa umsebenzi wethu. Njengoba nje u-Adamu lo-Eva kwakumele bawulime umhlaba, lathi sizakwenza umsebenzi omnandi wokutshintsha umhlaba ube liPharadayisi. Akucabange ukuthi sizakholisa kangakanani sesifundisa amamiliyoni abantu  abavusiweyo abayabe besazi okuncane ngoJehova lenhloso zakhe. Akucabange lokuthi kuzabe kumnandi njani ukunceda abathembekileyo abaphila uJesu engakabuyi emhlabeni ukuthi bafunde okunengi.

7. Kuyini esingakuthandabuziyo njalo kungani?

⁷ Asithandabuzi ukuthi ePharadayisi elizayo sizabe siphakathi komhlane lembeleko, kulokuthula njalo izinto zonke zihlelekile. Okwenza singathandabuzi yikuthi uJehova usesitshengisile ukuthi ukuphila kuyabe kunjani nxa sesibuswa yiNdodana yakhe njalo sizakubona lokho nxa singakhangela ukuthi kwakunjani ngesikhathi kubusa iNkosi uSolomoni.

8. Amazwi eNkosi uDavida akuHubo 37:10, 11, 29 agcwaliseka njani? (Khangela isihloko esithi “Imibuzo Ebuzwa Ngabafundi” esikumagazini le.)

⁸ INkosi uDavida yaphefumulelwa ukuthi ibhale ukuthi impilo izabe isinjani nxa sekubusa inkosi ehlakaniphileyo njalo ethembekileyo. (Bala iHubo 37:10, 11, 29.) Sijayele ukusebenzisa iHubo 37:11 nxa sixoxa labantu ngePharadayisi. Lokho kuqondile sibili ngoba uJesu wakhuluma amazwi lawo entshumayelweni yakhe yasentabeni, etshengisa ukuthi azagcwaliseka esikhathini esizayo. (Mat. 5:5) Kodwa amazwi kaDavida ayetshengisa lokuthi impilo yayizabe isinjani nxa sekubusa uSolomoni. Ngesikhathi kubusa uSolomoni ko-Israyeli, kwakulokuthula phakathi kwabantu bakaNkulunkulu njalo babeselizweni “eligeleza uchago loluju.” UNkulunkulu wayethe: ‘Nxa lingaqhubeka lilandela imilayo yami ngizakwenza kube lokuthula elizweni, lizalala kungabi lomuntu ozalenza lesabe.’ (Levi. 20:24; 26:3, 6) Izithembiso lezo zagcwaliseka ngesikhathi kubusa uSolomoni. (1 Imilan. 22:9; 29:26-28) Kanti njalo uNkulunkulu wathembisa ukuthi abantu abenza okubi babezabe “bengasekho.” (Hubo. 37:10) Kuyacaca-ke ukuthi amazwi akuHubo 37:10, 11, 29 agcwaliseka kudala futhi azagcwaliseka esikhathini esizayo.

9. Indlovukazi yeShebha yathini ngombuso kaSolomoni?

⁹ Indlovukazi yeShebha yezwa ngokuthula lenhlalakahle eyayikhona ko-Israyeli ngesikhathi  kubusa uSolomoni. Yahamba umango omude isiyazibonela ngawayo eJerusalema. (1 Amakho. 10:1) Ngemva kokuhlola umbuso kaSolomoni yathi: ‘Engakutshelwayo kulutshwana kakhulu. Bayathokoza kakhulu abantu bakho futhi ziyathokoza lezinceku zakho ezima phambi kwakho zikhathi zonke zilalela inhlakanipho yakho.’ (1 Amakho. 10:6-8) Lokho okwenzakala ngesikhathi kubusa uSolomoni kwakuyinzwisa yalokho uJehova azakwenzela abantu sekubusa iNdodana yakhe uJesu.

