1-2. Kungani uJehova wasivulela indlela yokuthi sibe ngamalunga emuli yakhe futhi wakwenza njani lokho?

UJEHOVA usinxuse ukuthi sibe ngamalunga emuli yakhe emkhonzayo. Lesi yisibusiso esikhulu sibili! Imuli yethu ibunjwa ngabantu abazinikele kuNkulunkulu njalo abalokholo emhlatshelweni weNdodana yakhe. Siyimuli ethokozayo okwamagama. Siphila impilo engcono khathesi futhi siyathokoza ngoba silethemba lokuphila okungapheliyo ezulwini loba ePharadayisi emhlabeni.

² UJehova wasivulela indlela yokuthi sibe ngamalunga emuli yakhe ngenxa yokuthi uyasithanda kakhulu. Kodwa walahlekelwa njalo wezwa ubuhlungu ukuze akwenze lokhu. (Joh. 3:16) ‘Sathengwa ngentengo.’ (1 Khor. 6:20) UJehova wasebenzisa inhlawulo ukuze senelise ukuba ngabangane bakhe abaseduze. Silesibusiso sokubiza uMuntu omkhulu kulabo bonke ngokuthi Baba. Kanti njalo esihlokweni esidlulileyo sifunde ukuthi uJehova unguBaba ongcono kulabo bonke.

3. Yiphi imibuzo esingazibuza yona? (Khangela lebhokisi elithi “ UJehova Uyangazi Yini?”)

³ Lathi singabuza umbuzo ofanana lalowo owabuzwa ngomunye umlobi weBhayibhili. Wathi: “Ngizamnikani uJehova ngabo bonke ubuhle bakhe kimi?” (Hubo. 116:12, NWT) Iqiniso yikuthi akulalutho esingalunika uBaba wethu osezulwini olulingana lalokho asenzele khona. Lanxa kunjalo uthando alalo ngathi lwenza simthande. Umphostoli uJohane wabhala wathi: “Siyathanda ngoba yena wasithanda kuqala.” (1 Joh. 4:19) Singatshengisa njani ukuthi siyamthanda uBaba wethu osezulwini?

4. Ngokwalokho okutshiwo kuJakhobe 4:8, kungani kumele sizame ukusondela kuJehova?

⁴ UJehova ufuna sisondele kuye futhi sikhuleke kuye. (Bala uJakhobe 4:8.) Usikhuthaza ukuthi ‘siphikelele ekuthandazeni’ njalo uhlala esilalela. (Rom. 12:12) Kasisweli isikhathi sokulalela imithandazo yethu futhi kadinwa ukuyilalela. Thina simlalela ngokubala iLizwi lakhe iBhayibhili lamabhuku asinceda ukuthi silizwisise langokulalelisisa nxa sisemihlanganweni yebandla. Sizahlala siseduze loJehova nxa singathandaza zikhathi zonke njengoba nje abantwana behlala beseduze labazali babo nxa bexoxa labo zikhathi zonke.

5. Singayithuthukisa njani imithandazo yethu?

⁵ Zibuze ukuthi imithandazo yakho injani. UJehova ufuna simtshele konke okusezinhliziyweni zethu. (Hubo. 62:8) Kumele sizibuze umbuzo lo: ‘Imithandazo yami injengencwadi engiyikopileyo yini kumbe injengencwadi engizibhalele yona kusuka enhliziyweni?’ Akuthandabuzwa ukuthi umthanda ngenhliziyo yonke uJehova futhi ufuna ukugcina ubungane bakho laye buqinile. Kodwa ukuze ukwenze lokhu kumele uthandaze kuye zikhathi zonke. Mtshele imfihlo zakho, izinto ezikuthokozisayo lezikuzwisa ubuhlungu. Qiniseka ukuthi uJehova uzakuncedisa nxa ungamcela.

