1. Kusinceda ngani ukuba khona eSikhumbuzweni sokufa kukaKhristu esenziwa minyaka yonke?

 AKULAMBUZO ukuthi inhlawulo iyisipho esiligugu kulazo zonke esasiphiwa nguNkulunkulu. (2 Khor. 9:15) Phela siyenelisa ukuba ngabangane bakaJehova uNkulunkulu ngenxa yokuthi uJesu wanikela ngokuphila kwakhe. Kanti njalo siyenelisa ukuphila kuze kube nini lanini ngenxa yenhlawulo. Kumele simbonge sibili uJehova ngoba uthando lwakhe yilo olwenza wasinika inhlawulo. (Rom. 5:8) UJesu wasungula iSikhumbuzo sokufa kwakhe esisenza minyaka yonke ukuze asincede sihlale sikhumbula ukuthi inhlawulo iqakathekile lokuthi sitshengise ukuthi siyabonga.—Luk. 22:​19, 20.

2. Sizaxoxa ngani esihlokweni lesi?

² Lonyaka iSikhumbuzo sizaba khona ngoMgqibelo mhlaka 12 April. Akuthandabuzwa ukuthi sonke sizenza okusemandleni ethu ukuthi sibe khona. Kuzasinceda kakhulu ukuthi nxa sekusele amaviki ukuthi iSikhumbuzo sifike lalapho sesidlulile, sizinike isikhathi sokucabangisisa a ngalokho uJehova loJesu abasenzele khona. Esihlokweni lesi sizaxoxa ngokuthi inhlawulo isifundisani ngoJehova langeNdodana yakhe. Isihloko esilandelayo sizasinceda sizwisise ukuthi inhlawulo ingasinceda njani lokuthi singatshengisa njani ukuthi siyabonga ngalokho uJehova loJesu abasenzele khona.

INHLAWULO ISIFUNDISANI NGOJEHOVA?

3. Ukufa komuntu oyedwa kwakungawakhulula njani amamiliyoni abantu? (Khangela lomfanekiso.)

³ Inhlawulo isifundisa ukuthi uJehova wahlulela kuhle lokuthi indlela zakhe zilungile. (Dute. 32:4) Kungani sisitsho njalo? Cabanga ngalokhu: Sonke silesono esasithatha ku-Adamu ngenxa  yokungalaleli kwakhe futhi yiso esibangela ukufa. (Rom. 5:12) UJehova wathuma uJesu ukuthi asihlawulele ukuze sikhululwe esonweni lasekufeni. Kodwa umhlatshelo womuntu oyedwa ongelasono wawungawahlenga njani amamiliyoni abantu? Umphostoli uPhawuli wathi: “Njengoba nje abanengi benziwa baba yizoni ngokungalaleli komuntu oyedwa [u-Adamu], abanengi kuzathiwa balungile ngokulalela komuntu oyedwa [uJesu].” (Rom. 5:19; 1 Thim. 2:6) Ukungalaleli komuntu oyedwa owayengelasono yikho okwabangela ukuthi sibe lesono futhi sife. Kodwa umuntu oyedwa ongelasono owalalelayo wenza sakhululwa esonweni lasekufeni.

4. Kungani kwakungasoze kuvume ukuthi uJehova angenzi lutho ngesono esasenziwe ngu-Adamu?

⁴ Sasikhona yini isidingo sokuthi uJesu afe ukuze thina sisindiswe? Phela uJehova wayengakhetha ukuthi abantwana baka-Adamu abalalelayo baphile phakade. Thina abantu singacabanga ukuthi le kwakuyindlela engcono yokuthi uJehova alungise uhlupho olwaselukhona. Kodwa aluba uJehova kazange amjezise u-Adamu kwakuzakhanya angani kahluleli kuhle. Phela yena uhlala esenza okuqondileyo, yikho wayengeke aphonguyekela u-Adamu yena enze isono esikhulu.

5. Kuyini okwenza singathandabuzi ukuthi uJehova uzahlala esenza okuqondileyo?

⁵ Kwakuzahamba njani aluba uJehova wayekela ukwenza izinto ngendlela eqondileyo, wavumela ukuthi abantwana baka-Adamu baphile kuze kube nini lanini kungelanhlawulo eyabhadalwayo? Abantu babezacabanga ukuthi uNkulunkulu kahluleli kuhle ngazo zonke izikhathi njalo babengasoze bayithembe indlela enza ngayo izinto. Babengazibuza ukuthi pho uNkulunkulu uzakwenza yini konke akuthembisileyo. Kodwa akumelanga sikhathazeke ngokuthi mhlawumbe uNkulunkulu kasoze ahlulele kuhle ngazo zonke izikhathi kumbe ukuthi kasoze agcwalise ezinye izithembiso zakhe ngoba wanikela ngeNdodana yakhe eligugu ukuze asihlawulele. Khonokho kwenza siqiniseke ukuthi uzahlala esenza okuqondileyo.

