1-2. Yibuphi ubunzima izinceku zikaJehova ezithembekileyo ezingahlangana labo?

 KWEZINYE izikhathi singehlelwa yibunzima obungatshintsha impilo yethu ngokucwayiza kwelihlo nje. Ngokwesibonelo, omunye umzalwane othembekileyo okuthiwa nguLuis a wabanjwa umkhuhlane we-cancer. Udokotela wamtshela ukuthi wayesalelwe zinyanga ezilutshwana ephila. Omunye udadewethu okuthiwa nguMonika lomkakhe babekhuthele emisebenzini ephathelane lokukhonza. Ngelinye ilanga uMonika wezwa ukuthi kwasekulesikhathi umkakhe owayengumdala esenza isono efihla. Omunye udadewethu ongatshadanga okuthiwa ngu-Olivia wasuka endlini yakhe ngenxa yokuthi kwakulesiphepho esilolaka esasizahlasela indawo ayehlala kuyo. Wathi ephenduka wathola ukuthi isiphepho sasesidilize indlu yakhe. Impilo zabazalwane laba zatshintsha ngesikhatshana nje. Okwenzakala kubo kwake kwenzakala lakuwe yini? Wake wehlelwa yibunzima obatshintsha impilo yakho ngokuphangisa yini?

² Lanxa sikhonza uJehova sithembekile siyake sehlelwe yibunzima kumbe sigule njengabantu bonke nje. Ngezinye izikhathi singahlukuluzwa kumbe sihlaselwe yizitha zabantu bakaNkulunkulu. Lanxa uJehova engasivikeli ebunzimeni lobu, uthembisa ukuthi uzasincedisa. (Isaya. 41:10) Nxa uJehova esincedisa siyenelisa ukuhlala sithokoza, sisenza izinqumo ezinhle futhi siqhubeke sithembekile kuye lanxa siphakathi  kobunzima. Esihlokweni lesi sizaxoxa ngezindlela ezine uJehova asincedisa ngazo nxa sisebunzimeni. Sizaphinda sibone ukuthi kumele senzeni ukuze asincedise.

UJEHOVA UZAKUVIKELA

3. Kuyini okungaba nzima nxa kungenzakala into esiqeda amandla?

³ Ubunzima. Nxa singehlelwa luhlupho kungaba nzima ukuthi sicabange kuhle futhi senze izinqumo ezinhle. Ngenxa yani? Inhliziyo yethu ingabe ibuhlungu kakhulu futhi singabe sikhathazeke kakhulu. Singezwa angathi silahlekile, siswele lokuthi sibambe ngaphi. Nanzelela ukuthi odadewethu ababili bezwa njani ngesikhathi bephakathi kobunzima. U-Olivia uthi: “Isiphepho sathi sesidilize indlu yami kwakungathi ngilahlekile futhi ngangikhathazeke kakhulu.” UMonika yena nxa ekhuluma ngendlela umkakhe amzwisa ngayo ubuhlungu uthi: “Ngiyehluleka lokuchaza indlela engadana ngayo. Kwakungathi ngigwaziwe, kunzima lokuthi ngenze imisebenzi yansuku zonke. Kwenzakala into engangingakaze ngicabange lokuthi ingenzakala kimi.” UJehova uthembisa ukuthi uzasinceda njani nxa kungenzakala into esiqeda amandla?

4. UFiliphi 4:​6, 7 uthi uJehova uzasincedisa njani?

⁴ Indlela uJehova asincedisa ngayo. Uthembisa ukusinika lokho iBhayibhili elikubiza ngokuthi ‘yikuthula kukaNkulunkulu.’ (Bala uFiliphi 4:​6, 7.) Ukuthula kukaNkulunkulu kutsho ukuhlaliseka engqondweni lasenhliziyweni umuntu akuthola nxa engumngane wakhe. Ukuthula lokhu ‘kwedlula konke ukuzwisisa’ njalo kuligugu ukwedlula loba yini esingayicabanga. Uyake uzizwe uhlalisekile yini ngemva kokukhuleka kuJehova ngenhliziyo yonke? Nxa usuhlalisekile uyabe ‘usulokuthula kukaNkulunkulu.’

