1. Kuyini okutshengisa ukuthi uJesu wayeyiqakathekisa iMibhalo?

 AKUCABANGE ukuthi kwakunjani ukulalela uJesu efundisa. Izikhathi ezinengi wayekhuluma okuseMibhalweni eNgcwele futhi eyitshaya ngekhanda. Amazwi okuqala uJesu awakhuluma esanda kubhabhathizwa lamazwi okucina awakhuluma engakafi wayewathethe eMibhalweni. b (Dute. 8:3; Hubo. 31:5; Luk. 4:4; 23:46) Kanti njalo phakathi kweminyaka emithathu lezinyanga eziyisithupha kusukela uJesu ebhabhathizwa waze wayakufa, wayejayele ukubalela abantu iMibhalo futhi ekhuluma ngayo eyichasisa.—Mat. 5:17, 18, 21, 22, 27, 28; Luk. 4:16-20.

2. Kuyini okwanceda uJesu ukuthi ayazi kuhle iMibhalo ngesikhathi ekhula? (Khangela umfanekiso ongaphandle.)

² Kusasele iminyaka eminengi ukuthi uJesu aqalise inkonzo yakhe wayelibala iLizwi likaNkulunkulu futhi elizwa kanengi. Kumele ukuthi ngekhaya nxa babezixoxela beyimuli wayesizwa uMariya loJosefa bekhuluma ngeMibhalo. c (Dute. 6:6, 7) Asithandabuzi ukuthi uJesu wayesiya esinagogeni iSabatha ngalinye lemuli yangakibo. (Luk. 4:16) Kumele ukuthi ekhonale wayelalelisisa nxa iMibhalo ibalwa. Ngokuhamba kwesikhathi uJesu wafunda ukuzibalela iMibhalo le eNgcwele. Lokhu  kwenza wayazi wangayiphumputhi iMibhalo, wayithanda njalo wayisebenzisa empilweni yakhe. Ngokwesibonelo, cabanga ngokwenzakala ethempelini uJesu eleminyaka engu-12 kuphela. Abafundisi ababewazi kuhle uMthetho kaMosi ‘bamangaliswa yikuzwisisa kwakhe lezimpendulo zakhe.’—Luk. 2:46, 47, 52.

3. Kuyini esizakufunda esihlokweni lesi?

³ Lathi singabalazi futhi silithande iLizwi likaNkulunkulu nxa silibala zikhathi zonke. Kodwa kuyini esingakwenza ukuze sithole okunengi nxa silibala? Singafunda kulokho uJesu akutshela labo ababewazi uMthetho, okugoqela ababhali labaFarisi labaSadusi. Abakhokheli benkolo laba babebala iMibhalo kanengi kodwa ababekubala kwakungabancedi. UJesu wakhuluma ngezinto ezintathu okwakumele amadoda la azenze ukuze ancedwe yiMibhalo. Esihlokweni lesi sizaxoxa ngokuthi amazwi akhe asinceda njani ukuthi sikuzwisise lokho esikubalayo, sithole amagugu aseLizwini likaNkulunkulu lokuthi sivumele ukuthi lisibumbe.

4. ULukha 10:25-29 usifundisani ngokubala iLizwi likaNkulunkulu?

⁴ Sifuna ukuzwisisa esikubalayo eLizwini likaNkulunkulu ngoba singayekela ukwenza njalo ngeke kusincede kangako. Ngokwesibonelo, ake sibone enye ingxoxo uJesu aba layo ‘lenye indoda eyayiyisazi soMthetho.’ (Bala uLukha 10:25-29.) Indoda le yathi ibuza ukuthi kuyini okumele ikwenze ukuze ithole ukuphila okungapheliyo, uJesu wayinceda ukuthi ithole impendulo eLizwini likaNkulunkulu ngokuyibuza esithi: “EMthethweni kubhalweni? Ukuzwisisa njani lokho okubalayo?” Indoda le yaphendula kuhle ngokuqamba imibhalo eyayikhuluma ngokuthanda uNkulunkulu lokuthanda umakhelwane. (Levi. 19:18; Dute. 6:5) Kodwa nanzelela okunye eyakutshoyo: “Ngubani sibili umakhelwane wami?” Kwakhanya ukuthi indoda le yayingakuzwisisanga kuhle lokho eyayikubalile. Yikho yayingenelisi ukusebenzisa kuhle okutshiwo yiMibhalo le empilweni yayo.

