1-2. (a) Kunini lapho esikhumbula khona kakhulu umuntu esimthandayo owafayo? (b) UJesu wasungulani ngobusuku bokucina engakabulawa?

 KUNGELANI lokuthi sekulesikhathi esinganani abantu esibathandayo bafa, silokhu sibakhumbula. Sicabanga ngabo kakhulu ngelanga abafa ngalo.

² Umnyaka ngamunye siba phakathi kwabantu abangamamiliyoni ababuthana ndawonye emhlabeni wonke ukuthi bakhumbule ukufa komuntu abamthanda kakhulu, uJesu Khristu. (1 Phet. 1:8) Siyabuthana ukuze sikhumbule lowo owanikela ngokuphila kwakhe kwaba yinhlawulo esikhulula esonweni lasekufeni. (Mat. 20:28) UJesu wayefuna sibili ukuthi abalandeli bakhe bakhumbule ukufa kwakhe. Ngobusuku bokucina engakabulawa, wasungula isidlo sakusihlwa esiqakathekileyo futhi watshela abafundi bakhe wathi: “Qhubekani likwenza lokhu lingikhumbula.”—Luk. 22:19.

3. Sizaxoxa ngani esihlokweni lesi?

³ Ebantwini ababakhona eSikhumbuzweni sokufa kukaKhristu, balutshwana abalethemba lokuyaphila ezulwini. Amamiliyoni alabo ababakhona alethemba lokuphila emhlabeni. Esihlokweni lesi sizaxoxa ngezizatho ezenza amaqembu la womabili abe khona eSikhumbuzweni minyaka yonke. Sizaphinda sixoxe ngokuthi kusinceda ngani ukuba seSikhumbuzweni. Asiqaleni ngokuxoxa ngokuthi kungani abagcotshiweyo besiba khona eSikhumbuzweni.

4. Kungani abagcotshiweyo besidla isinkwa futhi benatha lewayini eSikhumbuzweni?

⁴ Minyaka yonke abagcotshiweyo baba khona eSikhumbuzweni njalo yibo abadla isinkwa banathe lewayini.  Kungani kufanele benze njalo? Impendulo yombuzo lo singayithola ngokuhlolisisa okwenzakala ngobusuku bokucina uJesu engakafi. Eseqede ukunanza iPhasika uJesu wasungula umkhosi othiwa yiSidlo SeNkosi Sakusihlwa. Wathatha isinkwa lewayini waqhubela abaphostoli bakhe abangu-11 abathembekileyo wasebatshela ukuthi badle banathe. Wabatshela ngezivumelwano ezimbili, isivumelwano esitsha lesivumelwano soMbuso. * (Luk. 22:19, 20, 28-30) Izivumelwano lezo zazizakwenza ukuthi abaphostoli labo kanye labanye abalutshwana babe ngamakhosi kanye labaphristi ezulwini. (Isam. 5:10; 14:1) Okumele badle isinkwa banathe lewayini eSikhumbuzweni ngabagcotshiweyo abaseselapha emhlabeni, abasezivumelwaneni lezi ezimbili.

5. Kuyini abagcotshiweyo abakwaziyo ngethemba abaliphiweyo?

⁵ Nansi esinye isizatho esenza abagcotshiweyo babe khona eSikhumbuzweni: Umbuthano lo ubapha ithuba lokucabangisisa ngethemba abalalo. UJehova ubanike ithemba elimangalisayo lokuyaphila ezulwini bengasafi, bebusa loJesu Khristu okhazimulayo kanye labanye abe-144 000. Kanti njalo bazakuba lesibusiso esikhulu sokubona uJehova uNkulunkulu ngokwakhe! (1 Khor. 15:51-53; 1 Joh. 3:2) Abagcotshiweyo bayakwazi ukuthi banxusiwe ukuthi bathole izibusiso lezi ezulwini. Kodwa kumele bahlale bethembekile baze bafe ukuze bayephila ezulwini. (2 Tim. 4:7, 8) Kuyabathokozisa kakhulu ukucabangisisa ngethemba lelo abalalo. (Tit. 2:13) Kodwa ‘abezinye izimvu’ ke? (Joh. 10:16) Kungani besiba khona eSikhumbuzweni?

