1-2. Okwenzakala kithi kuhambelana njani lalokho okwenzakala ejaheni okukhulunywa ngalo kundima 1?

 AKE sithi kulejaha elikhulele emulini enothileyo. Kodwa ngelinye ilanga lizwe kuthiwa kube lengozi, abazali balo bahle bafela khonapho. Lithi lisaphakathi kokukhala, beselisizwa ezinye futhi izindaba ezimbi. Lizwa kuthiwa abazali bayo batshaphaze inotho yonke basala sebelezikwelede ezesabekayo. Kulokuthi lisale likhomba ngophakathi, lizithola selicwile ezikweledeni futhi abantu bazithonisa ukusa kwamalanga. Ijaha leli ngeke lafa lenelisa ukubhadala izikwelede lezo.

² Okwenzakala ejaheni leli kuyahambelana lalokho okwenzakala kithi. Abazali bethu, u-Adamu lo-Eva, babephelele futhi behlala emhlabeni omuhle olipharadayisi. (Gen. 1:27; 2:​7-9) Babengaphila kuze kube nini lanini bethokoza. Kodwa ngelinye ilanga bawona futhi lokhu kwahle kwatshintsha impilo yabo. Ngakho baxotshwa epharadayisi futhi babengasoze besaphila kuze kube nini lanini. Pho-ke yiliphi ilifa abasebezalitshiyela abantwababo? IBhayibhili lithi: “Isono sangena emhlabeni ngomuntu oyedwa [u-Adamu], lokufa kwangena ngesono, ngaleyondlela ukufa kwafika ebantwini bonke ngenxa yokuthi bonke bonile.” (Rom. 5:12) Ilifa esalitshiyelwa ngu-Adamu yisono futhi isono lesi sibangela  ukuthi sife. Isono sifanana lesikwelede esesabekayo, kakho ongenelisa ukusibhadala.—Hubo. 49:8.

 3. Kungani izono zethu zifaniswa ‘lezikwelede’?

³ UJesu wafanisa izono ‘lezikwelede.’ (Mat. 6:​12, amabala angaphansi; Luk. 11:4) Nxa singawona kuyabe sekungathi sesilesikwelede kuJehova. Kuyabe sekumele sisibhadale isikwelede leso. Nxa singasabhadalwanga siyabe sesizacitshwa nxa singafa.—Rom. 6:​7, 23.

 4. (a) Kuyini obekuzakwenzakala kithi aluba asilutholanga uncedo? (IHubo 49:​7-9) (b) Ibala elithi “isono” litshoni? (Khangela ibhokisi elithi “ Isono.”)

⁴ Singenelisa yini ukusibhadala isikwelede esadalwa ngu-Adamu lo-Eva ngesikhathi bewona? Akula loyedwa ongasibhadala. (Bala iHubo 49:​7-9.) Kumele sincediswe ukubhadala isikwelede leso ukuze sibe lethemba lokuphila okungapheliyo lelokuvuswa nxa singafa. Aluba uncedo asilutholanga, bekuyabe sekuphelile nxa singafa, njengoba nje kunjalo ngezinyamazana.—Umtshu. 3:19; 2 Phet. 2:12.

 5. Kuyini okwenziwe nguJehova ukuze abhadale isikwelede esilaso? (Khangela umfanekiso.)

⁵ Akuphinde ucabange ijaha leliyana esikhulume ngalo ekuqaliseni. Lithi lisaphithene ikhanda kufike indoda enothileyo ibisisithi ingabhadala zonke izikwelede zalo. Asithandabuzi ukuthi ijaha leli lizavumela phezulu futhi umuntu lo liyabe lizambonga lize liyengena egodini. Lokhu kufanana xathu lalokho esakwenzelwa nguJehova, uBaba wethu osithandayo. UJehova wasibhadalela isikwelede esadalwa ngu-Adamu. UJesu wakucacisa kuhle okwenziwa nguJehova. Wathi: “UNkulunkulu wawuthanda kakhulu umhlaba waze wanikela ngeNdodana yakhe ezelwe yodwa, ukuze wonke umuntu otshengisa ukuthi uyakholwa kuyo angabhujiswa kodwa abe lokuphila okungapheliyo.” (Joh. 3:16) Kanti njalo lokho uJehova asenzele khona kusivulela lethuba lokuthi sibe ngabangane bakhe.

