ISIFUNDO 5
“Inhloko Yamadoda Wonke NguKhristu”
“Inhloko yamadoda wonke nguKhristu.”—1 KHOR. 11:3.
INGOMA 12 UJehova Uphakeme
ESIZAKUFUNDA *
1. Kuyini okungenza indoda ingayiphathi kuhle imuli yayo?
UBONA angani kutshoni ukuba yinhloko? Amanye amadoda aphatha omkawo kanye labantwabawo elandela amasiko awo kumbe indlela akhuliswa ngayo. Udadewethu okuthiwa nguYanita ohlala e-Europe uthi: “Lapho engihlala khona abantu babakhangelela phansi abesifazana futhi bababona njengezisebenzi.” Omunye umfowethu okuthiwa nguLuke ohlala eMelika uthi: “Abanye obaba bafundisa amadodana abo ukuthi akumelanga alalele abesifazana ngoba vele akulalutho oluqakathekileyo abangalutsho.” Kodwa uJehova kafuni ukuthi amadoda aphathe omkawo ngale indlela. (Khangela uMakho 7:13.) Manje indoda ingenzani ukuze iyiphathe kuhle imuli yayo?
2. Kuyini inhloko yemuli okumele ikwazi njalo kungani?
2 Indoda kumele iqale izwisise ukuthi uJehova ufuna yenzeni ukuze iyiphathe kuhle imuli yayo. Kanti njalo kumele ikwazi ukuthi kungani uJehova wakhetha ukuthi kube lenhloko emulini lokuthi ingamlingisela njani yena loJesu. Kungani kuqakathekile ukuthi ikwazi lokhu? Ngenxa yokuthi uJehova uyinike amandla emulini njalo ukhangelele ukuthi iwasebenzise kuhle.—Luk. 12:48b.
UJEHOVA UYIHLELE NJANI IMULI YAKHE?
3. Amazwi aku-1 Khorinte 11:3 asifundisani ngobunhloko?
3 Bala u-1 Khorinte 11:3. Ivesi le ichasisa indlela uJehova ahlele ngayo imuli yakhe esezulwini lasemhlabeni. Njengoba eyinhloko yabo bonke, ulamandla ukwedlula loba ngubani. Yikho ukhethe abanye ukuthi babezinhloko kodwa bazalandisa kuye ngendlela abasebenzisa ngayo amandla abo. (Rom. 14:10; Efe. 3:14, 15) UJehova ubeke uJesu ukuthi abe yinhloko yebandla kodwa uzalandisa kuye ngendlela aliphatha ngayo. (1 Khor. 15:27) Uphinde wabeka indoda ukuthi ibe yinhloko yemuli kodwa izalandisa kuye lakuJesu ngendlela eyiphatha ngayo.—1 Phet. 3:7.
4. UJehova loJesu balamandla okwenzani?
4 Njengoba uJehova eyinhloko yemuli yakhe, nguye olamandla okufakela abantwabakhe imithetho futhi ulelungelo lokulaya labo abangayilandeliyo. (Isaya. 33:22) UJesu inhloko yebandla laye ulelungelo lokufaka imithetho lelokulaya labo abangayilandeliyo.—Gal. 6:2; Kol. 1:18-20.
5. Inhloko yemuli ilamandla okwenzani njalo kuyini okumele ikwazi?
5 Inhloko yemuli layo ilamandla okufaka imithetho emulini yayo. (Rom. 7:2; Efe. 6:4) Kodwa amandla la kulalapho aphelela khona. Ngokwesibonelo, imithetho eyifakayo kumele isekelwe eLizwini likaNkulunkulu. (Zaga. 3:5, 6) Kanti njalo inhloko yemuli kayilamandla okufakela abantu abangayisibo bemuli yayo imithetho. (Rom. 14:4) Okunye okumele ikukhumbule yikuthi nxa abantwana sebekhulile basuka ngekhaya bayabe bengasekho ngaphansi kwayo lanxa bezaqhubeka beyihlonipha.—Mat. 19:5.
