1. Kuyini okwenza kube nzima ukuthi abantu bakholwe ukuthi singaphila phakade?

 ABANTU abanengi badla ukudla okwakha umzimba futhi baqeqetsha lemizimba yabo ukuze babe lempilakahle. Lanxa kunjalo sonke siyakwazi ukuthi sizakufa. Ukuphila okungapheliyo kungakhanya kuliphupho nje njalo kuyinto umuntu angeke ayifune ngenxa yokuthi nxa iminyaka ilokhu itshova imizimba layo iyabilokhu isiba buhlungu. Kodwa kuJohane 3:16 laku–5:24 uJesu wathi kungenzakala sibili ukuthi abantu bakuthole ‘ukuphila okungapheliyo’ njalo kuyisibusiso esivela kuNkulunkulu.

2. UJohane isahluko 6 usitshelani ngokuphila okungapheliyo? (UJohane 6:​39, 40)

² Ngelinye ilanga uJesu wanika izinkulungwane zabantu isinkwa lenhlanzi. a Basala bengelankani sibili. Kodwa akukhuluma ngelanga elilandelayo kwabatshiya bebambe owangaphansi. Abantu laba bamlandela baze bayamthola eKhaphenawume, duze lekhunjini leGalile. Wabatshela ukuthi uyenelisa ukuvusa abafileyo lokuthi bangakuthola ukuphila okungapheliyo. (Bala uJohane 6:​39, 40.) Nxa wafelwa ngumngane wakho kumbe yisihlobo, ubona angathi okwakhulunywa nguJesu kungakunceda njani? Amazwi kaJesu atshengisa ukuthi abanengi asebasitshiyayo bazavuswa baphinde baphile. Wena lezihlobo labangane bakho lingakuthola ukuphila okungapheliyo. Lanxa kunjalo abanengi abakuzwisisi okunye okwakhulunywa nguJesu kuJohane isahluko 6. Kanti wathini uJesu?

3. Kuyini uJesu akucacisayo kuJohane 6:51?

 ³ UJesu wathi esephe abantu ukudla ngendlela eyisimangaliso bona bacabanga ngemana uJehova ayeyinike ama-Israyeli ngesikhathi esenkangala. Phela iBhayibhili lithi imana le ‘kwakuyisinkwa esasivela ezulwini.’ (Hubo. 105:40; Joh. 6:31) UJesu wakhuluma ezinye izinto ababezazi ngemana ukuze aveze umcijo oqakathekileyo. Wabacacisela ukuthi lanxa uNkulunkulu wapha abantu bakhe imana ngendlela eyisimangaliso, abayidlayo bacina befile. (Joh. 6:49) Kodwa uJesu wathi yena ‘uyisinkwa seqiniso esivela ezulwini,’ ‘uyisinkwa sikaNkulunkulu’ futhi ‘uyisinkwa sokuphila.’ (Joh. 6:​32, 33, 35) UJesu wabacacisela ukuthi yena utshiyene njani lemana eyadliwa ngokhokho babo. Wathi: “Yimi isinkwa sokuphila esehla sivela ezulwini. Loba ngubani odla isinkwa lesi uzaphila kuze kube nini lanini.” (Bala uJohane 6:51.) AmaJuda awazange azwisise ukuthi wayesitshoni. Kwakuwaphica ukuthi kungani uJesu esithi yena ‘uyisinkwa’ esehla sivela ezulwini esingcono kakhulu kulemana uNkulunkulu ayeyinike okhokho bawo. Kodwa uJesu wawatshela wathi: “Isinkwa engizanikela ngaso yinyama yami.” Wayengabe esitshoni? Kuqakathekile ukuthi sikuzwisise lokho ngoba kwenza siqiniseke ukuthi thina lezihlobo zethu singakuthola ukuphila okungapheliyo. Ake sibone ukuthi wayesitshoni.

UJESU WAYESITSHONI NGESIKHATHI ESITHI INYAMA YAKHE IYISINKWA SOKUPHILA?

4. Kuyini okwenza amazwi kaJesu atshiya abantu bemangele?

⁴ Abanye awazange abaphathe amazwi kaJesu ngesikhathi ebatshela ukuthi isinkwa okwakumele basidle ‘yinyama yakhe eyayizakwenza ukuthi umhlaba uthole ukuphila.’ Mhlawumbe babecabanga ukuthi uJesu usefuna ukubenza amazimu nxa esithi bazakudla inyama yakhe sibili. (Joh. 6:52) Kodwa uJesu waphinda wakhuluma okunye futhi okumele ukuthi kwabamangalisa kakhulu. Wathi: “Nxa lingasayidlanga inyama yeNdodana yomuntu lanatha legazi layo, alilakho ukuphila phakathi kwenu.”—Joh. 6:53.

