1. Singenzani ukuze sithokozise uJehova?

 AKE sithi uphe umngane wakho isipho esihle futhi obonayo ukuthi sizamnceda empilweni. Ubungezwa njani nxa ebengathatha isipho leso asifake ebhokisini akhohlwe ngaso? Akuthandabuzwa ukuthi ubungadana. Kodwa nxa ebengabonga futhi asisebenzise isipho leso kufanele ukuthi lawe ubuzathokoza kakhulu. UJehova laye wasipha isipho esiqakathekileyo, wanikela ngeNdodana yakhe ukuze isihlawulele. Kumele ukuthi uyathokoza nxa ebona ukuthi siyasiqakathekisa isipho esiligugu asipha sona lokuthi siyambonga ngothando lwakhe.—Joh. 3:16; Rom. 5:​7, 8.

2. Sizaxoxa ngani esihlokweni lesi?

² Kungenzakala ukuthi ngokuhamba kwesikhathi sicine singasayiqakathekisi inhlawulo, kube sengathi sesisifake ebhokisini isipho esisiphiwe nguNkulunkulu. Siyabe silaso sibili kodwa singaselandaba laso. Yikho ukuze sihlale sisiqakathekisa isipho lesi kumele sizinike isikhathi sokucabanga ngalokho uNkulunkulu loKhristu abasenzela khona. Le yiyo indaba esizaxoxa ngayo esihlokweni lesi. Sizabona ukuthi inhlawulo isinceda njani khathesi lokuthi izasinceda njani esikhathini esizayo. Sizafunda langokuthi singatshengisa njani ukuthi siyaluqakathekisa uthando lukaJehova, ikakhulu ngesikhathi lesi seSikhumbuzo.

INHLAWULO ISINCEDA NJANI KHATHESI?

3. Inhlawulo isinceda njani khathesi?

³ Inhlawulo iyasinceda kakhulu lamuhla. Ngokwesibonelo, yiyo eyenza uJehova asithethelele izono zethu. Ayisikho ukuthi kumele asithethelele efuna engafuni, usithethelela ngenxa yokuthi uyasithanda. Omunye umhubi watshengisa ukuthi uyabonga ukuthi uJehova uyathelela. Wathi: “Phela wena Jehova  umuhle futhi uzimisele ukuthethelela.”—Hubo. 86:5; 103:​3, 10-13.

4. Inhlawulo yenzelwa abantu abanjani? (ULukha 5:32; u-1 Thimothi 1:15)

⁴ Abanye abantu bacabanga ukuthi uJehova ngeke abathethelele. Iqiniso elikhona yikuthi akulamuntu ongathi ulelungelo lokuthethelelwa. Umphostoli uPhawuli wayekwazi lokho, yikho wathi: “Akungifanelanga ukubizwa ngokuthi ngingumphostoli.” Lanxa kunjalo waphinda wathi: “Ngiyilokho engiyikho khona ngenxa yomusa omkhulu kaNkulunkulu.” (1 Khor. 15:​9, 10) Nxa singatshiya okubi esikwenzayo uJehova uyasithethelela. Usithethelela ngenxa yokuthi uyasithanda hatshi ukuthi sekumele asithethelele ngenkani. Kodwa nxa ubona angani izono zakho sezinkulu kakhulu okokuthi uJehova ngeke akuthethelele khumbula ukuthi inhlawulo ayenzelwanga abangcwele kodwa yenzelwe abantu abayizoni, abazimisele ukutshintsha.—Bala uLukha 5:32 lo-1 Thimothi 1:15.