5. Ukuthandaza lokubala ungagijimi kungakunceda njani ukuthi uzwisise okubalayo?

⁵ Singalizwisisa ngcono iLizwi likaNkulunkulu nxa singathuthukisa indlela esilibala ngayo. Nanku okunye okungakunceda. Qala uthandaze ungakalibali. Kumele sicele uJehova asincedise ukuze sizwisise iMibhalo. Yikho singacela umoya wakhe ongcwele ukuze usincede singacabangi ngezinye izinto nxa silibala. Ungagijimi nxa ubala iBhayibhili. Lokho kuzakunceda uzwisise okubalayo. Kungakunceda ukubalela phezulu kumbe ukulalela iBhayibhili elirekhodiweyo nxa ubala. Lokhu kuzakwenza ukuthi ube phakathi kwayo sibili indaba oyibalayo njalo kuzakunceda ukuthi iLizwi likaNkulunkulu libe sengqondweni yakho lasenhliziyweni yakho. (Josh. 1:8) Nxa ungaqeda ukubala, thandaza ubonge uJehova ngesipho seLizwi lakhe ubusumcela ukuthi akuncedise ukusebenzise lokho okubalileyo.

6. Ukuzibuza imibuzo lokubhala phansi nxa ubala iBhayibhili kungakunceda njani? (Khangela lomfanekiso.)

⁶ Nanzi ezinye izinto ezimbili ezingakunceda ukuthi uzwisise iBhayibhili. Zibuze imibuzo nxa ubala. Nxa ubala indaba ethile, nansi eminye imibuzo ongazibuza yona: ‘Ngobani okukhulunywa ngabo kakhulu endabeni le? Ngubani okhulumayo? Ukhuluma lobani futhi kungani ekhuluma laye? Okubalayo kwenzakala ngaphi futhi kwenzakala  ngasiphi isikhathi?’ Imibuzo enjalo izakunceda ukuthi ucabangisise futhi uyibone lemicijo eyisiqokoqela endabeni oyibalayo. Bhala ngamafitshane imicijo oyitholileyo. Nxa ubhala phansi lokho okubalayo, kuyakunceda ukuthi ucabangisise ngakho lokuthi ukuzwisise ngcono. Ukubhala phansi kuyakunceda lokuthi ukhumbule lokho okubalileyo. Ungabhala phansi imibuzo olayo, ubhale lokho okutholileyo uchwayisisa, ufinqe imicijo eyisiqokoqela, ubhale ukuthi ungakusebenzisa njani lokho okubalileyo kumbe ubhale nje ukuthi uzwe njani ngalokho okubalayo. Ukubhala phansi izinto ezinjengalezo kuzakunceda ubone iLizwi likaNkulunkulu njengelibhalelwe wena ngokwakho.

7. Kumele sibe ngabantu abanjani ukuze sizwisise esikubala eBhayibhilini njalo kungani kuqakathekile? (UMathewu 24:15)

⁷ UJesu wakhuluma ngokuthi kuqakathekile ukuthi sibe ngabantu abaqedisisayo ukuze sizwisise lokho esikubala eLizwini likaNkulunkulu. (Bala uMathewu 24:15.) Kuyini ukuqedisisa? Yikwenelisa ukuzwisisa ukuthi umcijo othile uhambelana njani lomunye, ukuthi utshiyana njani lomunye kanye lokubona okungangale kwalokho okubalayo. UJesu wathi kumele sibe ngabantu abaqedisisayo ukuze sizwisise izenzakalo ezigcwalisa isiphrofetho esiseBhayibhilini. Kumele sibe lokuqedisisa ukuze sithole okunengi nxa sibala iBhayibhili.

8. Kuyini okungasinceda ukuthi sibe lokuqedisisa nxa sibala?

⁸ UJehova unika izinceku zakhe ukuqedisisa. Yikho thandaza kuye umcele ukuthi akuncedise ukuthi ube lakho. (Zaga. 2:6) Ungatshengisa njani ukuthi uyafuna sibili ukuthi uNkulunkulu akuncedise? Hlolisisa okubalayo njalo ukhangele ukuthi kuhambelana njani lalokho okwaziyo. Okungakunceda yikuhlola amabhuku ethu, ngokwesibonelo iBhuku Lokuchwayisisa  LaboFakazi BakaJehova. Amabhuku la ngawokukunceda ukuthi ube lokuqedisisa futhi ubone ukuthi okubala eBhayibhilini kutshoni lokuthi ungakusebenzisa njani empilweni yakho. (Heb. 5:14) Ungabala uqedisisa uzayizwisisa ngcono iMibhalo.

