ISIFUNDO 28
UMbuso Usubusa!
“Umbuso womhlaba usube nguMbuso weNkosi yethu loKhristu wayo.”—ISAM. 11:15.
INGOMA 22 UMbuso Usubusa—Kawuze!
ESIZAKUFUNDA a
1. Kuyini esikwazi mhlophe njalo sikwazi njani lokho?
NXA ukhangele okubi okwenzakala emhlabeni ubona angani izinto zizafa zatshintsha yini? Abantu emulini abasazwanani. Abantu sebelodlakela, abaselandaba labanye njalo balolaka. Abanengi abasazithembi iziphathamandla. Kodwa lokho okwenzakalayo kungenza sibe lethemba lokuthi izinto zizakuba ngcono. Kungani sisitsho njalo? Ngoba abantu sebesenza khona kanye iBhayibhili elathi bazabe sebekwenza “ezinsukwini zokucina.” (2 Tim. 3:1-5) Akulamuntu oyihlolisisayo indaba le ongakuphika ukuthi isiphrofetho lesi siyagcwaliseka. Kanti njalo ukugcwaliseka kwaso kutshengisa ukuthi uJesu Khristu useyiNkosi yoMbuso kaNkulunkulu. Isiphrofetho lesi esesikhulume ngaso ngesinye seziphrofetho ezinengi ezikhuluma ngoMbuso. Kuzasiqinisa ukholo ukufunda ngezinye iziphrofetho ezigcwaliseke eminyakeni edlulileyo.
Njengeziqephu ezihlanganiswayo ukuze kubunjwe umfanekiso owodwa, iziphrofetho ezikuDanyeli lakuSambulo ziyangenelana, zisincede sibone ukuthi sesiphila kusiphi isikhathi (Khangela indima 28)
2. Sizaxoxa ngani esihlokweni lesi njalo lokhu kuzasinceda njani? (Khangela umfanekiso ongaphandle.)
2 Esihlokweni lesi sizaxoxa ngesiphrofetho esitshengisa ukuthi uMbuso kaNkulunkulu waqalisa nini ukubusa kanye leziphrofetho ezisinceda sizwisise ukuthi uJesu useyiNkosi yoMbuso kaNkulunkulu ezulwini. Sizaxoxa langeziphrofetho ezitshengisa ukuthi izitha zoMbuso kaNkulunkulu zizatshabalaliswa njani. Sizabona ukuthi iziphrofetho lezi ziyangenelana njengeziqephu ezihlanganiswayo ukuze kubunjwe umfanekiso owodwa, okuzasinceda sibone ukuthi siphila kusiphi isikhathi.
SIKWAZI NJANI UKUTHI UMBUSO WAQALA NINI UKUBUSA?
3. Isiphrofetho esikuDanyeli 7:13, 14 sisitshelani?
3 Isiphrofetho esikuDanyeli 7:13, 14 sisiqinisekisa ukuthi uKhristu uJesu nguye ofaneleyo ukuba yiNkosi yoMbuso kaNkulunkulu. Abantu abavela ezizweni zonke bazazikhethela ‘ukumkhonza’ njalo akusoze kube lenye inkosi ngemva kwakhe. Esinye isiphrofetho ebhukwini likaDanyeli sathi uJesu wayezaqalisa ukubusa ekupheleni kwezikhathi eziyisikhombisa. Manje singabakwazi njani ukuthi uJesu waqalisa nini ukubusa?
4. Chasisa ukuthi izenzakalo ezikuDanyeli 4:10-17 zisinceda njani sikwazi ukuthi uKhristu waqalisa ukubusa ngawuphi umnyaka. (Khangela lamabala angaphansi.)
4 Bala uDanyeli 4:10-17. b “Izikhathi eziyisikhombisa” zimela iminyaka engu-2 520. Izikhathi lezo zaqalisa ngo-607 B.C.E., c lapho abaseBhabhiloni bekhipha inkosi yokucina eyayibekwe nguJehova esihlalweni sayo eJerusalema. Zaphela ngo-1914 C.E., lapho uJehova ebeka uJesu onguye olelungelo lokuba yiNkosi yoMbuso kaNkulunkulu. d—Hez. 21:25-27.
5. Kusinceda ngani ukuzwisisa isiphrofetho esimayelana ‘lezikhathi eziyisikhombisa’?
5 Isiphrofetho lesi sisinceda njani? Ukuzwisisa isiphrofetho esimayelana ‘lezikhathi eziyisikhombisa’ kusiqinisekisa ukuthi uJehova uyazigcwalisa izithembiso zakhe ngesikhathi esifaneleyo. UJehova wabeka uJesu ukuthi abe yiNkosi ngesikhathi ayesimisile yikho siyaqiniseka ukuthi uzagcwalisa zonke ezinye iziphrofetho ngesikhathi asikhethileyo. Usuku lukaJehova ‘kaluyikuphuza.’—Hab. 2:3.
SIKWAZI NJANI UKUTHI UKHRISTU USEYINKOSI YOMBUSO KANKULUNKULU?
