1. Kuyini uJehova akwenzele khona?

UNGAKABI nguFakazi kaJehova waqala wezwa “izindaba ezinhle” ebazalini bakho loba kosebenza laye kumbe kofunda laye, loba kuboFakazi abakuvakatshela ngesikhathi betshumayela. (Mak. 13:10) Ngemva kwalokho kwaba lomuntu owasebenzisa isikhathi esinengi lamandla efunda lawe iBhayibhili. Usufunda waqalisa ukumthanda uJehova njalo wananzelela ukuthi laye uyakuthanda. UJehova wakudonsela eqinisweni futhi khathesi usulethemba lokuphila kuze kube nini lanini njengoba usungumfundi kaJesu Khristu. (Joh. 6:44) Akuthandabuzwa ukuthi uyambonga kakhulu uJehova ngokuthi wasebenzisa omunye umuntu ukuthi akufundise iqiniso lokuthi wakwamukela ukuthi ube ngomunye wezinceku zakhe.

2. Sizaxoxa ngani esihlokweni lesi?

² Khathesi njengoba sesilazi iqiniso silesibusiso sokuncedisa abanye ukuthi labo bahambe endleleni eya ekuphileni. Kungaba lula ukuthi sitshumayeze abantu endlini ngendlu kodwa kube nzima ukucela ukuthi sifunde labo kumbe ukuqhuba isifundo seBhayibhili. Nxa lakuwe kunjalo, isihloko lesi sizakunceda. Sizaxoxa ngokuthi kuyini okusifuqa ukuthi senze abafundi. Sizaphinda sixoxe ngokuthi singenzani ukuze senelise ukuqhuba izifundo zeBhayibhili lanxa kusithwalisa nzima. Kodwa asiqaleni ngokuxoxa ngokuthi kungani kumele sitshumayeze abantu futhi sibafundise izindaba ezinhle.

3. Kungani sitshumayela?

³ Ngesikhathi uJesu esemhlabeni, walaya abalandeli bakhe ukuthi benze umsebenzi olengxenye ezimbili. Okokuqala, wabatshela  ukuthi batshumayele izindaba ezinhle zoMbuso futhi wabatshengisa ukuthi bakwenze njani lokho. (Mat. 10:7; Luk. 8:1) Ngokwesibonelo, wabatshela lokho okwakumele bakwenze nxa abantu belalela izindaba zoMbuso lalokho okwakumele bakwenze nxa bengalaleli. (Luk. 9:2-5) Waphinda wachasisa lokuthi bazatshumayeza abantu abanengi ezindaweni ezinengi lapho esithi bazanika ‘ubufakazi ezizweni zonke.’ (Mat. 24:14; ImiSeb. 1:8) Abafundi kwakumele batshele abantu ngoMbuso kaNkulunkulu langalokho ozakwenza kungelani lokuthi bayalalela kumbe kabalaleli.

4. Ngokwalokho okutshiwo kuMathewu 28:18-20, kuyini okunye okumele sikwenze ngaphandle kokutshumayela ngoMbuso?

⁴ Yiphi ingxenye yesibili yomlayo uJesu awunika abalandeli bakhe? Wabatshela ukuthi bafundise abantu ukuthi balandele zonke izinto ayebalaye zona. Kodwa umsebenzi wokutshumayela lowokufundisa kwakumele wenziwe ngamaKhristu akuqala kuphela yini njengalokho okutshiwo ngabanye? Hatshi, ngoba uJesu wathi umsebenzi lo oqakathekileyo uzakwenziwa “kuze kube yisiphetho somumo lo wezinto.” (Bala uMathewu 28:18-20.) Kungenzakala ukuthi wanika umlayo lo ngesikhathi ebonakala kubafundi bakhe abedlula 500. (1 Khor. 15:6) Kanti njalo embonweni awunika uJohane wakwenza kwacaca ukuthi ufuna bonke abafundi bakhe bancedise abantu ukuthi bafunde ngoJehova.—Isam. 22:17.

5. Ku-1 Khorinte 3:6-9 yiwuphi umzekeliso uPhawuli awusebenzisayo ukuze atshengise ukuthi ukutshumayela lokufundisa kuhamba ndawonye?

⁵ Umphostoli uPhawuli wafanisa umsebenzi wokwenza abafundi lowokulima, etshengisa ukuthi akumelanga siphelele ekuhlanyeleni kuphela. Watshela abaseKhorinte wathi: ‘Mina ngahlanyela, u-Apholo wathelela. Lina liyinsimu kaNkulunkulu elinywayo.’ (Bala u-1 Khorinte 3:6-9.) Njengoba siyizisebenzi ‘ensimini kaNkulunkulu,’ siyahlanyela, sithelele besesiqhubeka sikhangela ukuthi kukhula kuhle yini. (Joh. 4:35) Lanxa kunjalo, siyakwazi ukuthi uNkulunkulu nguye okhulisayo.