6. Kumele senzeni ukuze sihlale siseduze loBaba wethu osezulwini?

⁶ Kumele sihlale simbonga ngazo zonke izikhathi uBaba wethu osezulwini nxa sifuna ukuhlala siseduze laye. Sivumelana lomhubi owabhala wathi: “Zinengi, Jehova, Nkulunkulu wami, izimangaliso ozenzileyo. Izinto owasilungiselela zona kakho ongazibala kuwe; aluba bengingakhuluma loba ngilandise ngazo, zingaba zinengi ngokweqileyo ukuzibalisa.” (Hubo. 40:5) Ukubonga kwethu akumelanga kuphelele enhliziyweni kodwa kumele sikutshengise ngamazwi langezenzo. Lokhu kwenza singafanani labantu abanengi esiphila labo emhlabeni lo, abatshengisi ukuthi bayabonga ngalokho uNkulunkulu abenzela khona. Vele okunye okutshengisa ukuthi siphila “ezinsukwini zokucina” yikuthi abantu ababongi. (2 Tim. 3:1, 2) Kasingaqali ukuba njengabo.

7. UJehova ufuna senzeni futhi kungani kumele senze njalo?

⁷ Abazali abafuni ukuthi abantwababo baxabane kodwa bafuna bathandane. UJehova laye unjalo, ufuna bonke abantwabakhe bazwanane. Phela nxa sibathanda abafowethu labodadewethu siyabe sitshengisa ukuthi singamaKhristu eqiniso. (Joh. 13:35) Sivumelana lomhubi owabhala wathi: “Bheka kuhle, kuyabukeka kangakanani nxa abazalwane behlezi ndawonye ngokuzwana!” (Hubo. 133:1) Nxa sithanda abafowethu labodadewethu siyabe sitshengisa uJehova ukuthi siyamthanda. (1 Joh. 4:20) Kuyathokozisa kakhulu ukuba ngamalunga emuli ebunjwa ngabantu ‘abalomusa komunye lomunye labazwelana kakhulu.’​—Efe. 4:32.

8. Ngokwalokho okutshiwo ku-1 Johane 5:3, yisiphi isizatho esiqakatheke kulazo zonke esenza silalele uJehova?

⁸ UJehova ukhangelele ukuthi abantwana balalele abazali babo njalo ufuna lathi simlalele. (Efe. 6:1) Kufanele simlalele ngoba nguye owasidalayo futhi  usinika izinto esizidingayo ukuze siphile njalo ulenhlakanipho edlula eyabobaba bonke. Kodwa isizatho esiqakatheke kulazo zonke esenza simlalele yikuthi siyamthanda. (Bala u-1 Johane 5:3.) Lanxa silezizatho ezinengi zokumlalela, kasibambi ngamandla ukuthi senze njalo. UJehova wasinika inkululeko yokuzikhethela yikho uyathokoza nxa simlalela ngenxa yokuthi siyamthanda.

9-10. Kungani kuqakathekile ukwazi lokulalela imithetho kaNkulunkulu?

⁹ Abazali bafuna abantwababo bavikeleke yikho bebanika imithetho ebavikelayo. Nxa abantwana beyilalela imithetho le bayabe betshengisa ukuthi bayabathemba futhi bayabahlonipha. Ukwazi lokulalela imithetho kaBaba wethu osezulwini khona kuqakatheke kakhulu. Nxa singenza njalo, siyabe sitshengisa ukuthi siyamthanda uJehova lokuthi siyamhlonipha. Kanti njalo ukwazi lokulalela imithetho yakhe kuyasinceda. (Isaya. 48:17, 18) Kodwa labo abangayilaleliyo imithetho kaJehova bacina belimala kakhulu.​—Gal. 6:7, 8.

¹⁰ Nxa silalela uJehova siyabe sizivikela ezintweni ezingasilimaza futhi zisiphambanise ekukhonzeni. UJehova uyakwazi okusincedayo. Udadewethu okuthiwa ngu-Aurora ohlala eMelika uthi: “Angithandabuzi ukuthi ukulalela uJehova kwenza siphile impilo engcono kakhulu.” Uqinisile sibili udadewethu. Ukulalela imithetho kaJehova kukuncede njani?

11. Ukuthandaza kusinceda ukuthi senzeni?

 ¹¹ Ukuthandaza kuyasinceda ukuthi silalele langesikhathi kunzima ukwenza njalo. Ngezinye izikhathi isono esilaso senza kube nzima ukuthi silalele uJehova kodwa kumele silwise ukuthi simlalele. Umhubi wancenga uJehova wathi: “Ngipha ukuzwisisa ukuze ngigcine umthetho wakho ngiwulalele ngayo yonke inhliziyo yami.” (Hubo. 119:34) Udadewethu oliphayona lesikhathi sonke okuthiwa nguDenise uthi, “Nxa sekunzima ukuthi ngilalele umthetho kaJehova, ngiyathandaza ngicele amandla okwenza okuqondileyo.” Sileqiniso lokuthi uJehova uhlala eyiphendula imithandazo enjalo.​—Luk. 11:9-13.

