1. U-3 Johane 3, 4 uthi kuyini okusenza sithokoze?

AKE ucabange ukuthi umphostoli uJohane wathokoza njani lapho esizwa ukuthi labo abancedisa ukufunda iqiniso babeqhubeka bekhonza uJehova bethembekile. Babehlangana lenhlupho ezinengi futhi uJohane wayesebenza nzima eqinisa ukholo lwamaKhristu la aqotho ayewabona enjengabantwabakhe. Lathi siyathokoza nxa sibona abantwabethu kumbe labo esibancedisa ukufunda iqiniso bezinikela kuJehova njalo beqhubeka bemkhonza.​—Bala u-3 Johane 3, 4.

2. Yayingeyani inhloso yezincwadi ezabhalwa nguJohane?

² Ngo-98 C.E., * kumele ukuthi uJohane wayehlala e-Efesu kumbe eduzane ledolobho lelo. Mhlawumbe wathuthela lapho esekhululiwe ejele eyayisesihlengeni sePhathimosi. Kungenzeka lesi yiso isikhathi uJehova amphefumulela ukuthi abhale izincwadi ezintathu. Inhloso yalezozincwadi yayingeyokukhuthaza amaKhristu aqotho ukuthi ahlale elokholo kuJesu futhi aqhubeke ehamba eqinisweni.

3. Yiphi imibuzo esizayiphendula?

³ UJohane nguye yedwa umphostoli owayesaphila futhi wayekhathazeke ngokuthi abantu ababefundisa amanga basebephambanisa amabandla. * (1 Joh. 2:18, 19, 26) Labo bahlamuki babesithi bayamazi uNkulunkulu kodwa babengayilaleli imilayo yakhe. Esihlokweni lesi sizaxoxa ngeseluleko sikaJohane njalo sizaphendula imibuzo le emithathu: Kumele senzeni ukuze sihambe eqinisweni? Yiziphi izinto ezingenza siyekele ukuhamba eqinisweni? Singancedisana njani ukuthi sihlale siseqinisweni?

4. Ngokwalokho okutshiwo ku-1 Johane 2:3-6 lo-2 Johane 4, 6, kumele senzeni ukuze sihambe eqinisweni?

⁴ Kumele sibelazi iqiniso eliseLizwini likaNkulunkulu iBhayibhili ukuze sihambe kilo. Kanti njalo kumele ‘silalele imilayo yakhe.’ (Bala u-1 Johane 2:3-6; 2 Johane 4, 6.) UJesu uyisibonelo esihle sokulalela uJehova. Ngakho enye indlela eqakathekileyo esilalela ngayo uJehova yikulandela eduze amanyathelo kaJesu.​—Joh. 8:29; 1 Phet. 2:21.

5. Kuyini okumele singakuthandabuzi?

⁵ Nxa sifuna ukuqhubeka sihamba eqinisweni kumele singathandabuzi ukuthi uJehova unguNkulunkulu weqiniso lokuthi konke asitshela khona eLizwini lakhe kuliqiniso. Kumele singathandabuzi lokuthi uJesu unguMesiya. Abantu abanengi lamuhla bayathandabuza ukuthi uJesu wagcotshwa ukuthi abe yiNkosi yoMbuso kaNkulunkulu. UJohane waxwayisa ukuthi ‘kulamaqili amanengi’ ayezadukisa labo ababethandabuza iqiniso elimayelana loJehova loJesu. (2 Joh. 7-11) Wabhala wathi: “Oqamba amanga akusilowo ophika ukuthi uJesu unguKhristu yini?” (1 Joh. 2:22) Ukutaditsha iLizwi likaNkulunkulu yikho kuphela okungenza ukuthi singaqilwa. Nxa singalitaditsha sizabamazi uJehova loJesu. (Joh. 17:3) Kanti njalo kasisoze sithandabuze lakancane ukuthi siseqinisweni.