5. Ukhona yini ongathi yena ulelungelo lokuthi uJehova amthethelele? Chasisa.

⁵ Nxa kuyikuthi sesileminyaka eminengi sikhonza uJehova akutsho ukuthi sesilelungelo lokuthi uJehova asithethelele kumnyama kubomvu. Kuliqiniso sibili ukuthi uJehova uyakuqakathekisa konke esimenzele khona. (Heb. 6:10) Wasinika iNdodana yakhe yaba yisipho samahala, ayisiyo mbadalo yokuthi simkhonza sithembekile. Yikho akumelanga sicabange ukuthi silelungelo lokuthethelelwa nguJehova ngenxa nje yokuthi sesileminyaka eminengi simkhonza. Phela nxa singacabanga njalo siyabe sesisitsho ukuthi uJesu wafela into engekhoyo.—Khangela loGalathiya 2:21.

6. Kuyini okwenza uPhawuli wasebenza nzima etshumayela?

⁶ UPhawuli wayekwazi ukuthi akulanto emangalisayo ayeyenzile eyayizakwenza uJehova abe lomlandu wokumthethelela. Manje wayesebenzelani nzima kangaka etshumayela? Wayefuna ukutshengisa ukuthi uyabonga ngomusa omkhulu uJehova ayemenzele wona. (Efe. 3:7) Lathi silingisela uPhawuli ngokukhuthala ekukhonzeni ngoba sifuna ukutshengisa ukuthi siyawuqakathekisa umusa kaJehova.

7. Inhlawulo isinceda njani khathesi? (URoma 5:1; uJakhobe 2:23)

⁷ Okunye inhlawulo esinceda ngakho yikuthi siba ngabangane abaseduze loJehova. a Esihlokweni esidlulileyo sibonile ukuthi sathi sizalwa sasingelabo ubungane loNkulunkulu. Kodwa inhlawulo ingenza ukuthi sibe ‘lokuthula loNkulunkulu’ futhi sisondele kuye.—Bala uRoma 5:1 loJakhobe 2:23.

8. Yindaba kumele simbonge uJehova ngesipho sokuthandaza?

⁸ Ukuba ngabangane bakaJehova kwenza senelise ukuthandaza kuye. UJehova uyabalalela abantu bakhe nxa bethandaza bebuthene aphinde alalele lemithandazo yomuntu munye ngamunye. Umthandazo wenza sibe lokuthula futhi sihlaliseke. Kanti njalo okuqakatheke kakhulu kulakho konke yikuthi wenza ubungane bethu loJehova buqine. (Hubo. 65:2; Jak. 4:8; 1 Joh. 5:14) Ngesikhathi esemhlabeni uJesu wayehlala ethandaza ngoba wayekwazi ukuthi uJehova uyabe emlalele lokuthi umthandazo uzakwenza ubungane bakhe loYise buqine. (Luk. 5:16) Siyambonga uJehova ngesipho senhlawulo ngoba senza sibe ngabangane bakhe futhi senelise ukuthandaza kuye.

 INHLAWULO IZASINCEDA NJANI NGESIKHATHI ESIZAYO?

9. Inhlawulo izabanceda njani abantu esikhathini esizayo?

⁹ Inhlawulo izabanceda njani abantu bakaJehova abathembekileyo ngesikhathi esizayo? Bazathola ukuphila okungapheliyo. Abantu abanengi bacabanga ukuthi lokhu ngeke kwenzakale ngoba akunamuhla abantu besifa. Kodwa uJehova wayehlose ukuthi abantu bakhe baphile kuze kube nini lanini. Aluba u-Adamu kawonanga, akulamuntu obezacabanga ukuthi impilo engapheliyo liphupho nje. Lanxa kungakhanya angani lokho ngeke kwenzakale, siyakholwa ukuthi abantu bazaphila kuze kube nini lanini ngoba uJehova wasihlawulela ngeNdodana yakhe ayithandayo.—Rom. 8:32.

