1-2. (a) Kuyini okungenza kube nzima ukuthi uthethelele omunye umuntu? (b) UDenise watshengisa njani ukuthi uyathethelela?

 KUNZIMA yini ukuthi uxolele abanye? Kwabanengi bethu kunzima, ikakhulu nxa umuntu wakhona esizwise ubuhlungu kakhulu. Kodwa singenelisa ukupholisa amanxeba besesimthethelela. Lokhu yikho kanye okwenziwa ngomunye udadewethu okuthiwa nguDenise. a Waxolela omunye umuntu ngendlela eyatshiya abanye bebambe owangaphansi. Ngo-2017 uDenise lemuli yakhe bavakatshela emawofisini amakhulu aboFakazi bakaJehova ayesanda kuvulwa. Bathi besendleleni sebebuyela ngekhaya, imota ababehamba ngayo yathuzwa ngenye imota. UDenise waqaleka, wathi ephaphama watshelwa ukuthi abantwabakhe babelimele kakhulu lokuthi umkakhe wayengasekho. UDenise uthi, “Ngalesosikhathi ngezwa ubuhlungu kakhulu futhi ngangingasakwazi lokuthi ngenzeni.” Ngokuhamba kwesikhathi wezwa ukuthi akulalutho olwaluphambanise umtshayeli owabathuzayo lokuthi akulalutho olwalwenze wangaboni kuhle. Yikho wathandaza ecela ukuthi uJehova amenze ahlaliseke.

² Umtshayeli lo wetheswa icala lokubulala engahlosanga. Nxa umthethwandaba wawungamthola elecala wayengavalelwa ejele. Kodwa uDenise watshelwa ukuthi ayezakukhuluma emthethwandaba yikho okwakuzatsho ukuthi indoda le iyagwetshwa kumbe iyakhululwa. UDenise wathi, “Ngezwa angathi kulomuntu owayesefike wavula amanxeba ami ayesephola wathela isawudo ngoba kwasekumele ngikhulume konke okwakwenzakele.” Akumbone ngelihlo lengqondo uDenise ngemva kwamaviki amalutshwana nje esehlezi emthethwandaba elindele  ukukhuluma ngokwakwenziwe yindoda le eyayibangele imuli yakhe usizi. Wathini uDenise? Wacela umahluleli ukuthi ayizwele indoda le. b Wathi eqeda nje ukukhuluma umahluleli wakhala, wathi: “Lo ngumnyaka wami wesi-25 ngingumahluleli. Ngiyaqala ngqa ukuzwa into enje. Angikaze ngizwe umuntu owonelweyo ecela ukuthi omoneleyo axolelwe. Uthando kanye lokuthethelela yinto engajayelekanga emthethwandaba lo.”

 3. Kuyini okwenza uDenise wathethelela indoda le?

³ Kuyini okwanceda uDenise ukuthi athethelele indoda le? Wacabangisisa ngendlela uJehova athethelela ngayo. (Mik. 7:18) Nxa singacabangisisa ngendlela uJehova athethelela ngayo, kuzakuba lula ukuthi lathi sithethelele abanye.

 4. UJehova ukhangelele ukuthi senzeni? (U-Efesu 4:32)

⁴ UJehova usithethelela ngenhliziyo yonke yikho efuna lathi sithethelele abanye. (Bala u-Efesu 4:32.) Ukhangelele ukuthi sizimisele ukuthethelela abanye lanxa bengasizwisa ubuhlungu. (Hubo. 86:5; Luk. 17:4) Esihlokweni lesi sizaxoxa ngezinto ezintathu ezizasinceda ukuthi sibe ngabantu abathethelelayo.

