1-2. Kuyini okungenza sehlise izinyembezi?

 AKULAMUNTU ongakaze ehlise inyembezi. Kwezinye izikhathi kuyabe kuzinyembezi zentokozo. Mhlawumbe wakhala usamukela umntanakho esanda kuzalwa kumbe zehla izinyembezi ukhumbula into enhle eyake yenzakala loba ubona umngane wakho okwasekukudala wamcina.

² Kodwa izikhathi ezinengi sikhaliswa yizinto ezibuhlungu ezenzakala empilweni yethu. Ngokwesibonelo, singakhala nxa singadaniswa ngumuntu ebesimthemba. Zingehla sibili inyembezi nxa silomkhuhlane omubi njalo sisizwa ubuhlungu obukhulu loba nxa sifelwe. Kwezinye izikhathi singezwa ubuhlungu size sikhale njengalokho okwenziwa nguJeremiya ngesikhathi abaseBhabhiloni betshabalalisa iJerusalema. Wathi: ‘Inyembezi zami zigeleza njengamanzi omfula. Sengihlala ngikhala, kuyala ukuthi ngithule.’—Izili. 3:​48, 49.

3. UJehova uzwa njani nxa izinceku zakhe zisebunzimeni? (U-Isaya 63:9)

³ UJehova uyazazi zonke inyembezi owake wazehlisa ngesikhathi usebunzimeni. IBhayibhili liyasiqinisekisa ukuthi nxa izinceku zakhe zisizwa ubuhlungu uyabe ebona futhi uyezwa ukukhala kwazo nxa zicela uncedo. (Hubo. 34:15) Kodwa ayisikho ukuthi uJehova uyezwa kuphela kumbe abone abesesitshiya sinjalo. Unjengomzali olothando ozwa kuhela nxa umntanakhe ekhala abesesukumela phezulu amncede.—Bala u-Isaya 63:9.

4. Ngobani esizafunda ngabo futhi okwenzakala kubo kuzasifundisani ngoJehova?

 ⁴ ELizwini lakhe iBhayibhili uJehova kasifihleli ukuthi wayesizwa njani nxa wayebona izinceku zakhe zikhala. Sizabona ukuthi wenzani ngesikhathi ebona uHana loDavida leNkosi uHezekhiya bekhala. Kuyini okwenza abantu laba bakhala? UJehova wenzani ngesikhathi bekhala kuye becela ukuthi abancede? Okwenzakala kubo kungasiduduza njani nxa sikhala ngenxa yosizi kumbe silahliswe ngumuntu ebesimthemba loba nxa sesiphelelwe lithemba?

INYEMBEZI ZOSIZI

5. UHana wayesizwa njani ngalokho ayekwenziwa nguPhenina?

⁵ UHana wayelenhlupho ezinengi ezazisenza ukuthi ahlale ekhala. Olunye uhlupho ayelalo yikuthi wayesesithenjini futhi unyanewabo uPhenina wayemzonda. Okwakubuhlungu kakhulu yikuthi uPhenina wayelabantwana abanengi yena engela. (1 Sam. 1:​1, 2) UPhenina wayehlala emchothoza uHana ngenxa yokuthi wayengatholi abantwana. Kunguwe wawuzakuzwa njani? UHana yena kwakumzwisa ubuhlungu “akhale aze ehluleke lokudla” futhi ‘inhliziyo yakhe yayisiba buhlungu kakhulu.’—1 Sam. 1:​6, 7, 10.

6. UHana wenzani ukuze athole induduzo?

⁶ UHana wayesenzani ukuze athole induduzo? Okunye ayekwenza yikuya khonza uJehova ethabanikeli. Ngelinye ilanga wathi ekhonale mhlawumbe eseduze kwegedi leguma lethabanikeli, “waqalisa ukuthandaza kuJehova ekhala kabuhlungu.” Wancenga uJehova wathi: ‘Khangela ukuthi mina incekukazi yakho ngihlupheka njani futhi ungikhumbule.’ (1 Sam. 1:10b, 11) UHana wathandaza watshela uJehova konke okwakusenhliziyweni yakhe. Kumele ukuthi uJehova wezwa ubuhlungu obukhulu ebona inyembezi zendodakazi yakhe le eligugu.

7. Kwamnceda njani uHana ukutshela uJehova konke okusenhliziyweni yakhe?

⁷ UHana wathi esethandazile kuJehova emtshela konke okusenhliziyweni yakhe, umphristi omkhulu u-Eli wamqinisekisa ukuthi uJehova wayezawuphendula umthandazo wakhe. UHana wasala esizwa njani? IBhayibhili lithi ‘wasuka wahamba wayakudla futhi wayengasadananga.’ (1 Sam. 1:​17, 18) UHana wasala esizwa ngcono lanxa izinto zazingakatshintshi. Umthwalo owawumsinda wayesewuphosele kuJehova. UJehova wayebubonile ubunzima ayekubo, wakuzwa ukukhala kwakhe futhi ngokuhamba kwesikhathi wambusisa waba labantwana.—1 Sam. 1:​19, 20; 2:21.