 6. Sizaxoxa ngani esihlokweni lesi futhi kuzasinceda njani?

⁶ Lokho esikwenzelwe nguJehova ukuze izono zethu zithethelelwe kusinceda njani? Okuzasinceda sithole impendulo yombuzo lo yikuzwisisa amanye amabala asetshenziswa eBhayibhilini njengelithi ukubuyisana, ukuhlawulelwa, inhlawulo, ukuhlengwa, lomutsho othi kuthiwe balungile. Esihlokweni lesi sizaxoxa ngamabala la lokuthi atshoni. Nxa singaqhubeka sicabangisisa ngalokho uJehova asenzele khona ukuze asithethelele sizambonga kakhulu.

 UJEHOVA UFUNA UKUBUYISANA LATHI

 7. (a) Yikuphi okunye okwaphinda kwalahlekela u-Adamu lo-Eva? (b) Kuyini okumele sikwenze ukuze siphinde sibe semulini kaJehova? (URoma 5:​10, 11)

⁷ Ngesikhathi u-Adamu lo-Eva besona, abalahlekelwanga yikuphila okungapheliyo kuphela kodwa baphinda balahlekelwa yibungane babo loBaba wabo uJehova, baba yizitha zakhe. U-Adamu lo-Eva babengamalunga emuli kaJehova bengakawoni. (Luk. 3:38) Kodwa bathi sebewonile, baxotshwa emulini yakhe futhi lokhu kwenzakala bengakabi labantwana. (Gen. 3:​23, 24; 4:1) Yikho lathi kumele sibuyisane loJehova ngoba sazalwa siyizitha zakhe. (Bala uRoma 5:​10, 11.) Lokhu kutsho ukuthi kumele sizame ukuba ngabangane bakhe. Elinye ibhuku lokuchwayisisa lithi ibala lesiGrikhi elithi “ukubuyisana” litsho “ukuguqula isitha sibe ngumngane wakho.” Okumangalisayo yikuthi lanxa kunguJehova owayewonelwe, nguye owadinga indlela yokuthi abuyisane lathi. Wakwenza njani lokho?

UNKULUNKULU WASIHLAWULELA

 8. UJehova wenzani?

⁸ UJehova wasihlawulela ukuze senelise ukuba ngabangane bakhe lanxa silesono. Nguye owadinga indlela yokuthi kubhadalwe isikwelede esadalwa ngu-Adamu. Wakhipha imbadalo elingana lalokho okwakulahlekile. IMibhalo yesiGrikhi layo iyakhuluma ngalokho okwenziwa nguJehova ukuze abantu babuyisane laye babe ngabangane bakhe.—Rom. 3:25.

 9. Kuyini uJehova akwenzayo ukuze izono zama-Israyeli zithethelelwe?

⁹ UJehova wenza kwaba lendlela yokuthi izono zama-Israyeli zithethelelwe lokuthi abe ngabangane bakhe. Yikho kwabekwa ilanga ama-Israyeli okwakumele alinanze minyaka yonke okwakuthiwa liLanga Lokuhlawulelwa. Ngalelolanga umphristi omkhulu wayesenza umhlatshelo ngezinyamazana. Lanxa kunjalo imihlatshelo le yayingeke isuse izono zabantu ngokupheleleyo ngoba izinyamazana ziphansi kulabantu. Kodwa uJehova wayezimisele ukuthethelela lokwamukela umhlatshelo wama-Israyeli nxa ayephenduka ngenhliziyo yonke. (Heb. 10:​1-4) Imihlatshelo ababehlala beyenza laleyo ababeyenza ngeLanga Lokuhlawulelwa yayikhumbuza ama-Israyeli ukuthi ayeyizoni lokuthi kukhona okufunekayo okuzaqeda zonke izono.

