1. Singasithola njani iseluleko futhi kungani sonke sidinga ukwelulekwa?

 SONKE siyakudinga ukwelulekwa ngezinye izikhathi. Singacela umuntu esimhloniphayo ukuthi aseluleke, kumbe umfowethu okhathazeke ngathi angasixwayisa ukuthi ‘sesiphambuka.’ (Gal. 6:1) Kwesinye isikhathi singaphiwa iseluleko sesenze iphutha elikhulu. Kungelani lokuthi sisiphiwa kutheni, kumele sisilalele. Ukwenza njalo kuyasinceda futhi kungasindisa ukuphila kwethu.—Zaga. 6:23.

2. Ngokwalokho okutshiwo kuZaga 12:15, kungani kumele silalele nxa siselulekwa?

² Umbhalo okusekelwe kuwo isihloko sethu usikhuthaza ukuthi ‘silalele sizwe amazwi ezihlakaniphi.’ (Zaga. 22:17) Akulamuntu owazi yonke into, bakhona abantu abalolwazi olunengi njalo asebebone okunengi kulathi. (Bala iZaga 12:15.) Yikho ukulalela iseluleko kutshengisa ukuthi sithobekile. Kutshengisa ukuthi siyakwazi ukuthi kulezinto esingenelisi ukuzenza lokuthi siyananzelela ukuthi sidinga ukuncediswa ukuze siphumelele kulokho esiyabe sifuna ukukwenza. UJehova waphefumulela inkosi ehlakaniphileyo uSolomoni ukuthi ibhale amazwi la: ‘Amaqhinga ayaphumelela ngabeluleki abanengi.’—Zaga. 15:22.

3. Yiziphi izindlela esingaphiwa ngazo iseluleko?

³ Singaphiwa iseluleko mathupha ngomunye umuntu. Umdala webandla kumbe omunye umzalwane oqinileyo ekukhonzeni angasitshela lapho okumele silungise khona. Nxa omunye umuntu esithanda okokuthi uze wasilanda wasinika iseluleko esivela eBhayibhilini, kumele sitshengise ukuthi siyabonga ngokusilalela langokusisebenzisa. Kodwa singathola iseluleko langezinye izindlela. Ngokwesibonelo, singabala okuthile eBhayibhilini kumbe emabhukwini ethu sicabangisise ngalokho esikwenzayo besesitshintsha.—Heb. 4:12.

4. UmTshumayeli 7:9 uthi kuyini okungamelanga sikwenze nxa siselulekwa?

 ⁴ Kungaba nzima ukuthi silalele iseluleko esisinikwe ngomunye. Ngezinye izikhathi singacaphuka. Kuyini okungenza sicaphuke? Lanxa sivuma sibili ukuthi silesono, kungaba nzima ukwamukela iseluleko nxa othile esitshela khona kanye esikuphambanisayo. (Bala umTshumayeli 7:9.) Singazama ukucatsha ngomunwe. Singasola izizatho ezenze umuntu lo wasinika iseluleko kumbe sicatshulwe yindlela aseluleke ngayo. Singamsola laye ngokwakhe sisithi: ‘Kalalungelo lokunginika iseluleko, phela laye ulezakhe!’ Kanti njalo nxa singasithandi iseluleko singayekela ukusilalela kumbe sicele ukuthi omunye umuntu aseluleke silethemba lokuthi uzasitshela lokho esifuna ukukuzwa.

5. Sizaxoxa ngani esihlokweni lesi?

⁵ Esihlokweni lesi sizaxoxa ngabanye abantu okukhulunywa ngabo eBhayibhilini abangazange basamukele iseluleko labasamukelayo. Sizaphinda sixoxe ngalokho okungasinceda ukuthi samukele iseluleko njalo sisisebenzise.