6. Kuyini okungenza abasakhulayo bayekele ukuhamba eqinisweni?

⁶ Wonke amaKhristu kumele ananzelele ukuthi angadukiswa zimfundiso zabantu. (1 Joh. 2:26) Abasakhulayo yibo kakhulu okumele bawuqaphele umjibila lo. Udade okuthiwa ngu-Alexia * oleminyaka angu-25 ovela eFrance uthi: “Ngisasesikolo ngafunda ukuthi izinto zazenzakalela njalo ngafunda lezinye izimfundiso zabantu futhi lokhu kwangenza ngathandabuza iqiniso. Kwesinye isikhathi izimfundiso lezi ngangizibona zilengqondo. Kodwa ngakubona kungaqondanga ukuthi ngilahle lokho okufundiswa liBhayibhili besengikholwa konke engikufundiswa ngamatitsha ami.” U-Alexia wabala ibhuku elithi Life—How Did It Get Here? By Evolution or by Creation? Ngemva kwamaviki ambalwa konke  ukuthandabuza kwakhe kwaphela. Uthi: “Ngazibonela ukuthi iBhayibhili lileqiniso. Futhi ngananzelela ukuthi nxa ngingalandela lokho elikutshoyo ngizathokoza njalo ngibe lokuthula.”

7. Kuyini okufanele sikunanzelele njalo kungani?

⁷ Wonke amaKhristu, asakhulayo lasekhulile kumele ananzelele ukuthi angenzi angani akhonza uJehova ngapha esenza izinto ezimbi. UJohane wathi asingeke sihambe eqinisweni ngapha sisenza izinto ezimbi. (1 Joh. 1:6) Nxa sifuna uJehova athokoze ngathi kumele sihlale sikhumbula ukuthi ubona konke esikwenzayo. Lanxa abantu bengakuboni esikwenza ekusithekeni kuJehova konke kusegcekeni.​—Heb. 4:13.

8. Kuyini okumele sikuxwaye?

⁸ Kumele sixwaye indlela abantu bomhlaba lo ababona ngayo isono. Umphostoli uJohane wabhala wathi: “Nxa sisithi, ‘Kasilasono,’ siyaziyenga.” (1 Joh. 1:8) Ngezinsuku zikaJohane, abahlamuki babesithi umuntu wayengenza izinto uNkulunkulu athi zimbi kodwa aqhubeke engumngane wakhe. Lamuhla siphila phakathi kwabantu abacabanga njalo. Abanengi abathi bakholwa kuNkulunkulu abavumelani lendlela abona ngayo isono ikakhulu endabeni zemacansini. Kulokunye ukuziphatha kwezemacansini uJehova athi kubi kodwa abantu laba bathi umuntu ukhululekile ukukwenza nxa efuna.

9. Abasakhulayo kubanceda njani ukuhlala belalela okutshiwo liBhayibhili?

⁹ Kungabanzima ukuthi amaKhristu asakhulayo aqhubeke ebona ezemacansini ngendlela eqondileyo nxa abasebenza labo kumbe abafunda labo bengavumelani lokutshiwo liBhayibhili ngendaba le. Lokhu kwenzakala komunye umfowethu okuthiwa ngu-Aleksandar. Uthi: “Amanye amankazana esikolo azama ukungiyenga ukuthi ngilale lawo. Ngala, yikho athi ngiyisitabane.”  Nxa lokhu kungenzakala kuwe, khumbula ukuthi ukulalela okutshiwo liBhayibhili kuzakwenza ungakhathazeki, uhlale ulesithunzi lempilakahle njalo ungumngane kaJehova. Sonke isikhathi nxa ungayala ukulingwa kuba lula ukuthi uqhubeke usenza okuhle. Ungakhohlwa lokuthi indlela engaqondanga abantu bomhlaba lo ababona ngayo ezemacansini ivela kuSathane. Ngakho nxa unganqoba isilingo uyabe ‘umnqobile omubi.’​—1 Joh. 2:14.

