1. Kuyini okwenziwa ngabanengi lamuhla?

 UYAKUNANZELELA yini ukuthi khathesi abantu abanengi sebegijimisa okwabo, kabaselandaba labanye? Ngokwesibonelo, kwezokuxhumana abanye bafaka izinto ezitshengisa ukuthi bayaziphakamisa ngalokho asebekwenzile empilweni lokuthi bafuna ukubukwa ngabantu. Sebebalutshwana kakhulu abantu abanika uJehova udumo. Esihlokweni lesi sizaxoxa ngokuthi kutshoni ukunika uJehova inkazimulo lokuthi kungani kumele simdumise. Sizabona lokuthi singamnika njani inkazimulo emfaneleyo lokuthi yena uzalikhazimulisa njani ibizo lakhe esikhathini esiseduze.

KUTSHONI UKUNIKA UJEHOVA INKAZIMULO?

2. UJehova wayiveza njani inkazimulo yakhe entabeni iSinayi? (Khangela lomfanekiso.)

² IBhayibhili litshengisa ukuthi uJehova nguNkulunkulu omkhulu njalo omangalisayo. Ngemva kwamalanga amalutshwana nje uJehova ekhulule ama-Israyeli eGibhithe, wawatshengisa inkazimulo yakhe. Amamiliyoni abantu bako-Israyeli abuthana eceleni kwentaba iSinayi ezohlangana loNkulunkulu wawo. Intaba yasibekelwa liyezi elimnyama tshu. Besamangele, umhlaba waqalisa ukunyikinyeka lentaba yathunqa intuthu futhi kwakungathi kulomlilo ovuthayo esiqongweni sayo. Kwakuduma, kuphazima njalo kwaba lomsindo wophondo omkhulu kakhulu. (Eks. 19:​16-18; 24:17; Hubo. 68:8) Kumele ukuthi ama-Israyeli asala ebambe owangaphansi, emangaliswa yibukhulu bukaNkulunkulu lenkazimulo yakhe.

3. Kutshoni ukunika uJehova inkazimulo?

³ Thina singenelisa yini ukunika uJehova inkazimulo? Ye, siyenelisa.  Enye indlela esimnika ngayo inkazimulo yikutshela abanye ngamandla akhe amakhulu langobuntu bakhe obumangalisayo. Nxa singaphumelela ukwenza into ethile sincediswa nguJehova, besesimdumisa ngenxa yalokho, siyabe simkhazimulisa. (Isaya. 26:12) INkosi uDavida yayikuthanda ukudumisa uJehova. Yathi ikhuleka phambi kwabantu bako-Israyeli, yakhazimulisa uNkulunkulu yathi: “Awu Jehova, ngobakho ubukhulu lamandla lobuhle lenkazimulo kanye lobukhosi ngoba konke okusemazulwini lokusemhlabeni ngokwakho.” UDavida wathi eseqedile ukuthandaza, “bonke abantu bamdumisa uJehova.”—1 Imilan. 29:​11, 20.

4. UJesu wamkhazimulisa njani uJehova?

⁴ Ngesikhathi uJesu esemhlabeni, wakhazimulisa uYise ngokutshela abantu ukuthi nguye owayemnike amandla okwenza izimangaliso. (Mak. 5:​18-20) Okunye akwenzayo yikutshela abanye ngobuhle bukaJehova futhi wayebaphatha kuhle abantu. Ngelinye ilanga wathi efundisa esinagogeni wabona owesifazana owayeledimoni elaselimgulise okweminyaka engu-18. Owesifazana lo wayehlala ekhotheme, esehluleka ukuma aqonde. Wayezwisa usizi sibili. UJesu wamzwela wamlanda, wathi kuye: “Dadewethu, ususilisiwe emkhuhlaneni wakho.” Wambeka izandla owesifazana lo, wahle wama waqonda “waqalisa ukukhazimulisa uNkulunkulu” eseqine saka. (Luk. 13:​10-13) Owesifazana lo wamdumisa uJehova ngenxa yalokho ayemenzele khona. Lathi kunengi okwenza simdumise uJehova.

KUYINI OKWENZA SINIKE UJEHOVA INKAZIMULO?

