1. Yibuphi ubunzima uDavida ayephakathi kwabo?

 UDAVIDA wayezulelwa ngamanqe. USawuli inkosi yako-Israyeli elamandla, yayifuna ukumbulala. Ngesikhathi uDavida ebaleka waphelelwa yikudla wasesiya edolobheni leNobi wafika wacela izinkwa ezinhlanu kuphela. (1 Sam. 21:1, 3) Ngokuhamba kwesikhathi yena lamadoda ayehamba lawo bacatsha ebhalwini. (1 Sam. 22:1) Kuyini okwabangela ukuthi uDavida abe sesimeni lesi?

2. Kuyini okubi okwenziwa nguSawuli? (U-1 Samuyeli 23:16, 17)

² USawuli wayelomhawu ngoDavida ngoba wayethandwa ngabantu abanengi futhi enqoba ezimpini ezinengi. USawuli wayekwazi ukuthi ukungalaleli kwakhe yikho okwabangela ukuthi uJehova angasabusekeli ubukhosi bakhe lokuthi uDavida nguye owayesekhethwe ukuthi abe yinkosi esikhathini esizayo. (Bala u-1 Samuyeli 23:16, 17.) Lanxa kunjalo uSawuli wayelokhu eyinkosi yako-Israyeli futhi wayelebutho elikhulu labasekeli abanengi. Yikho uDavida kwakumele abaleke ukuze angabulawa. Kambe uSawuli wayecabanga ukuthi wayengavimba inhloso kaJehova yokuthi uDavida abe yinkosi? (Isaya. 55:11) IBhayibhili alisitsheli lutho ngakho. Kodwa nanku esikwaziyo: USawuli wayezidonsela amanzi ngomsele. Phela labo abalwisana loJehova abakaze baphumelele!

3. Kuyini uDavida angazange akwenze lanxa wayesebunzimeni?

³ UDavida wayeyindoda ethobekileyo. Kazange azikhethele ukuba yinkosi yako-Israyeli. UJehova nguye owamkhethayo. (1 Sam. 16:1, 12, 13) USawuli wacina emzonda  kakhulu uDavida. Lanxa kunjalo uDavida kazange asole uJehova ngokuthi impilo yakhe yayisengozini njalo kazange akhonone ngokuthi wayehlala ebhalwini futhi elokudla okulutshwana. Kodwa kungenzakala ukuthi ngesikhathi ecatshe ebhalwini lolo yikho abhala khona ingoma yokudumisa emnandi elamazwi esihloko sethu athi: “Labo abamfunayo uJehova kabasweli lutho oluhle.”—Hubo. 34:10.

4. Yiphi imibuzo esizaxoxa ngayo futhi kungani iqakathekile?

⁴ Lezinsuku, izinceku zikaJehova ezinengi ziyake ziswele ukudla okwaneleyo loba ezinye izinto ezizidingayo. * Lokhu kwenzakale kakhulu ngesikhathi somkhuhlane we-COVID-19. Kanti njalo izinto zizakuba nzima kakhulu njengoba sesisondela ‘ekuhluphekeni okukhulu.’ (Mat. 24:21) Silalokho engqondweni asiphenduleni imibuzo emine elandelayo: Kungani uDavida wathi ‘wayengasweli lutho oluhle’? Kungani kumele sifunde ukusuthiseka ngalokho esilakho? Kungani singaqiniseka ukuthi uJehova uzasinakekela? Kanti njalo singenzani khathesi ukuze silungiselele okuzayo?

5-6. IHubo 23:1-6 lisinceda njani sizwisise ukuthi kungani uDavida wathi izinceku zikaNkulunkulu ‘kazisweli lutho oluhle’?

⁵ Amazwi kaDavida athi izinceku zikaJehova ‘kazisweli lutho oluhle’ atshoni? Singawazwisisa ngokuhlola amazwi akuHubo 23 ahambelana lawo. (Bala iHubo 23:1-6.) UDavida uqalisa iHubo leli ngamazwi athi: “UJehova ungumalusi wami, angiyikuswela.” Emavesini alandelayo uqamba izibusiso ezinengi azithola ngenxa yokwamukela uJehova njengoMalusi wakhe. Uthi uJehova uyamkhokhela “ezindleleni zokulunga” futhi uhlala emsekela ngezikhathi ezinhle langezikhathi ezinzima. UDavida uyavuma ukuthi lanxa ‘esemadlelweni aluhlaza’ kaJehova uzakwehlelwa zinhlupho. Kwezinye izikhathi  angadana kube sengathi udabula phakathi ‘kwesigodi sethunzi lokufa,’ njalo uzakuba lezitha. Kodwa ‘kayikwesaba okubi’ ngoba uJehova unguMalusi wakhe.