5. Ukuthula kukaNkulunkulu kuzilinda njani ingqondo zethu lenhliziyo zethu?

⁵ Ivesi le iphinda ithi ukuthula kukaNkulunkulu “kuzalinda” kumbe kuvikele “izinhliziyo zenu lengqondo zenu.” Ibala elithi ‘ukulinda’ lalisetshenziswa esisotsheni nxa kukhulunywa ngamasotsha alinda idolobho futhi alivikele nxa selihlaselwa. Abantu ababehlala edolobheni elilindiweyo babezilalela ngokuthula ngoba bekwazi ukuthi kulamasotsha alindileyo emagedini. Ngendlela efananayo nxa ukuthula kukaNkulunkulu kulinde inhliziyo zethu lengqondo zethu siyahlaliseka ngoba siyabe sikwazi ukuthi sivikelekile. (Hubo. 4:8) Lanxa okusithwalise nzima kungeke kuphele masinyane nje, lathi singahlaliseka njengoHana. (1 Sam. 1:​16-18) Izikhathi ezinengi nxa sihlalisekile kuba lula ukuthi sicabange kuhle lokuthi senze izinqumo ezinhle.

6. Kumele senzeni ukuze sithole ukuthula kukaNkulunkulu? (Khangela lomfanekiso.)

 ⁶ Okumele sikwenze. Nxa kulento ekukhathazayo cela ukuthi uJehova akulinde. Njani? Khuleka uze ube lokuthula kukaNkulunkulu. (Luk. 11:9; 1 Thes. 5:17) ULuis esike saxoxa ngaye uyasichasisela ukuthi yena lomkakhe u-Ana kuyini okwabancedayo ngesikhathi besizwa ukuthi wayesesalelwe yizinyanga ezilutshwane ukuthi afe. Uthi: “Ngesikhathi leso kwakunzima kakhulu ukuthi senze izinqumo ezimayelana lokwelatshwa, lokunye nje empilweni. Kodwa ukuthandaza kwasinceda kakhulu ukuthi sibe lokuthula esikhathini lesi esasinzima.” ULuis lomkakhe bathi bathandaza ngenhliziyo yonke, futhi bathandaza kanengi becela ukuthi uJehova abenze bahlaliseke, abanike ukuthula kanye lokuhlakanipha ukuze benze izinqumo ezinhle. Lakanye bakubona ukuthi wayebancedisa. Nxa lawe uphakathi kobunzima phikelela ekuthandazeni njalo lokhu kuzakunceda ukuthi ube lokuthula kukaJehova okuzalinda inhliziyo yakho lengqondo yakho.—Rom. 12:12.

UJEHOVA UZAKWENZA UHLALISEKE

7. Singazizwa njani nxa siphakathi kobunzima?

⁷ Ubunzima. Nxa siphakathi kobunzima, indlela esizizwa ngayo lemicabango yethu kanye lalokho esikwenzayo kungatshintsha. Indlela esizizwa ngayo ingatshintshatshintsha njengomkhumbi ophoselwa le lale ngamagagasi. U-Ana esike sakhuluma ngaye uthi ngemva kokufa kukaLuis indlela ayezizwa ngayo yayitshintshatshintsha. Wathi: “Kwezinye izikhathi ngangihlulukelwa ngize ngibone angathi umhlaba ungihlanekele. Kwakuke kungizondise ukucabanga ukuthi wayengasekho.” U-Ana wayeke abe lesizungu futhi kwakumthwalisa nzima ukwenza izinqumo ezimayelana lezinto ezazisenziwa nguLuis engakafi. Wayeke azizwe angani uselwandle olulesiphepho. UJehova usincedisa njani nxa sithwele nzima?

8. UJehova usiqinisekisa ngani ku-Isaya 33:6?

⁸ Indlela uJehova asincedisa ngayo. Uthembisa ukuthi uzasenza sihlaliseke. (Bala u-Isaya 33:6.) Nxa kungaba lesiphepho elwandle, umkhumbi ungaqalisa ukunyikinyeka usiyale lale. Okuncedayo yikuthi imikhumbi eminengi ilezinto ezisemaceleni eziyibambayo ukuthi inganyikinyeki kakhulu. Lokhu kwenza abantu abasemkhunjini bavikeleke futhi bahlaliseke. Lanxa kunjalo izinto lezo ezibamba umkhumbi zisebenza kuhle nxa umkhumbi uhamba. Ngendlela efananayo uJehova uzasenza sihlaliseke nxa singaqhubeka sithembekile ngezikhathi zobunzima.

9. Amabhuku ethu okuchwayisisa angasinceda njani ukuthi singakhathazeki kakhulu nxa sisebunzimeni? (Khangela lomfanekiso.)