KUNGANI UJEHOVA WENZA UKUTHI KUBE LOBUNHLOKO?
6. Kungani uJehova wenza ukuthi kube lobunhloko?
6 UJehova wenza kwaba lobunhloko ngenxa yokuthi uyayithanda imuli yakhe. Buyisipho esivela kuye. Benza kube lokuthula lokuhleleka emulini yakhe. (1 Khor. 14:33, 40) Aluba bekungela bunhloko bekuzakuba lengxabangxoza lokungathokozi. Ngokwesibonelo, besingasoze sikwazi ukuthi ngubani okumele enze izinqumo futhi abe leqiniso lokuthi ziyalandelwa.
7. Ngokwalokho okutshiwo ku-Efesu 5:25, 28, uJehova ufuna amadoda aphathe njani omkawo?
7 Nxa kuyikuthi ubunhloko yisipho esivela kuNkulunkulu, pho kungani amadoda amanengi ewadlisa luklubhu omkawo futhi engontandokayiphikiswa? Lokhu kubangelwa yikuthi akhetha ukulandela amasiko awo kulokulalela imithetho kaJehova emayelana lokuthi imuli kumele iphathwe njani. Kanti njalo angabe ehlukuluza omkawo ecabanga ukuthi lokhu kuwenza abe ngamadoda kuzwa. Ngokwesibonelo, indoda ingabe ihlukuluza umkayo ukuze ayesabe kumbe ukuze abanye bayibone iyindoda emadodeni. Ingazitshela ukuthi njengoba ingeke ibambe umkayo ngamandla ukuthi ayithande ingamenza ayesabe. Nxa umkayo eseyesaba kuzaba lula ukuthi enze lokho ekufunayo. * Amadoda anje alahlekile sibili ngoba kawahloniphi omkawo futhi enza okuphikisana lalokho uJehova afuna akwenze.—Bala u-Efesu 5:25, 28.
INDODA INGENZANI UKUZE IPHATHE KUHLE IMULI YAYO?
8. Indoda ingenzani ukuze iyiphathe kuhle imuli yayo?
8 Nxa indoda ingalingisela indlela uJehova loJesu abasebenzisa ngayo amandla abo izayiphatha kuhle imuli yayo. Khathesi kasixoxeni ngesibonelo sikaJehova lesikaJesu besesibona ukuthi inhloko yemuli ingabalingisela njani endleleni ephatha ngayo imuli yayo.
9. UJehova utshengisa njani ukuthi uthobekile?
9 Ukuthobeka. UJehova uhlakaniphe ukwedlula loba ngubani kodwa uyalalela nxa izinceku zakhe ziveza lokho ezikucabangayo. (Gen. 18:23, 24, 32) Ngesinye isikhathi wake walalela icebo lengilosi. (1 AmaKho. 22:19-22) Lanxa yena engelasono, kalindelanga ukuthi singaphambanisi. Uzimisele ukusincedisa ukuthi siphumelele ekumkhonzeni. (Hubo. 113:6, 7) IBhayibhili lize lithi uJehova “ungumsizi.” (Hubo. 27:9; Heb. 13:6) INkosi uDavida yavuma ukuthi okwenza yaphumelela kukho konke eyayikwenza yikuthi uJehova uthobekile futhi wayeyincedisa.—2 Sam. 22:36.
10. UJesu watshengisa njani ukuthi uthobekile?
10 Khathesi asixoxeni ngesibonelo sikaJesu. Lanxa wayeyiNkosi, wagezisa inyawo zabafundi bakhe. Okunye okwenza uJehova wathi indaba le ibhalwe eBhayibhilini yikuthi wayefuna inhloko zemuli kanye labanye balingisele isibonelo sikaJesu. UJesu ngokwakhe wathi: “Ngilitshiyele isibonelo ukuze lani lenze njengoba ngenzile kini.” (Joh. 13:12-17) Lanxa wayelesikhundla esiphezulu, wayengakhangelelanga ukuthi aphathwe njengenkosi kodwa wayezehlisa enze imisebenzi yenceku.—Mat. 20:28.
