ISIFUNDO 2
INGOMA 132 Sesinyamanye
Madoda, Baphatheni Kuhle Omkenu
‘Madoda baqakathekiseni abesifazana.’—1 PHET. 3:7.
ESIZAKUFUNDA
Sizabona ukuthi indoda ingatshengisa njani ukuthi iyamqakathekisa umkayo ngalokho ekutshoyo langalokho ekwenzayo.
1. Kuyini okwenza uJehova wanika abantu isipho sokutshada?
UJEHOVA ‘nguNkulunkulu othokozayo’ njalo ufuna lathi sithokoze. (1 Thim. 1:11) Kunengi asiphe khona okwenza impilo ibe mnandi. (Jak. 1:17) Esinye isipho esivela kuye yikutshada. Nxa indoda lowesifazana betshada bayafunga ukuthi bazathandana, bahloniphane njalo baqakathekisane. Nxa indoda lomfazi bangahlala bethandana, bobabili bayathokoza kakhulu.—Zaga. 5:18.
2. Kuhamba njani emizini eminengi lamuhla?
2 Kuyadanisa ukuthi khathesi abantu abanengi abatshadileyo abasakwenzi lokho abakufungayo mhla betshada. Lokhu kwenza bangathokozi. Omunye umbiko we-World Health Organization osanda kuphuma uthi amadoda amanengi abaphatha kubi omkawo. Ayabatshaya njalo akhulume izinto ezibazwisa ubuhlungu futhi kawalandaba lokuthi bazizwa njani. Amanye amadoda nxa ephakathi kwabantu enza angani ayabathanda omkawo kodwa nxa sebebodwa ngekhaya kuba ngokunye. Amadoda amanengi ayakuthanda ukubukela iphonografi futhi lokhu kwenza inkosikazi izizwe ingathandwa njalo ikhathazeke.
3. Kuyini okungenza indoda ihlukuluze umkayo?
3 Kuyini okwenza amanye amadoda aphathe kubi omkawo? Omunye uyabe wakhula ebona uyise ehlukuluza unina abesezitshela ukuthi yikho ukuba yindoda. Ikanti abanye bangabe belandela amasiko abo abenza babone angani indoda kumele isebenzise amandla, ibe lesihluku ukuze kukhanye ukuthi iyindoda kuzwa. Amanye amadoda kawazange akufundiswe ukuzibamba yikho nxa angazonda enza loba yini. Amanye amadoda abukela iphonografi yikho elemicabango engayisiyo ngezemacansini langabesifazana. Imibiko itshengisa ukuthi ngesikhathi seCovid-19 amadoda amanengi aqalisa ukuhlukuluza omkawo. Kodwa konke lokhu akuniki amadoda isizatho sokuthi ahlukuluze omkawo.
4. Kuyini amadoda angamaKhristu okumele akunanzelele njalo kungani?
4 Amadoda angamaKhristu kumele ananzelele ukuthi lawo kawathatheki ngendlela abantu bomhlaba lo abacabanga ngayo acine engasabaqakathekisi abesifazana. a Kungani kumele ananzelele? Ngenxa yokuthi umuntu ucina esekwenza lokho ahlala ekucabanga. Umphostoli uPhawuli watshela amaKhristu agcotshiweyo ayeseRoma wathi: “Yekelani ukubunjwa ngumumo lo wezinto.” (Rom. 12:1, 2) Ngesikhathi uPhawuli ebhala incwadi eyayisiya kwabaseRoma, ibandla leli laselilesikhathi likhona. Kodwa amazwi kaPhawuli atshengisa ukuthi abanye ebandleni babelokhu belandela amasiko futhi becabanga ngendlela abantu bomhlaba abacabanga ngayo. Yikho wabakhuthaza ukuthi batshintshe indlela abacabanga ngayo lezenzo zabo. Iseluleko sikaPhawuli siyawanceda lamadoda angamaKhristu lamuhla. Kuzwisa usizi ukuthi amanye aselandela imibono yomhlaba aze acine ehlukuluza omkawo. b UJehova ukhangelele ukuthi indoda imphathe njani umkayo? Impendulo siyithola embhalweni okhokhela isifundo lesi.
5. U-1 Phetro 3:7 uthi indoda kumele imphathe njani umkayo?
5 Bala u-1 Phetro 3:7. UJehova uthi kumele amadoda aqakathekise omkawo. Lokhu kutsho ukuthi kumele babahloniphe. Indoda emhloniphayo umkayo imphatha kuhle futhi iyamthanda. Esihlokweni lesi sizaxoxa ngokuthi indoda ingamtshengisa njani umkayo ukuthi iyamhlonipha. Kodwa sizaqala sikhulume ngezinto okungamelanga amadoda azenze.