10. Yiluphi uhlelo olwenziwa nguJehova ukuze izono zabantu zithethelelwe ngokupheleleyo?

¹⁰ UJehova wenza uhlelo olwaluzakwenza ukuthi zonke izono zabantu zithethelelwe ngokupheleleyo. Wathuma iNdodana yakhe ayithandayo ukuthi ‘inikelwe kube kanye kuphela ukuze ithwale izono zabanengi.’ (Heb. 9:28) UJesu ‘wanikela ngempilo yakhe yaba yinhlawulo yabanengi.’ (Mat. 20:28) Kuyini inhlawulo?

UJEHOVA WASIBHADALELA NGEMPILO YENDODANA YAKHE

11. (a) Kuyini inhlawulo? (b) Ngumuntu onjani owayengabhadala inhlawulo?

¹¹ Nxa iBhayibhili likhuluma ngenhlawulo, liyabe lisitsho imbadalo efunekayo ukuze abantu babuyisane loNkulunkulu. a UJehova wakubona kufanele ukuthi kube lenhlawulo ukuze abantu baphinde babe ngabangane bakhe. Khumbula ukuthi okwenziwa ngu-Adamu lo-Eva kwenza balahlekelwa yimpilo epheleleyo, baba lesono futhi  babengaselalo ithuba lokuphila phakade. Ngakho inhlawulo okwakumele kubhadalwe ngayo kwakumele ilingane lalokho okwakulahlekile. (1 Thim. 2:6) Yayingabhadalwa kuphela yindoda (1) engelasono; (2) eyayingaphila phakade emhlabeni njalo (3) eyayizimisele ukunikela ngempilo yayo. Umuntu owayelezinto lezi ezintathu nguye owayengabhadala kumbe ahlawule impilo eyalahlwa ngu-Adamu.

12. Kuyini okwenza uJesu wenelisa ukubhadala lokho okwakulahlwe ngu-Adamu?

¹² Nanzi izinto ezintathu ezenza uJesu wafanela ukubhadala inhlawulo: (1) Wayengelasono. IBhayibhili lithi “yena kenzanga sono.” (1 Phet. 2:22) (2) UJesu wayengaphila emhlabeni kuze kube nini lanini ngenxa yokuthi wayengelasono. (3) Wayezimisele ukufa ukuze anikele ngempilo yakhe ngenxa yethu. (Heb. 10:​9, 10) Njengoba uJesu wayengelasono, wayefanana lo-Adamu engakawoni. (1 Khor. 15:45) Ngesikhathi uJesu esifa, wabhadalela isono esasenziwe ngu-Adamu njalo wabuyisela lokho okwakulahlwe ngu-Adamu. (Rom. 5:19) Yikho iBhayibhili limbiza ngokuthi ‘ngu-Adamu wokucina.’ Akusadingeki ukuthi kubuye omunye umuntu ongelasono azobhadala lokho okwalahlwa ngu-Adamu. UJesu wafa “kwaba kanye kuphela.”—Heb. 7:27; 10:12.

13. Kuyini okwenza senelise ukuba ngabangane bakaJehova?

¹³ Kuyini okwenza senelise ukuba ngabangane bakaJehova? Yikuthi uJehova wenza uhlelo lokuthi izono zethu zihlawulelwe. Wasihlawulela ngeNdodana yakhe. UJesu wanikela ngempilo yakhe. Igazi lakhe eliligugu lachitheka ngenxa yethu.—Efe. 1:7; Heb. 9:14.

UJEHOVA USIKHULULA ESONWENI LASEKUFENI, ATHI SILUNGILE

14. Sizaxoxa ngani khathesi?

¹⁴ Konke okwenziwe nguJehova ukuze asihlawulele kusinceda ngani? Sizaphendula umbuzo lo ngokuxoxa ngamanye amabala asetshenziswe eBhayibhilini azasinceda sibone ukuthi indlela uJehova ayisebenzisileyo ukuthi asithethelele isinceda njani.

15-16. (a) Kutshoni “ukuhlengwa?” (b) Ukuhlengwa kusinceda njani?

