1-2. Kuyini okumele abazali bakwenze nxa abantwababo bangabuza imibuzo mayelana loNkulunkulu kanye leBhayibhili?

 UKUKHULISA umntwana ngumsebenzi omkhulu kakhulu. Nxa ungumzali akuthandabuzwa ukuthi wenza konke ongakwenza ukuze uncedise umntanakho abe lokholo oluqinileyo. Siyakuncoma ngalokho. (Dute. 6:​6, 7) Nxa umntwana ekhula angaqalisa ukubuza imibuzo emayelana lalokho esikukholwayo njalo angabuza ukuthi kungani iBhayibhili lisalisa ukwenza ezinye izinto.

² Kungaqala kukukhathaza ukubona umntanakho esengathi uyakuthandabuza lokho esikukholwayo. Ungabona angathi kasakholwa kuNkulunkulu lokuthi kasakukholwa okutshiwo liBhayibhili. Kodwa kuhle ukuthi abantwana babuze imibuzo ngoba lokho kuyaluqinisa ukholo lwabo. (1 Khor. 13:11) Ngakho akumelanga ukhathazeke kakhulu. Nxa umntanakho angakubuza mayelana lalokho esikukholwayo, kuthathe njengethuba lokumncedisa ukuthi acabangisise ngakho ngoba lokho kuzamnceda ukuthi aqinise ukholo lwakhe.

3. Sizafundani esihlokweni lesi?

³ Esihlokweni lesi sizafunda ukuthi abazali bangancedisa njani abantwababo ukuthi (1) bakholwe kuNkulunkulu njalo bakholwe okutshiwo liBhayibhili, (2) babone ukuthi okutshiwo liBhayibhili ngokuziphatha kunceda bona, kanye lokuthi (3) benelise ukuchasisela abanye abakukholwayo. Sizabona ukuthi kungani kukuhle ukuthi abantwana babuze imibuzo lokuthi kuyini okungenziwa ngabazali ukuze bathole ithuba lokuxoxa labantwababo ngalokho esikukholwayo.

 NCEDA UMNTANAKHO ABE LOKHOLO OLUQINILEYO

4. Yiphi imibuzo umntanakho angazibuza yona futhi kuyini okungenza azibuze imibuzo leyo?

⁴ Abazali abangamaKhristu kumele bananzelele ukuthi abantwababo abazalwa bekholwa kuNkulunkulu. Lawe unje awuzange uthi uzalwa wahle waba lokholo kuJehova. Nxa umntanakho elokhu ekhula angaqalisa ukuzibuza imibuzo le: ‘Ngikwazi njani ukuthi uNkulunkulu ukhona? Okutshiwo liBhayibhili kuliqiniso yini?’ Phela iBhayibhili lisikhuthaza ukuthi sizisebenzise kuhle ‘izingqondo zethu’ njalo ‘sihlolisise zonke izinto.’ (Rom. 12:1; 1 Thes. 5:21) Manje ungamncedisa njani umntanakho ukuthi aqinise ukholo lwakhe?