UNGAFELI NGAPHAKATHI

 5. Singezwa njani nxa omunye umuntu angasicaphula? (IZaga 12:18)

⁵ Kwesinye isikhathi lokho okwenziwa ngabanye kungasizwisa ubuhlungu kakhulu, ikakhulu nxa kungumngane kumbe isihlobo. (Hubo. 55:​12-14) Indlela abanye abayabe besizwise ngayo ubuhlungu ingenza sizwe angathi sigwaziwe. (Bala iZaga 12:18.) Kwezinye izikhathi singazama ukuziqinisa sisenzela ukuthi abanye bangaboni ukuthi sizwa ubuhlungu. Ukwenza njalo kufanana lokuthi nxa ungagwazwa uyekele ingqamu ingangcothulwanga. Lathi ngeke sikhangelele ukuthi sizwe ngcono singazange senze lutho ngobuhlungu esibuzwayo.

 6. Singenzani nxa omunye umuntu angasicaphula?

⁶ Nxa umuntu angasiphambanisa kulula ukuthi sihle sizonde. IBhayibhili liyatsho lalo ukuthi singazonda. Kodwa liyasixwayisa ukuthi singahlali sifuthelene. (Hubo. 4:4; Efe. 4:26) Ngenxa yani? Ngenxa yokuthi nxa sizondile singenza into esingacina sizisola ngayo. Kukalutshwana ukuthi nxa umuntu ezondile enze okuqondileyo. (Jak. 1:20) Khumbula ukuthi nxa umuntu angasizondisa siyazikhethela ukuthi sizahlala sizondile yini kumbe sizakwehlisa umoya.

 7. Singezwa njani nxa singaphathwa kubi?

⁷ Nxa singaphathwa kubi singezwa njani? Omunye udadewethu okuthiwa ngu-Ann uthi: “Ngisasemncane, ubaba watshiya umama wasethatha unkazana owayesebenza ngekhaya. Ngazizwa ngilahlelwe iganga. Ubaba wathi esiba labanye abantwana ngazibona angani angisenguye mntanakhe. Ngakhula ngizitshela ukuthi akulamuntu ongithandayo.” Omunye udadewethu okuthiwa nguGeorgette wachasisa indlela azizwa ngayo umkakhe aze afebe. Wathi: “Sasingabangane kusukela sibancane njalo sasiphayona sonke. Ngezwa angathi umhlaba ungihlanekele.” Udadewethu okuthiwa nguNaomi yena wathi: “Ngangingakaze ngike ngiphuphe ukuthi ngelinye ilanga umkami angangizwisa ubuhlungu. Wathi engitshela ukuthi ubebukela iphonografi ngazibona ubuthutha futhi ngazizwa ngingaqakathekiswa.”

 8. (a) Kungani kumele sithethelele abanye? (b) Kusinceda ngani ukuthethelela? (Khangela ibhokisi elithi “ Ungenzani Nxa Kulomuntu Okuzwise Ubuhlungu Kakhulu?”)

 ⁸ Ngeke sivimbe muntu ukuthi enze kumbe atsho akufunayo, kodwa kukithi ukuthi sizakwenzani ngalokho akukhulumileyo kumbe akwenzileyo. Okungcono ongakwenza yikumthethelela. Ngenxa yani? Ngenxa yokuthi siyamthanda uJehova futhi ufuna sithethelele abanye. Nxa singahlala sifuthelene singafuni ukuthethelela singenza into esingacina sizisola ngayo kumbe sicine sesigula. (Zaga. 14:​17, 29, 30) Omunye udadewethu okuthiwa nguChristine uthi: “Nxa kungaba lento engizwisa ubuhlungu izikhathi ezinengi ngiyabe ngibophe ubuso. Ebusuku ngilala nzima. Ngicina sengisidla lezinto ezingaqedakaliyo. Umkami labanye bayabe sebethwele nzima ngenxa yezinye izinto engiyabe ngizenza.”

 9. Kungani kungamelanga sibambe izikhwili?

⁹ Kuyini esingakwenza nxa umuntu osizwise ubuhlungu engafuni ukuxolisa? UGeorgette esike sakhuluma ngaye uthi: “Lanxa nje sehlukana, ngacina ngingasamzondelanga futhi ngingasambambelanga isikhwili, kodwa kwangithatha isikhathi. Lokhu kwenza ngahlaliseka.” Nxa singayekela ukubamba izikhwili asisoze sihlale sibazondele abanye. Lokho kuyasinceda kakhulu ngoba siyabe singasahlali sicabanga ngendaba leyo. Siyabe sesikhululekile futhi sesizikholisela impilo. (Zaga. 11:17) Kodwa kuyini okumele ukwenze nxa ungananzelela ukuthi kuyala ukuthi uthethelele?