6. Kungani abezinye izimvu besiba khona eSikhumbuzweni?

⁶ Abezinye izimvu baba khona eSikhumbuzweni kodwa bona abadli isinkwa njalo abanathi iwayini. Ngo-1938 kwaba ngokokuqala ukuthi labo abalethemba lokuphila emhlabeni banxuswe eSikhumbuzweni. INqabayokulinda kaMarch 1 1938 yathi: ‘Kuhle kakhulu njalo kuqondile ukuthi abezinye izimvu babe khona embuthanweni lo babone okuyabe kusenzakala. Lakubo kumele kube yisikhathi sokuthokoza ngoba umbuthano lo uqakathekile.’ Abezinye izimvu banjengabantu abanxuswe emtshadweni abathokoza ukuba kiwo lanxa kungayisibo abatshadayo. Labo bayathokoza ngokuba seSikhumbuzweni lanxa bengadli isinkwa njalo banathe iwayini njengabagcotshiweyo.

7. Inkulumo yeSikhumbuzo ibanceda njani abezinye izimvu?

⁷ Ukuba seSikhumbuzweni kunika abezinye izimvu ithuba lokuthi labo bacabangisise ngethemba abalalo. Bayayikholisa inkulumo yeSikhumbuzo ngoba iyabe ichasisa lokho uKhristu labangu-144 000 abazabusa laye abazakwenzela abantu abathembekileyo ngesikhathi sebebusa okweminyaka eyinkulungwane. Bekhokhelwa yiNkosi yabo uJesu Khristu, ababusi labo abasezulwini bazatshintsha umhlaba ube liPharadayisi njalo bakhiphe lesono ebantwini bonke abalalelayo.  Akucabange ukuthi kubathokozisa njani abezinye izimvu ukuzibona ngelihlo lengqondo iziphrofetho eziseBhayibhilini zigcwaliseka, njengalezo ezitholakala ku-Isaya 35:5, 6; 65:21-23 lakuSambulo 21:3, 4. Ukuzibona sebesemhlabeni omutsha labathandekayo babo kuyaliqinisa ithemba labo njalo kubenza bazimisele ukuqhubeka bekhonza uJehova.—Mat. 24:13; Gal. 6:9.

8. Yisiphi esinye isizatho esenza abezinye izimvu babe khona eSikhumbuzweni?

⁸ Esinye isizatho esenza abezinye izimvu babe khona eSikhumbuzweni yikuthi bayabe befuna ukutshengisa ukuthi bayabathanda njalo bayabasekela abagcotshiweyo. ILizwi likaNkulunkulu lisitshela ukuthi abagcotshiweyo lalabo abalethemba lokuphila emhlabeni babezasebenza ndawonye bemanyene. Kwakuzakwenzakala njani lokhu? Asixoxeni ngakho.

9. Isiphrofetho esikuZekhariya 8:23 sitshengisani ngabezinye izimvu labagcotshiweyo?

⁹ Bala uZekhariya 8:23. Isiphrofetho lesi siyiveza kuhle indlela ezinye izimvu ezibabona ngayo abafowabo labodadewabo abagcotshiweyo. ‘UmJuda oyedwa’ okukhulunywa ngaye evesini le umela abagcotshiweyo abasesemhlabeni. (Rom. 2:28, 29) “Amadoda alitshumi aphuma kuzo zonke izindimi lezizwe” amela abezinye izimvu. Amadoda la ‘agagadlela umphetho wengubo yomJuda oyedwa’ ngokuzimanyanisa labagcotshiweyo ekukhonzeni kweqiniso. Yikho nxa abezinye izimvu beseSikhumbuzweni bayabe betshengisa ukuthi bamanyene labagcotshiweyo.