 ⁹ Okumele sikwenze. Nxa ungazithola usukhathazeke kakhulu, yenza okusemandleni akho ukuthi uqhubeke usenza izinto eziphathelane lokukhonza. Lanxa ungasoze wenelise ukwenza lokho owawukwenza kudala khumbula ukuthi uJehova uyazwisisa. (Khangela loLukha 21:​1-4.) Okunye ongakwenza yikuzinika isikhathi sokutaditsha lokucabangisisa. Kuzakunceda ngani lokho? UJehova usebenzisa inhlanganiso yakhe ukuthi asinike amavidiyo lezihloko ezingasinceda ukuthi sihlaliseke nxa siphakathi kobunzima. Ukuze uthole okungakunceda ungasebenzisa izinto zokuchwayisisa ezikhona ngolimi lwakho, ngokwesibonelo iJW Library^®, le-Bhuku Lokuchwayisisa LaboFakazi BakaJehova kanye le-Watch Tower Publications Index. UMonika esike sakhuluma ngaye uthi wayesebenzisa izinto lezi zokuchwayisisa ukuze athole amacebo angamnceda nxa wayesekhulelwa yikukhathazeka. Ngokwesibonelo wayeke adinge izihloko ezikhuluma ngokuzonda. Kwezinye izikhathi wayedinga izihloko ezikhuluma ngokungathembeki kwabantu abatshadileyo. Wayebala aze azizwe esengcono. Uthi: “Ngangiqalisa ukuchwayisisa ngikhathazeke kakhulu kodwa nxa ngangiqhubeka ngibala ngangisizwa angani uJehova uyangigona. Ukubala kwangenza ngananzelela ukuthi uJehova wayeyizwisisa indlela engangizizwa ngayo njalo wayengincedisa.” Nxa uJehova esekuncedise njalo, usala ungasakhathazekanga kakhulu futhi uhlalisekile.—Hubo. 119:​143, 144.

UJEHOVA UZAKUSEKELA

10. Singezwa njani nxa sisanda kwehlelwa yibunzima?

¹⁰ Ubunzima. Nxa sisanda kwehlelwa yibunzima kungaba lamalanga lapho esiyabe sizizwa singelamandla futhi sikhathazekile. Singazizwa njengomuntu owayelejubane kodwa abeselimala ahambe eqhula. Kungasithwalisa nzima ukwenza izinto esasizenza lula kuqala kumbe singezwa kungatsho ukuthi senze izinto esasizikholisa. Njengo-Elija, lathi singaswela amandla okuvuka sizwe kusithi silale kuphela. (1 Amakho. 19:​5-7) UJehova uthembisa ukuthi uzasincedisa njani nxa singaphela amandla?

11. Yiphi eyinye indlela uJehova asincedisa ngayo? (IHubo 94:18)

¹¹ Indlela uJehova asincedisa ngayo. Uthembisa ukuthi uzasisekela. (Bala iHubo 94:18.) Nxa umuntu ogijimayo angalimala uyabe  esedinga ukuncediswa ukuze ahambe. Yikho lathi singadinga ukuncediswa ukuze siqhubeke sikhonza uJehova. Nxa siphakathi kobunzima uJehova uyasiqinisekisa ngamazwi la: “Mina Jehova, uNkulunkulu wakho, ngibambe isandla sakho sokudla, ngithi kuwe, ‘Ungesabi. Ngizakunceda.’” (Isaya. 41:13) INkosi uDavida yakubona ukuthi uJehova wayeyincedisa. Ngesikhathi iphakathi kobunzima, lezitha ziyihlasela yathi kuJehova: “Isandla sakho sokudla siyangisekela.” (Hubo. 18:35) UJehova usisekela njani?

12. Ngobani uJehova angabasebenzisa ukuze basincedise nxa sisebunzimeni?

¹² Izikhathi ezinengi uJehova usebenzisa abanye ukuthi basincedise. Ngokwesibonelo, ngesikhathi uDavida esebunzimeni umngane wakhe uJonathani wamvakatshela wafika wamqinisa futhi wamkhuthaza. (1 Sam. 23:​16, 17) UJehova waphinda wasebenzisa u-Elisha ukuthi ancede u-Elija. (1 Amakho. 19:​16, 21; 2 Amakho. 2:2) Lamuhla uJehova angasebenzisa imuli, abangane kumbe abadala bebandla ukuze basisekele. Kodwa nxa kulento esikhathazayo kwezinye izikhathi siyabe singafuni ukuba sebantwini futhi kujayelekile ukuthi umuntu azizwe njalo. Manje singenzani ukuze uJehova asincedise?