5. Kuyini okwenza simhloniphe uJehova?

⁵ Siyamkhazimulisa uJehova ngoba siyamhlonipha kakhulu. Kunengi okwenza simhloniphe. UnguSomandla, angenza loba yini ayifunayo njalo kadinwa. (Hubo. 96:​4-7) Inhlakanipho yakhe emangalisayo iyakhanya ezintweni azenzileyo. Nguye owasidalayo futhi usinika konke esikudingayo ukuze siqhubeke siphila. (Isam. 4:11) Uqotho. (Isam. 15:4) Kehlulwa lutho futhi konke akuthembisayo uyakwenza. (Josh. 23:14) Yikho umphrofethi uJeremiya wababaza ngoJehova wathi: “Phakathi kwabo bonke abahlakaniphileyo ezizweni lasemibusweni yonke, kakho loyedwa onjengawe.” (Jer. 10:​6, 7) Siyabona sibili ukuthi kunengi okwenza simhloniphe uBaba wethu osezulwini. UJehova kasimhloniphi nje kuphela, siyamthanda.

6. Kungani simthanda uJehova?

⁶ Siyamkhazimulisa uJehova ngoba siyamthanda kakhulu. Kunengi okwenza simthande uJehova. Ulozwelo lesihawu. (Hubo. 103:13; Isaya. 49:15) Nxa siphakathi kobuhlungu, laye uyabe ebuzwa ubuhlungu esibuzwayo. (Zak. 2:8) Uyasincedisa ukuthi simazi njalo sibe ngabangane bakhe. (Hubo. 25:14; Imiseb. 17:27) Uthobekile, “uyakhothama akhangele ezulwini lasemhlabeni, aphakamise ohluphekayo amsuse emhlabathini.” (Hubo. 113:​6, 7) Konke lokhu kwenza simkhazimulise uNkulunkulu wethu omkhulu.—Hubo. 86:12.

7. Yiphi enye indlela esingakhazimulisa ngayo uJehova?

⁷ Siyamkhazimulisa uJehova ngoba sifuna abanye babemazi. Abantu abanengi kabalazi iqiniso ngoJehova ngoba uSathane uvale ingqondo zabo ngokumemethekisa amanga ngaye. (2 Khor. 4:4) USathane wenze abantu bakholwa ukuthi uJehova nguye obangela inhlupho ezisemhlabeni lokuthi kalandaba lathi kanye lokuthi uhlala ebazondele abantu. Kodwa thina siyalazi iqiniso ngoNkulunkulu wethu. Yikho nxa sitshela abanye  iqiniso leli siyabe simdumisa. (Isaya. 43:10) IHubo 96 likhuluma ngokunika uJehova inkazimulo. Ngesikhathi sihlola iHubo leli, cabangisisa ngezinye indlela onganika ngazo uJehova inkazimulo emfaneleyo.

SINGAMNIKA NJANI UJEHOVA INKAZIMULO EMFANELEYO?

8. Singamkhazimulisa njani uJehova? (IHubo 96:​1-3)

⁸ Bala iHubo 96:​1-3. Singakhazimulisa uJehova ngalokho esikutshoyo ngaye. Emavesini la, abantu bakaJehova bakhuthazwa ukuthi ‘bahlabelele uJehova’ futhi ‘badumise ibizo lakhe.’ Bakhuthazwa lokuthi ‘bamemezele izindaba ezinhle zensindiso yakhe’ njalo ‘bakhulume ngenkazimulo yakhe phakathi kwezizwe.’ Zonke lezi zindlela esingamdumisa ngazo uBaba wethu osezulwini. AmaJuda akudala ayethembekile kanye lamaKhristu akuqala ayezimisele ukutshela abanye izinto ezinhle uJehova ayebenzele zona lokulwela ibizo lakhe. (Dan. 3:​16-18; Imiseb. 4:29) Thina singakwenza njani lokho?

9-10. Ufundani kulokho okwenzakala ku-Angelena? (Khangela lomfanekiso.)

⁹ Omunye udadewethu okuthiwa ngu-Angelena a ohlala e-United States waqunga isibindi walwela ibizo likaJehova lapho asebenza khona. U-Angelena wathi esanda kuqhatshwa, kwenziwa umhlangano emsebenzini ukuze bonke ababesanda kuqhatshwa bazethule kwabanye ababesebenza labo. U-Angelena wenza ividiyo encane eyayitshengisa izinto azikholisayo ngokuba nguFakazi kaJehova. Omunye ayesebenza laye wathi ezethula wathi abazali bakhe babengoFakazi bakaJehova njalo waqalisa ukusola lokho esikukholwayo. U-Angelena nguye owayezalandela. Uthi: “Uvalo lwangitshaya lwangiqeda kodwa ngacabanga ngathi, ‘Ngizithulele yini ngingatsho lutho ngoJehova kumbe ngikhulume iqiniso ngilwele ibizo lakhe?’”

