1. Isinkwa sasiqakatheke kangakanani ebantwini okukhulunywa ngabo eBhayibhilini?

 ISINKWA yiso esasidliwa kakhulu ngabantu abanengi okukhulunywa ngabo eBhayibhilini. (Gen. 14:18; Luk. 4:4) Sasidliwa kakhulu okokuthi kwezinye izikhathi nxa iBhayibhili likhuluma ngokudla lisebenzisa ibala elithi “isinkwa.” (Mat. 6:11; Imiseb. 20:​7, khangela umcijo wokutaditsha wevesi le ku-Nguqulo Yomhlaba Omutsha yesiNgisi okuthiwa yi-Study Bible) UJesu laye wasebenzisa isinkwa ezimangalisweni zakhe ezimbili ezaziwa kakhulu. (Mat. 16:​9, 10) Esinye isimangaliso sakhe sisithola kuJohane isahluko 6. Yiso esifuna ukusihlola esihlokweni lesi besesibona ukuthi sithola ziphi izifundo ezingasinceda lamuhla.

2. Kuyini okwenza abafundi bakaJesu bazibuza ukuthi abantu bazakudlani?

² Abaphostoli bakaJesu bathi bevela tshumayela, uJesu wathi bangene esikepeni bachaphe uLwandle lwaseGalile ukuze bayephumula. (Mak. 6:​7, 30-32; Luk. 9:10) Bahamba bayafika endaweni eyayingelabantu eduze leBhethisayida. Kodwa kungakayi ngaphi kwatheleka izinkulungwane zabantu. Lanxa kunjalo uJesu kazange abaxotshe abantu labo kumbe athi leso yisikhathi sakhe sokuphumula. Wabafundisa ngoMbuso, welapha labagulayo. Kwathi sekuntambama abafundi baqalisa ukuzibuza ukuthi abantu bonke laba babezakudlani. Mhlawumbe bakhona ababethwele imiphako, kodwa abanengi kwakumele baye ezigabeni eziseduze ukuze bayethenga ukudla. (Mat. 14:15; Joh. 6:​4, 5) Manje uJesu wayezakwenza njani?

 UJESU WENZA ISIMANGALISO SOKUPHA ABANTU ISINKWA

3. UJesu watshela abaphostoli bakhe ukuthi benzeni? (Khangela ongaphandle.)

³ UJesu watshela abaphostoli bakhe wathi: “Akulasizatho sokuthi bahambe, bapheni lina ukudla.” (Mat. 14:16) Manje babengakwenza njani lokho njengoba kwakulamadoda angaba ngu-5 000? Phela nxa kwasekubalwa abesifazana labantwana, abantu laba babengafika ku-15 000. (Mat. 14:21) Umphostoli u-Andreya wathi: “Nangu umfana olezinkwa zebhali ezinhlanu lenhlanzi ezimbili ezincane. Kodwa zingabenela yini abantu abanengi kangaka?” (Joh. 6:9) Isinkwa sebhali sasijayele ukudliwa ngabayanga. Lenhlanzi lezo ezincane zazingabe zifakwe isawudo zonyiswa. Lanxa kunjalo, ukudla komfana lo kwakungeke kubenele abantu bonke laba ababebanengi kangaka.

4. Sifundani kuJohane 6:​11-13? (Khangela lemifanekiso.)

⁴ UJesu watshengisa ukuthi ulomusa. Wathi abantu babumbe amaqembu bahlale etshanini. (Mak. 6:​39, 40; bala uJohane 6:​11-13.) Kodwa engakabaniki isinkwa lenhlanzi waqala wabonga uYise. Kwakufanele sibili ukuthi ambonge uNkulunkulu ngoba nguye osipha ukudla. Okwenziwa nguJesu kusifundisa ukuthi lathi kumele sikhuleke singakadli, kungelani ukuthi sisodwa kumbe siphakathi kwabantu. UJesu wathi esethandazile, wathi abafundi bakhe banike abantu ukudla njalo badla baze batshiya. Kodwa uJesu wayengafuni ukuthi ukudla okuseleyo kulahlwe. Yikho wathi kubuthwe, mhlawumbe ukuze kudliwe ngesinye isikhathi. Lapha uJesu wayesifundisa ukuthi sikusebenzise kuhle lokho esilakho. Nxa ungumzali, kungaba kuhle ukuthi ubale indaba le labantwabakho beselixoxa  ngezifundo esizithola kuyo ezimayelana lokuthandaza, ukuba lomusa kanye lokuphana.