¹⁵ Nxa iBhayibhili likhuluma ngokuhlengwa, liyabe lisitsho ukukhululwa esikuthola ngenxa yokuthi inhlawulo seyabhadalwa. Umphostoli uPhetro wayicacisa indaba le, wathi: “Liyakwazi ukuthi lanxa lakhululwa endleleni yenu yokuphila engancedi ngalutho elayitshiyelwa ngokhokho benu, alikhululwanga [kumbe, ‘alihlawulelwanga; alihlengwanga’] ngezinto ezonakalayo ezinjengesiliva loba igolide. Kodwa lakhululwa ngegazi eliligugu elinjengelemvana engelasici lemsulwa, igazi likaKhristu.”—1 Phet. 1:​18, 19; amabala angaphansi.

¹⁶ Inhlawulo iyasikhulula esonweni lasekufeni okusithwalise nzima. (Rom. 5:21) Siyambonga kakhulu uJehova loJesu ngoba basikhulula esonweni lasekufeni ngegazi likaJesu eliligugu.—1 Khor. 15:22.

17-18. (a) Kutshoni ukubizwa ngokuthi silungile? (b) Yiziphi izibusiso esizazithola?

¹⁷ IBhayibhili lithi izinceku zikaJehova kuthiwa zilungile. Lokhu kutsho ukuthi amacala azo ayabe esecitshiwe. Kodwa akutsho ukuthi uJehova uyabe esesephula izimiso zakhe. Okwenza uJehova athi silungile ayisikho ukuthi siyabe sikusebenzele thina kumbe ukuthi kalandaba lezono zethu. Kodwa ngenxa yokuthi siyakholwa kulokho yena loJesu abakwenzayo ukuze basihlawulele,  uyasithethelela abesesithi silungile.—Rom. 3:24; Gal. 2:16.

¹⁸ Yiziphi izibusiso esizitholayo ngenxa yokuthi uJehova uthi silungile? Labo abakhethwe ukuthi bayebusa loJesu ezulwini bona kuthiwa balungile besebesiba ngabantwana bakaNkulunkulu. (Tit. 3:7; 1 Joh. 3:1) Izono zabo ziyabe sezithethelelwe, sekungani abakaze bawone. Lokhu kwenza bafanele ukubusa loJesu. (Rom. 8:​1, 2, 30) Abanye okuthiwa balungile bona balethemba lokuphila emhlabeni futhi izono zabo sezithethelelwe baba ngabangane bakaNkulunkulu. (Jak. 2:​21-23) Abexuku elikhulu abazasinda empini ye-Amagedoni bazakuba lethuba lokuphila phakade bengazange bake bafe. (Joh. 11:26) “Abalungileyo labangalunganga” asebafayo bazavuswa. (Imiseb. 24:15; Joh. 5:​28,29) Ekucineni, bonke abantu abalalela uJehova abasemhlabeni bazathola “inkululeko ekhazimulayo yabantwana bakaNkulunkulu.” (Rom. 8:21) Sisilindele ngabomvu isikhathi leso lapho esiyabe sesingabantwana bakaBaba wethu uJehova, sesiphelele singaselasono.

19. Okwenziwe nguJehova loJesu kusincede njani? (Khangela lebhokisi elithi “ Kusinceda Ngani?”)

¹⁹ Lathi sasinjengejaha leliyana esike saxoxa ngalo elasala liphakathi kwezikwelede futhi lingakwazi lokuthi lizazibhadala ngani. Kodwa uJehova wasinceda, wenza ukuthi izono zethu zithethelelwe esebenzisa inhlawulo kaJesu. Ukuba lokholo kuJesu kwenza sihlengwe, sikhululwe esonweni lasekufeni. Nxa uJehova esithethelela izono zethu uhle azesule, kube angathi kasikaze siwone. Okusithokozisa kakhulu yikuthi sesisenelisa ukuba ngabangane bakaJehova, uBaba wethu olothando.

20. Sizaxoxa ngani esihlokweni esilandelayo?

²⁰ Simbonga singaqedi uJehova loJesu ngalokho abasenzele khona. (2 Khor. 5:15) Aluba kabasincedisanga besizahlala sisemnyameni singelathemba! Kodwa kuyini okungakunceda ungathandabuzi ukuthi uJehova usekuthethelele? Sizaxoxa ngalokho esihlokweni esilandelayo.