5. Kuyini okungenziwa ngabazali ukuze bancede abantwababo bakholwe okutshiwo liBhayibhili? (URoma 12:2)

⁵ Khuthaza umntanakho ukuthi adinge ubufakazi obutshengisa ukuthi okutshiwo liBhayibhili kuliqiniso. (Bala uRoma 12:2.) Nxa umntanakho angakubuza imibuzo mtshengise ukuthi angazithola njani izimpendulo esebenzisa amabhuku okuchwayisisa. Ngokwesibonelo angasebenzisa i-Watch Tower Publications Index kumbe iBhuku Lokuchwayisisa LaboFakazi BakaJehova. Nxa angasebenzisa iBhuku Lokuchwayisisa, angadinga isihloko esithi “IBhayibhili” abesesiya esihlokwaneni esithi “Liphefumulelwe NguNkulunkulu,” ukuze athole ubufakazi obutshengisa ukuthi iBhayibhili alisobhuku elabhalwa ngabantu nje kodwa ‘liLizwi likaNkulunkulu.’ (1 Thes. 2:13) Okunye angakwenza yikuchwayisisa ngedolobho lase-Asiriya okwakuthiwa yiNiniva. Kudala ezinye izikhwicamfundo ezichwayisisa iBhayibhili zazisithi idolobho leli alizange libe khona. Kodwa kwakhanya ukuthi okutshiwo liBhayibhili kuliqiniso ngoba ngabo-1850 kwatholakala amanxiwa edolobho leli. (Zef. 2:​13-15) Nxa efuna ukuzwisisa ukuthi ukutshabalaliswa kwedolobho leli kwasigcwalisa njani isiphrofetho esiseBhayibhilini angakhangela isihloko esithi “Ubukwazi Yini” ku-Nqabayokulinda kaNovember 2021. Nxa umntanakho angahlola lokho okutshiwo ngamabhuku ethu abesekhangela lalokho okubhalwa ngabachwayisisa iBhayibhili kasoze athandabuze ukuthi okutshiwo liBhayibhili kuliqiniso.

6. Abazali bangabancedisa njani abantwababo ukuthi bacabangisise ngesikukholwayo? Nika isibonelo. (Khangela lomfanekiso.)

⁶ Ncedisa umntanakho acabangisise ngokuthi kungani okutshiwo liBhayibhili kuliqiniso. Zama ukudinga amathuba okuxoxa lomntanakho ngeBhayibhili kanye lokuthi angenzani ukuze abe lokholo kuNkulunkulu. Ungahlela ukuthi livakatshele e-museum, ephakhi kumbe kwenye indawo enhle. Okunye elingakwenza  yikuvakatsha liyebona i-museum eseBhetheli, kungaba ngeselizweni lakini kumbe kwelinye ilizwe. Nxa lingavakatshela e-museum ungamtshengisa ezinye izinto ezingenza aqiniseke ukuthi okutshiwo liBhayibhili kuliqiniso. Kweyinye i-museum eseFrance kulelitshe lakoMowabi elaziwa ngokuthi yi-Moabite Stone. Ilitshe leli selileminyaka engu-3 000 futhi libhalwe ibizo likaNkulunkulu. Ilitshe leli lingalikhangela ku-inthanethi kumbe lidinge eminye imifanekiso emabhukwini ethu eyezinto zasendulo. E-museum esemawofisini amakhulu aboFakazi bakaJehova eWarwick eNew York kulesithombe selitshe leli engxenyeni ebhalwe ukuthi “The Bible and the Divine Name.” Elitsheni leli kubhalwe ukuthi uMesha inkosi yakoMowabi yahlamukela abako-Israyeli. Lokhu yikho kanye okutshiwo liBhayibhili. (2 Amakho. 3:​4, 5) Nxa umntanakho angazibonela ngawakhe ubufakazi obutshengisa ukuthi okutshiwo liBhayibhili kuliqiniso ukholo lwakhe luzaqina.—Khangela u-2 ImiLando 9:6.

7-8. (a) Izinto ezimangalisayo ezadalwa nguNkulunkulu zisifundisani? Nika isibonelo. (Khangela lomfanekiso.) (b) Yiphi enye indlela ongamncedisa ngayo umntanakho ukuthi akholwe kuNkulunkulu?

⁷ Ncedisa umntanakho ukuthi acabangisise ngezinto ezidalwe nguJehova. Nxa ungathi uzihambela lomntanakho endaweni eliganga kumbe ephakhi, mtshengise izinto ezitshiyeneyo ezidalwe nguNkulunkulu eliyabe lihamba lizibona. Kuzamnceda ngani lokhu? Kuzamnceda abone ukuthi owenza izinto lezi uhlakaniphile njalo ukhaliphile. Ngokwesibonelo nxa ungakhangela indlela intanga ze-sunflower ezilandelana ngayo, ukhangele lendlela ezinye indlu zomnenke ezibunjwe ngayo, leminye imithala lamahlamvu ezinye izihlahla, uzabona ukuthi kuyahambelana. Abezesayensi sebeleminyaka bezihlola izinto lezi. a