Inhloko yemuli ingatshengisa ukuthi ithobekile lokuthi iyayithanda imuli yayo ngokwenza imisebenzi yendlini langokuyincedisa endabeni zokukhonza (Khangela indima 11 lo-13)
11. Isibonelo sikaJehova lesikaJesu singayinceda njani inhloko yemuli ukuthi ithobeke?
11 Sifundani? Zinengi indlela inhloko yemuli engatshengisa ngazo ukuthi ithobekile. Ngokwesibonelo, kayisoze ikhangelele ukuthi imuli yayo ingaphambanisi. Izalalela nxa umkayo labantwabayo beveza lokho abakucabangayo lanxa ingavumelani lakho. Udadewethu okuthiwa nguMarley ohlala eMelika uthi: “Ngezinye izikhathi mina lomkami siyake sibone izinto ngendlela etshiyeneyo. Kodwa ngiyakwazi ukuthi uyangiqakathekisa futhi uyangihlonipha ngoba uyangivumela ukuthi ngiveze engikucabangayo abesecabangisisa ngakho engakenzi isinqumo.” Kanti njalo indoda ingatshengisa ukuthi ithobekile ngokwenza imisebenzi yendlini lanxa abantu emphakathini besithi imisebenzi leyo ngeyabomama. Lokhu kudinga ukuthi izimisele. Kungani sisitsho njalo? Udade okuthiwa nguRachel uthi: “Lapho engakhulela khona, nxa indoda incedisa umkayo ukugezisa imiganu kumbe ukuklina endlini, omakhelwane lezihlobo bathi ayisiyondoda kuzwa. Bangacabanga ukuthi ibuswa ngumfazi.” Nxa kuyikuthi lokho yikho okwenzakala lapho ohlala khona, khumbula ukuthi uJesu wagezisa inyawo zabafundi bakhe lanxa lo kwakungumsebenzi owawusenziwa yinceku. Indoda ephatha kuhle imuli yayo iqakathekisa ukuthi umkayo labantwabayo bathokoze kulokuthi abantu bayibone iyindoda kuzwa. Kuyini okunye indoda okumele ikwenze ukuze iyiphathe kuhle imuli yayo?
12. UJehova loJesu batshengisa njani ukuthi bayasithanda?
12 Uthando. Konke uJehova akwenzayo ukwenza efuqwa luthando. (1 Joh. 4:7, 8) Lokho asifundisa khona esebenzisa iLizwi lakhe iBhayibhili lenhlanganiso yakhe kutshengisa ukuthi uyasithanda lokuthi ufuna sibe ngabangane bakhe. Utshengisa ukuthi ulendaba lathi ngokusiqinisekisa ukuthi uyasithanda. Kanti njalo uyasinakekela ngezinto esizidingayo, ‘usinika inala yezinto zonke esizikholisayo.’ (1 Tim. 6:17) Nxa singaphambanisa uyasiqondisa, kodwa uyabe elokhu esithanda. Waphinda watshengisa ukuthi uyasithanda ngokuthumela iNdodana yakhe ukuthi izosifela. UJesu laye watshengisa ukuthi uyasithanda ngokunikela ngokuphila kwakhe ngenxa yethu. (Joh. 3:16; 15:13) Akulalutho oluzasehlukanisa lothando lukaJehova loJesu nxa singahlala siqotho kubo.—Joh. 13:1; Rom. 8:35, 38, 39.
13. Kungani kuqakathekile ukuthi inhloko yemuli ithande umkayo labantwabayo? (Khangela lebhokisi elithi “ Indoda Esanda Kutshada Ingenzani Ukuze Ihlonitshwe Ngumkayo?”)