8-9. Kungani kumele sihambe emihlanganweni yebandla lanxa sisizwa kungatsho? (UHebheru 10:​24, 25) (Khangela lomfanekiso.)

⁸ Sifundani? Uphakathi kobunzima obukwenza  uhlale usehlisa izinyembezi yini? Mhlawumbe ufelwe ngumngane kumbe yisihlobo sakho. Izikhathi ezinjalo zingenza ufune ukuba wedwa ungabi sebantwini. Khumbula ukuthi uHana waya ethabanikeli futhi yikho lapho athola khona induduzo njalo wakhuthazwa ngu-Eli. Yikho lawe uzathola induduzo nxa ungaya emihlanganweni yebandla lanxa usizwa kungatsho. (Bala uHebheru 10:​24, 25.) Emihlanganweni yebandla siyathola induduzo evela eMibhalweni futhi yindlela uJehova ayabe ekuncedisa ngayo ukuthi ungahlali ucabanga izinto ezizakwenza udane lanxa uyabe ulokhu uphakathi kobunzima.

⁹ Emihlanganweni yebandla sithola abafowethu labodadewethu abalozwelo njalo abakhuluma amazwi asiduduzayo atshengisa ukuthi bayasithanda lokuthi balendaba lathi. (1 Thes. 5:​11, 14) Omunye umfowethu oliphayona eliqakathekileyo owafelwa ngumkakhe uthi: “Lakhathesi ziyake zehle izinyembezi, kwezinye izikhathi ngiyabe ngifuna ukuzihlalela ngedwa nje ngikhala. Kodwa nxa ngingahamba emihlanganweni yebandla ngifika ngikhuthazwe ngabafowethu labodadewethu. Amazwi amahle abangitshela wona kanye lezimpendulo zabo kuyawathoba amanxeba ami. Kwezinye izikhathi ngifika emihlanganweni yebandla ngikhathazekile kumbe ngidanile kodwa nxa ngikuyo ngiyabe sengisizwa ngcono.” Nxa sisemihlanganweni yebandla uJehova angasebenzisa abafowethu labodadewethu ukuthi basincedise.

10. Singamlingisela njani uHana nxa sisizwa ubuhlungu?

¹⁰ Okunye okwanceda uHana wahlaliseka yikuthandaza etshela uJehova konke okwakumkhathaza. Lawe ‘ungaphosela [kuJehova] konke okukukhathazayo’ ngoba uyabe engasoze ayekele ukukulalela. (1 Phet. 5:7) Omunye udadewethu owafelwa ngumkakhe ebulawa yizigebenga wathi: “Inhliziyo yami yayibuhlungu kakhulu okokuthi ngangicabanga ukuthi angisoze ngafa ngaphola. Okwangiduduza kakhulu yikuthandaza kuBaba wami osezulwini ongithandayo. Kwezinye izikhathi ngangiswela amazwi okuchasisa engangikuzwa kodwa yena wayengizwisisa. Nxa ngasengikhathazeke kakhulu ngangicela uJehova ukuthi angincedise ngihlaliseke. Ngangisithi ngingenza njalo ngibe ngcono, besengisenza imisebenzi yami yalelolanga.” Nxa uthandaza, tshela uJehova konke okukukhathazayo. Nxa ebona inyembezi zakho uyezwa ubuhlungu njalo uyayizwisisa indlela oyabe usizwa ngayo. Lanxa okukukhathazayo kuyabe kulokhu kukhona, uJehova uyenelisa ukukududuza lokukuncedisa ukuthi uzwe ngcono. (Hubo. 94:19; Flp. 4:​6, 7) Nxa ungaqinisela futhi uhlale uthembekile, uJehova uzakubusisa.—Heb. 11:6.

NXA UNGADANISWA NGUMUNTU OBUMTHEMBILE

11. UDavida wezwa njani ngesikhathi abantu ayebathembile bemzwisa ubuhlungu?

¹¹ UDavida wake waba lenhlupho ezazimenza ehlise inyembezi. Kulabantu ababemzonda bemfuna ephansi njalo kulabanye ayebathembile ababemdanisa. (1 Sam. 19:​10, 11; 2 Sam. 15:​10-14, 30) Ngesinye isikhathi esebunzimeni wabhala wathi: “Sengidiniwe ngokukhala, ngikhala ubusuku bonke umbheda uze ubemanzi. Isofa lami selimanzi te ngezinyembezi.” Wayekhalelani uDavida? Wathi: “Ngenxa yalabo abangihlukuluzayo.” (Hubo. 6:​6, 7) Okwenziwa ngabantu laba kwamzwisa ubuhlungu obukhulu uDavida, zehla ezimathonsi.