6. Kuyini okunye okwenza uJehova wasinika inhlawulo? (U-1 Johane 4:​9, 10)

⁶ Sesibonile sibili ukuthi inhlawulo itshengisa ukuthi uJehova uhlala esahlulela kuhle. Kodwa akupheleli khonapho, iphinda isincedise sizwisise ukuthi uJehova uyasithanda kakhulu. (Joh. 3:16; bala u-1 Johane 4:​9, 10.) Inhlawulo itshengisa ukuthi uJehova ufuna sithole ukuphila okungapheliyo futhi siphinde sibe ngamalunga emuli yakhe. Cabanga ngalokhu: Ngemva kokona kuka-Adamu, uJehova wamsusa emulini yezikhonzi zakhe. Lokhu kwenza lathi sazalwa singekho emulini kaNkulunkulu. Lanxa kunjalo, uJehova uyasithethelela izono zethu ngenxa yokuthi uJesu wasifela njalo  bonke abatshengisa ukuthi balokholo labamlalelayo bazakuba ngamalunga emuli yakhe esikhathini esizayo. Kodwa kulesisikhathi uJehova uyasithethelela izono zethu futhi lokhu kwenza sibe ngabangane bakhe labangane babafowethu labodadewethu. Kuyazicacela sibili ukuthi uJehova kasithontisi!—Rom. 5:​10, 11.

7. Ukuvumela kukaJehova ukuthi uJesu ahlupheke kusifundisani ngaye?

⁷ Okungasinceda sizwisise ukuthi uJehova usithanda kangakanani yikucabangisisa ngobuhlungu abuzwayo ngesikhathi ebona iNdodana yakhe iphathwa kubi. USathane uthi nxa inceku kaNkulunkulu ingaba sebunzimeni ngeke iqhubeke iqotho kuye. UJehova wavumela ukuthi iNdodana yakhe ithwale nzima ingakabulawa ukuze kukhanye ukuthi uSathane wayeqamba amanga. (Jobe. 2:​1-5; 1 Phet. 2:21) UJehova wayeyikhangele iNdodana yakhe ngesikhathi ichothozwa ngabakhokheli benkolo ababeyizonda, ibhaxabulwa ngamasotsha, lalapho ibethelwa esigodweni sokuhlutshwa. UJehova wayeyikhangele iNdodana yakhe ayithandayo isifa kabuhlungu. (Mat. 27:​28-31, 39) Phela uJehova wayengakuvimbela konke lokhu. Ngokwesibonelo, ngesikhathi izitha zikaJesu zisithi: ‘UNkulunkulu kamkhulule phela nxa kuyikuthi uyamthanda,’ uJehova wayengahle akwenze khonalokho. (Mat. 27:​42, 43) Kodwa aluba wamvikela uJesu, akulanhlawulo eyayizabhadalwa njalo sasizaqhubeka singelathemba. Yikho uJehova wavumela ukuthi iNdodana yakhe ihlupheke kuze kube sekufeni.

8. Sikwazi njani ukuthi uJehova wezwa ubuhlungu ngesikhathi ebona iNdodana yakhe ihlupheka? (Khangela lomfanekiso.)

⁸ Akumelanga sizitshele ukuthi uJehova kezwa ubuhlungu ngenxa yokuthi unguSomandla. Phela lathi siyabuzwa ubuhlungu ngenxa yokuthi sadalwa ngomfanekiso wakhe. IBhayibhili lisitshela ukuthi abantu bakhe bake “bamzwisa ubuhlungu.” (Hubo. 78:​40, 41) Ake sixoxe ngendaba ka-Abrahama lo-Isaka. UNkulunkulu wacela ukuthi u-Abrahama anikele ngeNdodana yakhe ezelwe yodwa. (Gen. 22:​9-12; Heb. 11:​17-19) Ucabanga ukuthi u-Abrahama wezwa njani sekumele agwaze umntanakhe ngengqamu? Manje uJehova yena wezwa njani ngesikhathi ebona iNdodana yakhe ihlukuluzwa kabuhlungu futhi ibulawa ngabantu abayizitha zikaNkulunkulu? Kumele ukuthi lokho kwamzwisa ubuhlungu obukhulu kakhulu obedlula obazwiwa ngu-Abrahama!—Bukela ividiyo ethi Lingisela Ukholo Lwabo—U-Abrahama, Ingxenye 2 ku-jw.org.