9. Yiliphi iqiniso eliqakathekileyo eliseMibhalweni abaSadusi abangazange balamukele?

⁹ AbaSadusi babewazi kuhle amabhuku okuqala amahlanu eMibhalo yesiHebheru kodwa kabazange balamukele iqiniso eliqakathekileyo elalisemabhukwini la aphefumulelweyo. Ngokwesibonelo, khangela ukuthi uJesu waphendula njani lapho abaSadusi bembuza ngendaba yokuvuswa kwabafileyo. Wababuza wathi: “Alikaze likubale yini ebhukwini likaMosi ukuthi endabeni yesihlahla sameva uNkulunkulu wathi kuye: ‘NginguNkulunkulu ka-Abrahama loNkulunkulu ka-Isaka loNkulunkulu kaJakhobe’?” (Mak. 12:18, 26) Lanxa abaSadusi babeyibale kanengi indaba le, umbuzo kaJesu waveza ukuthi babengalamukelanga iqiniso eliqakathekileyo eliseMibhalweni elimayelana lokuvuswa kwabafileyo.—Mak. 12:27; Luk. 20:38. d

10. Kuyini okumele sikunanzelele nxa sibala iBhayibhili?

¹⁰ Sifundani endabeni le? Nxa sibala sifuna ukuba lelihlo elibukhali, sinanzelele ukuthi ivesi esiyibalayo kumbe indaba esiyibala eBhayibhilini ingasifundisani. Asifuni ukuzwisisa kuphela into ezilula, kodwa sifuna ukudinga iqiniso kumbe izimiso ezingekho egcekeni ezindabeni zeBhayibhili esiyabe sizibala.

11. U-2 Thimothi 3:16, 17 angakunceda njani ukuthi uthole amagugu aseBhayibhilini?

¹¹ Nxa ubala iBhayibhili ungawathola njani amagugu akulo? Khangela ukuthi u-2 Thimothi 3:16, 17 uthini. (Bala.) Nanzelela ukuthi ‘yonke iMibhalo iyasiza’ (1) ekufundiseni, (2) ekukhuzeni, (3) lasekuqondiseni izinto (4) lasekulayeni. Izinto lezi ezine ungazithola lasemabhukwini eBhayibhili ongajayelanga ukuwasebenzisa. Hlola ukuthi indaba oyibalayo ikufundisani ngoJehova, ngenhloso yakhe loba ngezimiso zikaNkulunkulu. Hlola ukuthi isiza njani ekukhuzeni. Lokhu ungakwenza ngokunanzelela ukuthi amavesi owabalayo akunceda njani ukuthi ubone okuyimikhutshana kumbe imicabango emibi ongabe ulayo ubusuyilahla, lokuthi akunceda njani ukuthi uqhubeke uthembekile. Hlola ukuthi indaba oyibalayo ingasetshenziswa njani ukuthi iqondise kumbe ilungise umbono ongayisiwo mhlawumbe owuzwe ukhulunywa ekutshumayeleni. Dinga lamavesi angakulaya ukuze indlela ocabanga ngayo ihambelane lekaJehova. Nxa ungenza izinto lezi ezine uzathola amagugu azakunceda ukuthi uthole okunengi nxa ubala iBhayibhili.

12. Kungani uJesu wabuza abaFarisi wathi “Kanti alikaze likubale yini?”

¹² UJesu waphinda wabuza umbuzo othi “Kanti alikaze likubale yini?” ukuze atshengise ukuthi abaFarisi babelombono ongayisiwo ngalokho ababekubala eMibhalweni. (Mat. 12:1-7) e Ngalesosikhathi abaFarisi babesithi abafundi bakaJesu bephule umthetho weSabatha. UJesu wathi ebaphendula wabatshela izibonelo ezimbili eziseMibhalweni, wasebatshela lamazwi asembhalweni kaHosiya ukuze abatshengise ukuthi babengazwisisi ukuthi umthetho weSabatha usebenza njani lokuthi kabazange babe lesihawu. Kungani amadoda la engabunjwanga liLizwi likaNkulunkulu ngesikhathi elibala? Ngenxa yokuthi babethanda ukubala bechothoza futhi babezikhukhumeza. Lokhu kwenza behluleka ukuzwisisa ukuthi abakubalayo kutshoni.—Mat. 23:23; Joh. 5:39, 40.