6. Sifundani eNkosini uRehobhowami?

⁶ Ake sixoxe ngoRehobhowami. Wathi esebekwe ukuthi abe yinkosi yako-Israyeli, abantu bamlanda besiyacela ukuthi abaphungulele umthwalo ababewetheswe nguyise uSolomoni. URehobhowami wenza kuhle, wacela abadala bako-Israyeli ukuthi bamcebise ngokuthi abaphendule esithini abantu. Abadala bamtshela ukuthi abantu babezahlala bemsekela nxa engenza lokho abakucelayo. (1 AmaKho. 12:3-7) Kukhanya kakuthandanga lokho, yikho wacela amadoda ayekhule lawo ukuthi amcebise. Kungenzeka amadoda la ayeseleminyaka edlula 40, ngakho ayeselokuthile ayekubonile empilweni. (2 ImiLan. 12:13) Kodwa amtshelela eceleni, amtshela ukuthi engeze umthwalo wabantu. (1 AmaKho. 12:8-11) URehobhowami watshelwa izinto ezimbili ezitshiyeneyo, yikho kwasekumele akhuleke kuJehova emcela ukuthi amncedise akhethe icebo elihle. Kodwa yena wakhetha ukulandela icebo ayelitshelwe ngamadoda ayekhule lawo ngoba elithandile. Lokhu kwabangela ukuthi izinto zingamhambeli kuhle uRehobhowami labantu bako-Israyeli. Lathi singaphiwa iseluleko esingasithandiyo. Kodwa nxa sisekelwe eLizwini likaNkulunkulu, kumele sisamukele.

7. Okwenzakala eNkosini u-Uziya kusifundisani?

⁷ INkosi u-Uziya ayisamukelanga iseluleko. Yangena endaweni esethempelini likaJehova lapho okwakungavunyelwa khona abanye abantu ngaphandle kwabaphristi, ifuna ukutshisa impepha. Abaphristi bakaJehova bathi kuyo: “Akulunganga ukuthi wena, Uziya, utshisele uJehova impepha. Lokho ngokwabaphristi.” Manje wenzani u-Uziya? Aluba wazithoba wamukela iseluleko njalo wahle wasuka ethempelini, uJehova wayengamthethelela. Kodwa ‘u-Uziya wathukuthela.’ Kuyini okwenza ukuthi angasamukeli iseluleko? Kungenzeka wazitshela ukuthi njengoba wayeyinkosi, wayelelungelo lokwenza loba yini ayifunayo. Kodwa le ayisiyo indlela uJehova ayebona ngayo izinto. U-Uziya wenza into ayengelamvumo yokuyenza, yikho uJehova wamtshaya ngobulephero njalo ‘waba lobulephero kwaze kwaba lilanga afa ngalo.’ (2 ImiLan. 26:16-21) Okwenzakala ku-Uziya kusifundisa ukuthi nxa singalaleli iseluleko seBhayibhili esisiphiwayo,  uJehova kasoze asamukele kungelani lokuthi singobani.   

8. UJobe wenzani esephiwe iseluleko?

⁸ IBhayibhili liphinda likhulume ngalabo ababusiswayo ngenxa yokuthi bamukela iseluleko. Asixoxeni ngoJobe. Lanxa wayemthanda uJehova futhi efuna ukumthokozisa, wayelesono. Wathi esephakathi kwelitshe lembokodo wakhuluma ezinye izinto ezingaqondanga. Yikho u-Elihu loJehova bamnika iseluleko esingabhodiyo. Wenzani uJobe? Wathobeka wasamukela iseluleko wathi: ‘Ngikhulumile ngezinto ebengingazizwisisi. Ngakho sengizeyisa, sengiphenduka ngizilahla othulini lasemlotheni.’ UJehova wambusisa uJobe ngenxa yokuthi wayethobekile.—Jobe. 42:3-6, 12-17.

9. UMosi wenzani esephiwe iseluleko futhi kungani eyisibonelo esihle?

⁹ UMosi wathi esenze iphutha elikhulu wavuma ukuqondiswa. Ngelinye ilanga, wazonda waze wehluleka ukunika uJehova udumo. Lokhu kwabangela ukuthi uJehova angamvumeli ukuthi angene eLizweni Lesithembiso. (Nani. 20:1-13) UMosi wancenga uJehova ukuthi amvumele angene kulelolizwe, kodwa uJehova wathi kuye: “Ungabe usakhuluma kimi futhi ngalindaba.” (Dute. 3:23-27) UMosi kazange amzondele uJehova kodwa wasamukela isinqumo sakhe njalo uJehova waqhubeka emsebenzisa ukuthi akhokhele abako-Israyeli. (Dute. 4:1) Bobabili uJobe loMosi bamukela iseluleko futhi kumele sibalingisele. UJobe watshintsha indlela ayecabanga ngayo, kazange azame ukucatsha ngomunwe. UMosi watshengisa ukuthi uyasamukela iseluleko esivela kuJehova ngokuqhubeka ethembekile lanxa wayengasavunyelwa ukungena eLizweni Lesithembiso okuyinto ayeyilindele ngabomvu.