13 Sifundani? Inhloko yemuli kumele ifuqwe luthando kukho konke ekwenzayo. Kungani lokhu kuqakathekile? Umphostoli uJohane wathi: “Lowo ongamthandiyo umfowabo [kumbe imuli] ambonileyo ngeke amthande uNkulunkulu angakaze ambone.” (1 Joh. 4:11, 20) Indoda ethanda imuli yayo futhi ezimisele ukulingisela uJehova loJesu izayincedisa ukuthi iqinise ubungane bayo loJehova, izakuba lendaba layo njalo iyinakekele ngalokho ekudingayo. (1 Tim. 5:8) Izafundisa njalo iqondise abantwabayo. Kanti njalo izaqhubeka isebenza nzima isenza izinqumo ezithokozisa uJehova lezinceda imuli yayo. Khathesi asixoxeni ngokuthi inhloko yemuli ingamlingisela njani uJehova loJesu ezintweni lezi esisanda kuziqamba.
OKUMELE KWENZIWE YINHLOKO YEMULI
14. Inhloko yemuli kumele yenzeni ukuze incedise imuli yayo endabeni zokukhonza?
14 Kumele incedise imuli yayo iqinise ubungane bayo loJehova. UJesu walingisela uYise ngokuncedisa abalandeli bakhe ukuthi bahlale belokholo oluqinileyo. (Mat. 5:3, 6; Mak. 6:34) Inhloko yemuli layo kumele iqakathekise ukuncedisa imuli yayo endabeni zokukhonza. (Dute. 6:6-9) Lokho ikwenza ngokuba leqiniso lokuthi yona lemuli yayo bayabala futhi bataditshe iLizwi likaNkulunkulu, bayangena imihlangano yebandla, bayatshumayela izindaba ezinhle futhi baba ngabangane bakaJehova abaseduze.
15. Inhloko yemuli ingatshengisa njani ukuthi ilendaba lomkayo labantwabayo?
15 Kumele itshengise ukuthi ilendaba lemuli yayo. UJehova watshela uJesu ukuthi uyamthanda abanye besizwa. (Mat. 3:17) UJesu watshengisa ukuthi uyabathanda abalandeli bakhe ngalokho ayekutsho layekwenza. Abalandeli bakhe labo bamtshela ukuthi bayamthanda. (Joh. 15:9, 12, 13; 21:16) Inhloko yemuli ingatshengisa ukuthi iyamthanda umkayo labantwabayo ngalokho ekwenzayo. Ngokwesibonelo, ingataditsha iBhayibhili labo. Kumele ibatshele ukuthi iyabathanda lokuthi baqakatheke kangakanani kuyo futhi nxa kuvuma ibancome abanye besizwa.—Zaga. 31:28, 29.
Indoda kumele inakekele imuli yayo ngalokho ekudingayo ukuze ithokozise uJehova (Khangela indima 16)
16. Inhloko yemuli kumele yenzeni kodwa kuyini okumele ikunanzelele?
16 Kumele inakekele imuli yayo ngezinto ezidingayo. UJehova wanika ama-Israyeli konke ayekudinga lanxa wayewajezisa ngenxa yokungalaleli kwawo. (Dute. 2:7; 29:5) Lathi lamuhla uyasinika esikudingayo. (Mat. 6:31-33; 7:11) UJesu laye wanika abalandeli bakhe ukudla. (Mat. 14:17-20) Waphinda welapha abagulayo. (Mat. 4:24) Yikho ukuze inhloko yemuli layo ithokozise uJehova kumele inakekele imuli yayo ngalokho ekudingayo. Kodwa akumelanga iphilele ukusebenza ngoba lokho kungenza iswele isikhathi sokuba lemuli yayo lesokuyincedisa ukuthi iqine ekukhonzeni.
17. UJehova loJesu basifundisa futhi basiqondise njani?
17 Kumele ifundise njalo iqondise imuli yayo. UJehova uyasifundisa njalo asiqondise ngenxa yokuthi ufuna ukusinceda. (Heb. 12:7-9) NjengoYise, uJesu ufundisa njalo aqondise abalandeli bakhe ngendlela elothando. (Joh. 15:14, 15) Kagudli iguma nxa enika iseluleko kodwa ukwenza ngendlela elomusa. (Mat. 20:24-28) Uyazwisisa ukuthi silesono lokuthi siyaphambanisa kanengi.—Mat. 26:41.