13. Kumele senzeni ukuze uJehova asisekele? (Khangela lomfanekiso.)

¹³ Okumele sikwenze. Zama ngamandla ukuthi ungazehlukanisi labanye. Nxa singazehlukanisa labanye sicina sicabanga ngathi lenhlupho zethu kuphela, singasabi lendaba labanye. Lokhu kungenza kube nzima ukuthi senze izinqumo ezinhle. (Zaga. 18:1) Khona akukubi ukuthi sifune ukuba sodwa ikakhulu nxa kulento esithwalise nzima. Kodwa nxa singazehlukanisa labanye okwesikhathi eside singacina singasalutholanga usizo ebesingaluphiwa nguJehova esebenzisa abanye. Lanxa isimo sakho singaba nzima njani, vuma ukuncediswa ngabemuli yakho labangane kanye labadala bebandla. Nanzelela ukuthi uJehova usebenzisa bona ukuze akusekele.—Zaga. 17:17; Isaya. 32:​1, 2.

UJEHOVA UZAKUDUDUZA

14. Yiziphi izinto ezingenza sesabe ezingasehlela?

¹⁴ Ubunzima. Ngezinye izikhathi singazizwa sisesaba. EBhayibhilini kulezinceku zikaJehova ezazithembekile ezakhuluma ngendlela ezazikhathazeke ngayo lendlela ezazisesaba ngayo ngenxa yezitha zazo kumbe okunye okwakuzithwalise nzima. (Hubo. 18:4; 55:​1, 5) Lathi singabe sithwaliswe nzima ngabanye  esikolo, emsebenzini, emulini loba sihlukuluzwa ngohulumende. Ukuphila kwethu kungabe kusengozini ngenxa yomkhuhlane esilawo. Ezikhathini lezo ezinzima singazibona sinjengomntwana omncane, kungelalutho esingazinceda ngalo. Manje uJehova usincedisa njani?

15. IHubo 94:19 lithi uJehova uzasenzelani?

¹⁵ Indlela uJehova asincedisa ngayo. Uyasiduduza asenze sizizwe ngcono. (Bala iHubo 94:19.) Ihubo leli lingasenza sicabange ngomntwana omncane owesabayo aze ehluleke lokulala ngenxa yesiphepho esilomdumo omkhulu. Uyise uyamlanda afike amphathe aze alale. Lanxa isiphepho silokhu sikhona uzizwa evikelekile nxa ephethwe nguyise. Nxa singehlelwa yibunzima obusenza sesabe siyabe sifuna kube angathi uBaba wethu osezulwini usiphethe engalweni zakhe size sizizwe sihlalisekile. Singenzani ukuze siduduzwe nguJehova?

16. Singenzani ukuze uJehova asiduduze? (Khangela lomfanekiso.)

¹⁶ Okumele sikwenze. Hlala uzinika isikhathi sokukhuluma loJehova ngokuthandaza kuye langokubala iLizwi lakhe. (Hubo. 77:​1, 12-14) Nxa ungenza njalo into yokuqala ozayicabanga nxa ungaba lohlupho yikuthandaza kuYihlo osezulwini. Tshela uJehova lokho okwesabayo lalokho okukuhluphayo. Mvumele ukuthi akhulume lawe futhi akududuze ngeMibhalo. (Hubo. 119:28) Ungathola ukuthi kulezinye ingxenye zeMibhalo ezingakududuza kakhulu nxa usesaba. Ngokwesibonelo ungathola amavesi angakukhuthaza ebhukwini likaJobe, kumaHubo, kuZaga kanye lasemazwini kaJesu atholakala kuMathewu isahluko 6. Nxa ungathandaza kuJehova futhi ubale iLizwi lakhe uzayithola induduzo evela kuye.

17. Kuyini esingakuthandabuziyo?

¹⁷ Asithandabuzi ukuthi uJehova uzahlala esisekela ngezikhathi ezinzima. Kasoze asitshiye sodwa. (Hubo. 23:4; 94:14) UJehova uthembisa ukuthi uzasivikela, asenze sihlaliseke, asisekele njalo asiduduze. U-Isaya 26:3 uthi ngoJehova: “Labo abathembela kuwe ngokupheleleyo uzabagcina, uzabanika ukuthula okungapheliyo, ngenxa yokuthi bayakuthemba.” Yikho thembela kuJehova futhi wenze konke okusemandleni akho ukuthi uthole uncedo lwakhe. Nxa ungenza njalo uzakuba lamandla lanxa uphakathi kobunzima.