ONGAKWENZA NXA ULOKHU USIZWA UBUHLUNGU

10. Kungani kumele sizinike isikhathi sokuthoba inhliziyo? (Khangela lemifanekiso.)

¹⁰ Ungenzani nxa ulokhu usizwa ubuhlungu? Okunye ongakwenza yikuzinika isikhathi sokuthi amanxeba aphole. Nxa umuntu angalimala kakhulu, kuyathatha isikhathi ukuthi aphole. Lathi kumele sizinike isikhathi sokuthoba inhliziyo singakamxoleli umuntu osizwise ubuhlungu.—Umtshu. 3:3; 1 Phet. 1:22.

11. Ukuthandaza kungakunceda njani?

¹¹ Thandaza ucele uJehova akuncedise uthethelele. c  U-Ann esike saxoxa ngaye uyasitshela ukuthi ukuthandaza kwamnceda njani. Uthi: “Ngathandaza ngicela ukuthi uJehova asithethelele sonke emulini kulokho esasingabe sikuphambanisile. Ngemva kwalokho ngabhalela ubaba lenkosikazi ayeseyithethe incwadi, ngibatshela ukuthi ngasengibaxolele.” U-Ann uthi kwakungalula ukuthi akwenze lokho. Uphinda athi: “Ngilethemba lokuthi nxa ngingaqhubeka ngilingisela indlela uJehova athethelela ngayo, ubaba lenkosikazi yakhe bangacina befisa ukufunda ngoJehova.”

12. Kungani kumele sithembe uJehova kulokulandela indlela esizizwa ngayo? (IZaga 3:​5, 6)

¹² Themba uJehova, ungalandeli indlela ozizwa ngayo. (Bala iZaga 3:​5, 6.) UJehova uyakwazi lokho okuzasinceda. (Isaya. 55:​8, 9) Ngeke asicele ukuthi senze into akwaziyo ukuthi izasilimaza. Njengoba esikhuthaza ukuthi sithethelele siyaqiniseka ukuthi nxa singamlalela sizancedakala. (Hubo. 40:4; Isaya. 48:​17, 18) Kodwa nxa singaphika ngobuhlungu esibuzwayo kungaba nzima ukuthi sithethelele. (Zaga. 14:12; Jer. 17:9) UNaomi esike sakhuluma ngaye uthi: “Ekuqaliseni ngangibona kuqondile ukuthi ngingamxoleli umkami. Ngangisesaba ukuthi angasiphinda futhi isenzo sakhe njalo ngangibona angani nxa ngingamxolela kasoze abone ukuthi wayengizwise ubuhlungu obungakanani. Ngangizitshela ukuthi uJehova uyayizwisisa indlela engizizwa ngayo. Ngacina nginanzelela ukuthi lanxa uJehova engabe ezwisisa indlela engizizwa ngayo, angabe engavumelani lengikwenzayo. Lanxa ekwazi ukuthi ngizwa njani lokuthi kuthatha isikhathi ukuthi inhliziyo iphole, ufuna ngithethelele.” d

YENZA IZINTO EZIZAKUNCEDA UTHETHELELE

13. URoma 12:​18-21 uthi kumele senzeni?

¹³ Nxa singathethelela umuntu osizwise ubuhlungu, ayisikho ukuthi siyabe sifuna ukuyekela indaba idlule nje kuphela kodwa kulokunye okuyabe kumele sikwenze. Nxa umuntu lowo engumKhristu kumele sizimisele  ukwenza ukuthi kube lokuthula phakathi kwethu laye. (Mat. 5:​23, 24) Kasifuni kuba ngabantu abahlala bezondile kumbe ababamba izikhwili kodwa sifuna ukuba lozwelo njalo sithethelele. (Bala uRoma 12:​18-21; 1 Phet. 3:9) Kuyini okungasinceda ukuthi sikwenze lokho?