5. Abantu benzani bebona lokho okwakwenziwe nguJesu futhi yena wenzani?

⁵ Abantu babemangaliswa yindlela uJesu ayefundisa ngayo lezimangaliso ayezenza. AmaJuda ayekwazi ukuthi uMosi wayethe uNkulunkulu wayezathuma umphrofethi omkhulu. Yikho nxa ayebona uJesu esenza izinto zonke lezi ayengabe ezibuza ukuthi kayisuye yini umphrofethi lowo. (Dute. 18:​15-18) Mhlawumbe ahle azitshela ukuthi uJesu nguye iNkosi ayifunayo ngoba wayezabe enika isizwe sonke isinkwa. Ngenxa yalokho ayesefuna ‘ukumbamba ukuze amenze inkosi.’ (Joh. 6:​14, 15) Aluba uJesu wavuma, wayezabe esengena kwezombusazwe zamaJuda ayengaphansi kombuso wamaRoma. Kodwa yena kazange avume. IBhayibhili lithi uJesu ‘wasuka waya entabeni eyedwa.’ Lanxa abantu babefuna ukumbamba ngamandla ukuthi angene kwezombusazwe kazange avume. Lesi yisifundo esiqakathekileyo kithi.

6. Singamlingisela njani uJesu? (Khangela lomfanekiso.)

⁶ Izikhathi ezinengi abantu ngeke basicele ukuthi senze isimangaliso esinjengalesi esenziwa nguJesu kumbe ukuthi sisilise abagulayo ngendlela eyisimanga, loba ukuthi sibe ngamakhosi. Kodwa bangafuna ukuthi singene kwezombusazwe ngokuvota kumbe ukusekela omunye umuntu ababona angani angaletha utshintsho. UJesu wakwenza kwacaca ukuthi kafuni ukungena kwezombusazwe. Ngokuhamba kwesikhathi  wathi: “UMbuso wami awusiwo walumhlaba.” (Joh. 17:14; 18:36) Lathi lamuhla kumele silingisele lokho okwakusenziwa nguJesu njalo sicabange ngendlela ayecabanga ngayo. Sisekela uMbuso kaNkulunkulu, sitshele abanye ngawo njalo siyawuthandazela. (Mat. 6:10) Asibuyeleni endabeni yesimangaliso sikaJesu sokunika abantu abanengi isinkwa besesibona ukuthi kuyini okunye esikufundayo.

‘ISIMANGALISO SEZINKWA SASIBAFUNDISANI?’

7. UJesu wenzani njalo abaphostoli bona benzani? (UJohane 6:​16-20)

⁷ UJesu wathi esenike abantu ukudla, wathi abaphostoli bakhe basuke lapho babuyele eKhaphenawume ngesikepe. Yena wasuka waya entabeni ebalekela abantu abasebefuna ukumenza inkosi. (Bala uJohane 6:​16-20.) Abaphostoli bathi besaphakathi kokugwedla, kwaqubuka isiphepho esasilolaka siphosa amagagasi esabekayo. Bathi besakhangelane lamagagasi, babona uJesu esiza kubo ehamba phezu kwamanzi, wasesithi umphostoli uPhetro ehle esikepeni abuye kuye ehamba phezu kwamanzi. (Mat. 14:​22-31) UJesu wathi esengene esikepeni isiphepho saphela. Abafundi basala bengelankani basebesithi kuye: “Wena uyiNdodana kaNkulunkulu sibili.” a (Mat. 14:33) Kuyamangalisa ukuthi abafundi babengakuzwisisi ukuthi isimangaliso lesi uJesu ayesanda kusenza sihambelana njani lesokunika abantu ukudla. UMakho wathi: “[Abaphostoli] bamangala kakhulu, ngoba babengakazwisisi ukuthi isimangaliso sezinkwa sasibafundisani. Izinhliziyo zabo zazilokhu zibuthundu ekuzwisiseni.” (Mak. 6:​50-52) Abazange bakuzwisise ukuthi uJehova wayenike uJesu amandla okwenza izimangaliso ezinengi, hatshi esokupha abantu ukudla kuphela. Ngemva kwalokho uJesu waphinda wakhuluma ngesimangaliso sokunika abantu abanengi isinkwa njalo siyathola isifundo kulokho akukhulumayo.

8-9. Kuyini okwenza abantu badinga uJesu? (UJohane 6:​26, 27)

⁸ Abantu uJesu ayebanike ukudla babeqakathekisa izisu zabo kuphela. Ngelanga elilandelayo bavuka baya lapho uJesu ayebaphele khona isinkwa bathola yena labaphostoli bakhe sebehambile. Yikho bagada izikepe ezazivela eThiberiya bayadinga uJesu eKhaphenawume. (Joh. 6:​22-24) Kambe ukuthi babefuna ukuyafunda okunengi ngoMbuso kaNkulunkulu? Hatshi. Babezifunela ukudla nje kuphela. Sikwazi njani lokho?