9. URoma 8:​32, 38, 39 ukunceda njani uzwisise ukuthi uJehova uyakuthanda kakhulu wena, labafowenu labodadewenu?

⁹ Inhlawulo iphinde isifundise ukuthi akulamuntu osithanda njengoJehova, okwala zona izihlobo zethu kumbe abangane. (Bala uRoma 8:​32, 38, 39.) Asithandabuzi ngitsho lakancane  ukuthi uJehova usithanda ukwedlula indlela thina esizithanda ngayo. Uyafuna yini ukuphila kuze kube nini lanini? Ungathandabuzi ukuthi uJehova ufuna uphile kuze kube nini lanini ukwedlula indlela wena ongakufisa ngayo lokho. Uyafuna yini ukuthethelelwa izono zakho? Qiniseka ukuthi uJehova uyafuna ukukuthethelela ukwedlula indlela wena ongakufisa ngayo lokho. Yena akufunayo nje kithi yikuthi sitshengise ukuthi siyabonga ngalokho asenzele khona ngokuba lokholo lokumlalela. Indlela enkulu uJehova atshengise ngayo ukuthi uyasithanda kakhulu yikusinika inhlawulo. Kanti njalo emhlabeni omutsha sizafunda ezinye izinto ezinengi ezitshengisa ukuthi uJehova uyasithanda.—Umtshu. 3:11.

INHLAWULO ISIFUNDISANI NGOJESU?

10. (a) Kuyini okwakumzwisa ubuhlungu uJesu? (b) UJesu walilwela njani ibizo likaJehova? (Khangela ibhokisi elithi “ UJesu Walilwela Njani Ibizo LikaJehova?”)

¹⁰ UJesu kafuni ukuthi abantu bakhulume kubi ngebizo likaYise. (Joh. 14:31) UJesu wetheswa icala lokuthethisa uNkulunkulu lokuvukela umbuso. Lokhu kwakumzwisa ubuhlungu kakhulu ngoba kwakungangcolisa ibizo likaYise. Yikho wathandaza wathi: “Baba, nxa kungenzeka, vumela inkomitsho le yedlule kimi.” (Mat. 26:39) UJesu walilwela ibizo likaYise ngoba waqhubeka eqotho waze wafa.

11. UJesu watshengisa njani ukuthi wayebathanda kakhulu abantu? (UJohane 13:1)

¹¹ Inhlawulo iphinde isifundise ukuthi uJesu uyabathanda kakhulu abantu, ikakhulu abalandeli bakhe. (Zaga. 8:31; bala uJohane 13:1.) UJesu wayekwazi ukuthi ezinye izinto okwakumele azenze emhlabeni zazizabe zinzima kakhulu, ngokwesibonelo kwakumele afe kabuhlungu. Lanxa kunjalo, konke ayekwenza ngesikhathi esemhlabeni wayekwenza ngenhliziyo yonke ngenxa yokuthi wayebathanda abantu. Umsebenzi wokutshumayela lowokufundisa wayewenza  ngenhliziyo yonke futhi wayebancedisa abantu ngoba ebathanda. Langelanga abulawa ngalo wagezisa abaphostoli bakhe inyawo, wazinika isikhathi sokubakhuthaza lokubaduduza. (Joh. 13:​12-15) Ngesikhathi elengiswe esigodweni wazinika isikhathi sokukhuluma lesigebenga esasibethelwe eceleni kwakhe, wasinika ithemba njalo wahlela lokuthi ngubani ozasala egcine unina. (Luk. 23:​42, 43; Joh. 19:​26, 27) Kuyacaca ukuthi uJesu wayebathanda kakhulu abantu okwempilo yakhe yonke futhi lokhu wakutshengisa langokubafela.

12. Kuyini uJesu asenzela khona khathesi?

¹² Lanxa uKhristu wasifela “kanye kuphela,” kunengi alokhu esenzela khona. (Rom. 6:10) Wenzani? UJesu lokhu esebenza nzima ukuze sithole izibusiso ezinengi eziba khona ngenxa yenhlawulo. Ngokwesibonelo uyiNkosi yethu, unguMphristi Omkhulu futhi uyinhloko yebandla. (1 Khor. 15:25; Efe. 5:23; Heb. 2:17) Nguye okhokhela umsebenzi wokuqoqa amaKhristu agcotshiweyo kanye labexuku elikhulu futhi umsebenzi lo kumele uphele ukuhlupheka okukhulu kungakapheli. b (Mat. 25:32; Mak. 13:27) Kanti njalo uba leqiniso lokuthi abantu bakaJehova bayakuthola konke okubanceda baqinise ukholo lwabo ezinsukwini lezi zokucina. (Mat. 24:45) Langesikhathi esebusa okweminyaka eyinkulungwane uzaqhubeka esenzela izinto ezinengi ezinhle. UJehova wanikela ngeNdodana yakhe ukuze isincede sibili!

