1-2. (a) Kuyini uJehova akukhangelayo ngelanga leSidlo SeNkosi Sakusihlwa? (Khangela umfanekiso ongaphandle.) (b) Sizaxoxa ngani esihlokweni lesi?

UJEHOVA uyathokoza kakhulu nxa ebona amamiliyoni abantu emhlabeni wonke ethe gwaqa eSidlweni SeNkosi Sakusihlwa. Kakhangeli ubunengi babantu kuphela kodwa unanzelela lomuntu ngamunye oyabe ekhona. Uyababona bonke abangena iSikhumbuzo minyaka yonke. Abanye babo yilabo abathwele nzima ngenxa yokuhlukuluzwa. Kulabanye abakuqakathekisayo ukungena iSikhumbuzo lanxa bengabuyi emihlanganweni esiba layo maviki wonke. UJehova uphinda abone lalabo ababuya eSikhumbuzweni okokuqala bezobona ukuthi kanti vele kwenziwani embuthanweni lo.

² Uyathokoza kakhulu nxa ebona abantu bebuya ngobunengi eSikhumbuzweni. (Luk. 22:19) Kodwa kayisikho ukuthi uqakathekisa inani labantu ababakhona eSikhumbuzweni. Yena okumthokozisa kakhulu yisizatho esenza babuye embuthanweni lo. Esihlokweni lesi sizaxoxa ngombuzo oqakathekileyo othi: Kungani singena iSikhumbuzo kanye lemihlangano eyenziwa maviki wonke esiyilungiselwe nguJehova?

3-4. (a) Kungani singena imihlangano? (b) Ukungena imihlangano kutshengisa ukuthi singabantu abanjani? (c) Ngokwalokho okutshiwo ku-1 Khorinte 11:23-26, kungani kungamelanga silove eSikhumbuzweni?

³ Isizatho esikhulu esenza singene imihlangano yebandla yikuthi layo isinika ithuba lokudumisa uJehova. Okunye okwenza siyingene yikuthi sifuna asifundise. Abantu abazigqajayo bazitshela ukuthi abakudingi ukufundiswa.  (3 Joh. 9) Kodwa thina siyafuna ukufundiswa nguJehova lenhlanganiso yakhe.​—Isaya. 48:17, 18; Joh. 6:45.

⁴ Ngakho nxa sisiba khona emihlanganweni yebandla siyabe sitshengisa ukuthi sithobekile lokuthi siyavuma ukufundiswa nguJehova. Lokuba khona eSikhumbuzweni sokufa kukaJesu kuqakathekile ngoba kutshengisa ukuthi sithobekile futhi siyawulalela umlayo wakhe othi: “Qhubekani likwenza lokhu lingikhumbula.” (Bala u-1 Khorinte 11:23-26.) Umbuthano lo esiwenza kanye ngomnyaka uyaliqinisa ithemba lethu njalo usikhumbuza ukuthi uJehova uyasithanda kakhulu. Kodwa uJehova uyakwazi ukuthi siyakudinga ukukhuthazwa lokuqiniswa ngaso sonke sikhathi. Yikho esinika eminye imihlangano afuna siyingene maviki wonke. Nxa sithobekile sizazinika isikhathi sokuyilungiselela futhi sizimisele lokuyingena.

5. Abantu abathobekileyo benzani nxa uJehova ebanxusa?

⁵ Minyaka yonke uJehova unxusa abantu ukuthi azobafundisa. Abathobekileyo bayasamukela isimemo leso. (Isaya. 50:4) Bayakukholisa kakhulu ukuba seSikhumbuzweni futhi baze baqalise lokungena imihlangano yebandla. (Zek. 8:20-23) Kuyasithokozisa sonke ukufundiswa lokuqondiswa nguJehova ‘umsizi wethu lomkhululi wethu.’ (Hubo. 40:17) Ukuvuma ukufundiswa nguJehova kanye leNdodana yakhe ayithandayo kuqakathekile njalo kumnandi kakhulu.​—Mat. 7:5; 18:20; 28:20.

