ISIFUNDO 3
INGOMA 35 Linanzelele Okuqakatheke Kakhulu
Yenza Izinqumo Ezithokozisa UJehova
“Ukwesaba uJehova yikuqala kokuhlakanipha, lokwazi oNgcwele Kakhulu yikho ukuzwisisa”—ZAGA. 9:10.
ESIZAKUFUNDA
Sizabona ukuthi ukuba lolwazi ngendaba, lokuzwisisa kanye lokuqedisisa kusinceda njani ukuthi senze izinqumo ezinhle.
1. Yibuphi ubunzima esiyake sibe labo?
IZINQUMO sizenza kusa kwamalanga. Ezinye zakhona zilula njengokukhetha ukuthi udleni ekuseni kumbe ukuthi ulale sikhathi bani. Kodwa ezinye kunzima ukuzenza. Phela ezinye yizo ezitshoyo ukuthi impilakahle yakho izakuba njani, ukuthi uzathokoza yini loba hatshi, kumbe ukuthi uzaqhubeka umkhonza kuhle yini uJehova. Ezinye zingatshiya imuli yakho ithokoza kumbe idanile. Sifuna ukwenza izinqumo ezisincedayo futhi ezinceda lemuli zethu. Okuqakatheke kakhulu yikuthi senze izinqumo ezizathokozisa uJehova.—Rom. 12:1, 2.
2. Kuyini okuzakunceda wenze izinqumo ezinhle?
2 Okuzakunceda ukuthi wenze isinqumo esihle (1) yikudinga konke okuphathelane lendaba, (2) lokucabanga ngokuthi uJehova engabe eyibona njani (3) langokucabangisisa ngokuthi isinqumo leso sizakusa ngaphi. Esihlokweni lesi sizaxoxa ngezinto lezi ezintathu njalo zizasinceda sibone ukuthi singenzani ukuze sibe lokuqedisisa.—Zaga. 2:11.
DINGA KONKE OKUPHATHELANE LENDABA
3. Nika umzekeliso otshengisa ukuthi kuqakathekile ukuhlola konke okuphathelane lendaba ungakenzi isinqumo.
3 Nxa ufuna ukwenza isinqumo esihle into yokuqala okuyabe kumele uyenze yikudinga konke okuphathelane lendaba. Kuqakatheke ngani lokho? Ake sithi uyagula ubususiya kudokotela. Ubungathini nxa udokotela lo engakubhalela amaphilisi engazange akubuze imibuzo kumbe akuhlole? Udokotela oyingcitshi uqala ahlole isigulane futhi asibuze imibuzo engakenzi isinqumo. Yikho lawe uzenza izinqumo ezinhle nxa ungaqala udinge konke okuphathelane lendaba. Ungakwenza njani lokho?
4. Ungakwenza njani lokho okutshiwo kuZaga 18:13 ukuze wazi konke okuphathelane lendaba? (Khangela lomfanekiso.)
4 Okunye okungakunceda ukuthi ukwazi konke ngendaba yikubuza imibuzo. Ake sithi unxuswe embuthanweni kumbe ephathini. Kumele uphonguhamba yini? Nxa umuntu ohlele umbuthano lo ungamjayelanga kumbe ungakwazi ukuthi kuzabe kusenziwani, ungambuza imibuzo elandelayo: “Umbuthano lo uzakwenzelwa ngaphi futhi nini? Kuyabe kulabantu abangaki? Ngubani ozabe ekhangele lokho okwenzakalayo? Ngobani abazabe bekhona? Kuzabe kusenziwani? Utshwala buyabe bukhona yini?” Izimpendulo zemibuzo le zizakunceda ukuthi wenze isinqumo esihle.—Bala iZaga 18:13.