10. (a) IZaga 4:10-13 zithi ukulalela iseluleko kusinceda ngani? (b) Abanye benzeni sebephiwe iseluleko?

¹⁰ Ukulingisela okwenziwa ngamadoda athembekileyo anjengoJobe loMosi kuyasinceda. (Bala iZaga 4:10-13.) Abafowethu labodadewethu abanengi bakwenzile lokhu. Umzalwane okuthiwa ngu-Emmanuel ohlala eCongo njalo owanikwa iseluleko uthi: “Abazalwane abaqinileyo ekukhonzeni ababesebandleni babona ukuthi ngasengingena iganga basebenginceda. Ngasilalela iseluleko abanginika sona, futhi lokhu kwanginceda ukuthi ngingangeni emanyaleni.” * Udade okuthiwa nguMegan ohlala eCanada uthi: “Iseluleko besingahlali sibuya ngendlela engiyifunayo, kodwa ngiyabe ngisidinga sibili.” UMarko ohlala eCroatia yena uthi: “Ngacelwa ukuthi ngime ukwenza umsebenzi wenkonzo othile ebandleni, kodwa nxa ngicabanga ngalokho okwenzakala ngalesosikhathi ngiyabona ukuthi iseluleko engasiphiwayo, sanginceda ukuthi ngiphinde ngibe ngumngane kaJehova oseduze.”

11. Umfowethu uKarl Klein wathini ngokwamukela iseluleko?

¹¹ Umfowethu uKarl Klein owayelilunga leQula Elikhokhelayo ngomunye owancedwa yiseluleko asiphiwayo. Endabeni yakhe yokuphila, wakhuluma ngokuthi wake waphiwa iseluleko esilamandla ngumfowethu uJoseph F. Rutherford owayengumngane wakhe. Umfowethu uKlein wavuma ukuthi ekuqaliseni iseluleko lesi samzwisa ubuhlungu. Wathi: ‘Sokudlule isikhathi esithile [umfowethu uRutherford] wathi engibona, wangibingelela ethabile  wathi, “Unjani Karl?” Kodwa ngangilokhu ngisizwa ubuhlungu yikho ngaphongumphendula ngingunguna. Yena wathi, “Karl, nanzelela! UDeveli ufuna ukukubamba!” Ngamphendula sengiyangekile ngathi, “Hayi ngitsho mfowethu Rutherford, akulalutho.” Kodwa yena wayekwazi ukuthi ngimzondele, yikho waphinda amazwi ayewakhulumile wathi, “Ngiyakuzwa kodwa nanzelela, uDeveli ufuna ukukubamba.” Wayeqinisile sibili! Nxa singaqhubeka sibambele umfowethu isikhwili ikakhulu nxa esitshele into obekuvele kumele asitshele yona kubalula ukuthi uDeveli asibambe.’ * (Efe. 4:25-27) Umfowethu uKlein wasamukela iseluleko ayesiphiwe ngumfowethu uRutherford njalo baqhubeka bengabangane.

12. Ukuthobeka kusinceda njani ukuthi samukele iseluleko? (IHubo 141:5)

¹² Kuyini okungasinceda ukuthi samukele iseluleko? Kumele sithobeke njalo sikhumbule ukuthi silesono lokuthi ngezinye izikhathi siyake sibe yiziphukuphuku sibili. Sike sakhuluma ngokuthi uJobe wayebona izinto ngendlela engayisiyo, kodwa watshintsha indlela ayecabanga ngayo njalo uJehova wambusisa ngenxa yokuthi wayethobekile. Watshengisa ukuthi uthobekile ngokwamukela iseluleko asinikwa ngu-Elihu, lanxa u-Elihu wayemncane kakhulu kulaye. (Jobe. 32:6, 7) Lathi nxa sithobekile sizalalela iseluleko lanxa sibona angani asisidingi kumbe nxa sisiphiwe ngumuntu omncane kulathi. Omunye umdala webandla ohlala eCanada uthi, “Njengoba singeke sizibone ngendlela abanye abantu abasibona ngayo, kambe singathuthuka njani nxa bengaseluleki?” Sonke kumele sithuthuke ekutshengiseni izithelo zomoya lasemsebenzini wokutshumayela lokufundisa.—Bala iHubo 141:5.