6. Ukuzithoba kwayinceda njani enye indoda eyayinxuswe eSikhumbuzweni?

⁶ Ngesikhathi seSikhumbuzo senza konke okusemandleni ethu ukuze sinxuse abantu embuthanweni lo wokukhumbula ukufa kukaJesu. Abantu abanengi abathobekileyo bancedakale kakhulu ngokuba khona eSikhumbuzweni. Ngokwesibonelo, eminyakeni eyedlulayo omunye umfowethu wanika enye indoda isimemo seSikhumbuzo. Indoda le yamtshela ukuthi kayisoze yenelise ukuba khona kodwa ngelanga leSikhumbuzo umfowethu lo wamangala eyibona ithutsha eWolu yoMbuso. Abazalwane bayamukela ngazo zombili indoda le futhi yathokoza kakhulu yaze yaqalisa ukungena imihlangano maviki wonke. Ngalowomnyaka yalova kathathu kuphela emihlanganweni. Kuyini okwenza yaqalisa ukungena yonke imihlangano yebandla? Yayithobekile njalo izimisele ukuntshintsha. Umfowethu owayeyinxusile wakhuluma ngayo wathi: “Uyindoda ethobekileyo sibili.” Asithandabuzi ukuthi uJehova nguye owadonsa indoda le ukuthi imkhonze futhi khathesi seyabhabhathizwa.​—2 Sam. 22:28; Joh. 6:44.

7. Esikufunda emihlanganweni yebandla kanye lalokho esikubala eBhayibhilini kusinceda ngani?

⁷ Esikufunda emihlanganweni yebandla lalokho esikubala eBhayibhilini kuyasinceda ukuthi sibe ngabantu abathobekileyo. Nxa sekusele amaviki ukuthi iSikhumbuzo sifike imihlangano yethu ijayele ukukhuluma kakhulu ngesibonelo sikaJesu kanye lendlela atshengisa ngayo ukuthi uthobekile ngesikhathi enikela ngokuphila kwakhe. Kanti njalo nxa sekusele amalanga ukuthi iSikhumbuzo sifike sihlala sikhuthazwa ukuthi sibale indaba eziseBhayibhilini ezimayelana lokufa kanye lokuvuswa kukaJesu. Esikufunda emihlanganweni yebandla ngesikhathi seSikhumbuzo kanye lalokho esikubala eBhayibhilini kwenza siyiqakathekise kakhulu inhlawulo. Kuyasisiza lokuthi silingisele ukuthobeka kukaJesu futhi sizimisele ukwenza intando kaJehova lanxa siphakathi kobunzima.​—Luk. 22:41, 42.

8. UJesu watshengisa njani ukuthi ulesibindi?

⁸ Sonke siyafuna ukulingisela indlela uJesu atshengisa ngayo ukuthi ulesibindi. Ngokwesibonelo, khumbula lokho akwenzayo sekusele insukwana ukuthi abulawe. Wayekwazi ukuthi izitha zakhe zizamenza inhlekisa, zimbhaxabule besezimbulala ngendlela ebuhlungu. (Mat. 20:17-19) Lanxa kunjalo, wazimisela ukukhangelana lokufa. Kwathi isikhathi sokuthi abotshwe sesisondele, watshela abaphostoli bakhe abathembekileyo ababelaye eGetsemane wathi: “Sukumani sihambe. Umthengisi wami usesondele!” (Mat. 26:36, 46) Khonokho nje kwatheleka ixuku elalithwele izikhali lizombopha kodwa kazange acatshe. Watshela amasotsha ukuthi ayekele abaphostoli bakhe bahambe. (Joh. 18:3-8) Kuyakhanya ukuthi uJesu wayelesibindi. Lalamuhla abagcotshiweyo kanye labezinye izimvu bayamlingisela ngokuba lesibindi. Bakwenza njani lokhu?