⁶ Nxa sikhangela esesixoxe ngakho, kungani uDavida wathi ‘kasweli lutho oluhle’? Ngenxa yokuthi wayelakho konke ayekudinga ukuze ahlale eseduze loJehova. Wayengadingi izinto ezinengi empilweni ukuze athokoze. Wayesuthiseka ngalokho ayekunikwa nguJehova. Okwakuqakatheke kakhulu kuye yikuthi uJehova wayembusisa futhi emvikela.

7. Ngokwalokho okutshiwo kuLukha 21:20-24, yibuphi ubunzima obehlela amaKhristu ayehlala eJudiya?

⁷ Amazwi kaDavida atshengisa ukuthi akumelanga siqakathekise kakhulu impahla esilayo. Siyakholisa ukuba lempahla kodwa akumelanga siphilele yona. AmaKhristu ayehlala eJudiya ngesikhathi sabaphostoli akuzwisisa lokho futhi kwakuqakathekile ukuthi enze njalo. (Bala uLukha 21:20-24.) UJesu wawaxwayisa ukuthi kwakuzafika isikhathi lapho idolobho laseJerusalema ‘elalizagonjolozelwa khona ngamabutho.’ Nxa lokhu kwasekusenzakala kwakumele ‘aqalise ukubalekela ezintabeni.’ Ukubaleka kwakuzakwenza amaKhristu lawo asinde kodwa ayezatshiya izinto ezinengi emuva. Eminyakeni edlulileyo enye iNqabayokulinda yathi: “Atshiya amasimu lemizi, kawazange athathe ngitsho lempahla yawo ezindlini. Ayeqiniseka ukuthi uJehova uzawavikela futhi awasekele yikho aqakathekisa ukumkhonza ukwedlula loba yini eyayingakhanya iqakathekile.”

8. Yisiphi isifundo esiqakathekileyo esingasithola kulokho okwenzakala kumaKhristu ayehlala eJudiya?

⁸ Yisiphi isifundo esiqakathekileyo esingasithola kulokho okwenzakala kumaKhristu ayehlala eJudiya? INqabayokulinda okukhulunywe ngayo kundima edlulileyo yathi: “Kungenzeka esikhathini esizayo sihlangane lezilingo ezizatshengisa ukuthi sizibona njani izinto esilazo; ukuthi yizo esiziqakathekisa ukwedlula loba yini kumbe siqakathekisa kakhulu ukusindiswa okuzatholwa yibo bonke abasekela uNkulunkulu. Nxa ukuphela sekufikile, singahlangana lobunzima njalo silahlekelwe yizinto esilazo. Kuzamele sizimisele ukwenza loba yini edingakalayo njengalokho okwenziwa ngamaKhristu akuqala abaleka esuka eJudiya.” *

9. Amazwi umphostoli uPhawuli awatshela amaHebheru akwenza uqiniseke ngani?

⁹ Kumele ukuthi kwakunzima kakhulu ukuthi amaKhristu lawo atshiye phose konke ayelakho ayeqalisa impilo entsha endaweni entsha. Kwakumele abe lokholo ukuze athembe uJehova ukuthi uzawancedisa athole lokho akudingayo. Kodwa kukhona okwakuzawanceda. Kusasele iminyaka emihlanu ukuthi amaRoma agombolozele iJerusalema, umphostoli uPhawuli wacebisa amaKhristu angamaHebheru wathi: “Indlela eliphila ngayo kayingabi ngeyokuthanda imali, kodwa suthisekani ngalokho elilakho, ngoba yena uthe: ‘Kangisoze ngikutshiye loba sekutheni, njalo kangisoze ngikulahle loba sekutheni.’ Ngakho siba lesibindi esikhulu sithi: ‘UJehova ungumsizi wami; kangisoze ngesabe. Kambe umuntu angangenzani?’” (Heb. 13:5, 6) Akuthandabuzwa ukuthi kwaba lula kulabo abalalela okwatshiwo nguPhawuli iJerusalema ingakagonjolozelwa ukuthi basuthiseke ngezinto ezilutshwana endaweni entsha. Babeqiniseka ukuthi uJehova  uzabanakekela. Amazwi akhulunywa nguPhawuli enza lathi siqiniseke ukuthi uJehova uzasinakekela.