14. Kuyini okumele sizimisele ukukwenza futhi kuzasinceda ngani?

¹⁴ UJehova ukhetha ukudinga okuhle ebantwini, yikho lathi kumele sizame ukudinga okuhle emuntwini oyabe esizwise ubuhlungu. (2 Imilan. 16:9; Hubo. 130:3) Nxa ungadinga okubi ebantwini, uyabe uzakuthola, njalo nxa ungadinga okuhle uyabe ungasoze ukuswele. Nxa singadinga okuhle okwenziwa ngabanye kuzakuba lula ukuthi sibathethelele. Omunye umfowethu okuthiwa nguJarrod uthi, “Nxa ngingacatshulwa ngumzalwane, kuba lula ukuthi ngimthethelele nxa ngingacabanga ngezinto ezinengi engizithandayo ngaye.”

15. Kungani kuqakathekile ukutshela umuntu ukuthi usumthethelele?

¹⁵ Okunye okuqakathekileyo esingakwenza yikutshela umuntu osiphambanisileyo ukuthi  sesimthethelele. Kungani kuqakathekile lokho? UNaomi esike sakhuluma ngaye uthi: “Umkami wangibuza wathi, ‘Usungithethelele yini?’ Ngathi ngivula umlomo ngifuna ukuthi, ‘Sengikuthethelele,’ umphimbo wahle woma qha, ngehluleka lokukhuluma. Lokhu kwenza ngananzelela ukuthi ngangingakamthetheleli ngenhliziyo yonke. Ngokuhamba kwesikhathi ngenelisa ukumtshela amazwi la aqakathekileyo, ngathi, ‘Sengikuthethelele.’ Ngathi ngisitsho njalo wathaba, wahlengezela inyembezi njalo lami ngezwa ngihlaliseka. Khathesi sengimthemba futhi sesingamathe lolimi.”

16. Kuyini okufundileyo ngokuthethelela?

¹⁶ UJehova ufuna sibe ngabantu abathethelelayo. (Kol. 3:13) Lanxa kunjalo, kwesinye isikhathi kungaba nzima ukuthi sithethelele abanye. Kodwa okungasinceda nxa sizondile yikungafeli ngaphakathi, lokuzama ukwenza izinto ezizasinceda ukuthi sehlise umoya. Ngemva kwalokho sesingenza izinto ezizasinceda ukuthi sithethelele.—Khangela ibhokisi elithi “ Izinto Ezintathu Ezizakunceda Ukuthi Uthethelele.”

CABANGISISA NGOBUHLE BOKUTHETHELELA

17. Ukuthethelela kusinceda njani?

¹⁷ Ukuthethelela kusinceda ngezindlela ezinengi. Ake sixoxe ngezinye zakhona. Okokuqala, kusinceda silingisele uBaba wethu olesihawu uJehova njalo simthokozise. (Luk. 6:36) Okwesibili, siyabe sitshengisa ukuthi siyambonga uJehova ngokuthi usithethelele. (Mat. 6:12) Okwesithathu, kuyasinceda ukuthi singabanjwa yimikhuhlane ebangelwa yikuhlala sizondile, kuphinde kusincede ukuthi sizwanane labanye.

18-19. Ukuthethelela kuzasinceda njani?

¹⁸ Kulezinye izibusiso esizitholayo nxa singathethelela abanye. Cabanga ngalokho okwenzakala kuDenise esike sakhuluma ngaye. Indoda eyabathuzayo yayicabanga ukuthi izahle izibulale ngemva kokuthonisiswa kwayo. UDenise wayengakwazi lokho. Okwenziwa nguDenise kwayimangalisa indoda le yasiqalisa ukufunda laboFakazi bakaJehova iBhayibhili.

¹⁹ Kwezinye izikhathi kungaba nzima ukuthi sithethelele umuntu oyabe esizwise ubuhlungu. Kodwa nxa singathethelela sizathola izibusiso ezinengi. (Mat. 5:7) Ngakho sonke kasenzeni konke esingakwenza ukuze sithethelele njengoJehova.