9. (a) Kungani kumele sibe lesibindi ukuze singene imihlangano yebandla? (b) Singabakhuthaza njani abafowethu abasemajele?

⁹ Kwezinye izikhathi kungaba nzima ukungena imihlangano yebandla. Kodwa kumele sitshengise ukuthi silesibindi ngokwenza konke okusemandleni ethu ukuthi sibe khona kuyo yonke. Abanye abafowethu labodadewethu bayayingena imihlangano lanxa bedanile, begula kumbe befelwe. Abanye batshengise ukuthi balesibindi ngokungena imihlangano lanxa bephikiswa ngabangakibo loba yiziphathamandla zikahulumende. Nxa siqhubeka singena imihlangano siyabe sikhuthaza labafowethu abasemajele. (Heb. 13:3) Ukholo lwabo luyaqina, babe lesibindi njalo bahlale bethembekile kuJehova nxa besizwa ukuthi silokhu simkhonza kungelani lobunzima esiphakathi kwabo. Lokhu yikho okwenzakala kumphostoli uPhawuli ngesikhathi esejele eRoma. Wayethokoza kakhulu nxa esizwa ukuthi abazalwane baqhubeka bekhonza uNkulunkulu bethembekile. (Flp. 1:3-5, 12-14) Wathi esezaphuma ejele kumbe esanda nje kuphuma, wabhalela amaHebheru incwadi ewakhuthaza ukuthi ‘aqhubeke etshengisa ukuthi alothando lobuzalwane’ futhi angayekeli ukuhlangana ndawonye.​—Heb. 10:24, 25;13:1.

10-11. (a) Ngobani okumele sibanxuse eSikhumbuzweni? (b) Yisiphi isizatho esiku-Efesu 1:7 esenza sinxuse abantu eSikhumbuzweni?

¹⁰ Nxa sinxusa izihlobo zethu, esisebenza labo kanye labomakhelwane bethu ukuthi babuye eSikhumbuzweni siyabe sitshengisa ukuthi silesibindi. Kungani sizikhathaza ngabo kangaka? Sifuna ukutshengisa ukuthi siyabonga ngalokho uJehova loJesu abasenzela khona. Kanti njalo sifuna labo bafunde ukuthi bangenzani ukuze bancedwe ‘ngumusa omkhulu’ esawenzelwa nguJehova lapho enikela ngeNdodana yakhe ukuze isihlawulele.​—Bala u-Efesu 1:7; Isam. 22:17.

 ¹¹ Ukuba lesibindi kayisikho kodwa okwenza singene imihlangano yebandla. Okunye okwenza sikhuthalele ukuyingena yikuthi sifuna ukutshengisa ukuthi silothando njengoNkulunkulu leNdodana yakhe.

12. (a) Ukungena imihlangano kusisiza njani? (b) Umbhalo ka-2 Khorinte 5:14, 15 usikhuthaza ukuthi senzeni ukuze silingisele uJesu?

¹² Okunye okwenza singene imihlangano yebandla yikuthi siyamthanda uJehova loJesu. Imfundo esiyithola emihlanganweni le yiyo esinceda ukuthi siqhubeke sibathanda kakhulu ngoba ihlala isikhumbuza lokho abasenzele khona. (Rom. 5:8) Ukungena iSikhumbuzo khona kwenza sikhumbule ukuthi bayasithanda kakhulu sonke, ngitsho lalabo abangayiqakathekisiyo inhlawulo. Siyazama lokulingisela uJesu kukho konke esikwenzayo ukuze sitshengise ukuthi siyayiqakathekisa inhlawulo. (Bala u-2 Khorinte 5:14, 15.) Inhliziyo zethu ziphuphuma intokozo nxa sicabanga ngesipho lesi futhi lokhu kusifuqa ukuthi simdumise uJehova. Enye indlela esingamdumisa ngayo yikuphendula ngenhliziyo yonke nxa sisemihlanganweni yebandla.