10. UJehova usigcwalise njani isiphrofetho esikuHezekheli 37:15-19, 24, 25?

¹⁰ Bala uHezekheli 37:15-19, 24, 25. UJehova usegcwalise isiphrofetho lesi ngokwenza ukuthi abagcotshiweyo labezinye izimvu basebenze ndawonye bemanyene. Isiphrofetho lesi sikhuluma ngezinti ezimbili. Uluthi ‘lukaJuda’ (isizwana lapho okwakukhethwa khona amakhosi ako-Israyeli) yilabo abalethemba lokuyaphila ezulwini, besekusithi “uluthi luka-Efrayimi” kube yilabo abalethemba lokuphila emhlabeni. * UJehova wayezamanyanisa amaqembu la womabili abe “luthilunye.” Lokhu kutsho ukuthi amaqembu la ayezakhonza ndawonye emanyene ngaphansi kweNkosi eyodwa uKhristu uJesu. Umnyaka ngamunye abagcotshiweyo labezinye izimvu baba khona eSikhumbuzweni bengasomaqembu amabili ehlukeneyo kodwa ‘bengumhlambi owodwa ngaphansi komelusi oyedwa.’—Joh. 10:16.

11. “Izimvu” okukhulunywa ngazo kuMathewu 25:31-36, 40 zitshengisa njani ukuthi ziyabasekela abafowabo bakaKhristu?

¹¹ Bala uMathewu 25:31-36, 40. “Izimvu” uJesu akhuluma ngazo zimela abantu abalungileyo ngesikhathi sokuphela abalethemba lokuphila emhlabeni. Basekela abafowabo bakaKhristu abasesemhlabeni ngenhliziyo yonke bebancedisa ukwenza umsebenzi omkhulu wokutshumayela lowokwenza abafundi emhlabeni wonke.—Mat. 24:14; 28:19, 20.

12-13. Kuyini okunye okungenziwa ngabezinye izimvu ukuze basekele abafowabo bakaKhristu?

¹² Minyaka yonke nxa sekuzafika iSikhumbuzo abezinye izimvu basekela abafowabo bakaKhristu ngokwenza  umkhankaso emhlabeni wonke wokunxusa abantu embuthanweni lo. (Khangela ibhokisi elithi “ Uyasilungiselela Yini ISikhumbuzo?”) Baphinda babe leqiniso lokuthi wonke amalungiselelo eSikhumbuzo ayenziwa lanxa emabandleni amanengi kungelamuntu ogcotshiweyo. Abezinye izimvu bayathokoza ukusekela abafowabo bakaKhristu ngalindlela. Bayakwazi ukuthi uJesu ubona lokho abakwenzela abafowabo abagcotshiweyo kuyikuncedisa yena ngokwakhe.—Mat. 25:37-40.

¹³ Yiziphi ezinye izizatho ezenza ukuthi sonke sibe khona eSikhumbuzweni kungelani lokuthi silethemba lokuyaphila ezulwini loba elokuphila emhlabeni?

14. UJehova loJesu batshengise njani ukuthi bayasithanda kakhulu?

¹⁴ Siyabe sitshengisa ukuthi siyabonga indlela uJehova loJesu abasithanda ngayo. UJehova utshengise ngendlela ezinengi ukuthi uyasithanda. Kodwa enkulu kulazo zonke yikuthi wathumela iNdodana yakhe eligugu ukuthi ihlupheke futhi isifele. (Joh. 3:16) UJesu laye watshengisa ukuthi uyasithanda kakhulu ngokuzinikela ukuthi asifele. (Joh. 15:13) Akulalutho esingalwenza ukuze sibhadale uJehova loJesu ngothando abasitshengisa lona. Kodwa singatshengisa ukuthi siyababonga ngendlela esiphila ngayo nsuku zonke. (Kol. 3:15) Kanti njalo siba khona eSikhumbuzweni ukuze sikhumbule indlela abasithande ngayo futhi sitshengise ukuthi siyabathanda.

15. Kungani abagcotshiweyo labezinye izimvu beyiqakathekisa kakhulu inhlawulo?

¹⁵ Siyayiqakathekisa kakhulu inhlawulo. (Mat. 20:28) Abagcotshiweyo bayayiqakathekisa inhlawulo ngoba yiyo eyenza babe lethemba lokuyaphila ezulwini. UJehova ubabone belungile njalo ubenze baba ngabantwabakhe ngenxa yokholo abalalo enhlawulweni kaKhristu. (Rom. 5:1; 8:15-17, 23) Labezinye izimvu bayayiqakathekisa inhlawulo. Ukuba lokholo emhlatshelweni kaKhristu kwenza bamukelwe nguNkulunkulu, bamenzele inkonzo engcwele njalo babe lethemba lokusinda “ekuhluphekeni okukhulu.” (Isam. 7:13-15) Enye indlela abagcotshiweyo labezinye izimvu abatshengisa ngayo ukuthi bayayiqakathekisa inhlawulo yikuba khona eSikhumbuzweni minyaka yonke.