18. Kuyini inhloko yemuli elingisela uJehova loJesu ekukhumbulayo?
18 Inhloko yemuli elingisela uJehova loJesu iyakhumbula ukuthi umkayo labantwabayo bayaphambanisa. ‘Kayibathukutheleli kakhulu.’ (Kol. 3:19, amabala angaphansi) Kodwa yenza lokho okukuGalathiya 6:1, izama ukubaqondisa “ngomoya omnene” ikhumbula ukuthi layo iyaphambanisa. Iyananzelela ukuthi indlela engcono kakhulu yokubafundisa yikubabekela isibonelo esihle njengoJesu.—1 Phet. 2:21.
19-20. Inhloko yemuli ingalingisela njani uJehova loJesu nxa isenza izinqumo?
19 Kumele yenze izinqumo ezizanceda imuli yayo. UJehova wenza izinqumo ezazinceda abanye. Ngokwesibonelo, wasidala ngenxa yokuthi wayefuna ukuthi sikholise ukuphila hatshi ngoba efuna ulutho oluthile kithi. Akulamuntu owambamba ngamandla ukuthi anikele ngeNdodana yakhe ukuze ihlawulele izono zethu. Wanikela ngayo ngoba efuna ukusinceda. UJesu laye wenza izinqumo ezazinceda abanye. (Rom. 15:3) Ngokwesibonelo, lanxa wayedinwe efile wakhetha ukufundisa abantu kulokuthi aphumule.—Mak. 6:31-34.
20 Indoda eyiphatha kuhle imuli yayo iyakwazi ukuthi enye yezinto ezinzima okumele izenze yikwenza izinqumo ezizanceda imuli yayo. Yikho iyawuqakathekisa kakhulu umlandu wayo. Kayigijimeli ukwenza izinqumo ingazange icabangisise, kodwa iyacela uJehova ukuthi ayincedise yenze izinqumo ezinhle. * (Zaga. 2:6, 7) Nxa ingenza njalo izakwenza izinqumo ezizanceda imuli yonke hatshi yona kuphela.—Flp. 2:4.
21. Sizaxoxa ngani esihlokweni esilandelayo?
21 UJehova unike inhloko zemuli umsebenzi onzima futhi ukhangelele ukuthi ziwenze kuhle. Kodwa nxa indoda ingenza konke okusemandleni ayo ukuthi ilingisele uJehova loJesu izayiphatha kuhle imuli yayo. Umkayo laye engenza okukhangelelwe ukuthi akwenze bazathokoza emtshadweni wabo. Inkosikazi kumele ibubone njani ubuhloko njalo yibuphi ubunzima engahlangana labo? Imibuzo le sizayiphendula esihlokweni esilandelayo.
INGOMA 16 Dumisa UJehova NgeNdodana Yakhe Egcotshiweyo
^ indima 5 Nxa indoda ingatshada iba yinhloko yemuli. Esihlokweni lesi sizaxoxa ngokuthi uJehova uyihlele njani imuli yakhe esezulwini lasemhlabeni, ukuthi kungani wenza ukuthi kube lobunhloko lokuthi amadoda angafundani kuye lakuJesu. Esihlokweni esilandelayo sizaxoxa ngokuthi indoda lomkayo bangafundani kuJesu lakwezinye izibonelo eziseBhayibhilini. Kwesesithathu sizaxoxa ngokuthi abafowethu bangawasebenzisa njani amandla abawaphiweyo ebandleni.
^ indima 7 Ngezinye izikhathi amafilimu lenhlelo ze-TV zenza kukhanye kungelalutho olubi ngokuthi indoda iphathe kubi umkayo kumbe ukuthi imtshaye. Lokhu kungenza abantu bacabange ukuthi kuyamukeleka ukuthi indoda ihlukuluze umkayo.
^ indima 20 Khangela isihloko esithi “Yenza Izinqumo Ezidumisa UNkulunkulu” ku-Nqabayokulinda yesiZulu ka-April 15 2011 ikhasi 13-17, ukuze ufunde okunengi mayelana lokwenza izinqumo ezinhle.