5. Sikwazi njani ukuthi uJesu wayengatsho ukuthi abantu kwakumele banathe igazi lakhe?

⁵ Ngesikhathi sikaNowa, uNkulunkulu watshela abantu ukuthi bangadli igazi. (Gen. 9:​3, 4) Ngokuhamba kwesikhathi uJehova waphinda watshela ama-Israyeli ukuthi akumelanga adle igazi. Loba ngubani owayezalidla ‘wayezabulawa.’ (Levi. 7:27) UJesu wayewulandela uMthetho lo. (Mat. 5:​17-19) Ngakho kwakungeke kwenze ukuthi atshele amaJuda ukuthi adle inyama yakhe anathe legazi lakhe. Pho wayesitshoni? Wayebacacisela ukuthi bangakuthola njani ‘ukuphila okungapheliyo.’—Joh. 6:54.

6. Sikwazi njani ukuthi amazwi kaJesu akuJohane 6:53 ayengumzekeliso?

⁶ Wayesitshoni uJesu? Kusegcekeni ukuthi uJesu wayesenza umzekeliso njengoba nje wake wenza into efanana laleyo ngesikhathi ekhuluma lowesifazana ongumSamariya. UJesu wathi kowesifazana lo: “Loba ngubani onatha amanzi engizamupha wona kasoze aphinde awome loba sekutheni. Amanzi engizamupha wona azakuba ngumthombo wamanzi ogobhozayo ngaphakathi kwakhe, amnike ukuphila okungapheliyo.” (Joh. 4:​7, 14) b UJesu wayengatsho ukuthi kulamanye amanzi owesifazana lo ayezathi angawanatha athole ukuphila okungapheliyo. Yikho lasebantwini laba ayekhuluma labo  eKhaphenawume, wayengatsho ukuthi nxa bangadla inyama yakhe banathe legazi lakhe sibili babezathola ukuphila okungapheliyo.

OKWAKHULUNYWA NGUJESU KUJOHANE 6:53 KUTSHIYENE NJANI LAKUKHULUMA ESIDLWENI SENKOSI?

7. Abanye bathini ngamazwi kaJesu akuJohane 6:53?

⁷ Abanye abantu bathi ngesikhathi uJesu ekhuluma amazwi akuJohane 6:53 wayechasisa lokho okumele kwenziwe eSidlweni SeNkosi Sakusihlwa. Okwenza batsho njalo yikuthi ngesikhathi leso uJesu wakhuluma amazwi ahambelana lakuJohane 6:53. (Mat. 26:​26-28) Bathi wonke umuntu oba khona eSidlweni SeNkosi Sakusihlwa kumele adle isinkwa anathe lewayini. Kodwa kuqondile yini lokhu? Kuqakathekile ukuthi siyihlolisise indaba le ngoba minyaka yonke kubuya amamiliyoni abantu ezonanza lathi iSidlo SeNkosi Sakusihlwa. Khathesi asikhangeleni ukuthi lokho uJesu akutsho kuJohane 6:53 lalokho akukhuluma eSidlweni SeNkosi Sakusihlwa kutshiyene njani.

8. Lokho uJesu akukhuluma kuJohane 6:53 kutshiyene njani lalokho akukhuluma eSidlweni SeNkosi Sakusihlwa? (Khangela lemifanekiso.)

