1. Kuyini okwenza umbonge uJehova ngokuthi wakunika iBhayibhili?

 SIYAMBONGA kakhulu uJehova ngoba wasinika iBhayibhili. Usebenzisa iBhayibhili ukuze asinike amacebo angasinceda silwisane lenhlupho esihlangana lazo lamuhla. Kanti njalo usithembisa ikusasa elihle. Okuqakatheke kakhulu uJehova akwenzileyo yikusifundisa ngobuntu bakhe esebenzisa iBhayibhili. Ukucabangisisa ngobuntu bakhe obuhle kuyasithinta kwamancane besekusenza ukuthi sisondele kuye sibe ngabangane bakhe.—Hubo. 25:14.

2. UJehova wayeziveza njani ebantwini?

² UJehova ufuna abantu bamazi. Kudala wayeziveza ebantwini esebenzisa amaphupho lemibono lezingilosi. (Nani. 12:6; Imiseb. 10:3, 4) Kodwa sasingawazi njani amaphupho la lemibono kanye lemibiko evela ezingilosini aluba ayengabhalwanga phansi? Yikho uJehova wathi abantu ‘babhale phansi encwadini’ lokho ayefuna sikwazi. (Jer. 30:2) Singaba leqiniso lokuthi indlela le uNkulunkulu akhuluma ngayo lathi iqondile futhi iyasinceda ngoba “indlela kaNkulunkulu weqiniso iphelele.”—Hubo. 18:30.

3. UJehova wenzani ukuze iBhayibhili lilondolozwe? (U-Isaya 40:8)

³ Bala u-Isaya 40:8. Okwezinkulungwane zeminyaka, amadoda labesifazana abathembekileyo bebethola amacebo ancedayo eLizwini likaNkulunkulu. Bekusenzakala njani lokhu njengoba imibhalo yakuqala eyayibhalelwe ezintweni ezitshabalalayo ingasekho? UJehova waba leqiniso lokuthi kwenziwa amakhophi emibhalo ephefumulelweyo. Lanxa abantu abakopa imibhalo le babelesono, bayikopa ngonanzelelo. Esinye isikhwicamfundo sathi sibhala ngeMibhalo yesiHebheru sathi:  “Siyabe siqinisile nxa sisithi akulabhuku lakudala elilondolozwe kuhle njengeBhayibhili.” Singaba leqiniso lokuthi amazwi esiwabala eBhayibhilini ayimicabango yoMlobi walo uJehova lanxa sekwadlula isikhathi eside labhalwa futhi libhalelwa ezintweni ezitshabalalayo njalo likotshwa ngabantu abalesono.

4. Sizaxoxa ngani esihlokweni lesi?

⁴ UJehova nguye osinika “zonke izipho ezinhle lazo zonke izipho ezipheleleyo.” (Jak. 1:17) IBhayibhili yisipho esihle kakhulu esisinikwe nguJehova. Nxa umuntu engakunika isipho esifaneleyo uyabe etshengisa ukuthi ukwazi kuhle lokuthi uyakwazi okudingayo. LoJehova owasinika iBhayibhili unjalo. Nxa sihlolisisa isipho lesi sifunda okunengi ngaye njalo nxa silibala siyabona ukuthi usazi kuhle lokuthi uyakwazi esikudingayo. Esihlokweni lesi sizafunda ngokuthi iBhayibhili lisifundisani ngokuhlakanipha kukaJehova lokwahlulela kwakhe okuhle kanye lothando lwakhe. Ake siqale sixoxe ngokuthi iBhayibhili lisifundisani ngokuhlakanipha kukaNkulunkulu.

5. IBhayibhili litshengisa njani ukuthi uNkulunkulu ulokuhlakanipha?

⁵ UJehova uyakwazi ukuthi amacebo asinika wona ayasinceda. Kanti njalo iBhayibhili, isipho asinike sona, sigcwele ukuhlakanipha kwakhe. Okufundiswa liBhayibhili kuyabanceda kakhulu abantu. IBhayibhili liyamtshintsha sibili umuntu. UMosi wathi ebhala amabhuku okuqala eBhayibhili watshela abantu bakaNkulunkulu abako-Israyeli wathi: “Leli akusilizwi elingatsho lutho, kodwa litsho ukuphila kini.” (Dute. 32:47) Labo ababelandela okutshiwo yiMibhalo babephumelela empilweni futhi babethokoza. (Hubo. 1:2, 3) Lanxa iBhayibhili labhalwa kudala, lilokhu lilawo amandla okutshintsha impilo zabantu. Ngokwesibonelo ungaya ku-jw.org ubusuthayipha isihloko esithi “IBhayibhili Liyamtshintsha Umuntu” uzathola okwenzakala ezimpilweni zabanye, okutshengisa ukuthi iBhayibhili lilamandla okutshintsha impilo zabantu futhi ‘liyasebenza kulabo abakholwayo.’—1 Thes. 2:13.