12. Kuyini uDavida ayengakuthandabuzi? (IHubo 56:8)

¹² Lanxa uDavida wayeke ehlelwe zinhlupho  wayengathandabuzi ukuthi uJehova uyamthanda. Wabhala wathi: “UJehova uzakuzwa ukukhala kwami.” (Hubo. 6:8) Kanti njalo uDavida nguye owabhala amazwi athinta inhliziyo atholakala kuHubo 56:8. (Bala.) Amazwi la enza kucace ukuthi uJehova uyasithanda kakhulu futhi enza sibone ukuthi ulendaba lokuthi sizwa njani. Ngesikhathi uDavida ekhala kwakungathi ubona uJehova ekhongozele inyembezi zakhe ngesigubhu kumbe ezibhala ebhukwini. UDavida wayeqiniseka ukuthi uJehova wayebubona ubuhlungu ayebuzwa lokuthi wayengasoze alukhohlwe usizi ayephakathi kwalo. UDavida wayengathandabuzi ukuthi uYise osezulwini olothando uyabubona ubunzima aphakathi kwabo njalo uyazwisisa ukuthi ubunzima lobu bumenza azizwe njani.

13. Kuyini okungasiduduza nxa abanye abantu bangasizwisa ubuhlungu? (Khangela lomfanekiso.)

¹³ Sifundani? Uphakathi kobuhlungu yini ngenxa yokuthi umuntu obumthemba kakhulu ukubambise ilitshe kumbe wenze into ekuzwise ubuhlungu kakhulu. Mhlawumbe inhliziyo yakho idabukile ngenxa yokuthi umuntu obuthandana laye ukulahlisile kumbe wena lomkakho selehlukene loba umuntu obumthanda kakhulu utshiye ukukhonza uJehova. Omunye umfowethu owayelenkosikazi eyafebayo yasimtshiya wathi: “Ngasala ngiphelelwe ngingakholwa lokuthi kwenzakele, ngadana, ngazonda njalo ngangizizwa ngilugebhezi.” Nxa omunye umuntu ekudanisile kumbe ekulahlisile, hlala ukwazi ukuthi uJehova kasoze akutshiye loba sekutheni. Umfowethu lo waphinda wathi: “Ngananzelela ukuthi uJehova uzahlala elidwala lami lanxa umuntu engimthandayo engangilahlisa. Kungaze kwenzakaleni uzahlala elathi. Kasoze abatshiye abaqotho bakhe.” (Hubo. 37:28) Khumbula ukuthi akulamuntu okuthanda njengoJehova. Kubuhlungu sibili ukulahliswa ngumuntu oyabe umthanda futhi umthembile. Kodwa indlela uJehova akuthanda ngayo ayisoze itshintshe. (Rom. 8:​38, 39) Nanku okumele uhlale ukukhumbula: Lanxa abanye abantu bengakuzwisa ubuhlungu, uYihlo osezulwini kakuthontisi.

14. Amazwi akuHubo 34:18 asiduduza njani?

¹⁴ Nxa omunye umuntu esizwise ubuhlungu, amazwi abhalwa nguDavida akuHubo 34:18 angasiduduza. (Bala.) Elinye ibhuku lithi ibala elithi “abadanileyo” lingahunyutshwa ngokuthi “labo abaphonguphila nje bengakhangelelanga lutho oluhle.” UJehova ubancedisa njani abantu laba abayabe bedaniswe ngendlela ebuhlungu kangaka? Umzali omthandayo umntanakhe uyamsondeza  amduduze. Lathi nxa sisizwa ubuhlungu kumbe sidanile ngenxa yokuthi umuntu ebesimthanda usilahlisile kumbe wasitshiya, uJehova uyabe ‘eseduze’ lathi esizwela futhi ekulungele ukusincedisa. Uzimisele ukusiduduza lokuthoba izinhliziyo zethu ezidabukileyo. Kanti njalo kunengi esikulindele ngabomvu asithembise khona okungasinceda ukuthi siqinisele nxa sisehlelwa zinhlupho.—Isaya. 65:17.