10. U-1 Johane 1:9 usinceda njani ukuthi sikhonze uJehova silomzwangedwa ohlanzekileyo?

¹⁰ Siyavuma ukuthi uJehova nguye olelungelo lokutsho ukuthi yikuphi okuyisono futhi senza konke okusemandleni ethu ukuthi singakwenzi. Kodwa nxa singenza isono siyathandaza kuJehova sivume ukuthi siphambanisile. (Bala u-1 Johane 1:9.) Kanti njalo nxa singenza isono esikhulu siyacela uncedo ebadaleni bebandla abayibo ababekwe nguJehova ukuthi basinakekele. (Jak. 5:14-16) Lanxa kunjalo akumelanga sihlale sizithonisisa ngamaphutha esawenza kudala ngoba uBaba wethu olothando wasenzela umhlatshelo ngeNdodana yakhe ukuze izono zethu zithethelelwe. Nxa uJehova esithi uzazithethelela izoni eziphendukayo uyabe eqinisile sibili. Yikho akulalutho olungasivimba ukuthi simkhonze silomzwangedwa ohlanzekileyo.​—1 Joh. 2:1, 2, 12; 3:19, 20.

11. Singenzani ukuze ukholo lwethu lungaxegiswa zimfundiso zabahlamuki?

¹¹ Kumele sixwaye izimfundiso zabahlamuki. Kusukela kwabunjwa ibandla lamaKhristu, uDeveli ubesebenzisa amaqili amanengi ukuze axegise ukholo lwezinceku zikaNkulunkulu ezithembekileyo. Ngakho kumele sibekwazi ukwehlukanisa amanga leqiniso. * Izitha zingasebenzisa i-inthanethi kumbe ezokuxhumana zizama  ukusenza singathembi uJehova futhi singabathandi abazalwane. Ungaqali ukuwakholwa amanga anjalo ngoba avela kuSathane!​—1 Joh. 4:1, 6; Isam. 12:9.

12. Kungani kufanele siliqakathekise kakhulu iqiniso esilifundileyo?

¹² Nxa singafuni ukuthi uSathane axegise ukholo lwethu kumele sithembe uJesu ngokupheleleyo futhi sikholwe ukuthi nguye osetshenziswa nguJehova ukuthi agcwalise injongo yakhe. Kanti njalo kufanele sithembe inceku ethembekileyo lehlakaniphileyo ngoba yiyo kuphela uJehova ayisebenzisayo ukuthi akhokhele inhlanganiso yakhe. (Mat. 24:45-47) Ukutaditsha iLizwi likaNkulunkulu nsuku zonke yikho okuzasinceda ukuthi simthembe kakhulu uJesu kanye lenceku ethembekileyo lehlakaniphileyo. Nxa singalitaditsha nsuku zonke ukholo lwethu luzafanana lesihlahla esilempande ezitshonayo. UPhawuli watsho okufananayo lapho ebhalela ibandla laseKholose. Wathi: “Njengoba selamukele uKhristu uJesu iNkosi, qhubekani lihamba limanyene laye, ligxile kuye njengempande, lisakhelwa kuye futhi liqiniswa ekukholweni.” (Kol. 2:6, 7) Nxa singasebenza nzima ukuthi siqinise ukholo lwethu, uSathane lalabo abamsekelayo abasoze basiyekelise ukuhamba eqinisweni.​—2 Joh. 8, 9.

13. Kuyini okumele sikukhangelele njalo kungani?

¹³ Kumele sikhangelele ukuthi abantu bomhlaba lo basizonde. (1 Joh. 3:13) UJohane usikhumbuza ukuthi “umhlaba wonke ungaphansi kwamandla omubi.” (1 Joh. 5:19) USathane ulokhu ezonda ngamandla njengoba ukuphela komhlaba lo kusondela. (Isam. 12:12) Kasihlaseli esebenzisa izindlela ezicatshileyo kuphela njengokusilinga ukuthi siziphathe kubi kwezemacansini kumbe ngamanga akhulunywa ngabahlamuki kodwa uphinda asihlasele okusegcekeni ngokusihlukuluza okulolunya. USathane uyakwazi ukuthi ulesikhathi esifitshane yikho ezama ngamandla wonke ukumisa umsebenzi wethu wokutshumayela lokusenza singabi lokholo. Ngakho asimangali ukuthi kulamanye amazwe lapho umsebenzi wethu ongavunyelwa khona ngokupheleleyo lalapho eminye imisebenzi yethu engavunyelwa khona. Lanxa kunjalo abafowethu labodadewethu emazweni lawo bayaqinisela. Benza kukhanye ukuthi sizanqoba kuphela kungelani lokuthi omubi usihlasela njani!

