Ubuzibala yini izihloko ezisanda kuphuma ku-Nqabayokulinda? Nxa kunjalo, ungenelisa yini ukuphendula imibuzo elandelayo?

UJehova ubaphatha njani abesifazana?

Kababandlululi njalo kathandi amadoda ukwedlula abesifazana. Uyabalalela njalo ulendaba lendlela abazizwa ngayo futhi uyakubona konke okubahluphayo. Utshengisa ukuthi uyabathemba ngokubavumela ukuthi benze umsebenzi wakhe.—w24.01, ikhasi 15-16.

Singakwenza njani lokho okutshiwo ku-Efesu 5:7 othi: “Lingabi lobudlelwano labo”?

Umphostoli uPhawuli wayesixwayisa ukuthi singajayelani labantu abazakwenza kube nzima ukuthi silandele imithetho kaJehova. Abantu labo ayisibo esibabona nsuku zonke kuphela kodwa kugoqela lalabo esingajayelana labo kwezokuxhumana (i-social media).—w24.03, ikhasi 22-23.

Yiziphi izindaba ezingamanga okumele sizixwaye?

Ezinye indaba ezingamanga okumele sizixwaye zingavela kubafowethu labodadewethu abayabe becabanga ukuthi bayasikhuthaza kodwa bengahlolanga ukuthi lokho abasithumezela khona kuliqiniso yini. Ezinye zingavela ebantwini esingabaziyo loba kubahlamuki abayabe besenza angathi bafuna ukufunda iBhayibhili.—w24.04, ikhasi 12.

Kuyini esikwaziyo lesingakwaziyo mayelana lendlela uJehova azakwahlulela ngayo iNkosi uSolomoni labantu beSodoma leGomora ababhujiswayo lalabo ababhujiswa ngesikhathi sikaZamcolo?

Abukho ubufakazi obuveza ukuthi uJehova wakhetha ukubabhubhisa phakade abantu labo. Esikwaziyo yikuthi ulesihawu esikhulu futhi uyabe ekwazi konke okwenzakalayo.—w24.05, ikhasi 3-4.

Ukwazi ukuthi uJehova “uliDwala” kusiqinisekisa ngani? (Dute. 32:4)

Singenza uJehova abe yindawo yethu yokucatsha. Ngeke asilahlise, uhlala egcina izithembiso zakhe. Katshintshi njalo ubuntu bakhe lenhloso yakhe akutshintshi.—w24.06, ikhasi 26-28.

Kuyini okungakunceda nxa uthuthele ebandleni elitsha?

Thembela kuJehova ngoba uzakuncedisa ngendlela ancedisa ngayo izinceku zakhe zasendulo. Ungaqathanisi ibandla owawukulo lalelo osukulo. Yenza okunengi ebandleni elitsha, udinge labangane abatsha.—w24.07, ikhasi 26-28.

Sifundani emizekelisweni kaJesu emithathu ekuMathewu 25?

Umzekeliso wezimvu lembuzi ugcizelela ukuthi kumele sithembeke futhi sibe qotho. Owentombi ezihlakaniphileyo leziyizithutha ugcizelela ukuthi kumele sihlale siphapheme njalo silungiselele. Umzekeliso wamathalenta wona ugcizelela ukuthi kuqakathekile ukukhuthala.—w24.09, ikhasi 20-24.

Ivurandi lethempeli likaSolomoni lalilide kangakanani?

Ku-2 ImiLando 3:4 eminye imibhalo yakudala ithi “lalizingalo ezingu-120,” okutsho ukuthi lalingamamitha angu-53 ukuya phezulu. Kodwa eminye imibhalo yakudala ethenjwayo ithi “lalizingalo ezingu-20,” okutsho ukuthi lalingaba ngamamitha angu-9 ukuphakama. Lokhu yikho okuhambelana lobubanzi bemiduli yethempeli.—w24.10, ikhasi 31.

Kutshoni ukuthi inceku ekhonzayo kumele “ibe yindoda elenkosikazi eyodwa”? (1 Thim. 3:12)

Kutsho ukuthi kumele ibe lenkosikazi eyodwa njalo akumelanga ifebe. Kanti njalo akumelanga izidlise satshanyana kwabanye abesifazana.—w24.11, ikhasi 19.

Kungani singeke sithi amazwi akuJohane 6:53 atshengisa ukuthi uJesu wayechasisa lokho okumele kwenziwe eSidlweni SeNkosi Sakusihlwa?

KuJohane 6:53 uJesu wathi abantu kumele badle inyama yakhe banathe legazi lakhe. Amazwi la wawakhuluma eGalile ngo-32 C.E., ewatshela amaJuda okwakumele akholwe kuye. Kodwa iSidlo SeNkosi Sakusihlwa sona sasungulwa eJerusalema sekwedlule umnyaka owodwa. ESidlweni leso uJesu wayekhuluma lalabo abazakuyabusa laye ezulwini.—w24.12, ikhasi 10-11.