6. Umsebenzi wethu wokufundisa ugoqelani?

⁶ Sidinga labo ‘abalesifiso sokuthola ukuphila okungapheliyo.’ (ImiSeb. 13:48) Ukuze sibancedise babe ngabafundi, kumele senze izinto ezintathu ezilandelayo: Kufanele sibasize bazwisise, bamukele futhi basebenzise izinto abazifunda eBhayibhilini. (Joh. 17:3; Kol. 2:6, 7; 1 Thes. 2:13) Sonke ebandleni singancedisa abafunda iBhayibhili ngokubatshengisa ukuthi siyabathanda langokubamukela ngazo zombili nxa bebuya emihlanganweni yebandla. (Joh. 13:35) Lowo oqhuba isifundo seBhayibhili kungadingeka ukuthi asebenzise isikhathi esinengi lamandla encedisa umfundi ukuthi adilize “izinto eziqine njengezinqaba,” kungaba yilokho akukholwayo kumbe imikhuba alayo. (2 Khor. 10:4, 5) Kungathatha izinyanga ezinengi ukuncedisa umfundi ukuthi enze utshintsho empilweni yakhe lokumsiza ukuthi afanele ukubhabhathizwa. Kodwa ungenza njalo umsebenzi wakho awusoze uphelele emoyeni.

7. Kuyini okusifuqa ukuthi sitshumayele futhi senze abafundi?

⁷ Kungani sitshumayela futhi sisenza abafundi? Isizatho sokuqala yikuthi siyamthanda uJehova. Nxa usenza konke okusemandleni akho ukuthi ulalele umlayo wokutshumayela lowokwenza abafundi, uyabe utshengisa ukuthi uyamthanda uNkulunkulu. (1 Joh. 5:3) Cabanga ngalokhu: Ukuthanda uJehova yikho okwakufuqa ukuthi uqalise ukutshumayela endlini ngendlu. Kodwa kwakulula yini  ukukwenza lokho? Mhlawumbe kwakungalula. Ngesikhathi usekutshumayeleni okokuqala ngqa wawusesaba yini? Akuthandabuzwa ukuthi wawusesaba! Kodwa wawukwazi ukuthi lo ngumsebenzi uJesu afuna uwenze futhi wamlalela. Kanti njalo kumele ukuthi wathi usutshumayele okwesikhathi esithile wawukubona sokulula. Kodwa kuthiwani ngokuqhuba isifundo seBhayibhili? Kuyakwesabisa yini? Engxenye. Kodwa nxa ungathandaza kuJehova umcele ukuthi akunike isibindi sokuthi ucele ukufunda lomuntu iBhayibhili, angakuncedisa ukuthi uzimisele ukwenza abafundi.

8. Ngokwalokho okutshiwo kuMakho 6:34, kuyini okunye okusifuqa ukuthi sifundise abantu?

⁸ Isizatho sesibili esenza sitshumayele yikuthi siyabathanda abantu. Ngelinye ilanga uJesu labafundi bakhe babedinwe befile ngenxa yokuthi babetshumayele okuzwayo. Babedinga indawo yokuthi baziphumulele kodwa ixuku elikhulu labalandela. UJesu walizwela usizi waseqalisa ukulifundisa “izinto ezinengi.” (Bala uMakho 6:34.) Wasebenza okuzwayo lanxa wayediniwe. Kungani wenza njalo? Wayekwazi ukuthi abantu ababesexukwini babesizwa njani. Wabona ukuthi babehlupheka lokuthi babedinga ukunikwa ithemba, yikho wabanceda. Labantu lamuhla balenhlupho njalo badinga ukunikwa ithemba lanxa bengakhanya angathi bayathokoza futhi bayasuthiseka ngempilo. Banjengezimvu eziphonguzula nje, ezingelamelusi ongaziqondisa. Umphostoli uPhawuli wathi abantu abanje kabalaNkulunkulu futhi kabalathemba. (Efe. 2:12) ‘Basendleleni eyisa ekubhujisweni.’ (Mat. 7:13) Nxa singacabanga ngokuthi abantu abasensimini yethu kumele bamazi uNkulunkulu, uthando lozwelo kuzasifuqa ukuthi sibancede futhi indlela engcono kulazo zonke esingakwenza ngayo lokhu yikufunda labo iBhayibhili.