⁸ Nxa umntanakho esefunda isayensi esikolo angafunda ngezinye izinto ezidaliweyo abone indlela emangalisayo ezibunjwe ngayo. Ngokwesibonelo, izihlahla ezinengi zikhula ngendlela efananayo. Kuqala kungokuyisigodo, kukhule kuze kube lengatsha ezinenginengi. Kulezinto ezinengi ezibunjwe ngendlela efananayo. Kodwa ngubani owabumba izinto zonke lezi ezinhle kangaka? Nxa umntanakho angacabangisisa ngezinto ezimangalisayo ezadalwa nguNkulunkulu ukholo lwakhe luzaqina. (Heb. 3:4) Nxa umntanakho esethe thuthu kuzamele umncedise azwisise ukuthi kungani uNkulunkulu wasinika imithetho. Mhlawumbe ungambuza uthi, “Nxa uNkulunkulu kunguye owasidalayo kambe ukuthi angasipha imithetho engasenza singathokozi?” Ngemva kwalokho usungamtshela ukuthi uNkulunkulu wasinika iBhayibhili elilemithetho engasinceda ukuthi sithokoze.

 NCEDA UMNTANAKHO AZWISISE UKUTHI IMITHETHO ESEBHAYIBHILINI IYANCEDA

9. Kuyini okungenza umntanakho azibuze ukuthi imithetho eseBhayibhilini emayelana lokuziphatha iyanceda yini?

⁹ Nxa umntanakho ezibuza ukuthi imithetho eseBhayibhilini emayelana lokuziphatha iyanceda yini, zama ukuzwisisa ukuthi kungani ezibuza lokho. Mhlawumbe engabe engakukholwa ukuthi imithetho eseBhayibhilini iyanceda loba angabe ekubona ukuthi iyanceda kodwa esehluleka ukuchasisela abanye akukholwayo. Ngakho ungasebenzisa ibhuku elithi Ungathokoza Kuze Kube Nini Lanini! ukuze uncedise umntanakho abone ukuthi imithetho eseBhayibhilini emayelana lokuziphatha iyasinceda. b

10. Ungamncedisa njani umntanakho ukuthi amthande uJehova?

¹⁰ Khuthaza umntanakho ukuthi amthande uJehova. Nxa ufundisa umntanakho iBhayibhili usebenzisa ibhuku elithi Ungathokoza Kuze Kube Nini Lanini!, sebenzisa imibuzo kanye lemifanekiso elapho ukuze uzwisise ukuthi umntanakho ucabangani ngalokho elikufundayo. (Zaga. 20:5) Ngokwesibonelo, kusifundo 8 uJehova ufaniswa lomngane olothando ngoba uyasixwayisa ukuze singaweli engozini futhi asitshela khona kunceda thina. Nxa selibale u-1 Johane 5:3 ungambuza uthi, “Njengoba usukwazi ukuthi uJehova ngumngane wakho okuthandayo, uzwa njani ngalokho ayabe ekutshela ukuthi ukwenze?” Umbuzo lo ungakhanya ulula kodwa unganceda umntanakho abone ukuthi imithetho kaJehova itshengisa ukuthi uyasithanda.—Isaya. 48:​17, 18.

11. Ungamncedisa njani umntanakho ukuthi abone ukuthi okutshiwo liBhayibhili kuyasinceda? (IZaga 2:​10, 11)

¹¹ Xoxa lomntanakho ngokuthi kunceda ngani ukulalela okutshiwo liBhayibhili. Nxa libala iBhayibhili kumbe umbhalo wosuku xoxani ngokuthi ukulandela okutshiwo liBhayibhili sekulincede njani. Umntanakho uyakubona yini ukuthi ukuthembeka lokusebenza nzima kuyanceda? (Heb. 13:18) Ungagcizelela lokuthi ukusebenzisa okutshiwo liBhayibhili kuzalinceda njani ukuthi libe lempilakahle futhi lingahlali likhathazekile. (Zaga. 14:​29, 30) Lokhu kuzanceda umntanakho angathandabuzi ukuthi esikufunda eBhayibhilini kuyasinceda zikhathi zonke.—Bala iZaga 2:​10, 11.