UNGENZI IZINTO EZIZAZWISA UMKAKHO UBUHLUNGU
6. UJehova uzwa njani nxa amadoda etshaya omkawo? (UKholose 3:19)
6 Ungamtshayi umkakho. UJehova uyabazonda abantu abalodlakela. (Hubo. 11:5) Kakuthandi ukubona amadoda ehlukuluza omkawo. (Mal. 2:16; bala uKholose 3:19.) Umbhalo okhokhela isifundo lesi, u-1 Phetro 3:7 usitshela ukuthi nxa indoda ihlukuluza umkayo iphambanisa ubungane bayo loJehova. UJehova angayekela lokulalela imithandazo yayo.
7. Kuyini amadoda okumele akubalekele? (U-Efesu 4:31, 32; Khangela leNgcazelo Yamabala)
7 Ungakhulumi amazwi azwisa umkakho ubuhlungu. Amanye amadoda azwisa omkawo ubuhlungu ngokukhuluma amazwi ahlabayo langokubatshingela. UJehova uyaluzonda ‘ulaka, lokuklabalala, lokuthethisa kanye lakho konke okulimazayo.’ c (Bala u-Efesu 4:31, 32.) Khumbula ukuthi uJehova uzwa konke. Lalokho elikukhuluma lilodwa ekusithekeni kumbe endlini uyakuzwa futhi ulendaba lakho. Indoda etshela umkayo amazwi ahlabayo iphambanisa inhlalakahle yayo lomkayo futhi iphambanisa lobungane bayo loNkulunkulu.—Jak. 1:26.
8. UJehova uzwa njani ngendoda ebukela iphonografi futhi kungani?
8 Ungabukeli iphonografi. UJehova uyayizonda kakhulu iphonografi. Ngakho indoda ebukela izinto ezingcolileyo iphambanisa ubungane bayo loJehova futhi ayimhloniphi umkayo. d UJehova ukhangelele ukuthi indoda ihlale iqotho kumkayo hatshi ngezenzo kuphela kodwa langalokho ekucabangayo. UJesu wathi indoda eqhubeka ikhangele owesifazana ize ifise ukulala laye iyabe isifebe laye ‘enhliziyweni yayo.’ e—Mat. 5:28, 29.
9. Kungani uJehova ekuzonda ukuthi indoda ibambe umkayo ngamandla ukuthi enze izinto angazifuniyo kwezemacansini?
9 Ungamenzisi izinto zemacansini a,ngazifuniyo. Amanye amadoda abamba omkawo ngamandla ukuthi benze izenzo zemacansini ezibayangisayo loba ezibenza bazizwe bengcolile kumbe bengathandwa. UJehova uyazizonda izenzo ezinjalo ezitshengisa ukuthi umuntu ufuna ukuzithokozisa yena, kalandaba lomunye. Ufuna ukuthi indoda imthande umkayo, imhloniphe futhi ibe lendaba lendlela azizwa ngayo. (Efe. 5:28, 29) Manje kungenziwani nxa kuyikuthi indoda engumKhristu ibivele imhlukuluza umkayo, imbamba ngamandla ukuthi enze izinto zemacansini angazifuniyo njalo ibukela iphonografi? Ingenzani ukuze itshintshe indlela ecabanga ngayo lezenzo zayo?
OKUNGANCEDA INDODA UKUTHI IYEKELE UKUPHATHA KUBI UMKAYO
10. Okwenziwa nguJesu kungawanceda njani amadoda?
10 Kuyini okunganceda indoda ukuthi iyekele ukuhlukuluza umkayo lokumbamba ngamandla ukuthi enze izinto zemacansini ezimyangisayo. Yikuzama ukulingisela uJesu. UJesu kazange atshade kodwa indlela ayephatha ngayo abafundi bakhe iyawafundisa amadoda ukuthi kumele aphathe njani omkawo. (Efe. 5:25) Asixoxeni ngokuthi uJesu wayebaphatha njani abaphostoli bakhe lokuthi wayekhuluma labo njani, besesibona ukuthi amadoda angafundani.
11. UJesu wayebaphatha njani abaphostoli bakhe?
11 UJesu wayebaphatha kuhle abaphostoli bakhe futhi ebahlonipha. Wayengabakhahlamezi futhi wayengababusi. Lanxa wayeyiNkosi yabo futhi elamandla, kazange asebenzise amandla akhe ukuthi abethusele ukuze bahlale besesaba kodwa wayezehlisa futhi ebenzela okuhle. (Joh. 13:12-17) Watshela abafundi bakhe wathi: “Lifunde kimi ngoba ngimnene futhi ngithobekile enhliziyweni. Lingenza njalo lizathola ukuphumula.” (Mat. 11:28-30) UJesu wayemnene. Ukuba mnene ayisikho ukuthi umuntu uligwala kodwa kutshengisa ukuthi uyenelisa ukuzibamba. Nxa engazonda kavuki ngolaka kodwa uyazikhuza.