6. Kungani sisithi iBhayibhili alifanani lamanye amabhuku?

⁶ Akula elinye ibhuku elinjengeLizwi likaNkulunkulu iBhayibhili. Ngenxa yani? Ngenxa yokuthi uMlobi webhuku leli unguSomandla, unguNkulunkulu waphakade njalo ulenhlakanipho engeke iqathaniswe leyaloba ngubani. Amanye amabhuku asala ebalwa ngabantu abalobi bawo sebefile njalo kwezinye izikhathi abayabe bekubhalile kucina kungasasebenzi. Kodwa iBhayibhili lilamazwi alenhlakanipho esebenza zikhathi zonke. Belilokhu linceda abantu kusukela endulo kuze kube khathesi. Nxa singabala lelobhuku eliphefumulelweyo sicabangisise ngalokho esikufundayo kuzakwenzakalani? UMlobi weBhayibhili uzasebenzisa umoya wakhe ongcwele olamandla ukuze usincede sibone ukuthi lokho esikubala kulo singakusebenzisa njani empilweni zethu. (Hubo. 119:27; Mal. 3:16; Heb. 4:12) UMlobi weBhayibhili ophilayo uzimisele sibili ukukunceda. Lokhu kumele kukwenze uzimisele ukulibala zikhathi zonke iBhayibhili.

7. IBhayibhili lalibamanyanisa njani abantu bakaNkulunkulu?

⁷ Enye indlela iBhayibhili elitshengisa ngayo ukuthi lilokuhlakanipha okuvela kuNkulunkulu yikuthi lenza abantu bakhe bamanyane. Abako-Israyeli bathi sebengene eLizweni Lesithembiso bahlala endaweni ezitshiyeneyo. Abanye baba ngabagoli benhlanzi, abanye babefuyile futhi abanye baba ngabalimi. Kwakungenzakala ukuthi ngokuhamba  kwesikhathi amanye ama-Israyeli angabi lendaba lama-Israyeli angahlali lawo. UJehova wahlela ukuthi ama-Israyeli abe lezikhathi zokuhlangana ndawonye ukuze azwe ilizwi lakhe libalwa njalo lichasiswa. (Dute. 31:10-13; Neh. 8:2, 8, 18) Akucabange ukuthi um-Israyeli othembekileyo wayesizwa njani lapho efika eJerusalema ebona amamiliyoni abantu bakaNkulunkulu abavela ezindaweni ezitshiyeneyo. Lokhu kutshengisa ukuthi uJehova wayenceda abantu bakhe ukuthi bahlale bemanyene. Ngokuhamba kwesikhathi kwabunjwa ibandla lobuKhristu elalilabesilisa labesifazana ababekhuluma indimi ezitshiyeneyo, abanye benothile njalo abanye bengabayanga. Kodwa babekhonza uNkulunkulu weqiniso bemanyene ngenxa yokuthi babeyithanda iMibhalo. Ababesiba ngamakholwa babencedwa ngabanye ababekhonza labo ukuthi bazwisise iLizwi likaNkulunkulu. Kanti njalo okunye okwakunceda amakholwa la yikuhlangana ndawonye lamanye amaKhristu.—Imiseb. 2:42; 8:30, 31. 

8. IBhayibhili libamanyanisa njani abantu bakaNkulunkulu lamuhla?

⁸ UNkulunkulu wethu ohlakaniphileyo uqhubeka efundisa abantu bakhe futhi ebamanyanisa esebenzisa iBhayibhili. IBhayibhili yilo elingumgogodla wolwazi esiluphiwayo. Sihlala sihlangana ndawonye emihlanganweni yebandla, leyesiqinti, leyesabelo ukuze sibalelwe iMibhalo, siyichasiselwe futhi sixoxe ngayo.  Yikho iBhayibhili lisetshenziswa kakhulu nguNkulunkulu ukuze ancede labo abamkhonzayo ukuthi “bamkhonze bemanyene.”—Zef. 3:9.