⁸ Ake sixoxe ngezinto ezimbili. Okokuqala, uJesu wawakhuluma nini amazwi akuJohane 6:​53-56 futhi wayengaphi? Amazwi la wawatshela amaJuda eGalile ngo-32 C.E. Ngesikhathi ewakhuluma kwakusasele phose  umnyaka ukuthi asungule iSidlo SeNkosi Sakusihlwa eJerusalema. Okwesibili, wayekhuluma labobani? Abantu abanengi ayekhuluma labo eGalile babengalandanga ukuthi abafundise, bona ababekufuna yikudla kuphela. (Joh. 6:26) Phela uJesu wathi esekhulume into ababengayizwisisi bahle bayekela ukukholwa kuye. Labanye abafundi bakhe bahle bayekela ukumlandela. (Joh. 6:​14, 36, 42, 60, 64, 66) Okwenziwa ngabantu laba kutshiyene kakhulu lalokho okwenziwa ngabaphostoli bakaJesu abangu-11 ngo-33 C.E., ngesikhathi esungula iSidlo SeNkosi Sakusihlwa. Lanxa uJesu wakhuluma izinto okwakunzima ukuzizwisisa, abaphostoli bakhe abazange bamtshiye. Bona babetshiyene labanengi ayekhuluma labo eGalile ngoba babeqiniseka ukuthi uJesu uyiNdodana kaNkulunkulu eyehla ivela ezulwini. (Mat. 16:16) Yikho uJesu wabancoma wathi: “Lina alizange lingilahle ebunzimeni bami.” (Luk. 22:28) Izinto lezi esesixoxe ngazo zitshengisa ukuthi kuJohane 6:53 uJesu wayengakhulumi ngalokho okwakuzenziwa eSidlweni SeNkosi Sakusihlwa. Kukhona futhi okunye okuwucacisa kuhle umehluko lo.

OKWATSHIWO NGUJESU KUKUNCEDA NJANI?

9. Lokho uJesu akukhuluma eSidlweni SeNkosi Sakusihlwa kusebenza kubobani?

⁹ ESidlweni SeNkosi Sakusihlwa uJesu wanika abaphostoli bakhe isinkwa esingelamvubelo wabatshela ukuthi simela umzimba wakhe. Wabanika lewayini wasesithi limela ‘igazi lesivumelwano.’ (Mak. 14:​22-25; Luk. 22:20; 1 Khor. 11:24) Lokhu akukhulumayo ngesivumelwano kuqakathekile. Isivumelwano esitsha senziwa “labendlu ka-Israyeli” abazakuba ‘seMbusweni kaNkulunkulu,’ hatshi labantu bonke nje. (Heb. 8:​6, 10; 9:15) Ngalesosikhathi abaphostoli abazange bakuzwisise lokho kodwa sasesizafika isikhathi sokuthi bagcotshwe ngomoya ongcwele besebengeniswa esivumelwaneni esitsha ukuze bayekuba loJesu ezulwini.—Joh. 14:​2, 3.

10. Yiwuphi omunye umehluko okhona phakathi kwalokho uJesu akukhuluma eseGalile lalokho akukhuluma eSidlweni SeNkosi Sakusihlwa? (Khangela lomfanekiso.)

¹⁰ Nanzelela ukuthi lokho uJesu akukhuluma eSidlweni SeNkosi Sakusihlwa kusebenza ‘emhlambini omncane.’ Ababa ngabokuqala eqenjini leli kwakungabaphostoli bakhe ababethembekile ababekhona ngesikhathi esungula iSidlo SeNkosi Sakusihlwa. (Luk. 12:32) Abaphostoli laba uJesu wabatshela ukuthi badle isinkwa futhi banathe lewayini abanika lona. Abanye ababezakuba seqenjini lelo ngokuhamba kwesikhathi labo kwakuzamele badle isinkwa banathe lewayini nxa kusenziwa iSidlo SeNkosi Sakusihlwa. Abantu laba yibo abazakuba loJesu ezulwini. Yikho lokho uJesu akutshela abaphostoli bakhe eSidlweni SeNkosi Sakusihlwa kusebenza ebantwini abalutshwana kodwa lokho akutshela ixuku labantu elaliseGalile kusebenza ebantwini abanengi.

11. Kuyini okwakhulunywa nguJesu ngesikhathi eseGalile okutshengisa ukuthi wayengakhulumi ngabantu abalutshwana nje?

¹¹ Ngesikhathi uJesu eseGalile ngo-32 C.E., wayekhuluma lamaJuda ayefuna ukuthi awanike isinkwa. Kodwa yena wawatshela ngokunye okwakuqakatheke kakhulu ukwedlula isinkwa, okwakuzawanceda ukuthi athole ukuphila okungapheliyo. Kanti njalo wawatshela ukuthi abafileyo bazavuswa ngelanga lokucina baphile phakade. Lapha uJesu wayengakhulumi labantu abalutshwana njengalokho akwenza esungula iSidlo SeNkosi Sakusihlwa, kodwa wayekhuluma labantu  abanengi. Wayekhuluma ngesibusiso esasingatholwa ngumuntu wonke nje. Wabatshela wathi: “Loba ngubani odla isinkwa lesi uzaphila kuze kube nini lanini. Isinkwa engizanikela ngaso yinyama yami ezakwenza ukuthi umhlaba uthole ukuphila.”—Joh. 6:51.