16. Yikuphi okunye okwenza sibe khona eSikhumbuzweni?

¹⁶ Okunye okwenza sibe khona eSikhumbuzweni yikuthi siyamlalela uJesu. Kungelani lethemba esilalo sonke sizimisele ukulalela lokho uJesu akutsho ngobusuku asungula ngabo iSikhumbuzo. Wathi: “Qhubekani likwenza lokhu lingikhumbula.”—1 Khor. 11:23, 24.

17. ISikhumbuzo sisinceda njani ukuthi sisondele kuJehova?

¹⁷ Kusisondeza kuJehova. (Jak. 4:8) Esixoxe ngakho kusitshengise ukuthi ukuba seSikhumbuzweni kusipha ithuba lokucabangisisa ngethemba uJehova asinike lona kanye lendlela asithanda ngayo. (Jer. 29:11; 1 Joh. 4:8-10) Ukucabangisisa ngethemba esilalo langothando olukhulu uNkulunkulu asitshengise lona kwenza simthande kakhulu njalo kuqinisa ubungane bethu laye.—Rom. 8:38, 39.

18. Kusinceda njani ukucabangisisa ngalokho okwenziwa nguJesu?

 ¹⁸ Kusenza sizimisele ukulingisela uJesu. (1 Phet. 2:21) Nxa sekusele amalanga amalutshwana ukuthi iSikhumbuzo sifike, sijayele ukubala ngendaba eziseBhayibhilini ezimayelana leviki yokucina kaJesu esasemhlabeni, ukubulawa kanye lokuvuswa kwakhe. Inkulumo eyenziwa eSikhumbuzweni isikhumbuza indlela uJesu asithanda ngayo. (Efe. 5:2; 1 Joh. 3:16) Ukubala lokucabangisisa ngendlela uJesu azidela ngayo kuyasinceda ukuthi sizimisele ‘ukuqhubeka sihamba ngendlela yena ayehamba ngayo.’—1 Joh. 2:6.

19. Singenzani ukuze sihlale sisethandweni lukaNkulunkulu?

¹⁹ Kwenza sizimisele kakhulu ukuhlala sisethandweni lukaNkulunkulu. (Jud. 20, 21) Sizahlala sisethandweni lukaNkulunkulu nxa singenza konke okusemandleni ethu ukuthi simlalele, singcwelise ibizo lakhe njalo simthokozise. (Zaga. 27:11; Mat. 6:9; 1 Joh. 5:3) Ukuba khona eSikhumbuzweni kwenza sizimisele ukuphila usuku ngalunye angani sitshela uJehova ukuthi, ‘Ngifuna ukuhlala ngisethandweni lwakho kuze kube nini lanini!’

20. Yiziphi izizatho ezinhle ezisenza sibe khona eSikhumbuzweni?

²⁰ Kungelani lokuthi silethemba lokuyaphila ezulwini kumbe elokuphila emhlabeni kuze kube nini lanini, sonke silezizatho ezinhle zokuba khona eSikhumbuzweni. Umnyaka ngamunye nxa sibuthana ndawonye ngelanga leSikhumbuzo siyabe sikhumbula ukufa komuntu esimthanda kakhulu, uJesu Khristu. Okuqakatheke kakhulu esikukhumbulayo ngelanga lelo luthando olukhulu uJehova asitshengisa lona ngokuthumela iNdodana yakhe ukuthi izosihlawulela. Esalonyaka iSikhumbuzo sizakwenziwa ngemva kokutshona kwelanga ngoLwesihlanu mhlaka 15 April. Siyamthanda uJehova leNdodana yakhe, yikho esikuqakathekisa kakhulu ngelanga uJesu afa ngalo yikuba khona eSikhumbuzweni.