¹⁰ Indoda le yathi iqeda ukukhuluma, u-Angelena wathandazela enhliziyweni wasesithi kuyo: “Lami ngakhuliswa ngendlela efanana leyakho. Abazali bami bangoFakazi bakaJehova futhi lakhathesi lokhu nginguFakazi.” Kwakungasamanga kuhle kodwa u-Angelena kazange ethuke. Wabatshengisa ividiyo eyayilamapikitsha akhe atshiyeneyo esemihlanganweni yethu futhi wabachasisela kuhle lokho akukholwayo. (1 Phet. 3:15) Manje kwaphetha ngani? U-Angelena wathi esesiyaqeda, indoda leyo yayisithambile yaze yathi useyikhumbuze okunengi okuhle okwenzakala  kudala isakhula isahamba emihlanganweni yaboFakazi bakaJehova. U-Angelena uqhubeka esithi: “Kumele sililwele ibizo likaJehova. Kuyisibusiso ukutshela abanye iqiniso ngaye.” Nxa abanye bekhuluma kubi ngoJehova, thina singamdumisa futhi simkhazimulise ngokumlwela.

11. Izikhonzi zikaJehova zitshengise njani ukuthi ziyakulandela lokho okukuHubo 96:8?

¹¹ Bala iHubo 96:8. Singakhazimulisa uJehova ngalokho esilakho. Lokhu yikho okwakusenziwa yizikhonzi zikaJehova kusukela kudala. (Zaga. 3:9) Ngokwesibonelo, ama-Israyeli akhipha imali lokunye okwakudingeka ukuze kwakhiwe ithempeli njalo ligcinwe lilihle. (2 Amakho. 12:​4, 5; 1 Imilan. 29:​3-9) Abanye abalandeli bakaJesu babenikela ‘ngempahla yabo’ ukuze bancedise uJesu labaphostoli bakhe. (Luk. 8:​1-3) AmaKhristu akuqala anikela ngemali ukuze kuncediswe abafowabo labodadewabo ababehlala lapho indlala eyayihlasele khona. (Imiseb. 11:​27-29) Lathi lamuhla singamkhazimulisa uJehova ngokunikela ngalokho esilakho.

12. Iminikelo yethu ingamkhazimulisa njani uJehova? (Khangela lomfanekiso.)

¹² Nansi esinye isibonelo esitshengisa ukuthi iminikelo yethu iyamkhazimulisa uJehova. Ekuqaliseni kuka-2020 kwaba lombiko owawutshengisa ukuthi eZimbabwe kulendlala eyayisidonse isikhathi eside. Abantu abanengi baphosa babulawa yindlala. Omunye wabo kwakungudadewethu okuthiwa nguPrisca. Lanxa laye wayeswela, waqhubeka ehamba ekutshumayeleni ngoLwesithathu langoLwesihlanu. Kazange ayekele ukuqhubeka etshumayela ngamalanga akhe la lanxa kwasekuyisikhathi sokulima. Omakhelwane bakhe babesithi nxa bembona esiya ekutshumayeleni bona besemasimini, bamnqolonge bathi: “Uzabulawa yindlala!” Kodwa yena wayebaphendula athi: “UJehova kakaze abatshiye abantu bakhe.” Kungakayi ngaphi uPrisca wathola ukudla okwakuvela enhlanganisweni. Ukudla lokho kwakuthengwe ngeminikelo evela kubafowethu labodadewethu emhlabeni wonke. Omakhelwane bakaPrisca basala bengelankani, baze bathi: “UNkulunkulu kakaze akulahle, lathi sesifuna ukufunda ngaye.” Omakhelwane bakhe abayisikhombisa baqalisa ukungena imihlangano.

13. Singenzani ukuze indlela esiziphatha ngayo ikhazimulise uJehova? (IHubo 96:9)

¹³ Bala iHubo 96:9. Singakhazimulisa  uJehova ngendlela esiziphatha ngayo. Abaphristi ababesebenza ethempelini likaJehova kwakumele bageze futhi bagqoke izigqoko ezihlanzekileyo. (Eks. 40:​30-32) Lathi kumele sihlanzeke njalo siziphathe kuhle. (Hubo. 24:​3, 4; 1 Phet. 1:​15, 16) Kumele sisebenze nzima ukuze sihlubule “ubuntu obudala” sitshiye yonke imikhuba kanye lemicabango engcolileyo. Nxa singakwenza lokho kuyabe sekumele sigqoke “ubuntu obutsha,” okutsho ukuthi sicabange njalo siziphathe ngendlela ekhazimulisa uJehova. (Kol. 3:​9, 10) UJehova uyenelisa ukuncedisa labantu abenza izinto ezimbi kakhulu ukuthi batshintshe besebegqoka ubuntu obutsha.

