1. UJehova wahle wenzani ngemva kokona kuka-Adamu lo-Eva? (UGenesisi 3:15)

 U-ADAMU lo-Eva bathi besanda ukona uJehova wakhuluma isiphrofetho esiqakathekileyo esasizanika izizukulwane zabo ithemba. Isiphrofetho lesi sitholakala kuGenesisi 3:15, The Holy Bible in Ndebele.—Bala. b

2. Kungani isiphrofetho lesi siqakathekile?

² Isiphrofetho lesi sitholakala ebhukwini lokuqala leBhayibhili kodwa okutshiwo ngamabhuku wonke eBhayibhili kuyangenelana laso. Isiphrofetho lesi sinjenge-glue ebambanisa amakhasi ebhuku ndawonye. Amazwi akuGenesisi 3:15 abambanisa konke okukhulunywa ngamabhuku eBhayibhili ukuze kuphume umlayezo owodwa wokuthi kwakuzaba loMkhululi owayezathunywa ukuthi atshabalalise uDeveli labo bonke abalandeli bakhe ababi. c Lezi zindaba ezinhle sibili kulabo abathanda uJehova.

3. Sizaxoxa ngani esihlokweni lesi?

³ Esihlokweni lesi sizaphendula imibuzo elandelayo emayelana lesiphrofetho esikuGenesisi 3:15: Ngobani okukhulunywa ngabo evesini le? Isiphrofetho lesi sigcwaliseka njani njalo sisinceda njani?

4. Ngubani inyoka futhi sikwazi njani lokhu?

⁴ KuGenesisi 3:14 lo-15 kukhulunywa ngenyoka, inzalo  yayo, owesifazana lenzalo yakhe. IBhayibhili liyasinceda sizwisise ukuthi kutshiwo obani lapha. d Asiqaleni ngenyoka. Inyoka ngokwayo yayingeke ikuzwisise okwatshiwo nguJehova esivandeni sase-Edeni. Lokhu kutsho ukuthi uJehova wayesahlulela umuntu othile. Ngubani umuntu lo? ISambulo 12:9 sithi ‘yinyoka yokuqala’ ebizwa ngokuthi nguSathane. Kodwa ngobani abayinzalo yenyoka?

5. Ngobani abayinzalo yenyoka?

⁵ Nxa iBhayibhili likhuluma ngenzalo liyabe lisitsho abantu abacabanga njalo benze njengalowo ofaniswa loyise. Yikho inzalo kaSathane igoqela izingilosi ezatshiya umsebenzi wazo ezulwini ngesikhathi sikaNowa kanye labantu abaphikisa uJehova uNkulunkulu lezinceku zakhe njengoyise uDeveli.—Gen. 6:1, 2; Joh. 8:44; 1 Joh. 5:19; Jud. 6.

6. Kungani kwakungeke kwenze ukuthi owesifazana okukhulunywa ngaye kube ngu-Eva?

⁶ Khathesi asiboneni ukuthi ngubani owesifazana. Kwakungeke kube ngu-Eva. Ngenxa yani? Esinye isizatho yikuthi isiphrofetho lesi sithi inzalo yowesifazana ‘yayizachoboza’ ikhanda lenyoka. Njengoba sesibonile, inyoka nguSathane oyisidalwa somoya njalo akulanzalo ka-Eva eyayingenelisa ukumchoboza. Manje ngubani owesifazana olenzalo eyayizachoboza uSathane?

7. Ngokwalokho okutshiwo kuSambulo 12:1, 2, 5, 10, ngubani owesifazana okukhulunywa ngaye kuGenesisi 3:15?

⁷ Ibhuku lokucina leBhayibhili liyasitshela ukuthi ngubani owesifazana okukhulunywa ngaye kuGenesisi 3: 15.  (Bala iSambulo 12:1, 2, 5, 10.) Lo ayisuye owesifazana ojayelekileyo. Kuthiwa ngaphansi kwenyawo zakhe kulenyanga futhi ekhanda lakhe kulomqhele wezinkanyezi ezingu-12. Ubeletha umntwana ongajayelekanga, uMbuso kaNkulunkulu. UMbuso lo usezulwini, yikho lowesifazana kumele abe sezulwini. Umela ingxenye yenhlanganiso kaJehova esezulwini ebunjwa zingilosi ezithembekileyo.—Gal. 4:26.