12. UJesu wayekhuluma njani labanye?
12 UJesu wayekhuluma kuhle labanye ukuze abaduduze njalo abavuselele. Kazange akhulume amazwi azwisa abafundi bakhe ubuhlungu. (Luk. 8:47, 48) Langesikhathi ababemzonda bemthethisa befuna ukumcaphula, “kazange aphindisele ngokuthethisa.” (1 Phet. 2:21-23) Kwezinye izikhathi wayekubona kungcono ukuthi azithulele angaphenduli. (Mat. 27:12-14) Nxa amadoda angamaKhristu angalingisela uJesu ayabe esenza kuhle kakhulu.
13. Indoda ingatshengisa njani ukuthi izimisele ‘ukunamathela kumkayo’? (UMathewu 19:4-6) (Khangela lomfanekiso.)
13 UJesu watshela amadoda ukuthi kumele abe qotho kubomkawo. Waphinda amazwi atshiwo nguYise ukuthi indoda kumele “inamathele kumkayo.” (Bala uMathewu 19:4-6.) Lokhu kutsho ukuthi indoda lomfazi kumele bazwanane kakhulu kube angathi bananyathiselwe ndawonye. Nxa omunye wabo angenza ubutshapha bobabili bayezwa ubuhlungu. Indoda ethanda umkayo ngaleyondlela izaxwaya iphonografi. Kayiqali ukukhangela ‘izinto ezingelancedo.’ (Hubo. 119:37) Izabe ingathi iyenze isivumelwano lamehlo ayo esokuthi kayisoze ikhangele omunye owesifazana ize imhawukele.—Jobe. 31:1.
Indoda eqotho kumkayo ayibukeli iphonografi (Khangela indima 13) g
14. Kuyini okumele kwenziwe yindoda ehlukuluza umkayo?
14 Indoda etshaya umkayo kumbe emhlukuluzayo ngokumtshela amazwi abuhlungu kumele ilungisise ubungane bayo loJehova futhi ilungise lobudlelwano bayo lomkayo. Nanzi izinto okumele izenze: Okokuqala, kumele inanzelele ukuthi ilohlupho olukhulu. Phela uJehova uyakubona konke ekwenzayo lekukhulumayo. (Hubo. 44:21; Umtshu. 12:14; Heb. 4:13) Okwesibili, kumele iyekele ukuhlukuluza umkayo njalo itshintshe lezenzo zayo. (Zaga. 28:13) Okwesithathu, kumele ixolise kumkayo futhi icele loJehova ukuthi ayithethelele. (Imiseb. 3:19) Kumele icele uJehova ukuthi ayiphe isifiso sokuthi itshintshe njalo icele lokuthi ayincedise yenelise ukuthiba imicabango yayo, lamazwi ayo lezenzo zayo. (Hubo. 51:10-12; 2 Khor. 10:5; Flp. 2:13) Okwesine, kumele yenze lokho ekuthandazelayo, izonde udlakela kanye lenkulumo ezwisa abanye ubuhlungu. (Hubo. 97:10) Okwesihlanu, kumele icele ukuthi abadala bebandla bayincedise. (Jak. 5:14-16) Okwesithupha, kumele yenze icebo lokuthi izazibalekela njani izinto zonke lezi ebizenza ukuze ingaziphindi. Indoda ebukela iphonografi layo kumele izenze izinto lezi eziyisithupha. Nxa indoda ingakwenza konke lokhu, uJehova uyabe ezayincedisa ukuthi ilahle umkhuba wayo omubi. (Hubo. 37:5) Iyabe iyenze kuhle indoda nxa ingayekela ukwenza izinto ezizwisa umkayo ubuhlungu. Kodwa okunye okuyabe kumele ikwenze yikufunda ukuphatha kuhle umkayo. Ingakwenza njani lokho?