⁹ Kwenzakalani abantu laba sebemtholile uJesu eduze leKhaphenawume? UJesu kazange atshaye inja efihla umphini, wahle wabatshela ukuthi balande ukudla. Lanxa ‘babedle izinkwa basutha,’ uJesu wabatshela ukuthi ukudla lokho ‘kwakuyikudla okubolayo.’ Yikho wabakhuthaza ukuthi basebenzele ‘ukudla okungaboliyo okuzabanika impilo engapheliyo.’ (Bala uJohane 6:​26, 27.) UJesu wabatshela ukuthi uYise wayezabanika lokho kudla. Kumele ukuthi abantu bamangala kakhulu besizwa ukuthi kulokudla okungenza umuntu athole ukuphila okungapheliyo. Pho kwakuyikuphi ukudla lokho futhi babengakuthola njani?

10. Abantu kwakumele benzeni ukuze bathole ukuphila okungapheliyo?

¹⁰ Kukhanya amaJuda ayecabanga ukuthi kwakumele akusebenzele ukudla uJesu ayekhuluma ngakho. Mhlawumbe ayesecabanga ukuthi uJesu ukhuluma ngemisebenzi okukhulunywa ngayo eMthethweni kaMosi. Kodwa uJesu wawatshela wathi: “UNkulunkulu ufuna litshengise ukuthi liyakholwa kulowo amthumileyo.” (Joh. 6:​28, 29) Abantu kumele babe lokholo kuye ukuze ‘babe lokuphila okungapheliyo.’ UJesu wayeke wakhuluma ngakho lokho. (Joh. 3: 16-18, 36) Kanti njalo kunengi ayesazokutsho mayelana lokuthi singenzani ukuze sithole ukuphila okungapheliyo.—Joh. 17:3.

11. AmaJuda atshengisa njani ukuthi ayezifunela ukudla kuphela? (IHubo 78:​24, 25)

¹¹ AmaJuda la kazange amlalele uJesu ngesikhathi ewatshela ngalokho okwakumele akwenze ukuze uNkulunkulu awamukele. Ambuza athi: “Uzasenzela siphi isimangaliso ukuze sisibone besesikukholwa?” (Joh. 6:30) Athi ngensuku zikaMosi okhokho bawo badla imana futhi babeyifanisa lesinkwa ngoba babeyidla nsuku zonke. (Neh. 9:15; bala iHubo 78:​24, 25.) Kuyacaca ukuthi abantu laba babelokhu bezifunela isinkwa. Kabazange bake bazihluphe ngokubuza uJesu ukuthi wayesitshoni ngesikhathi ebatshela ‘ngesinkwa seqiniso esivela ezulwini.’ Isinkwa leso sona sasingafanani lemana ngoba sasizabanika ukuphila okungapheliyo. (Joh. 6:32) Babengelandaba lalokho uJesu ayefuna ukubafundisa khona mayelana lokuphila okungapheliyo. Bona babezifunela ukudla. Thina sifundani kulokho?

KUYINI OKUMELE SIKUQAKATHEKISE KAKHULU?

12. UJesu watshengisa njani ukuthi kuyini okuqakatheke kakhulu empilweni?

¹² Nansi isifundo esiqakathekileyo esisifunda kuJohane isahluko 6: Okumele sikuqakathekise kakhulu empilweni yikulalela uJehova lokuhlala singabangane bakhe. UJesu wakucacisa lokhu ngesikhathi elingwa nguSathane. Watshengisa ukuthi ukulalela uJehova kuqakatheke kakhulu ukwedlula ukudla. (Mat. 4:​3, 4) Lasentshumayelweni yakhe yasentabeni wagcizelela ukuthi okuqakatheke kakhulu empilweni yikukhonza uJehova. (Mat. 5:3) Ngakho kumele sizibuze umbuzo lo, ‘Indlela engiphila ngayo iyatshengisa yini ukuthi ngiqakathekisa ukukhonza uJehova ukwedlula lokho engingabe ngikufuna?’