9. Ngokwalokho okutshiwo kuFiliphi 2:13, uJehova angakuncedisa njani?

⁹ Engxenye okwenza wesabe ukucela ukufunda lomuntu iBhayibhili yikuthi uyakwazi ukuthi uzaqeda isikhathi esinengi ulungiselela isifundo futhi usiqhuba. Nxa kunjalo, tshela uJehova indlela ozizwa ngayo. Mcele akunike isifiso sokudinga umuntu ozafunda laye iBhayibhili. (Bala uFiliphi 2:13.) Umphostoli uJohane wasiqinisekisa ukuthi uNkulunkulu uyayiphendula imithandazo ehambelana lentando yakhe. (1 Joh. 5:14, 15) Yikho ungathandabuzi ukuthi uJehova uzakuncedisa ukuthi ube lesifiso sokwenza abafundi.

10-11. Kuyini okungenza kube nzima ukuthi siqhube isifundo seBhayibhili?

¹⁰ Siyawuqakathekisa umsebenzi wethu wokwenza abafundi kodwa sihlangana lobunzima obungabangela ukuthi singenzi konke okusemandleni ethu kuwo. Ake sixoxe ngobunye bakhona lokuthi singabunqoba njani.

¹¹ Singehluleka ukwenza lokho esifisa ukukwenza. Ngokwesibonelo, abanye abamemezeli sebekhulile kumbe kabaphilanga kuhle emzimbeni. Lawe unjalo yini? Nxa unjalo, cabanga ngokunye esikufundileyo ngesikhathi somkhuhlane wekhorona. Sifunde ukuthi singenelisa ukuqhuba izifundo zeBhayibhili sisebenzisa ezempucuko. Yikho ungenelisa ukuqalisa ukufunda lomuntu futhi uqhube isifundo seBhayibhili uzihlalele endlini yakho. Kulokunye futhi esikufundileyo. Abanye abantu bayafuna ukufunda iBhayibhili kodwa kabatholakali ngezikhathi abafowethu labodadewethu abajayele ukutshumayela ngazo. Bangabe betholakala ekuseni kakhulu kumbe ebusuku. Ungenelisa yini ukuqhuba isifundo seBhayibhili ngalezozikhathi?  UJesu wafundisa uNikhodemu ebusuku, okungabe kwakuyisikhathi uNikhodemu ayesibona singcono.—Joh. 3:1, 2.

12. Kuyini okwenza siqiniseke ukuthi singenelisa ukufundisa kuhle?

¹² Singabona angani kasenelisi ukuqhuba isifundo seBhayibhili. Mhlawumbe sicabanga ukuthi ukuze sifunde lomuntu iBhayibhili kumele siqale sibe lolwazi olunengi kumbe sibe zingcitshi zokufundisa. Nxa uzizwa njalo, nanzi izinto ezintathu ezingakunceda ubone ukuthi ungenelisa sibili ukufundisa umuntu. Okokuqala, uJehova ukubona ufanele ukuthi ufundise abantu. (2 Khor. 3:5) Okwesibili, uJesu ‘olamandla wonke ezulwini lasemhlabeni’ ukulaye ukuthi ufundise. Lokhu kutshengisa ukuthi uyakuthemba. (Mat. 28:18) Okwesithathu, themba ukuthi abanye bazakuncedisa. UJesu wathembela kulokho uYise ayemfundise ukuthi akutsho, lawe ungenza okufananayo. (Joh. 8:28; 12:49) Kanti njalo ungacela umbonisi weqembu lenu kumbe iphayona loba ummemezeli oyingcitshi ukuthi akuncedise uqalise futhi uqhube isifundo seBhayibhili. Okunye okungakunceda ukuthi uthuthukise indlela ofundisa ngayo yikujoyina omunye wabamemezeli laba nxa eqhuba izifundo zakhe.

13. Kungani kumele sizimisele ukutshintsha?

¹³ Kungasithwalisa nzima ukutshintsha indlela esifundisa ngayo lokusebenzisa amathuluzi amatsha okufundisa. Indlela esesiqhuba ngayo izifundo zeBhayibhili isitshintshile. Ibhuku esesilisebenzisa ukuqhuba izifundo zeBhayibhili elithi Ungathokoza Kuze Kube Nini Lanini!, lidinga ukuthi silungiselele futhi siqhube isifundo ngendlela etshiyene laleyo ebesisenza ngayo. Sesibala indima ezilutshwana kodwa sixoxe kakhulu lomfundi. Sesisebenzisa amavidiyo amanengi lamathuluzi atholakala kwezempucuko njenge-JW Library^®. Nxa ungenelisi ukuwasebenzisa amathuluzi la, cela omunye ukuthi akuncedise. Thina abantu mdabuko wethu kasithandi ukutshintsha indlela esenza ngayo izinto. Yikho kunzima ukuthi sijayele indlela entsha yokwenza izinto. Kodwa uJehova labafowethu labodadewethu bazasincedisa ukuthi siyijayele futhi sikukholise ukufunda labantu iBhayibhili. Omunye umzalwane oliphayona wathi indlela entsha yokufundisa “imnandi kumfundi lakulowo ofundisayo.”