12. U-Efesu 5:1 uthi kumele senzeni?

¹² Bala u-Efesu 5:1. Senza konke okusemandleni ethu ukuthi silingisele uJehova ngoba ‘singabantwana abathandwayo.’ Siyabe simlingisela nxa sithanda abanye, silomusa futhi sibathethelela. Nxa abantu abangamaziyo uNkulunkulu bebona indlela esiziphatha ngayo bangafuna ukwazi okunengi ngaye. (1 Phet. 2:12) Abazali abangamaKhristu kumele bazame ukuphatha abantwababo ngendlela uJehova asiphatha ngayo. Nxa bengenza njalo, abantwababo labo bangafuna ukuba ngabangane bakaBaba wethu osithandayo.

13. Kumele senzeni ukuze sibe lesibindi?

 ¹³ Izikhathi ezinengi umntwana uyazigqaja ngoyise futhi uyakuthanda ukukhuluma ngaye. Lathi siyazigqaja ngoBaba wethu osezulwini uJehova futhi sifuna abanye babemazi. Sizizwa njengeNkosi uDavida eyabhala yathi: “Umphefumulo wami uzancoma uJehova.” (Hubo. 34:2) Kodwa kuthiwani nxa silenhloni zokukhuluma ngoJehova? Kuyini okumele sikwenze ukuze sibe lesibindi? Kumele sicabange ngokuthi uJehova uzathokoza nxa singakhuluma ngaye lokuthi ukukhuluma ngaye kuzabanceda abanye. UJehova uzasinika isibindi. Wanceda amaKhristu aphila ngesikhathi sabaphostoli ukuthi abe lesibindi futhi lathi uzasinceda sibe laso.​—1 Thes. 2:2.

14. Yiziphi ezinye izizatho ezenza umsebenzi wokutshumayela uqakatheke?

¹⁴ UJehova kakhethi yikho uyathokoza nxa esibona sithanda abanye kungelani lokuthi badabuka ngaphi. (ImiSeb. 10:34, 35) Ukutshumayela izindaba ezinhle ngeyinye indlela engcono kakhulu yokutshengisa ukuthi siyabathanda abanye. (Mat. 28:19, 20) Kuyini okungenzakala nxa singenza umsebenzi lo? Labo abasilalelayo bangantshintsha indlela abaphila ngayo futhi babe lethemba lokuphila okungapheliyo ePharadayisi.​—1 Tim. 4:16.

15-16. Kuyini okwenza sithokoze?

¹⁵ UJehova unguBaba olothando yikho ufuna imuli yakhe ithokoze. (Isaya. 65:14) Lanxa sisehlelwa yibunzima silezizatho ezinengi zokuthokoza. Ngokwesibonelo, asithandabuzi ukuthi uBaba wethu osezulwini uyasithanda kakhulu. Silolwazi oluqondileyo mayelana leLizwi lakhe iBhayibhili. (Jer. 15:16) Kanti njalo singamalunga emuli ebunjwa ngabantu abathanda uJehova, abathanda imithetho yakhe labathandanayo.​—Hubo. 106:4, 5.

¹⁶ Singenelisa ukuhlala sithokoza ngoba siyakwazi ukuthi izinto zizakuba ngcono esikhathini esizayo. Siyakwazi ukuthi sekuseduze ukuthi uJehova aqede bonke ububi lokuthi asebenzise uMbuso wakhe ukuthi antshintshe umhlaba ube liPharadayisi. Kanti njalo silethemba lokuthi abantu abafileyo bazavuswa siphinde sibabone. (Joh. 5:28, 29) Leso kuzakuba yisikhathi esihle kakhulu! Okuqakatheke kakhulu yikuthi siyaqiniseka ukuthi bonke abazakuya ezulwini labazaphila emhlabeni bazadumisa uBaba wethu osithandayo futhi bamkhonze.