14. Yiphi enye indlela esingancedisa ngayo abafowethu labodadewethu ukuthi bahlale beseqinisweni?

¹⁴ Kumele sibatshengise isihawu abafowethu labodadewethu ukuze bahlale beseqinisweni. (1 Joh. 3:10, 11, 16-18) Akumelanga sithandane kuphela nxa izinto zihamba kuhle kodwa kumele sithandane lalapho sekulenhlupho. Ngokwesibonelo, ukhona yini omaziyo ofelweyo odinga ukududuzwa kumbe ukuncediswa ngezinye indlela? Bakhona yini abazalwane abalahlekelwe yimpahla yabo ngenxa yomonakalo wemvelo njalo abadinga ukuncediswa ukwakha kutsha amaWolu oMbuso loba izindlu zabo? Kulokukhuluma nje ngomlomo, okuqakatheke kakhulu yikutshengisa ngezenzo ukuthi siyabathanda kakhulu abafowethu labodadewethu futhi silesihawu.

15. U-1 Johane 4:7, 8 uthi kuyini okumele sikwenze?

¹⁵ Nxa sithandana siyabe silingisela uBaba wethu osithandayo osezulwini. (Bala u-1 Johane 4:7, 8.) Indlela eqakathekileyo esitshengisa ngayo ukuthi siyathandana yikuthethelelana. Ngokwesibonelo, omunye umuntu angakhuluma loba enze into ekuzwisa  ubuhlungu. Uyabe utshengisa ukuthi uyamthanda nxa umthethelela ukhohlwe ngakwenzileyo. (Kol. 3:13) Umfowethu okuthiwa ngu-Aldo wazonda lapho omunye umfowethu ayemthemba ekhuluma kubi ngabantu bakibo. Uthi, “Ngangihlala ngicela uJehova ukuthi angincede ngingacabangi ukuthi umfowethu ngumuntu omubi.” Kodwa kulokunye u-Aldo akwenzayo. Wacela umfowethu lo ukuthi bahambe bonke ekutshumayeleni. Ngesikhathi besekutshumayeleni wamchasisela ukuthi ayekutshilo kwakumphathe njani. U-Aldo uthi: “Wathi esezwe indlela engangizizwa ngayo ngalokho akukhulumayo waxolisa. Indlela akhuluma ngayo exolisa yangenza ngabona ukuthi uyazisola sibili. Saqhubeka singabangane futhi sakhohlwa ngokwakwenzakele.”

16-17. Kumele sizimisele ukwenzani?

¹⁶ Umphostoli uJohane wayebathanda kakhulu abafowabo labodadewabo futhi wayefuna babe lokholo oluqinileyo. Lokho abatshela khona ezincwadini zakhe ezintathu kutshengisa ukuthi wayebathanda lokuthi wayelendaba labo sibili. Kuyasikhuthaza kakhulu ukwazi ukuthi amadoda labesifazana abanjengaye bagcotshiwe ukuthi babuse loKhristu.​—1 Joh. 2:27.

¹⁷ Kwangathi singasilalela iseluleko esixoxe ngaso. Kasizimiseleni ukuhamba eqinisweni ngokulalela uJehova kukho konke esikwenzayo. Taditsha iLizwi lakhe njalo ulithembe. Woba lokholo oluqinileyo kuJesu. Xwaya izimfundiso zabantu lezabahlamuki. Ungaqali ukwenza angani ukhonza uJehova ngapha usenza izinto ezimbi futhi ungavumi ukuyengwa ukuthi wenze isono. Phila ngendlela uNkulunkulu ayifunayo. Kanti njalo kasithetheleleni abafowethu labodadewethu nxa besiphambanisele njalo sibasize nxa bedinga uncedo ukuze bangadani kumbe baphele amandla. Nxa singakwenza lokhu sizaqhubeka sihamba eqinisweni kungelani lobunzima esihlangana labo.