13. Singatshengisa njani ukuthi siyamthanda kakhulu uJehova leNdodana yakhe? Chasisa.

¹³ Singatshengisa ukuthi siyamthanda uJehova leNdodana yakhe ngokwenza konke okusemandleni ethu ukuze singene imihlangano yebandla. Phela izikhathi ezinengi akulula ukungena imihlangano. Ngokwesibonelo, amabandla amanengi angena umhlangano waphakathi kweviki ntambama. Loba kunjalo, abazalwane abanengi bayayingena lanxa bayabe bedinwe befile bevela emsebenzini. Omunye umhlangano wenziwa ngempelaviki ngesikhathi abantu beziphumulele. UJehova uyathokoza kakhulu nxa esibona singena imihlangano lanxa sidiniwe. Uyayibona imizamo esiyenzayo ukuze sitshengise ukuthi siyamthanda.​—Mak. 12:41-44.

14. UJesu watshengisa njani ukuthi wayekuqakathekisa okufunwa ngabanye?

¹⁴ UJesu wayesenza konke ayengakwenza ukuze atshengise ukuthi uyabathanda abanye. Wayengaqakathekisi okufunwa nguye kuphela kodwa wayelendaba lalokho okufunwa ngabanye. Ngokwesibonelo, wayezinika isikhathi sokuba labafundi bakhe kungelani lokuthi udiniwe  loba ukhathazekile. (Luk. 22:39-46) Wayengalindeli ukuthi abantu bamenzele izinto ezinhle kodwa nguye owayesukumela phezulu ukuze asize abanye ngalokho abakudingayo. (Mat. 20:28) Ekucineni wanikela ngokuphila kwakhe ukuze abakhulule esonweni. Nxa lathi simthanda kakhulu uJehova kanye labazalwane bethu, sizazimisela ukuba khona eSidlweni SeNkosi Sakusihlwa futhi sizayingena yonke imihlangano yebandla.

15. Ngobani esifisa ukubasiza kakhulu?

¹⁵ Siyimuli ebambeneyo ekhonza uNkulunkulu weqiniso futhi sisebenzisa isikhathi sethu sinxusa abantu ukuthi babuye bazokhonza lathi. Kodwa esifisa ukubasiza kakhulu yilabo “abangabemuli yethu yabakholwayo” abangasayifezi inkonzo. (Gal. 6:10) Siyabathanda yikho sibanxusa ukuthi babuye emihlanganweni yebandla ikakhulu eSikhumbuzweni. Lathi njengoJehova loJesu siyathokoza kakhulu nxa sibabona bebuyela kuBaba wethu olothando njalo onguMalusi wethu.​—Mat. 18:14.

16. (a) Singabakhuthaza njani abanye njalo ukungena imihlangano kusinceda ngani? (b) Kungani lesi kuyisikhathi esihle sokuthi sikhumbule amazwi kaJesu atholakala kuJohane 3:16?

¹⁶ Emavikini alandelayo nxusa abantu abanengi ukuthi babuye eSikhumbuzweni ngoLwesihlanu ntambama mhlaka 19 April 2019. (Khangela ibhokisi elithi “ Uzabanxusa Yini?”) Zimisele lokukhuthaza abanye ngokuba khona kuyo yonke imihlangano yebandla esiyilungiselwe nguJehova lonyaka. Njengoba umhlaba lo obuswa nguSathane ususiya ekupheleni kumele senze konke okusemandleni ethu ukuthi singene imihlangano yebandla. Lokhu kuzasinceda ukuthi sihlale sithobekile, silesibindi njalo silothando. (1 Thes. 5:8-11) Kasimbongeni ngenhliziyo yonke uJehova kanye leNdodana yakhe ngoba abasenzele khona kutshengisa ukuthi bayasithanda kakhulu!​—Bala uJohane 3:16.