INYEMBEZI ZOMUNTU ONGASELATHEMBA

15. Kuyini okwakhalisa uHezekhiya?

¹⁵ Inkosi yakoJuda uHezekhiya yathi isileminyaka engu-39 yagula yabangwa lezibi. Umphrofethi u-Isaya watshela uHezekhiya umlayezo owawuvela kuJehova owawusithi umkhuhlane lo wawuzambulala. (2 Amakho. 20:1) UHezekhiya wayengaselathemba. Wayebona sekumnyama emuva laphambili. Lokhu kwamqeda amandla wakhala kabuhlungu. Wathandaza kuJehova ngenhliziyo yonke emncenga ukuthi amncedise.—2 Amakho. 20:​2, 3.

16. UJehova wawuphendula njani umthandazo kaHezekhiya?

¹⁶ UJehova wawuzwa umthandazo kaHezekhiya wazibona izinyembezi zakhe, wamzwela wasesithi kuye: “Ngiwuzwile umthandazo wakho, lenyembezi zakho ngizibonile. Ngakho ngizakusilisa.” UJehova wathuma u-Isaya ukuthi ayetshela uHezekhiya ukuthi wayezakuba lesihawu kuye, engeze impilo yakhe futhi akhulule iJerusalema ezandleni zama-Asiriya.—2 Amakho. 20:​4-6.

17. UJehova usiqinisa njani nxa silomkhuhlane osithwalise nzima (IHubo 41:3) (Khangela lomfanekiso.)

¹⁷ Sifundani? Ungenzani nxa kuyikuthi ulomkhuhlane osukutshudule kakhulu ungaselathemba lokuthi uzasila? Thandaza utshela uJehova indlela ozizwa ngayo, wehlise izinyembezi nxa kusithi ukhale. IBhayibhili lisithembisa ukuthi “uYise wesihawu esikhulu loNkulunkulu wenduduzo yonke uzasiduduza kuzo zonke inhlupho zethu.” (2 Khor. 1:​3, 4) Khathesi asikhangelelanga ukuthi uJehova asuse zonke inhlupho zethu kodwa siyakwazi ukuthi uzahlala esiqinisa. (Bala iHubo 41:3.) UJehova usebenzisa umoya wakhe ongcwele ukuthi asiqinise, asinike ukuhlakanipha njalo asincede singakhathazeki kakhulu. (Zaga. 18:14; Flp. 4:13) Usenza sihlaliseke ngoba usithembisa ukuthi esikhathini esizayo yonke imikhuhlane izabe ingasekho.—Isaya. 33:24.

18. Yiphi ivesi ejayele ukukududuza nxa usebunzimeni? (Khangela ibhokisi elithi “ Amavesi Aduduzayo.”)

¹⁸ Amazwi kaJehova amduduza uHezekhiya. Lathi iLizwi likaNkulunkulu lingasiduduza. EBhayibhilini kulamazwi angasiduduza futhi asenza sihlaliseke nxa sisebunzimeni. (Rom. 15:4) Omunye udadewethu ohlala  eWest Africa wabanjwa i-cancer futhi lokhu kwakusenza ukuthi ahlale ekhala. Uthi: “Umbhalo ongiduduza kakhulu ngu-Isaya 26:3. Lanxa singeke sizikhethele izilingo ezisehlelayo ivesi le yenza ngingathandabuzi ukuthi uJehova angangenza ngihlaliseke futhi ngingakhathazeki kakhulu nxa ngisebunzimeni.” Ikhona yini ivesi ekududuzayo nxa usebunzimeni kumbe usuphelelwa lithemba?

19. Kuyini esikulindele ngabomvu?

¹⁹ Njengoba sisezinsukwini zokucina kusazoba kunengi okuzasikhalisa, kusizwise ubuhlungu. UJehova uyazibona izinyembezi zethu futhi kumzwisa ubuhlungu kakhulu ukusibona sisebunzimeni. Siyibonile indlela ancedisa ngayo uHana, loDavida leNkosi uHezekhiya. Izinyembezi zethu ziligugu kuye. Nxa siphakathi kwelitshe lembokodo, inhlupho zisihanqile kumele sitshele uJehova konke okusezinhliziyweni zethu. Akumelanga sizehlukanise labafowethu labodadewethu. Kanti njalo kumele siqhubeke sibala iBhayibhili ukuze sithole amavesi angasiduduza. Nxa singaqhubeka sithembekile futhi siqinisela ebunzimeni, uJehova kasoze ayekele ukusibusisa. Esikhathini esizayo uzagcwalisa isithembiso esisilindele ngabomvu. Uzakwesula zonke izinyembezi zosizi, lezokulahliswa ngabantu esibathembayo lezokuphelelwa lithemba. (Isam. 21:4) Ngalesosikhathi sizabe sesisehlisa inyembezi zokuthokoza kuphela.