14. Kuyini okumele sikukhumbule nxa sitshumayela endaweni okunzima ukuthola izifundo zeBhayibhili futhi u-1 Khorinte 3:6, 7 usikhuthaza njani?

¹⁴ Singabe sitshumayela endaweni okunzima ukuthola izifundo zeBhayibhili. Abantu bangabe bengafuni ukusilalela kumbe besiphikisa. Kuyini okungasinceda sibe lethemba lokuthi ngelinye ilanga bazalalela? Yikukhumbula ukuthi emhlabeni lo omi manzonzo, impilo zabantu zingaphongutshintsha. Labo ababengalaleli bangacina sebenanzelela ukuthi kumele bakhokhelwe nguNkulunkulu. (Mat. 5:3) Abanye ababengafuni ukuthatha amabhuku ethu bacina sebevuma ukufunda iBhayibhili. Siyakwazi lokuthi uJehova uyiNkosi yokuvuna. (Mat. 9:38) Ufuna siqhubeke sihlanyela futhi sithelela kodwa nguye okhulisayo. (1 Khor. 3:6, 7) Kanti njalo kuyasikhuthaza ukukhumbula ukuthi lanxa kungelasifundo seBhayibhili esisiqhubayo khathesi, uJehova usinika umvuzo ngenxa yokuthi sisebenze nzima, hatshi ngenxa yokuthi sihambise amabhuku amanengi kumbe ukuthi siqhuba izifundo zeBhayibhili. *

15. UJehova uzwa njani nxa umuntu evuma ukufunda iBhayibhili futhi esebenzisa lokho akufundayo?

¹⁵ UJehova uyathokoza nxa umuntu esamukela iqiniso eliseBhayibhilini abeselitshela abanye. (Zaga. 23:15, 16) Kumele ukuthi uyathokoza okuzwayo nxa ebona abantu bakhe betshiseka emsebenzini wokutshumayela lowokufundisa. Ngokwesibonelo, lanxa bekulomkhuhlane obuhlasele umhlaba wonke, ngomnyaka wenkonzo ka-2020 siqhube izifundo ezingu-7 705 765 futhi sancedisa abantu abangu-241 994 ukuthi bazinikele kuJehova futhi babhabhathizwe. Abafundi laba abatsha labo bazaqhuba izifundo zeBhayibhili benze abanye abafundi. (Luk. 6:40) Akuthandabuzwa ukuthi uJehova uyathokoza kakhulu nxa esibona sisenza umsebenzi wokwenza abafundi.

16. Kuyini esingazama ukukwenza?

¹⁶ Ukwenza abafundi ngumsebenzi onzima, kodwa uJehova uzasincedisa ukuthi sifundise abantu ukuthi bamthande. Ungazama yini ukuba lesifundo seBhayibhili? Kuzakumangalisa okungenzakala nxa ungasebenzisa loba yiliphi ithuba ukuthi ucele abantu ohlangana labo ukuthi ufunde labo iBhayibhili. Siyaqiniseka ukuthi uJehova uzayibusisa imizamo yethu.

17. Sizezwa njani nxa singaqhuba isifundo seBhayibhili?

¹⁷ Silesibusiso esimangalisayo sibili sokutshumayeza abantu lesokubafundisa iqiniso. Umsebenzi lo wenza sithokoze okwamagama. Umphostoli uPhawuli owanceda abanengi eThesalonika ukuthi babe ngabafundi waveza indlela ayezizwa ngayo lapho esithi: “Ngobani abalithemba lethu kumbe injabulo yethu loba umqhele wethu wokuthokoza phambi kweNkosi yethu uJesu ngesikhathi sokuba khona kwayo? Kayisini yini? Yini sibili eliyinkazimulo yethu lenjabulo yethu.” (1 Thes. 2:19, 20; ImiSeb. 17:1-4) Banengi lamuhla abazizwa njengoPhawuli. Udadewethu uStéphanie lomkakhe sebencedise abantu abanengi ukuthi babhabhathizwe. Uthi: “Akulanto ethokozisa ukwedlula ukuncedisa abantu ukuthi bazinikele kuJehova.”