10. Kuyini okwenza uJesu abe ngcono kuloSolomoni?

¹⁰ UJesu ungcono kakhulu kuloSolomoni kukho konke. USolomoni wayeyindoda elesono njalo wenza amaphutha amabi kakhulu futhi lokhu kwacina kusenza ukuthi abantu bakaNkulunkulu bathwale nzima. Kodwa uJesu nguMbusi ongelasono futhi ongenzi amaphutha. (Luk. 1:32; Heb. 4:14, 15) Wahlala ethembekile kuNkulunkulu lanxa uSathane wayemjikela izilingo ezinzima kakhulu. UKhristu utshengisile ukuthi kasoze enze isono kumbe enze loba yini engalimaza abantu ababuswa nguye. Asingeke siyithole enye iNkosi enjengaye.

11. UJesu uzancediswa ngobani nxa esebusa?

¹¹ UJesu labangu-144 000 abazabusa laye bazanika abantu konke abakudingayo njalo bagcwalise inhloso kaNkulunkulu ngomhlaba. (Isam. 14:1-3) Abangu-144 000 laba bahlangana lenhlupho ezinengi ngesikhathi besemhlabeni yikho bezakuba ngababusi abalozwelo. Umsebenzi wabo uzagoqelani?

12. Yiwuphi umsebenzi uJehova azawunika abangu-144 000?

¹² Umsebenzi ophiwe uJesu lalabo abazabusa laye mkhulu kakhulu kulomsebenzi owawuphiwe uSolomoni. Inkosi le yayibusa ama-Israyeli angamamiliyoni kuphela elizweni elilodwa. Kodwa labo abazabusa eMbusweni kaNkulunkulu bazabusa izigidi lezigidi zabantu emhlabeni wonke. Lesi yisibusiso esimangalisayo uJehova asinike abangu-144 000!

13. Yiwuphi umsebenzi oqakathekileyo ozakwenziwa yilabo abazabusa loJesu?

¹³ Abangu-144 000 bazakuba ngamakhosi labaphristi njengoJesu. (Isam. 5:10) Ngaphansi koMthetho kaMosi umsebenzi omkhulu owawusenziwa ngabaphristi kwakuyikubona ngempilakahle yabantu lokuba leqiniso lokuthi bahlala beseduze loJehova. UMthetho ‘wawuyisithunzi sezinto ezinhle ezizayo.’ Yikho kuqondile sibili ukuthi sikhangelele ukuthi labo abazabusa loJesu bazaba leqiniso lokuthi abantu bakaNkulunkulu balempilakahle njalo bahlala bengabangane bakhe. (Heb. 10:1) Asikwazi ukuthi amakhosi la labaphristi laba bazabe bekhuluma njani labantu abalapha emhlabeni abazabuswa nguMbuso. Kodwa kungelani lokuthi uJehova uzakuthi kwenziweni asithandabuzi ukuthi abantu lapha emhlabeni bazakhokhelwa ngendlela enhle kakhulu.—Isam. 21:3, 4.

14. ‘Abezinye izimvu’ labafowabo bakaKhristu babumbani?

¹⁴ UJesu wathi labo abazabusa laye ‘bangumhlambi omncane.’ (Luk. 12:32) Waphinda wakhuluma ngelinye iqembu alibiza ngokuthi ‘ngezinye izimvu.’ Amaqembu la angumhlambi owodwa omanyeneyo. (Joh. 10:16) Asebenza ndawonye khathesi futhi azaqhubeka esebenza ndawonye nxa umhlaba usulipharadayisi. Ngalesosikhathi ‘abomhlambi omncane’ bayabe sebesezulwini njalo ‘abezinye izimvu’ bayabe belethemba lokuphila  phakade emhlabeni. Kodwa kulezinto okumele zenziwe ‘ngezinye izimvu’ ukuze ziphile ePharadayisi.

15. (a) ‘Abezinye izimvu’ babasekela njani abafowabo bakaKhristu? (b) Ungamlingisela njani umfowethu osesitolo? (Khangela umfanekiso.)