14. Sifundani kulokho okwenziwa nguJack? (Khangela lomfanekiso.)

¹⁴ Ake sixoxe ngoJack owayeyisigebenga esesabekayo. Abanye babembiza ngokuthi nguDimoni. UJack wagwetshelwa ukubulawa ngenxa yamacala ayewenzile. Kodwa wathi esalindele ukuthi abulawe, wavuma ukufunda iBhayibhili lomunye umfowethu owayejayele ukutshumayela ejele leyo. Lanxa uJack wayeyenze izinto ezinengi ezimbi, watshintsha walahla ubuntu obudala njalo wacina ebhabhathizwa waba nguFakazi kaJehova. Indlela uJack atshintsha ngayo yayimangalisa okokuthi ngelanga abulawa ngalo, abanye abalindi bejele bakhala ezimathonsi bemvalelisa. Omunye usayijeni osebenza ejele leyo wathi: “Besingakaze sibe lesibotshwa ebesihlupha njengoJack kodwa khathesi ubeselunge ngendlela esingakaze siyibone.” Kwathi ngemva kweviki uJack ebulewe, abazalwane bafika ejele leyo besiyaqhuba imihlangano yebandla. Kwabuya esinye isibotshwa sifuna ukungena imihlangano. Kuyini okwenza isibotshwa lesi safuna ukungena imihlangano? Sasimangaliswe yindlela uJack ayetshintshe ngayo futhi sasifuna ukwazi lokho okumele sikwenze ukuze sikhonze uJehova. Kuyazikhanyela ukuthi nxa siziphatha kuhle, uBaba wethu osezulwini uyakhazinyuliswa.—1 Phet. 2:12.

UJEHOVA UZALIKHAZIMULISA NJANI IBIZO LAKHE ESIKHATHINI ESIZAYO?

15. UJehova uzalikhazimulisa njani ibizo lakhe esikhathini esiseduze esizayo? (IHubo 96:​10-13)

¹⁵ Bala iHubo 96:​10-13. Amavesi okucina eHubo 96 aveza ukuthi uJehova uyiNkosi loMahluleli olungileyo. UJehova uzalikhazimulisa njani ibizo lakhe esikhathini esiseduze  esizayo? Uzalikhazimulisa ngendlela azakwahlulela ngayo. Sekuseduze ukuthi abhubhise iBhabhiloni Enkulu ngenxa yokuthi yenze izinto ezinengi ezimbi futhi ikhuluma amanga ngaye. (Isam. 17:​5, 16; 19:​1, 2) Kungenzakala ukuthi abanye abazabona iBhabhiloni Enkulu ibhujiswa bazabuya bazoqalisa ukukhonza uJehova ndawonye lathi. Ngesikhathi se-Amagedoni uJehova uzatshabalalisa umumo lo wezinto obuswa nguSathane. Uzasusa bonke abamphikisayo labakhuluma amanga ngaye, abesesindisa labo abamthandayo labamlalelayo, abazigqaja ngokumkhazimulisa. (Mak. 8:38; 2 Thes. 1:​6-10) Ngemva kokulingwa kokucina okuzakwanzakala ekupheleni kweminyaka eyinkulungwane yokubusa kukaKhristu, uJehova uzabe eselingcwelise ngokupheleleyo ibizo lakhe. (Isam. 20:​7-10) Ngalesosikhathi “umhlaba uzagcwala ulwazi lwenkazimulo kaJehova, njengolwandle lugcwele amanzi.”—Hab. 2:14.

16. Kuyini ozimisele ukukwenza? (Khangela lomfanekiso.)

¹⁶ Akucabange ukuthi kuzabe sekumnandi kangakanani ukubona wonke umuntu emhlabeni enika uJehova udumo olumfaneleyo. Ngakho lathi kasizameni ngamandla ethu wonke ukukhazimulisa uJehova ngakho konke esikwenzayo njalo sitshele abanye ngaye. IQula Elikhokhelayo liyasinceda sibone ukuthi kuqakatheke kangakanani ukunika uJehova inkazimulo, yikho likhethe iHubo 96:8 ukuthi libe ngumbhalo womnyaka ka-2025. IHubo leli lithi: “Nikani uJehova inkazimulo efanele ibizo lakhe.”