Buza imibuzo ukuze uthole konke okuphathelane lendaba (Khangela indima 4) a
5. Kuyini okumele ukwenze nxa usuthole konke okuphathelane lendaba?
5 Lanxa usukwazi konke okuphathelane lendaba, qala ume ucabangisise ngayo ungakenzi isinqumo. Uzakwenzani nxa ungezwa ukuthi embuthanweni lo kuzabe kulabanye abangelandaba lezimiso eziseBhayibhilini kumbe ukuthi utshwala buzabe bukhona kodwa kungelamuntu oba leqiniso lokuthi abantu abanathi kakhulu? Ubona angani ephathini le akusoze kucine sekuxokozela yini sekusenziwa izinto ezimbi? (1 Phet. 4:3) Uzakwenzani nxa kuyikuthi isikhathi esibekiweyo sombuthano lo yiso isikhathi semihlangano yebandla kumbe esokuya ekutshumayeleni? Nxa ungacabangisisa ngakho konke okuphathelane lendaba, kuba lula ukuthi wenze isinqumo esihle. Kodwa kulokunye okumele ukwenze. Njengoba wena uyabe usuyazi kuhle indaba, sekumele udinge ukuthi uJehova yena uyibona njani.—Zaga. 2:6.
CABANGA NGOKUTHI UJEHOVA UYIBONA NJANI INDABA
6. UJakhobe 1:5 uthi kungani kumele sicele ukuthi uJehova asincedise?
6 Cela uJehova akuncedise uzwisise ukuthi yena uyibona njani indaba. UJehova usithembisa ukuthi uzasinika ukuhlakanipha okuzasinceda sibone ukuthi esizakwenza kuzamthokozisa yini loba hatshi. Ukuhlakanipha lokhu usinika khona ‘ngesihle futhi engelansolo.’—Bala uJakhobe 1:5.
7. Kuyini ongakwenza ukuze ubekwazi ukuthi uJehova ukubona njani lokho ongabe ufuna ukukwenza? Nika umzekeliso.
7 Nxa ungathandaza kuJehova ucela ukuthi akuncedise, zama ukunanzelela ukuthi engabe ewuphendula njani umthandazo wakho. Ngokwesibonelo nxa ungathi uhamba endaweni ethile ubusulahleka, ungabuza umuntu ohlala khonapho ukuthi akulayele lapho oyakhona. Kodwa kungaba lengqondo yini ukuthi usuke uhambe yena engakakutsheli? Hatshi, uyama umlalelisise ekulayela. Ngakho nxa lawe ungacela ukuthi uJehova akunike ukuhlakanipha zama ukubona ukuthi ukuphendula njani ngokudinga imithetho kanye lezimiso eziseBhayibhilini ongazisebenzisa. Ngokwesibonelo nxa ucabanga ngokuthi uzahamba yini embuthanweni othile kumbe hatshi, ungacabanga ngalokho okutshiwo liBhayibhili ngemibuthano exokozelayo. Okunye ongacabanga ngakho yikuthi lithini ngokuzilibazisa labantu abenza okubi, uphinde ucabange ngokuthi kumele uqakathekise izinto ezimayelana loMbuso ukwedlula loba yini oyifunayo.—Mat. 6:33; Rom. 13:13; 1 Khor. 15:33.
8. Kuyini ongakwenza ukuze uthole lokho okungakunceda ukuthi wenze isinqumo esihle? (Khangela lomfanekiso.)
8 Kwezinye izikhathi ungadinga ukuncediswa ukuze uthole lokho okungakunceda ukuthi wenze isinqumo esihle. Ungacela omunye umfowethu kumbe udadewethu osekhulile ukuthi akunike amacebo angakunceda. Lanxa kunjalo, okunye okungakunceda yikuchwayisisa. Kunengi ongakuthola emabhukwini ethu okuchwayisisa, ngokwesibonelo ungadinga eBhukwini Lokuchwayisisa LaboFakazi BakaJehova kumbe kwelithi Imibhalo Engakunceda Ukhonze UJehova. Khumbula ukuthi inhloso yakho iyabe ingeyokuthi wenze isinqumo esizathokozisa uJehova.