9. Umuntu kumele abe njani ukuze alizwisise iBhayibhili? (ULukha 10:21)

⁹ Ake sixoxe ngokunye okutshengisa ukuthi uJehova ulokuhlakanipha. Waphefumulela abalobi beBhayibhili ukuthi babhale ngendlela eyayizakwenza ukuthi lizwisiswe ngabantu abathobekileyo kuphela. (Bala uLukha 10:21.) Abantu abanengi bayalibala iBhayibhili. Esinye isikhwicamfundo sathi “iBhayibhili libalwa ngabantu abanengi kakhulu njalo yilo lodwa ibhuku elibalwa ngonanzelelo.” Kodwa ngabathobekileyo kuphela abalizwisisayo futhi abenza lokho elikutshoyo.—2 Khor. 3:15, 16.

10. Yiphi eyinye indlela iBhayibhili elisitshengisa ngayo ukuthi uJehova ulokuhlakanipha?

¹⁰ Kulokunye esikufunda eBhayibhilini okutshengisa ukuthi uJehova unguNkulunkulu olokuhlakanipha. UJehova usebenzisa iMibhalo ukuze asifundise siliqembu aphinde ayisebenzise ukuthi afundise futhi aduduze umuntu ngamunye. Nxa sibala iLizwi likaNkulunkulu, sonke siyakubona ukuthi ulendaba lathi. (Isaya. 30:21) Wake wathi ulohlupho wasubala ivesi eyayingathi ibhalelwe wena sibili? Kuyamangalisa ukuthi iBhayibhili lilezinto ezingathi zibhalelwe wena kodwa lona libhalelwe ukuthi lizwisiswe ngamamiliyoni abantu. Lokhu kungenxa yokuthi iBhayibhili labhalwa nguMlobi olenhlakanipho emangalisayo.—2 Thim. 3:16, 17.

11. UNkulunkulu watshengisa njani ukuthi kabandlululi ngesikhathi iBhayibhili libhalwa?

¹¹ UJehova nguNkulunkulu owahlulela kuhle futhi olokulunga. (Dute. 32:4) Izikhathi ezinengi nxa umuntu esahlulela kuhle uyabe engabandlululi, uJehova laye kabandlululi. (Imiseb. 10:34, 35; Rom. 2:11) Siyakubona ukuthi uNkulunkulu kabandlululi nxa sikhangela izindimi ezasetshenziswa ukubhala iBhayibhili. Amabhuku amanengi angu-39 akuqala abhalwa ngesiHebheru esasizwisiswa ngabantu bakaNkulunkulu ngalesosikhathi. Kodwa ngesikhathi samaKhristu akuqala, abantu abanengi basebesebenzisa isiGrikhi yikho amabhuku amanengi okucina phakathi kwangu-27 aseBhayibhilini abhalwa ngesiGrikhi. UJehova kazange athi iLizwi lakhe libhalwe ngolimi oluthile kuphela. Lamuhla abantu abasemhlabeni abangaba ngu-8 bhiliyoni bakhuluma indimi ezitshiyeneyo. Kuyini okunganceda abantu abanengi kangaka ukuthi bafunde ngoJehova?

12. UDanyeli 12:4 ugcwaliseka njani ensukwini lezi zokucina?

¹² Esebenzisa umphrofethi uDanyeli, uJehova wathembisa ukuthi ngesikhathi sokucina “ulwazi lweqiniso” olutholakala eBhayibhilini “luzakuba lunengi.” Abantu abanengi babezaluzwisisa. (Bala uDanyeli 12:4.) Eyinye indlela ulwazi lolu oluba lunengi ngayo yikuhunyutshwa kwamaBhayibhili lamabhuku alichasisayo, ephrintwa njalo enikwa abantu. IBhayibhili libhuku elihunyutshwa ukwedlula wonke emhlabeni njalo abantu abanengi balalo. AmaBhayibhili amanengi athengiswayo ayadula kakhulu. Abantu bakaJehova sebehumutshe iBhayibhili kusukela kuGenesisi kusiya kuSambulo kumbe iMibhalo yamaKhristu yesiGrikhi ngezindimi ezedlula 240 njalo loba ngubani angalithola iBhayibhili leli mahala. Lokho sekwenze abantu bezizwe zonke bathola ‘izindaba ezinhle zoMbuso’ ukuphela kungakafiki. (Mat. 24:14) UNkulunkulu wethu owahlulela kuhle ufuna ukunika abantu abanengi ithuba lokuthi babale iLizwi lakhe ukuze  bamazi. Lokhu kungenxa yokuthi uyasithanda kakhulu sonke.