10. Yiziphi izibusiso ezizatholwa ngabagcotshiweyo labezinye izimvu?

¹⁰ Lanxa ukuphila okungapheliyo sizakuthola esikhathini esizayo, uJehova ufuna sicabangisise ngakho khathesi. Abagcotshiweyo bakulindele ngabomvu ukuyaphila ezulwini bebusa loKhristu. (Isam. 20:6) Abezinye izimvu bona bakhangelele ukuphila emhlabeni olipharadayisi kungasela buhlungu lenhlupho. (Isam. 21:​3, 4) Nxa ungomunye walabo abalethemba lokuphila emhlabeni kuze kube nini lanini, ungacabangi ukuthi isipho leso sincane kakhulu nxa siqathaniswa lesalabo abazaphila ezulwini. Phela abantu babevele bedalelwe ukuthi baphile lapha emhlabeni, yikho impilo izabe imnandi kakhulu epharadayisi.

11-12. Kuyini okunye esizakukholisa epharadayisi? (Khangela lemifanekiso.)

¹¹ Akucabange ukuthi impilo izabe isinjani epharadayisi. Phela uyabe ungasakhathazeki ngokugula langokufa. (Isaya. 25:8; 33:24) UJehova uzakunika konke okuhle okufisayo. Wena kuyini ofisa ukukufundela? Mhlawumbe ungafuna ukufunda ngezinyamazana, lezinyoni, ukufundela ukutshaya ikatari loba ukudweba. Epharadayisi kuzafuneka abantu abakwazi ukudweba amaplani, lokwakha kanye  labalimi. Kuzafuneka labantu abakwazi ukupheka, ukulungisa amathuluzi kanye lamaluba, indawo yonke nje ibenhle. (Isaya. 35:1; 65:21) Nxa usuphila phakade uyabe usulesikhathi esinengi sokufundela loba yini ongayicabanga.

¹² Cabanga ukuthi uzathokoza njani ngesikhathi usuhlangabeza abantu abayabe sebevusiwe! (Imiseb. 24:15) Uzakholisa lokufunda okunengi ngoJehova ngesikhathi uhlolisisa izinto azidalileyo. (Hubo. 104:24; Isaya. 11:9) Akuzibone lawe usukhonza uJehova ungasakhathazeki ngokuthi uzakwenza isono. Kambe usungadlalisa ithuba lokuphila phakade epharadayisi ufuna nje ukuthi ‘uthole injabulo esonweni okwesikhatshana’? (Heb. 11:25) Akulanto esingayiphiwa ngumhlaba lo esingayiqathanisa lezibusiso lezi. Ungakhohlwa ukuthi isithembiso sokuphila epharadayisi asisoze siphelele emoyeni kuhlale kulithemba nje. Lizafika elingaliyo. Okwenza sithole izibusiso lezi yikuthi uJehova uyasithanda yikho wanikela ngeNdodana yakhe.

UNGATSHENGISA NJANI UKUTHI UYAMBONGA UJEHOVA?

13. Singatshengisa njani ukuthi siyaluqakathekisa uthando lukaJehova? (U-2 Khorinte 6:1)

¹³ Singatshengisa njani ukuthi siyambonga uJehova ngesipho senhlawulo? Singatshengisa ngokuqakathekisa ukumkhonza. (Mat. 6:33) Phela uJesu wafa “ukuze abaphilayo bangasaziphileli bona kodwa baphilele lowo owabafelayo waphinda wavuswa.” (2 Khor. 5:15) Asifuni ukulahlekelwa yinhloso yomusa omkhulu kaJehova.—Bala u-2 Khorinte 6:1.

14. Singatshengisa njani ukuthi siyamthemba uJehova?

¹⁴ Eyinye indlela esingatshengisa ngayo ukuthi siyambonga uJehova yikumthemba lokulandela konke asitshela khona. Sikwenza njani lokho? Kumele sicabange ukuthi uJehova ufuna senzeni nxa sisenza izinqumo ezinjengokuthi sizafunda sime ngaphi lokuthi sizakhetha wuphi umsebenzi. (1 Khor. 10:31; 2 Khor. 5:7) Nxa singenza izinqumo ezitshengisa ukuthi siyamthemba uJehova, ukholo lwethu luzaqina futhi sizakuba ngabangane bakhe. Asisoze sithandabuze lokuthi isithembiso sokuthi sizaphila kuze kube nini lanini sizagcwaliseka.—Rom. 5:​3-5; Jak. 2:​21, 22.