¹⁵ Isigebenga esaphendukayo safa singakabi lethuba lokutshengisa ukuthi siyakuqakathekisa sibili lokho esasikwenzelwe nguKhristu. Kodwa thina ‘abezinye izimvu’ silamathuba amanengi okutshengisa ukuthi sikubona njani lokho esakwenzelwa nguJesu. Ngokwesibonelo sitshengisa ukuthi siyamthanda ngendlela esiphatha ngayo abafowabo abagcotshiweyo. UJesu wathi uzakwahlulela ehlukanise izimvu lezimbuzi kusiya ngokuthi zazibaphatha njani abafowabo. (Mat. 25:31-40) Singabasekela ngokutshiseka sisenza labo umsebenzi wokutshumayela lowokwenza abafundi. (Mat. 28:18-20) Yikho sifuna ukusebenzisa amabhuku esiwanikwayo, ngokwesibonelo ibhuku elithi Ungathokoza Kuze Kube Nini Lanini! Nxa ungakabi lomuntu ofunda laye iBhayibhili zama ukucela ukufunda iBhayibhili laloba ngubani ongenelisa ukumcela.

16. Kumele senzeni ukuze siphile ePharadayisi?

¹⁶ Kumele sihle siqale khathesi ukuba ngabantu uJehova afuna baphile ePharadayisi. Kumele sizame ukuba ngabantu abathembekileyo kulokho esikutshoyo lesikwenzayo futhi singedlulisi amalawulo endleleni esiphila ngayo. Kanti njalo kumele sizame ukuba qotho kuJehova, lokuthembeka kubomkethu lakubafowethu labodadewethu. Nxa singalalela uNkulunkulu khathesi emhlabeni lo omubi, kuzakuba lula ukuthi simlalele nxa sesiphila ePharadayisi. Zikhona ezinye izinto esingazifundela lobuntu esingabuthuthukisa ukuze sitshengise ukuthi silungiselela ukuphila ePharadayisi. Khangela isihloko esithi “Usukulungele Yini ‘Ukudla Ilifa Lomhlaba’?” esikumagazini le.

17. Izono esazenza kudala kumele zisiqede amandla yini? Chasisa.

¹⁷ Okunye okumele sikwenze yikuzama ngamandla ukuyekela ukuzithonisisa ngezono esazenza kudala. Asifuni sibili ukuthi inhlawulo  isinike isizatho ‘sokuqhubeka sisenza isono ngabomo.’ (Heb. 10:26-31) Kodwa nxa sesiphendukile okweqiniso esonweni esasenzayo sacela ukuthi uJehova labadala bebandla basincedise futhi satshiya okubi esasikwenza, singaba leqiniso lokuthi uJehova usesithethelele ngendlela enkulu. (Isaya. 55:7; Imiseb. 3:19) UJesu wathi kubaFarisi: “Angilandanga ukuzobiza abalungileyo, ngalanda ukuzobiza izoni.” (Mat. 9:13) Yikho umhlatshelo wakhe uyenelisa sibili ukucitsha zonke izono zethu kungelani lokuthi zinganani.

18. Kuyini ongafisa ukukuxoxa lesigebenga esasibethelwe eceleni kukaJesu?

¹⁸ Ake uzibone ususePharadayisi uxoxa lesigebenga esasikhuluma loJesu. Akuthandabuzwa ukuthi lizaxoxa ngokuthi liwuqakathekisa kangakanani umhlatshelo kaJesu. Kungenzeka uzasibuza ukuthi kwenzakalani uJesu esezakufa lokuthi sezwa njani uJesu esiphendula esithi uzakuba laso ePharadayisi. Sona kungenzeka sikubuze ukuthi zazinjani izinsuku zokucina emhlabeni kaSathane. Kuzakuba yisibusiso sibili ukufunda iLizwi likaNkulunkulu labantu abanjengendoda le!—Efe. 4:22-24.

19. Kungani ukuphila ePharadayisi kungasoze kusidake? (Khangela umfanekiso ongaphandle.)

¹⁹ Ukuphila ePharadayisi akusoze kudake ngitsho. Sizahlala sikukholisa ukuhlangana labantu abatshiyeneyo lokwenza imisebenzi etshiyeneyo. Okuzasithokozisa kakhulu yikuthi nsuku zonke sizafunda okuthile ngoBaba wethu osezulwini okuzasinceda ukuthi simazi ngcono njalo sizakholisa lokho azabe esinike khona. Sizahlala silokunengi okokufunda ngaye langezinto azidalileyo. Ukuthanda kwethu uJehova kuzaqhubeka kujula nxa lathi siqhubeka siphila. Simbonga singaqedi uJehova loJesu ngokusithembisa ukuphila okungapheliyo ePharadayisi.