13. Kungani singathi iBhayibhili lisifundisa ngothando lukaJehova? (UJohane 21:25)

¹³ IBhayibhili lisifundisa ukuthi konke okwenziwa nguMlobi walo kutshengisa ukuthi ulothando. (1 Joh. 4:8) Cabanga ngezinto uJehova azifake eBhayibhilini lalezo angazifakanga. Wasinika konke okungasinceda ukuthi sibe ngabangane bakhe, sithokoze empilweni futhi sithole ukuphila okungapheliyo. Kodwa ngenxa yokuthi uyasithanda kazange asinike ulwazi olunengi kakhulu esasingehluleka ukuluzwisisa.—Bala uJohane 21:25.

14. Yiphi eyinye indlela iBhayibhili elisifundisa ngayo ngothando lukaNkulunkulu?

¹⁴ Eyinye indlela uJehova atshengisa ngayo ukuthi uyasithanda yikukhuluma lathi ngendlela esenza sibe lesithunzi. EBhayibhilini kazange asinike imithetho engapheliyo esitshela okokwenza kukho konke. Kodwa uyasinceda ukuthi sizicabangele sodwa esebenzisa izindaba eziseBhayibhilini, iziphrofetho kanye lamacebo ancedayo. Lokhu yikho okwenza iLizwi likaNkulunkulu lisifuqe ukuthi simthande njalo simlalele ngenhliziyo yonke.

15. (a) UJehova utshengise njani ukuthi ulendaba labantu ababala iLizwi lakhe? (b) Emfanekisweni, inkazana encane lejaha elisakhulayo kanye lodade osekhulile bacabangisisa ngobani abaseBhayibhilini? (Gen. 39:1, 10-12; 2 Amakho. 5:1-3; Luk. 2:25-38)

¹⁵ IBhayibhili lisitshela ukuthi uJehova ulendaba lathi. ILizwi lakhe ligcwele izindaba ezilabantu abanjengathi. Sikuzwisisa kuhle okwenzakala ebantwini okukhulunywa ngabo eBhayibhilini ngenxa yokuthi babengabantu ‘abalemizwa enjengeyethu.’ (Jak. 5:17) Okuqakatheke  kakhulu yikuthi nxa sibona indlela uJehova ayephatha ngayo abantu abanjengathi, kusuka kukhanye bha ukuthi “ulozwelo olukhulu futhi ulesihawu.”—Jak. 5:11.

16. Nxa sibala eBhayibhilini ngabantu abaphambanisayo, sifundani ngoJehova? (U-Isaya 55:7)

¹⁶ Ikhona eyinye indlela iBhayibhili elisifundisa ngayo ngothando lukaJehova. IMibhalo isitshela ukuthi uNkulunkulu kasoze asitshiye lanxa singaphambanisa. Abako-Israyeli babemonela kanengi uJehova kodwa babesithi bangaphenduka abathethelele. (Bala u-Isaya 55:7.) AmaKhristu akuqala lawo akubona ukuthi uNkulunkulu uyabathanda kakhulu. Umphostoli uPhawuli waphefumulelwa ukuthi akhuthaze ayekhonza labo ukuthi ‘bamthethelele njalo bamduduze’ umuntu owenze isono esikhulu kodwa waphenduka. (2 Khor. 2:6, 7; 1 Khor. 5:1-5) Kuyamangalisa ukuthi lanxa izinceku zikaJehova zaziphambanisa wayengazilahleli iganga. Kodwa wayezincedisa kuhle kuhle, aziqondise, abesezamukela ukuthi zibe ngabangane bakhe. Lalamuhla uthembisa ukwenza njalo ebantwini abawonayo baphinde baphenduke.—Jak. 4:8-10.

17. Kungani iBhayibhili liyisipho esihle?

¹⁷ UJehova usinike isipho esihle. Kungani iLizwi likaNkulunkulu liyisipho esihle kangaka? Njengoba sifundile, iBhayibhili lifundisa ukuthi uNkulunkulu ulokuhlakanipha, wahlulela kuhle njalo ulothando. IBhayibhili litshengisa ukuthi uJehova ufuna simazi njalo ufuna sibe ngabangane bakhe.

18. Singatshengisa njani ukuthi siyambonga uJehova ‘ngesipho esihle’ esiliBhayibhili?

¹⁸ Akumelanga sisithathe lula ‘isipho esihle’ esiliLizwi likaNkulunkulu. (Jak. 1:17) Asiqhubekeni sitshengisa ukuthi siyabonga ukuthi uJehova wasinika iLizwi lakhe. Lokhu singakwenza ngokuthandaza, besesibala njalo sicabangisise ngamazwi la aphefumulelweyo. Nxa singenza njalo uMlobi walo uzabusisa konke esikwenzayo njalo ‘sizathola ulwazi olumayelana loNkulunkulu.’—Zaga. 2:5.