TSHENGISA UKUTHI UYAMQAKATHEKISA UMKAKHO
15. Indoda ingatshengisa njani ukuthi iyamthanda umkayo?
15 Mthande. Abanye abafowethu abatshadileyo abahlalisane kuhle labomkabo bajayele ukubenzela okuthile okuhle nsuku zonke ukuze babatshengise ukuthi bayabathanda. (1 Joh. 3:18) Indoda ingatshengisa ukuthi iyamthanda umkayo ngokumenzela izinto ezingakhanya angani zincane, njengokumbamba isandla kumbe ukumgona. Ingamthumezela imeseji imtshela ukuthi iyamkhanuka kumbe imbuza ukuthi ilanga lakhe lihamba njani. Kwezinye izikhathi ingambhalela ikhadi kumbe incwadi imtshela ukuthi imthanda kangakanani. Nxa indoda ikwenza lokhu iyabe itshengisa ukuthi umkayo uligugu kuyo futhi kuyawuqinisa umtshado.
16. Kungani kumele indoda imncome umkayo?
16 Mncome. Indoda emthandayo umkayo iyamtshela ukuthi uligugu futhi iyamkhuthaza. Eyinye indlela ekwenza ngayo lokhu yikumbonga ngakho konke akwenzayo. (Kol. 3:15) Nxa indoda ingamncoma umkayo uyathokoza. Lokhu kuzenza inkosikazi ihlaliseke ngoba iyabe ibona ukuthi iyathandwa futhi iligugu.—Zaga. 31:28.
17. Indoda ingatshengisa njani ukuthi iyamhlonipha umkayo?
17 Woba lomusa njalo uhloniphe. Indoda emthandayo umkayo iyamqakathekisa kakhulu. Imbona eyisipho esiligugu esivela kuJehova. (Zaga. 18:22; 31:10) Ngakho imphatha kuhle futhi iyamhlonipha. Lokhu kugoqela langesikhathi besiya emacansini. Indoda enjalo kayimbambi ngamandla umkayo ukuthi baye emacansini ngendlela ezamtshiya engakhululekanga, eyangekile kumbe umzwangedwa wakhe ungasahlanzekanga. f Layo indoda kumele yenze konke okusemandleni ayo ukuthi ihlale ilomzwangedwa ohlanzekileyo phambi kukaJehova.—Imiseb. 24:16.
18. Amadoda kumele azimisele ukwenzani? (Khangela lebhokisi elithi “ Izinto Ezine Okumele Indoda Izenze.”)
18 Madoda, uJehova uyathokoza kakhulu nxa elibona liphatha omkenu kuhle futhi libahlonipha. Ngakho zimisele ukungenzi loba yini engazwisa umkakho ubuhlungu kodwa woba lomusa, umhloniphe futhi umthande. Ungenza njalo umkakho uzabona ukuthi uyamthanda njalo uyamqakathekisa. Nxa ungamqakathekisa umkakho awusoze uphambanise ubungane bakho loJehova, uzahlala ungumngane wakhe omkhulu.—Hubo. 25:14.
INGOMA 131 Okuhlanganiswe NguNkulunkulu
a Amadoda kungawanceda ukubala isihloko esithi “Uphatha Abesifazana Ngendlela UJehova Abaphatha Ngayo Yini?” ku-Nqabayokulinda kaJanuary 2024.
b Labo abahlukuluzwayo kungabanceda ukubala isihloko esithi “Ukuncedisa Abahlukuluzwayo” engxenyeni ethi “Ezinye Izihloko” etholakala ku-jw.org laku-JW Library®.
c INGCAZELO YAMABALA: “Ukuhlukuluza umuntu ngamazwi” kugoqela ukumbiza ngamabizo okumeyisa lokumthethisa lokumenza azikhangelele phansi. Kugoqela lokuhlala utshela umuntu lokho ongakuthandiyo ngaye. Ngakho nxa indoda itshela umkayo izinto ezimzwisa ubuhlungu futhi imthethisa iyabe imhlukuluza ngamazwi.
d Yana ku-jw.org kumbe ku-JW Library ukhangele isihloko esithi “Iphonografi Ingawuchitha Umtshado Wakho.”
e Inkosikazi elomkayo obukela iphonografi ingancedakala nxa ingabala isihloko esithi “Ungenzani Nxa Umkakho Ebukela Iphonografi?” ku-Nqabayokulinda ka-August 2023.
f IBhayibhili kalisicaciseli ukuthi nxa indoda lomkayo abatshadileyo besiya emacansini yiziphi izenzo zemacansini ezingcolileyo lezihlanzekileyo. Bobabili indoda lomkayo kumele bakhethe ukwenza lokho okuzatshengisa ukuthi bayamhlonipha uJehova njalo okuzabatshiya belemizwangedwa ehlanzekileyo. Indoda lomkayo ngeke bahambe sebexoxela abanye ukuthi bona benzani kwezemacansini.
g OKUSEMFANEKISWENI: Abantu abangasibo boFakazi abasebenza lomunye umzalwane bazama ukumyenga ukuthi akhangele amapikitsha ephonografi akwenye imagazini.