13. (a) Kungani kungakubi ukukholisa ukudla? (b) Kuyini okumele sikunanzelele? (U-1 Khorinte 10:​6, 7, 11)

¹³ Akukubi ukuthi sikholise empilweni lokuthi sithandaze kuNkulunkulu sicele lokho esikufunayo. (Luk. 11:3) IBhayibhili lithi kuhle ukuthi umuntu “adle anathe futhi awukholise umsebenzi wakhe onzima” njalo lokhu “kuvela esandleni sikaNkulunkulu.” (Umtshu. 2:24; 8:15; Jak. 1:17) Lanxa kunjalo izinto lezi akumelanga kube yizo esiziqakathekisa kakhulu empilweni. Umphostoli uPhawuli wakucacisa lokhu lapho ebhalela amaKhristu ayephila ngesikhathi umumo wezinto wamaJuda ususiyaphela. Wawakhumbuza ngalokho okwenziwa ngama-Israyeli ngesikhathi esenkangala kanye lalokho okwenzakala eseduze lentaba iSinayi. Waxwayisa amaKhristu ukuthi ‘angafisi izinto eziyingozi njengalokho [ama-Israyeli] akwenzayo.’ (Bala u-1 Khorinte 10:​6, 7, 11.) UJehova wayenike ama-Israyeli ukudla ngendlela eyisimangaliso kodwa ukudla lokho kwaba ‘yingozi’ kubo ngenxa yobukhali babo. (Nani. 11:​4-6, 31-34) Langesikhathi aze enze ithole legolide, adla anatha futhi azikholisela. (Eks. 32:​4-6) UPhawuli wakhuluma ngalokho okwenziwa ngama-Israyeli ukuze axwayise amaKhristu ayephila ngesikhathi iJerusalema lethempeli lalo sekuzabhujiswa ngo-70 C.E. Kuqakatheke kakhulu ukuthi lathi silalele lokho okwatshiwo nguPhawuli ngoba sekuseduze ukuthi umumo lo wezinto ubhujiswe.

14. IBhayibhili lithi ukudla kuzabe sekunjani emhlabeni omutsha?

¹⁴ UJesu wathi ekhuluma ‘ngokudla kwethu kwalolusuku’ wakhuluma ngesikhathi lapho intando kaNkulunkulu ezakwenziwa khona “emhlabeni njengasezulwini.” (Mat. 6:​9-11) Ucabanga ukuthi kuzabe kunjani emhlabeni ngalesosikhathi? IBhayibhili litshengisa ukuthi nxa intando kaNkulunkulu isisenziwa emhlabeni ukudla kuzakuba yithaphutshiye. U-Isaya 25:​6-8 yena utshengisa ukuthi eMbusweni  kaNkulunkulu ukudla kuyabe sekugcwele. UHubo 72:16 yena uthi: “Kuzakuba lenala yokudla emhlabeni, amabele azakuba manengi eziqongweni zezintaba.” Nxa ukudla kuyabe sekukunengi kangaka, ucabanga ukuthi uzakwenzani? Kuyini ozafuna ukukupheka? Mhlawumbe uzafuna ukuzama ukupheka into ongakaze uyipheke. Okunye ozakukholisa yizithelo eziyabe zivela esihlahleni oyabe usihlanyele ngezakho izandla. (Isaya. 65:​21, 22) Akucabange ukuthi kuzabe kunjani, wonke umuntu esekholisa ukudla ukudla akuthandayo!

15. Abazavuswa emhlabeni omutsha bazafundani? (UJohane 6:35)

¹⁵ Bala uJohane 6:35. Esikhathini esizayo kuzahamba njani ngabantu labana uJesu abapha isinkwa lenhlanzi? Mhlawumbe abanye babo uzababona sebevusiwe. Lanxa kungenzakala ukuthi bafa bengakholwa kuJesu, kwazi bani uNkulunkulu angabavusa. (Joh. 5:​28, 29) Kodwa kuyabe kumele bafunde ukuthi uJesu wayesitshoni ngesikhathi esithi: “Mina ngiyisinkwa sokuphila. Loba ngubani oza kimi kasoze alambe.” Kuzamele bakholwe ukuthi uJesu wabahlawulela, wanikela ngempilo yakhe ngenxa yabo. Ngalesosikhathi abantu abazavuswa kanye labantwana abangabe bezazalwa emhlabeni omutsha bazafundiswa ngoJehova langalokho akuhlosileyo. Akucabange ukuthi kuzabe kumnandi njani ukufundisa abantu laba! Uzakukholisa ukwedlula ukudla ozakudla emhlabeni omutsha.

16. Sizaxoxa ngani esihlokweni esilandelayo?

¹⁶ Sesixoxe ngamanye amavesi akuJohane isahluko 6. Kodwa kulokunengi uJesu ayefuna ukukufundisa abantu mayelana ‘lempilo engapheliyo.’ AmaJuda uJesu ayekhuluma lawo kwakumele alalelisise lokho ayekutsho njalo lathi kumele senze njalo. Esihlokweni esilandelayo sizaxoxa ngamanye amavesi asesahlukweni leso.