10. Yiphi “imfihlo” uPhawuli asitshela yona?

¹⁰ UPhawuli wanika uThimothi iseluleko esifanana lesisanda kuxoxa ngaso futhi siyasebenza lakithi. Wambhalela wathi: “Ngakho nxa silokudla lokokugqoka sizasuthiseka ngezinto lezo.” (1 Tim. 6:8) Kambe lokhu kutsho ukuthi akumelanga sidle ukudla okumnandi, sibe lendawo enhle yokuhlala loba sithenge izigqoko ezintsha ngezinye izikhathi? Ayisikho okwakutshiwo nguPhawuli. Ayekutsho yikuthi kumele sisuthiseke ngalokho esilakho. (Flp. 4:12) Lokhu yikho athi ‘yimfihlo’ yakhe. Ubungane bethu loNkulunkulu buqakatheke ukwedlula loba yiphi impahla esilayo.—Hab. 3:17, 18.

11. Amazwi uMosi awatshela ama-Israyeli asifundisani ngokusuthiseka?

¹¹ UJehova uyakwazi esikudingayo futhi ngezinye izikhathi kungabe kutshiyene lalokho esicabanga ukuthi siyakudinga. Cabanga ngalokho uMosi akutshela ama-Israyeli ngemva kweminyaka engu-40 esenkangala. Wathi: “UJehova uNkulunkulu wenu uyibusisile imisebenzi yezandla zenu. Ulikhokhele kulo lonke uhambo lwenu phakathi kwenkangala enkulu kangaka. Iminyaka engamatshumi amane uJehova wenu ubelani, alizange liswele lutho.” (Dute. 2:7) Eminyakeni yonke leyo engu-40 uJehova wayenike ama-Israyeli  imana ukuthi adle. Zona kanye izigqoko asuka lazo eGibhithe azizange ziguge. (Dute. 8:3, 4) Lanxa amanye ayengacabanga ukuthi izinto lezi zazingenelanga, uMosi wawakhumbuza ukuthi ayelakho konke ayekudinga. UJehova uzathokoza nxa singafunda ukusuthiseka. Ufuna sibonge lezinto ezincane asinika zona futhi sizwisise ukuthi ziyizipho ezivela kuye.

12. Kuyini okutshengisa ukuthi uDavida wayethembe uJehova?

¹² UDavida wayekwazi ukuthi uJehova uthembekile lokuthi ulendaba sibili lalabo abamthandayo. Lanxa impilo yakhe yayisengozini ngesikhathi ebhala iHubo lesi-34, ukholo lwakhe lwaluqine okokuthi kwakungani uyayibona ‘ingilosi kaJehova imzungezile.’ (Hubo. 34:7) Kungenzeka uDavida wayefanisa ingilosi kaJehova lesotsha elihlala lilungele ukuhlasela nxa kungafika isitha. Lanxa uDavida wayeliqhawe lempi futhi ethenjiswe ubukhosi nguJehova, kazange athembe ubungcitshi bakhe bokusebenzisa isavutha kumbe inkemba ekulweni lesitha. (1 Sam. 16:13; 24:12) Wathemba uNkulunkulu njalo kazange athandabuze ukuthi ingilosi kaJehova ‘iyabakhulula labo abamesabayo.’ Lamuhla asikhangelelanga ukuthi uJehova asivikele ngendlela eyisimangaliso. Lanxa kunjalo, siyakwazi ukuthi bonke abamthembayo bazathola ukuphila okungapheliyo esikhathini esizayo lanxa bengafa.

13. Kuyini okungenza sikhanye singavikelekanga ngesikhathi uGogi waseMagogi esesihlasela? Kungani kungamelanga sesabe? (Khangela umfanekiso ongaphandle.)