Cabanga ngokuthi uJehova uyibona njani indaba (Khangela indima 8) b
9. Kuyini esingakwenza ukuze sibe leqiniso lokuthi esikhetha ukukwenza kuzamthokozisa uJehova? (U-Efesu 5:17)
9 Singenzani ukuze sibe leqiniso lokuthi esizakhetha ukukwenza kuzamthokozisa uJehova? Kumele siqale simazi kuhle. IBhayibhili lithi: ‘Ukwazi oNgcwele kakhulu yikho ukuzwisisa.’ (Zaga. 9:10) Nxa sifuna ukumazi kuhle uJehova kumele sazi ukuthi nguNkulunkulu onjani, sibekwazi lokho akuhlosileyo, sibekwazi lokuthi uthandani kanye lokuthi uzondani. Zibuze, ‘Ngalokho esengikwazi ngoJehova, yisiphi isinqumo engingasenza esingamthokozisa?’—Bala u-Efesu 5:17.
10. Kungani okutshiwo liBhayibhili kuqakatheke kakhulu ukwedlula amasiko ethu loba lokho okufunwa zimuli zethu?
10 Kwezinye izikhathi kungadingeka ukuthi senze into engadanisa izihlobo kumbe abangane ukuze sithokozise uJehova. Ngokwesibonelo abanye abazali abayabe befuna ukuthi umntanabo ahlale kuhle bangafuna ukumendisela endodeni engumali iyavuza, kumbe emuntwini ongakhipha ilobolo elizwayo lanxa umuntu lo eyabe engakuqakathekisi ukukhonza. Abazali laba bangabe befuna sibili ukuthi indoda leyo inakekele indodakazi yabo ihlale kuhle. Kodwa yona kumele izibuze ukuthi, ‘Umuntu lo uzanginceda yini ukuthi ngiqhubeke ngingumngane kaJehova? UJehova yena uyibona njani indaba le?’ Impendulo siyithola kuMathewu 6:33. Ivesi le ikhuthaza amaKhristu ukuthi ‘afune kuqala uMbuso.’ Lanxa sibahlonipha abazali bethu futhi sihlonipha labantu emphakathini, esikuqakathekisa kakhulu yikuthokozisa uJehova.
CABANGISISA NGOKUTHI ISINQUMO SAKHO SIZAKUSA NGAPHI
11. Kuyini okuzakunceda ucabangisise ngokuthi isinqumo sakho sizakufikisa ngaphi? (UFiliphi 1:9, 10)
11 Nxa usuchwayisisile wabona ukuthi iBhayibhili lithini ngalokho ofuna ukukwenza, sekumele ucabangisise ngokuthi isinqumo sakho sizakufikisa ngaphi. (Bala uFiliphi 1:9, 10; khangela umcijo wokutaditsha wevesi le othi “full discernment” ku-Nguqulo Yomhlaba Omutsha YesiNgisi okuthiwa yi-Study Bible.) Nxa ungaba ngumuntu oqedisisayo uzenelisa ukubona ukuthi lokho ozakukhetha kuzakutshiya ungaphi. Ezinye izinqumo kulula ukuzenza, kodwa ezinye ziyabe zifuna udle amathambo engqondo. Nxa ungumuntu oqedisisayo uzakwenza izinqumo ezinhle lanxa kunzima.
12-13. Ukuqedisisa kungakunceda njani ukuthi ukhethe kuhle umsebenzi?
12 Ake sithi udinga umsebenzi, ubusubizwa endaweni ezimbili. Ungahlola konke okuphathelane lemisebenzi le, ngokwesibonelo ukuthi uyabe usenzani, kusetshenzwa isikhathi esinganani, kukhatshana okunganani njalo njalo. Kungabe kungelalutho olubi ngokuthi umKhristu ayenze imisebenzi le. Mhlawumbe ungakhetha omunye wakhona ngoba uyawuthanda futhi uyabona ukuthi uzabe uhola imali enengi. Kodwa kulokunye okuyabe kumele ucabange ngakho ungakakhethi.
13 Ngokwesibonelo, usungahlola ukuthi phakathi kwemisebenzi le yiwuphi ozakuvumela ukuthi ungene yonke imihlangano yebandla? Yiwuphi umsebenzi ozakuvumela ukuthi uthole isikhathi sokuncedisa imuli yakho ukuthi isondele kuJehova lokuthi ube leqiniso lokuthi ihlala ithokoza? Ukuzibuza imibuzo enjalo kuzakunceda ubone ukuthi ukukhonza uJehova kanye lokunakekela imuli yakho, ‘yizinto eziqakatheke kakhulu’ ukwedlula imali. Ungenza njalo uzakwenza isinqumo esizathokozisa uJehova.