8. Ngubani oyingxenye yokuqala yenzalo yowesifazana futhi wagcotshwa nini ukuthi abe yinzalo le? (UGenesisi 22:15-18)

⁸ ILizwi likaNkulunkulu liphinda lisincede sibone ukuthi ngubani oyingxenye yokuqala yenzalo yowesifazana. Lithi kwakumele abe ngowesizukulwane sika-Abhrahama. (Bala uGenesisi 22:15-18.) Lakanye uJesu wayeyisizukulwane sika-Abhrahama njengoba nje isiphrofetho sasitshilo. (Luk. 3:23, 34) Kodwa inzalo le kwakumele ibe lamandla ukwedlula umuntu ngoba kwakumele ichoboze uSathane uDeveli angaphindi abe khona. Yikho uJesu wathi eseleminyaka engaba ngu-30 wagcotshwa ngomoya ongcwele. Ukugcotshwa kwakhe kwenza waba yinzalo eqakathekileyo yowesifazana. (Gal. 3:16) UJesu wathi esefile njalo wavuswa, uNkulunkulu “wamnika umqhele wenkazimulo lodumo” njalo ‘wamupha amandla wonke ezulwini lasemhlabeni’ kuhlanganise lamandla ‘okubhidliza imisebenzi kaDeveli.’—Heb. 2:7; Mat. 28:18; 1 Joh. 3:8.

9-10. (a) Ngobani abanye abayingxenye yenzalo yowesifazana futhi baqala nini ukuba yingxenye yenzalo le? (b) Kuyini esesizaxoxa ngakho?

⁹ Kodwa kulabanye futhi ababezakuba yingxenye yenzalo yowesifazana. Umphostoli uPhawuli wakhuluma ngabo ngesikhathi ebhalela amaKhristu agcotshiweyo angamaJuda lalawo angasomaJuda esithi: “Kanti njalo nxa lingabakaKhristu liyinzalo ka-Abhrahama sibili, izindlalifa mayelana lesithembiso.” (Gal. 3:28, 29) Nxa uJehova egcoba umKhristu ngomoya ongcwele, umKhristu lo uba yingxenye yenzalo yowesifazana. Yikho inzalo leyo ibunjwa nguJesu Khristu labangu-144 000 abazabusa laye. (Isam. 14:1) Bonke laba bazama ukulingisela uYise uJehova uNkulunkulu.

¹⁰ Njengoba sesikwazi ukuthi ngobani okukhulunywa ngabo kuGenesisi 3:15, asihloleni ukuthi uJehova wenzeni ukuze agcwalise isiphrofetho leso lokuthi thina sisinceda njani namuhla.

11. Inzalo yowesifazana yalinyazwa njani ‘esithendeni’?

¹¹ Isiphrofetho esikuGenesisi 3:15 sithi inyoka yayizalimaza “isithende” senzalo yowesifazana. Lokhu kwenzakala lapho uSathane ebangela ukuthi amaJuda lamaRoma abulale iNdodana kaNkulunkulu. (Luk. 23:13, 20-24) Njengoba nje umuntu olimele isithende engehluleka ukuhamba okwesikhathi esithile, loJesu esebulewe wayengenzi lutho. Wayelele engcwabeni okwamalanga amathathu.—Mat. 16:21.

12. Ikhanda lenyoka lizachotshozwa njani futhi nini?

¹² Ngokwesiphrofetho esikuGenesisi 3:15 kwakungeke kwenze ukuthi uJesu aqhubeke efile. Ngenxa yani? Ngoba inzalo kwakuzamele ichoboze ikhanda  lenyoka. Lokhu kutsho ukuthi uJesu kwakumele avuswe. Lakanye wavuswa ngelanga lesithathu eseyisidalwa somoya futhi wayengasoze aphinde afe. Ngesikhathi sikaNkulunkulu esifaneleyo, uJesu uzabhubhisa uSathane angaphindi abe khona futhi. (Heb. 2:14) UKhristu lalabo abazabusa laye bazabhubhisa inzalo yenyoka, okutsho izitha zikaNkulunkulu.—Isam. 17:14; 20:4, 10. e

13. Ukugcwaliseka kwesiphrofetho lesi kusinceda njani?

¹³ Nxa uyinceku kaNkulunkulu, ukugcwaliseka kwesiphrofetho lesi kuyakunceda. Ngesikhathi uJesu esemhlabeni walingisela ubuntu bukaYise ngendlela epheleleyo. (Joh. 14:9) Yikho ukufunda ngoJesu kwenze samazi uJehova uNkulunkulu futhi samthanda. Izimfundiso zikaJesu kanye lendlela aqondisa ngayo ibandla lamaKhristu namuhla kuyasinceda kakhulu. Usifundise esingakwenza ukuze siphile ngendlela ethokozisa uJehova. Ukulinyazwa kukaJesu esithendeni okutsho ukubulawa kwakhe lakho kuyasinceda. Kusinceda njani? Ngemva kokuvuswa kwakhe, uJehova wemukela igazi leNdodana yakhe njengomhlatshelo opheleleyo ‘osihlambulula kuzo zonke izono.’—1 Joh. 1:7.

14. Sikwazi njani ukuthi isiphrofetho esakhulunywa nguJehova esivandeni sase-Edeni asizange sigcwaliseke ngalesosikhathi?