QHUBEKA UFUNDA IZINTO EZINTSHA

13. Ungenzani ukuze uqhubeke ufunda okunengi ngoNkulunkulu loKhristu?

¹³ Nxa ungaqhubeka ucabangisisa ngothando lukaJehova uNkulunkulu loKhristu uJesu, ungafunda izinto ezinengi. Mhlawumbe ngesikhathi ulungiselela iSikhumbuzo salonyaka ungabala amaVangeli uzinika isikhathi sokuchwayisisa ngawo. Ungabaleli ukuqeda, kodwa wathathe kancane kancane udinge izinto ezinengi ezisitshengisa ukuthi uJehova loJesu bayasithanda. Kanti njalo ungayekeli ukutshela abanye lokho oyabe ukufundile.

14. Ukudingisisa ngalokho okubalayo kuzakunceda njani ukuthi ufunde okunengi ngenhlawulo langezinye imfundiso? (IHubo 119:97) (Khangela lomfanekiso.)

¹⁴ Nxa usuleminyaka eminengi ukhonza uJehova ungazibuza ukuthi kukhona yini okutsha ongakufunda ngokwahlulela okuhle kukaNkulunkulu, ngothando lwakhe langenhlawulo. Iqiniso yikuthi ukufunda akupheli, kunengi ongakufunda ngezinto lezi. Manje ungenzani ukuze  wengezelele ulwazi lwakho? Hlala ubala izinto ezinengi ezisekelwe eBhayibhilini esizifunda emabhukwini ethu. Nxa ungatshayisana lokunye ongakuzwisisiyo zama ukudingisisa ngakho, ubusuzinika isikhathi sokucabangisisa ngalokho okutholileyo. Mhlalokho zama ukutshona ucabangisisa ngokuthi kukutshelani ngoJehova langeNdodana yakhe langendlela abakuthanda ngayo.—Bala iHubo 119:97 lamabala angaphansi.

15. Kungani kumele siqhubeke sidinga amagugu aseBhayibhilini?

¹⁵ Ungakhalali nxa kuyikuthi uthe ubala kumbe uchwayisisa wangatholi lutho olutsha. Ukubala singakufanisa lokugebha igolide. Izikhathi ezinengi umuntu odinga igolide kuyabe kumele abekezele ngoba kungathatha amahora amanengi kumbe amalanga amanengi ukuthi athole igolide elincane nje. Kodwa kakhalali, uyaqhubeka egebha ngoba igolide liqakathekile kuye lanxa angaze athole elincane kangakanani. Ngakho yonke into entsha esiyifunda eBhayibhilini iqakatheke kakhulu ukwedlula igolide. (Hubo. 119:127; Zaga. 8:10) Yikho bekezela, ungakhalali ukubala iBhayibhili.—Hubo. 1:2.

16. Singamlingisela njani uJehova loJesu?

¹⁶ Nxa ubala zama ukukhangela ukuthi ungakusebenzisa njani lokho okufundayo. Ngokwesibonelo nxa ungafunda ngokuthi uJehova wahlulela kuhle, zama ukumlingisela ngokuphatha kuhle bonke abantu. Nxa ungafunda ngendlela uJesu ayethanda ngayo uYise kanye labantu ungamlingisela ngokuzimisela ukulwela ibizo likaJehova lanxa kunzima. Okunye ongakwenza yikuzama ngazo zonke indlela ukuthi uncedise abafowenu labodadewenu. Kanti njalo lingisela uJesu ngokutshumayeza abanye ukuze labo bafunde ngenhlawulo, isipho esihle kulazo zonke esisiphiwe nguJehova.

17. Sizaxoxa ngani esihlokweni esilandelayo?

¹⁷ Nxa singaqhubeka sifunda okunengi ngenhlawulo sizamthanda kakhulu uJehova leNdodana yakhe. Kanti njalo labo bazaqhubeka besithanda. (Joh. 14:21; Jak. 4:8) Ngakho kasiqhubekeni sikusebenzisa konke uJehova asinika khona okusinceda ukuthi sifunde ngenhlawulo. Esihlokweni esilandelayo sizaxoxa ngokuthi inhlawulo isinceda njani lokuthi singatshengisa njani ukuthi siyambonga uJehova ngenxa yothando lwakhe.