14. Ukuba ngabantu abaqedisisayo lokuthanda abanye kuzasinceda njani ukuthi singabakhubi?
14 Ukuba ngabantu abaqedisisayo kuzasinceda lokuthi sicabangisise ngokuthi lokho esizakhetha ukukwenza kuzabaphatha njani abanye, besekusenza ukuthi ‘singabakhubi.’ (Flp. 1:10) Lokho kuqakatheke kakhulu ezintweni esizikhethela zona, ezinjengokugqoka lokuzilungisa. Kungabe kulezinye izigqoko esizithandayo kumbe kulendlela yokuzilungisa esiyithandayo. Kodwa singenzani nxa lokho esikuthandayo kungakhuba abanye ebandleni kumbe emphakathini? Nxa singabantu abaqedisisayo asisoze siqhubeke sisenza lokho okukhuba abanye. Uthando luzasinceda ukuthi senze okunceda “abanye” lokuthi singadlulisi amalawulo. (1 Khor. 10:23, 24, 32; 1 Thim. 2:9, 10) Singenza njalo sizakwenza izinqumo ezitshengisa ukuthi siyabathanda abanye lokuthi siyabahlonipha.
15. Kuyini okumele ucabangisise ngakho ungakenzi isinqumo esiqakathekileyo?
15 Nxa kulesinqumo esiqakathekileyo okumele usenze, cabangisisa ngokuthi kuyini okumele ukwenze ukuze siphumelele. UJesu wathi ‘sibale izindleko.’ (Luk. 14:28) Ngakho cabangisisa ngokuthi kuzakuthatha isikhathi esinganani ofuna ukukwenza lokuthi kuyini okunye okuzabe kufuneka, kanye lokuthi kuyini okunye okumele ukwenze ukuze isinqumo sakho siphumelele. Kungadingeka ukuthi lihlale phansi labangakini ukuze lixoxe ngokuthi umuntu ngamunye angenzani ukuze isinqumo leso siphumelele. Kuqakatheke ngani lokho? Nxa lingaxoxa lingabona lapho okungabe kudingeka ukuthi lilungisise khona kumbe lingaphuma lesinye isinqumo esingabe singcono kulalokho obusukukhethile. Nxa ungaxoxa lemuli yakho ulalele imibono yabo, kuzakuba lula ukuthi bakusekele besekusenza ukuthi isinqumo sakho siphumelele.—Zaga. 15:22.
YENZA ISINQUMO ESIZATHOKOZISA UJEHOVA
16. Kuyini okuzakunceda ukuthi wenze izinqumo ezinhle? (Khangela ibhokisi elithi “ Okungakunceda Wenze Izinqumo Ezinhle.”)
16 Uzakwenza isinqumo esihle nxa ungalandela zonke izinto esesixoxe ngazo. Kumele udinge konke okuphathelane lesinqumo ofuna ukusenza futhi uhlole lokuthi yiwaphi amavesi azakunceda wenze isinqumo esizathokozisa uJehova. Nxa ungenza njalo usungacela ukuthi akuncedise ukuze uphumelele ukwenza lokho okukhethileyo.
17. Kuyini okumele uhlale ukukhumbula okuzakunceda ukuthi wenze izinqumo ezinhle?
17 Lanxa usuke waphumelela ukwenza ezinye izinqumo, khumbula ukuthi okuzakunceda kakhulu ukuthi wenze izinqumo ezinhle yikucela ukuthi uJehova akuphe ukuhlakanipha, hatshi ukuthemba okwakho ukukhalipha kumbe lokho osuke waphumelela ukukwenza. Nguye kuphela ongakunceda ukuthi ube lolwazi lokuzwisisa kanye lokuqedisisa ukuze ukhethe kuhle. (Zaga. 2:1-5) UJehova kasoze ayekele ukukuncedisa ukuthi wenze izinqumo ezizamthokozisa.—Hubo. 23:2, 3.
INGOMA 28 Ukuba Ngumngane KaJehova