12. Kumele senzeni nxa sifuna ukuthola ukuphila okungapheliyo?

¹² UJesu kazange atshele amaJuda ayeseGalile ukuthi ukuphila okungapheliyo kwakuzatholwa nguwonkewonke. Ababezathola ukuphila okungapheliyo yilabo ‘ababezakudla isinkwa’ leso uJesu ayekhuluma ngaso, okutsho labo ababezatshengisa ukuthi balokholo kuye. Abanengi lamuhla bazitshela ukuthi nxa bangamukela uJesu bavume ukuthi ungumsindisi wabo bazasindiswa. (Joh. 6:29) Lokhu ayisikho kodwa okumele umuntu akwenze, ngoba amanye amaJuda ayeseGalile ayekholwa kuJesu kodwa aphinda amtshiya. Kwasekutheni?

13. Kuyini okwakumele abantu bakwenze ukuze babe ngabafundi bakaJesu beqiniso?

¹³ Abantu abanengi babezimisele ukulandela uJesu kodwa kwakusithi nxa engasabaphanga ababekufuna bajikise bame ukumlandela. Bona babezifunela ukuthi abelaphe, abanike ukudla futhi abatshele lokho ababefuna ukukuzwa. Lanxa kunjalo wabatshela ukuthi kulokunye okwakumele bakwenze ukuze babe ngabafundi bakhe beqiniso. Phela uJesu wayengalandanga ukuzonika abantu izinto abazifunayo lapha emhlabeni, wayelande ukuzobafundisa ngalokho okwakumele bakwenze ukuze ‘baze kuye.’ Lokhu babengakwenza ngokulalela konke ayekufundisa.—Joh. 5:40; 6:44.

14. Kumele senzeni ukuze inyama legazi likaJesu kusincede?

 ¹⁴ UJesu wathi ekhuluma lamaJuda ayeseGalile wagcizelela ukuthi kwakumele abe lokholo. Kwakumele akholwe ukuthi umhlatshelo uJesu ayezawenza ngenyama yakhe langegazi lakhe wawuzakwenza ukuthi asindiswe, athole ukuphila okungapheliyo. Kwakuqakathekile ukuthi amaJuda akukholwe lokho futhi lathi kuqakathekile ukuthi sikukholwe. (Joh. 6:40) Nxa sifuna ukuthi inyama kaJesu legazi lakhe okukhulunywa ngakho kuJohane 6:53 kusincede kumele sikholwe ukuthi wasihlawulela. Lokhu kutsho ukuthi nxa singaba lokholo kuJesu sizathola ukuphila okungapheliyo njalo isibusiso lesi singatholwa ngabantu abanengi kakhulu.—Efe. 1:7.

15-16. Kuyini okuqakathekileyo esikufunde kuJohane isahluko 6?

¹⁵ Esikufunde kuJohane isahluko 6 kuqakatheke kakhulu futhi kuyasikhuthaza sonke. Kwenza kucace ukuthi uJesu ulendaba labantu. Ngesikhathi eseGalile welapha abagulayo, wafundisa abantu ngoMbuso njalo waba leqiniso lokuthi bayakuthola ukudla. (Luk. 9:11; Joh. 6:​2, 11, 12) Okuqakatheke kakhulu abafundisa khona yikuthi yena ‘uyisinkwa sokuphila.’—Joh. 6:​35, 48.

¹⁶ Labo uJesu athi ‘ngabezinye izimvu’ akumelanga badle isinkwa banathe lewayini eSidlweni SeNkosi Sakusihlwa esenziwa minyaka yonke. (Joh. 10:16) Lanxa kunjalo inyama legazi likaJesu Khristu kuyabanceda. Okuzakwenza ukuthi kubancede yikukholwa ukuthi umhlatshelo kaJesu yiwo ozakwenza ukuthi basindiswe. (Joh. 6:53) Kodwa labo abadla isinkwa banathe lewayini bayabe betshengisa ukuthi basesivumelwaneni esitsha futhi balethemba lokuyabusa loJesu ezulwini. Amazwi kaJesu akuJohane isahluko 6 asifundisa izinto eziqakatheke kakhulu kungelani lokuthi sigcotshiwe kumbe singabezinye izimvu. Isahluko lesi sitshengisa ukuthi kuqakathekile ukuthi sibe lokholo ukuze sithole ukuphila okungapheliyo.