13. Kumele sisibone njani iseluleko esisiphiwayo?

¹³ Bona iseluleko siyindlela uNkulunkulu atshengisa ngayo ukuthi uyakuthanda. UJehova usifisela okuhle. (Zaga. 4:20-22) Nxa uJehova eseluleka esebenzisa iLizwi lakhe, amabhuku ethu kumbe umKhristu oqinileyo ekukhonzeni, uyabe etshengisa ukuthi uyasithanda. UHebheru 12:9, 10 uthi “usilaya ngalokho okunceda thina.”

14. Kuyini okumele sikwenze nxa siphiwa iseluleko?

¹⁴ Lalela iseluleko ungabi lendaba lokuthi usiphiwe njani. Ngezinye izikhathi singabona angani iseluleko asisiphiwanga ngendlela efaneleyo. Kuliqiniso ukuthi loba ngubani onika iseluleko kumele azame  ukusinika ngendlela ezakwenza kube lula ukuthi samukeleke. * (Gal. 6:1) Kodwa nxa kuyithi esinikwa iseluleko kumele sigxile kulokho okutshiwoyo kulasendleleni esisinikwe ngayo. Nanku esingazibuza khona: ‘Lanxa ngingayithandi indlela engiphiwe ngayo iseluleko, kukhona yini engingakufunda kuso? Akungcono yini ukulalela lokho engikutshelwa ngumuntu onginika iseluleko kulokukhangela kakhulu amaphutha akhe?’ Siyabe sihlakaniphile nxa singazama ukusebenzisa loba yisiphi iseluleko esisiphiwayo.—Zaga. 15:31.

15. Kungani kumele sicele ukucetshiswa?

¹⁵ IBhayibhili lisikhuthaza ukuthi sicele abanye basicebise. IZaga 13:10 zithi: “Ukuhlakanipha kufunyanwa [“kwabacela,” NWT] ukwelulekwa.” Lokhu kuliqiniso sibili! Labo abacela ukucetshiswa kulokulinda omunye umuntu aze abacebise bajayele ukwenza izinqumo ezinhle kulalabo abangaceli ukucetshiswa. Yikho cela ukucetshiswa.

16. Kunini lapho esingacela khona ukucetshiswa ngabafowethu labodadewethu?

¹⁶ Kunini lapho esingacela khona ukucetshiswa ngabafowethu labodadewethu? Nanzi ezinye izimo: (1) Udade ucela ukuthi ummemezeli ofundisa kuhle amjoyine esifundweni sakhe, ngemva kokufunda uyacela ukuthi amcebise ukuze athuthuke ekufundiseni. (2) Udade ongatshadanga ufuna ukuthenga ibhulugwe yikho ubuza udade oqinileyo ekukhonzeni ukuthi uthini ngaselikhethile. (3) Umzalwane ophiwe inkulumo kazulu wonke yokuqala ucela umzalwane oselesikhathi eside esenza inkulumo ukuthi ayilalelisise abesemtshela lapho okumele athuthukise khona. Lomzalwane oseleminyaka eminengi esenza inkulumo angacela abazalwane abazingcitshi ekwenzeni inkulumo ukuthi bamcebise abesesebenzisa lokho abamtshela khona.

17. Kumele senzeni ukuze iseluleko sisincede?

¹⁷ Sonke sizaphiwa iseluleko, kungaba ngesisinikwa mathupha ngomunye umuntu kumbe esisithola ngezinye izindlela. Nxa ususiphiwa khumbula esixoxe ngakho. Hlala uthobekile. Ungazihluphi ngokuthi usiphiwe njani iseluleko kodwa silalele njalo usisebenzise. Akula phakathi kwethu ozalwa ehlakaniphile. Kodwa iLizwi likaNkulunkulu lisithembisa ukuthi nxa ‘singalalela ukucetshiswa, samukele ukuqondiswa, sizahlakanipha.’—Zaga. 19:20.