12. Omunye umfowethu umncedisa njani umntanakhe ukuthi abone ukuthi ukulandela okutshiwo liBhayibhili kuyanceda?

¹² Omunye umfowethu okuthiwa nguSteve ohlala eFrance uthi yena lomkakhe bayayincedisa indodana yabo okuthiwa ngu-Ethan ukuthi ibone ukuthi imithetho kaJehova itshengisa ukuthi uyasithanda. Uthi: “Siyambuza imibuzo enjengale: ‘Kungani uJehova efuna silalele umthetho lo? Umthetho lo utshengisa njani ukuthi uJehova uyasithanda? Kuyini okungenzakala nxa singayekela ukulalela umthetho lo?’” Lokhu sekuncede u-Ethan wangathandabuzi ukuthi esikutshelwa nguJehova kuyabe kuqondile sonke isikhathi. USteve uphinda athi: “Esikufunayo yikuncedisa u-Ethan abone ukuthi esikuthola eBhayibhilini kutshengisa ukuthi uJehova uhlakaniphile ukwedlula abantu.”

13. Abazali bangancedisa njani umntanabo ukuthi asebenzise okutshiwo liBhayibhili? Nika isibonelo.

¹³ Fundisa umntanakho ukuthi asebenzise okutshiwo liBhayibhili. Kwezinye izikhathi abantwana bayaphiwa amabhuku okumele bawabale. Amabhuku la angabe elabalingiswa abangaziphathanga kumbe abalolaka. Kungabe kukhanya angathi abakwenzayo kuqondile njalo abantwana bangakulingisela. Lokhu kungahle kube lithuba elihle lokuncedisa  umntanakho acabangisise ngokuthi okwenziwa ngabalingiswa laba kuyahambelana yini lokutshiwo liBhayibhili. (Zaga. 22:​24, 25; 1 Khor. 15:33; Flp. 4:8) Lokhu kunganceda umntanakho enelise ukutshumayeza umbalisi wakhe lalabo afunda labo nxa sebexoxa ngebhuku lelo ekilasini.

FUNDISA UMNTANAKHO UKUTHI ENELISE UKUCHASISELA ABANYE AKUKHOLWAYO

14. Yiphi indaba abasakhulayo abangesaba ukuyichasisela abanye futhi kuyini okungenza besabe?

¹⁴ Kwezinye izikhathi abasakhulayo bangatshaywa luvalo kube nzima ukuthi bachasisele abanye abakukholwayo. Nxa kungavuka indaba yokuthi izinto zazivelela azidalwanga nguNkulunkulu, bangesaba ukutsho abakukholwayo. Ngenxa yani? Ngenxa yokuthi ababalisi babo bangabe bebaqinisekisa ukuthi izinto zazivelela, kazidalwanga. Nxa ungumzali ungamncedisa njani umntanakho ukuthi angathandabuzi ukuthi akukholwayo kuliqiniso?

15. Kuyini okunganceda umKhristu osakhulayo ukuthi aqiniseke ngalokho akukholwayo?

¹⁵ Nceda umntanakho ukuthi aqiniseke ngalokho akukholwayo. Umntanakho akumelanga kumyangise ukuthi ukholwa ukuthi izinto zadalwa nguNkulunkulu. (2 Thim. 1:8) Phela labanye abezesayensi abakukholwa ukuthi izinto zaphonguzivelela. Bayabubona ubufakazi bokuthi kulomuntu okhaliphileyo owadala zonke izinto eziphilayo, yikho bengavumelani lalokho okufundiswa ezikolo ukuthi izinto kazidalwanga, zazivelela. Okunye okunganceda umntanakho ukuthi angathandabuzi ukuthi akukholwayo kuliqiniso yikudinga ukuthi kuyini okwanceda abanye abafowethu labodadewethu bakholwa ukuthi izinto eziphilayo zadalwa, abesecabangisisa ngalokho abayabe bemtshele khona. c

16. Umzali angamncedisa njani umntanakhe enelise ukuchasisela abanye ukuthi izinto zonke zadalwa nguNkulunkulu? (U-1 Phetro 3:15) (Khangela lomfanekiso.)