13. Kumele sibe ngabantu abanjani nxa sibala iBhayibhili, njalo kungani kumele sibe njalo?

¹³ Amazwi kaJesu asifundisa ukuthi nxa sibala iBhayibhili akumelanga sibe ngabantu abazikhukhumezayo futhi abachothozayo njengabaFarisi. Kodwa kumele sithobeke futhi sizimisele ukufunda kulo. Kumele ‘sikwamukele ngobumnene ukugxiliswa kwelizwi.’ (Jak. 1:21) Nxa singabantu abathobekileyo kumbe abamnene sizavumela ukuthi iLizwi likaNkulunkulu lisitshintshe. Nxa singayekela ukuba ngabantu abachothozayo kumbe abaziphakazimisayo, esikufunda eBhayibhilini kuzasitshintsha sibe ngabantu abalesihawu, abalozwelo lothando.

14. Kuyini okungasitshengisa ukuthi siyavumela ukuthi iBhayibhili lisibumbe? (Khangela lemifanekiso.)

¹⁴ Indlela esiphatha ngayo abanye ingatshengisa ukuthi siyalivumela yini iLizwi likaNkulunkulu  ukuthi lisibumbe. AbaFarisi behluleka ukuvumela ukuthi iLizwi likaNkulunkulu libatshintshe futhi lokhu kwenza ‘basola abangelacala.’ (Mat. 12:7) Lathi indlela esiphatha ngayo abanye lendlela esibabona ngayo iyatshengisa ukuthi siyavumela yini ukuthi iLizwi likaNkulunkulu lisibumbe. Ngokwesibonelo, sijayele ukukhuluma ngokuhle yini esikubona kwabanye kumbe sigijimela ukukhuluma ngabakuphambanisayo? Singabantu abalesihawu yini abazimiseleyo ukuthethelela abanye kumbe singabantu abathanda ukuchothoza abanye sibabambela izikhwili. Ukuzihlola okunjalo kungenza sibone ukuthi siyakuvumela yini esikubalayo kubumbe imicabango yethu, indlela esizizwa ngayo kanye lezenzo zethu.—1 Thim. 4:12, 15; Heb. 4:12.

15. UJesu wayeyibona njani iMibhalo eNgcwele?

¹⁵ UJesu wayeyithanda iMibhalo eNgcwele njalo isiphrofetho esikuHubo 40:8 sitshengisa indlela ayezizwa ngayo, sithi: “Ngiyakuthanda ukwenza intando yakho Nkulunkulu wami, umthetho wakho ungaphakathi enhliziyweni yami.” Lokhu kwenza uJesu wathokoza futhi waqhubeka ekhonza uJehova. Nxa lathi singabala iLizwi likaNkulunkulu futhi silithande sizathokoza futhi siphumelele.—Hubo. 1:1-3.

16. Kuyini ozimisele ukukwenza ukuze uthole okunengi nxa ubala iLizwi likaNkulunkulu? (Khangela ibhokisi elithi “ Amazwi KaJesu Angakunceda Uzwisise Lokho Okubalayo.”)

¹⁶ Asilandeleni isibonelo sikaJesu lamazwi akhe ngokuthuthukisa indlela esibala ngayo iBhayibhili. Singazwisisa ngcono esikubala eBhayibhilini ngokuthandaza, ngokubala singagijimi, ngokuzibuza imibuzo langokubhala phansi eminye imicijo esiyifundileyo. Singaba lokuqedisisa ngokuhlolisisa lokho esikubalayo sisebenzisa amabhuku esiwaphiwa yinhlanganiso. Singathuthukisa indlela esizwisisa ngayo iMibhalo ngitsho lamavesi esingawajayelanga, ngokudinga amagugu ezindabeni ezinjalo. Singavumela lokuthi iLizwi likaNkulunkulu lisibumbe ngokuba ngabathobekileyo langokuzimisela ukufunda kulokho esikubalayo. Nxa singazama ukwenza zonke izinto lezi sizathola okunengi nxa sibala iBhayibhili futhi kuzasinceda ukuthi sisondele kuJehova.—Hubo. 119:17, 18; Jak. 4:8.