¹⁴ Lokho uJehova akutshoyo esiphrofethweni leso kutshengisa ukuthi sasingasoze sigcwaliseke ngalesosikhathi. Kwakuzathatha isikhathi ukuthi owesifazana abe lenzalo lokuthi uDeveli aqoqe abalandeli bakhe kanye lokuthi kube lenzondano phakathi kwamaqembu la womabili. Ukuzwisisa isiphrofetho lesi kuyasinceda ngoba kwenza sibone ukuthi umhlaba kaSathane uzazizonda izinceku zikaJehova. UJesu laye waxwayisa abafundi bakhe ngalokho. (Mak. 13:13; Joh. 17:14) Sikubonile sibili ukugcwaliseka kwengxenye le yesiphrofetho lesi ikakhulu eminyakeni engu-100 edlulileyo. Njani?

15. Kuyini okwenza abantu bomhlaba kaSathane bayizonde kangaka inzalo yowesifazana futhi kungani kungamelanga sesabe?

¹⁵ Kwathi uJesu esanda nje ukubekwa ukuthi abe yiNkosi ngo-1914, uSathane wahle waxotshwa ezulwini. Khathesi usemhlabeni futhi ulindele ukubhujiswa. (Isam. 12:9, 12) Kodwa kagoqanga izandla. Uzondile futhi uhlasela abantu bakaNkulunkulu. (Isam. 12:13, 17) Yikho abantu bomhlaba lo sebesizonda kakhulu. Kodwa akumelanga simesabe uSathane labalandeli bakhe. Lathi singaqiniseka njengomphostoli uPhawuli owabhala wathi: “Nxa uNkulunkulu elathi, ngubani ongamelana lathi?” (Rom. 8:31) Siyamthemba uJehova ngoba njengoba sibonile, ingxenye enkulu yesiphrofetho esikuGenesisi 3:15 isigcwalisekile.

16-18. Ukuzwisisa uGenesisi 3:15 kuncede njani uCurtis, u-Ursula, loJessica?

¹⁶ Isithembiso sikaJehova esikuGenesisi 3:15 siyasinceda ukuthi sibekezelele loba yibuphi ubunzima esihlangana labo. UCurtis ongumnali eGuam uthi: “Kulezinto eziyake zenzakale empilweni yami ezenza kube nzima ukuthi ngihlale ngiqotho kuJehova. Kodwa ukucabangisisa  ngesiphrofetho esikuGenesisi 3:15 kungincede ukuthi ngihlale ngimthemba uBaba osezulwini.” UCurtis ukulindele ngabomvu ukubona uJehova ekhipha zonke inhlupho ezisehlelayo.

¹⁷ Udadewethu okuthiwa ngu-Ursula ohlala eBavaria uthi ukuzwisisa uGenesisi 3:15 kumncede waqiniseka ukuthi iBhayibhili liphefumulelwe nguNkulunkulu. Wabona ukuthi zonke ezinye iziphrofetho zingenelana njani lesiphrofetho lesi futhi lokhu kwamthinta inhliziyo. Uqhubeka esithi: “Ngamthanda kakhulu uJehova lapho ngifunda ukuthi wahle wenza okuthile ukuze asinike ithemba.”

¹⁸ UJessica ohlala eMicronesia uthi: “Ngisakhumbula ukuthi ngezwa njani lapho ngibona ukuthi ngasengilitholile iqiniso. Ngafunda ukuthi isiphrofetho esikuGenesisi 3:15 sasesigcwaliseka. Lokhu kwanginceda ngabona ukuthi kwakungasinhloso kaJehova ukuthi sihlupheke kangaka. Isiphrofetho lesi siphinde sangenza ngaqiniseka ukuthi nxa ngingakhonza uJehova ngizaphila impilo engcono khathesi lasesikhathini esizayo.”

19. Kuyini okwenza siqiniseke ukuthi ingxenye yokucina yesiphrofetho lesi izagcwaliseka?

¹⁹ Njengoba sibonile, isiphrofetho esikuGenesisi 3:15 siyagcwaliseka. Sesikwazi ukuthi ngubani inzalo yowesifazana kanye lenzalo yenyoka. UJesu, oyingxenye yokuqala yenzalo yowesifazana wavuswa futhi khathesi useyiNkosi elamandla engasoze iphinde ife. UJehova usezaqeda ukukhetha labo ababumba ingxenye yesibili yenzalo yowesifazana. Ingxenye yokuqala yesiphrofetho lesi isigcwalisekile. Yikho siyaqiniseka ukuthi lengxenye yokucina eyokuchotshozwa kwekhanda lenyoka layo izagcwaliseka. Izinceku zikaJehova zizathokoza kakhulu nxa uSathane esebhujisiwe. Yikho qhubeka ubekezela, ungakhalali. UNkulunkulu wethu uthembekile. Uzabusisa “zonke izizwe zomhlaba” esebenzisa inzalo yowesifazana.—Gen. 22:18.