¹⁶ Ncedisa umntanakho enelise ukuchasisela abanye ukuthi kungani ekholwa ukuthi izinto zadalwa nguNkulunkulu. (Bala u-1 Phetro 3:15.) Okunye okungamnceda yikuthi lingene ku-jw.org lidinge izihloko ezikhuluma ngendaba le beselizibala. Yekela umntanakho azikhethele indlela engcono yokuchasisela abanye indaba le. Lungiselelani ndawonye ukuthi uzabachasisela njani abanye. Mkhumbuze ukuthi akulasidingo sokuthi aphikisane lafunda labo.  Mkhuthaze ukuthi achasise ngendlela elula futhi ezwisisekayo nxa kungaba labanye abafuna ukuzwa akutshoyo. Ngokwesibonelo, omunye afunda laye angathi: “Mina ngikholwa engikubonayo kuphela, ngeke ngikholwe kuNkulunkulu ngoba angikaze ngimbone.” Osakhulayo onguFakazi yena angaphendula athi: “Ake sithi uphakathi kwegusu elikhatshana kakhulu lalapho okuhlala khona abantu, ubusubona umthombo oyakhelwe ngamatshe. Ubungacabanga ukuthi umthombo lo wazivelela yini? Nxa ucabanga ukuthi kulomuntu owawugebhayo wawakhela, kutsho ukuthi kulengqondo ukukholwa ukuthi kulomuntu owazenzayo izinto zonke lezi esizibonayo.”

17. Abazali bangabancedisa njani abantwababo ukuthi badinge amathuba okuxoxela abanye iqiniso eliseBhayibhilini? Nika isibonelo.

¹⁷ Khuthaza umntanakho ukuthi adinge amathuba okufundisa abanye iqiniso eliseBhayibhilini. (Rom. 10:10) Lokhu ungakwenza ngokumsiza abone ukuthi ukufundisa abanye kuyafanana lokufundela ukutshaya iziginci zomculo. Umuntu ofundela ukutshaya iziginci uqalisa ngokufunda okulula. Ngokuhamba kwesikhathi ucina eseyingcitshi. Yikho lomKhristu osakhulayo nxa etshela abanye akukholwayo angaqalisa ngokubaxoxela izinto ezilula. Ngokwesibonelo, angabuza afunda laye athi: “Ubukwazi yini ukuthi omanjinela nxa belungisa ezinye izinto bajayele ukukopa ezintweni ezidaliweyo? Ngicela ukukubukelisa ividiyo ekuchasisa kuhle lokhu.” Ngemva kokumbukelisa enye ividiyo esengxenyeni ethi Kwazenzakalela yini? angathi: “Nxa abesayensi bebukwa ngezinto abazenzayo bekopa ezintweni ezidaliweyo, wena uthini ngomuntu owadala izinto zonke lezi? Akumelanga simdumise yini?” Indlela le elula yokutshumayela ingenza ukuthi abanye bacine sebefuna ukufunda okunengi ngoNkulunkulu.

QHUBEKA UNCEDISA UMNTANAKHO UKUTHI ABE LOKHOLO OLUQINILEYO

18. Abazali bangabancedisa njani abantwababo ukuthi baqhubeke belokholo oluqinileyo?

¹⁸ Abantu abanengi emhlabeni lo abakholwa kuJehova. (2 Phet. 3:3) Ngakho bazali, nxa lifunda labantwabenu iBhayibhili bakhuthazeni ukuthi babale izihloko ezizabanceda ukuthi balithande iLizwi likaNkulunkulu futhi bakholwe elikutshoyo ngokuziphatha. Bancediseni bacabange ngezinto ezimangalisayo ezidalwe nguJehova njalo bazwisise iziphrofetho eziseBhayibhilini esezigcwalisekile. Okunye okuqakatheke kakhulu elingakwenza yikuthandaza labo lokubathandazela. Asithandabuzi ukuthi nxa lingakwenza konke lokhu, uJehova uzalincedisa ukuthi lisize abantwabenu babe lokholo oluqinileyo.—2 Imilan. 15:7.