¹³ Sekuseduze ukuthi kukhanye ukuthi simthemba kangakanani uJehova. Ngesikhathi izizwe ezimanyeneyo ezibizwa ngokuthi nguGogi waseMagogi zihlasela abantu bakaNkulunkulu kuzakhanya angathi selisitshonele emini. Kuzamele siqiniseke ukuthi uJehova uzasivikela. Izizwe zizasibona sinjengezimvu ezingelamuntu ongazivikela. (Hez. 38:10-12) Siyabe singelazikhali futhi singakufundelanga ukulwa. Izizwe zizabona angathi zizazithaphuzela nje. Ziyabe zingakwazi ukuthi izingilosi zikaJehova ziyabe zisizungezile zilungele ukusivikela. Thina siyakwazi lokho ngoba silokholo. Izizwe zona azilakholo kuNkulunkulu. Zizamangala amabutho asezulwini esesilwela.—Isam. 19:11, 14, 15.

14. Kuyini esingakwenza khathesi ukuze silungiselele okuzayo?

¹⁴ Kuyini esingakwenza khathesi ukuze silungiselele okuzayo? Okokuqala, akumelanga siqakathekise kakhulu impahla esilayo ngoba ngelinye ilanga kuzamele siyitshiye. Kumele sisuthiseke ngesilakho futhi siqakathekise kakhulu ubungane bethu loJehova. Nxa singaqhubeka sisibamazi kuhle uNkulunkulu wethu sizaqiniseka sibili ukuthi uzasivikela nxa sesihlaselwa nguGogi waseMagogi.

15. Kuyini okwenzakala kuDavida esesemncane okwenza waqiniseka ukuthi uJehova wayengasoze amdanise?

¹⁵ Asixoxeni ngokunye okwanceda uDavida okuzasinceda lathi ukuthi silungiselele ubunzima esizahlangana labo phambili. UDavida wathi: “Nambithani libone ukuthi uJehova ulungile; ubusisiwe umuntu ophephela kuye.” (Hubo. 34:8) Amazwi akhe enza sibone okwakusenza aqiniseke ukuthi uJehova uzamsekela. UDavida wayehlala ethembele kuJehova  njalo uNkulunkulu wakhe kazange amdanise. Esesemncane wajamelana lenkalakatha yendoda engumFilisti okwakuthiwa nguGoliyathi. Watshela isotsha lelo elalisesabeka wathi: “Lamhla uJehova uzakunikela kimi.” (1 Sam. 17:46) Ngokuhamba kwesikhathi uDavida wayesesebenzela iNkosi uSawuli eyazama kanengi ukumbulala. Kodwa “uJehova wayeloDavida.” (1 Sam. 18:12) UDavida wayeyibonile indlela uJehova ayemncedise ngayo. Yikho wayengathandabuzi ukuthi uzamncedisa nxa esebunzimeni.

16. Singabunambitha njani ubuhle bukaJehova?

¹⁶ Nxa singahlala sithembela kuJehova khathesi, sizaqiniseka sibili ukuthi uzasivikela esikhathini esizayo. Kumele sibe lokholo njalo sizimisele ukuthembela kuJehova ukuze senelise ukucela kumqhatshi wethu isikhathi sokungena umhlangano wesiqinti kumbe owesabelo, esokungena yonke imihlangano yebandla lesokutshumayela. Ake sithi umqhatshi wethu ayale besesiphelelwa ngumsebenzi. Silalo yini ukholo lokuthi uJehova kasoze asitshiye kumbe asilahle loba olokuthi uzahlala esinika izinto esizidingayo? (Heb. 13:5) Abanengi abasenkonzweni yesikhathi sonke bangasilandisela okwenzakala kibo okutshengisa ukuthi uJehova wabancedisa njani ngesikhathi beludinga kakhulu uncedo lwakhe. UJehova uthembekile.

17. Uthini umbhalo womnyaka ka-2022 futhi kungani ufanele?

¹⁷ Asikwesabi okuzayo ngoba uJehova ulathi. UNkulunkulu wethu kasoze asitshiye loba sekutheni nxa singaqakathekisa ukwenza intando yakhe ukwedlula loba yini. Ukuze sihlale sikhumbula ukuthi kumele silungiselele khathesi ubunzima obuzayo njalo siqiniseke ukuthi uJehova kasoze asitshiye, iQula Elibusayo likhethe iHubo 34:10 ukuthi libe ngumbhalo wethu womnyaka ka-2022: “Labo abamfunayo uJehova kabasweli lutho oluhle.”