15. Singatshengisa njani ukuthi siyambonga uJehova ngesikhathi seSikhumbuzo?

¹⁵ Kuleyinye futhi indlela esingatshengisa ngayo ukuthi siyambonga uJehova ngothando lwakhe. Sebenzisa isikhathi lesi seSikhumbuzo ukuze utshengise ukuthi uyambonga uJehova ngesipho senhlawulo. Zimisele ukuba khona eSikhumbuzweni uphinde unxuse labanye. (1 Thim. 2:4) Bachasisele ozabanxusa ukuthi kuyabe kusenzakalani eSikhumbuzweni. Ungabatshengisa amavidiyo aku-jw.org njengale ethi Kungani UJesu Wafa? lethi Khumbula Ukufa KukaJesu. Abadala akumelanga bakhohlwe ukunxusa labo  abangasafezi inkonzo. Cabanga ngentokozo eba khona ezulwini lasemhlabeni nxa ezinye izimvu zikaJehova ebezilahlekile ziphenduka emhlambini wakhe! (Luk. 15:​4-7) Ngelanga leSikhumbuzo akumelanga sikhohlwe ukubingelela labo abafika okokuqala lalabo asebelesikhathi bengabuyi emihlanganweni. Sifuna babone ukuthi sibamukela ngazo zombili.—Rom. 12:13.

16. Kuqakatheke ngani ukwenza okunengi ngesikhathi seSikhumbuzo?

¹⁶ Ungenelisa yini ukwenza okunengi enkonzweni yakho ngesikhathi seSikhumbuzo? Lokhu kungaba ngeyinye indlela esingatshengisa ngayo ukuthi siyambonga uNkulunkulu loKhristu ngalokho abasenzela khona. Nxa singakhuthala ekukhonzeni sizabona ukuthi uJehova uyasisekela futhi lokhu kuzakwenza simthembe kakhulu. (1 Khor. 3:9) Okunye esingakwenza yikubala amavesi esikhathi seSikhumbuzo ayabe efakwe ebhukwini elithi Ukuhlola IMibhalo Nsuku Zonke kumbe etshathini etholakala kugwalo lomhlangano. Ungachwayisisa okunengi ngamavesi la ukuze ungezelele ulwazi lwakho.

17. Kuyini okuthokozisa uJehova? (Khangela lebhokisi elithi “ Ezinye Indlela Ongatshengisa Ngazo Ukuthi Uyambonga UJehova.”)

¹⁷ Siyakwazi ukuthi kwezinye izikhathi izimo zakho ngeke zikuvumele ukuthi wenze konke esixoxe ngakho esihlokweni lesi. Ungakhohlwa ukuthi uJehova kakuqathanisi labanye, uyakubona okusenhliziyweni yakho. Uyathokoza nxa ebona ukuthi usiqakathekisa ngenhliziyo yonke isipho akupha sona.—1 Sam. 16:7; Mak. 12:​41-44.

18. Kungani kumele simbonge uJehova uNkulunkulu kanye loJesu Khristu?

¹⁸ Inhlawulo yiyo eyenza sithethelelwe izono, sibe ngabangane bakaJehova futhi sibe lethemba lokuphila kuze kube nini lanini. Asizimiseleni ukuqhubeka sitshengisa ukuthi siyambonga uJehova ngothando lwakhe oluyilo olwenza ukuthi sithole izibusiso zonke lezi. (1 Joh. 4:19) Asitshengiseni lokuthi siyamthanda uJesu ngoba wasithanda waze wasifela.—Joh. 15:13.