6. (a) Yiziphi izenzakalo ezitshengisa ukuthi uKhristu usebusa ezulwini? (b) Isiphrofetho esikuSambulo 6:2-8 sitshengisa njani ukuthi uJesu usebusa?
6 UJesu wathi esezaqeda inkonzo yakhe emhlabeni watshela abalandeli bakhe ngezenzakalo ezazizatshengisa ukuthi useqalisile ukubusa ezulwini. Okunye akhuluma ngakho yizimpi, indlala lokuzamazama komhlaba. Waphinda wathi kwakuzakuba lemikhuhlane “ezindaweni ezehlukeneyo.” Omunye umkhuhlane obekhona yi-COVID-19. Izenzakalo lezi ziyingxenye yalokho iBhayibhili elikubiza ngokuthi ‘yisibonakaliso’ sokubakhona kukaKhristu. (Mat. 24:3, 7; Luk. 21:7, 10, 11) Ngemva kweminyaka edlula 60 uJesu ebuyele ezulwini wanika umphostoli uJohane umbono owawumqinisekisa ukuthi izinto lezi zazizakwenzakala. (Bala iSambulo 6:2-8.) Izinto zonke lezi bezisenzakala kusukela uJesu eqalisa ukubusa ngo-1914.
7. Kungani kwenzakale izinto ezinengi ezimbi emhlabeni kusukela uJesu eqalisa ukubusa?
7 Kungani izinto zaba zimbi kakhulu emhlabeni ngesikhathi uJesu esiba yiNkosi? USambulo 6:2 usitshela ukuthi uJesu wathi esiba yiNkosi yoMbuso kaNkulunkulu waqala ngokulwa loDeveli kanye lamadimoni akhe. ISambulo isahluko 12 sisitshela ukuthi uSathane wanqotshwa wasephoselwa phansi emhlabeni yena kanye lamadimoni akhe. Lokhu kwamthukuthelisa kakhulu njalo waqalisa ukuhlasela abantu kwaba losizi emhlabeni.—Isam. 12:7-12.
Asithokozi nxa sibona izinto ezimbi zisenzakala kodwa ukubona iziphrofetho zigcwaliseka kwenza siqiniseke ukuthi uMbuso kaNkulunkulu usubusa (Khangela indima 8)
8. Kusinceda njani ukubona iziphrofetho ezimayelana loMbuso kaNkulunkulu zigcwaliseka?
8 Iziphrofetho lezi zisinceda njani? Izinto ezenzakala emhlabeni kanye lokutshintsha kwendlela abantu abenza ngayo kwenza sibone ukuthi uJesu useyiNkosi. Kasizwa ubuhlungu kakhulu nxa sibona abantu bengelandaba labanye njalo belenzondo ngoba siyakwazi ukuthi bagcwalisa iziphrofetho eziseBhayibhilini. UMbuso usubusa sibili! (Hubo. 37:1) Kanti njalo silindele ukuthi izinto ziqhubeke zisiba zimbi kakhulu emhlabeni njengoba i-Amagedoni ilokhu isondela. (Mak. 13:8; 2 Tim. 3:13) Siyambonga sibili uBaba wethu osithandayo ngokusinceda sizwisise ukuthi kungani kulenhlupho zonke lezi emhlabeni.
IZITHA ZOMBUSO KANKULUNKULU ZIZABHUJISWA NJANI?
9. Isiphrofetho esikuDanyeli 2:28, 31-35 siwuchasisa njani umbuso womhlaba wonke wokucina njalo umbuso lo waqalisa nini ukubusa?
9 Bala uDanyeli 2:28, 31-35. Isiphrofetho lesi laso siyagcwaliseka namuhla. Iphupho likaNebhukhadinezari laveza lokho okwakuzakwenzakala “ngezinsuku ezizayo,” uKhristu eseqalisile ukubusa. Izitha zikaJesu ezisemhlabeni zazizagoqela umbuso womhlaba wonke wokucina okukhulunywa ngawo eBhayibhilini omelwa ‘zinyawo zensimbi lebumba.’ Umbuso lo yiwo obusayo khathesi. Waqalisa ukubusa ngesikhathi seMpi Yomhlaba Yokuqala lapho iBritain le-United States bemanyana besiba yi-Anglo-America. Iphupho likaNebhukhadinezari laqamba izinto ezimbili ezenza umbuso lo ungafanani leminye imibuso elamandla eyake yaba khona.
10. (a) Kuyini esikubona kusenzakala okutshengisa ukuthi isiphrofetho sikaDanyeli esimayelana lombuso we-Anglo-America siyagcwaliseka? (b) Kuyini okumele sikunanzelele? (Khangela ibhokisi elithi “ Xwaya Ibumba!”)
10 Okokuqala, umbuso we-Anglo-America awufanani leminye imibuso eqanjwe embonweni ngoba wona awumelwa yinsimbi ezimele yodwa njengegolide kumbe isiliva kodwa umelwa yinsimbi ehlanganiswe lebumba. Ibumba limela “abantu.” (Dan. 2:43) Kuyazicacela ukuthi abakhokheli bombuso lo abenelisi ukwenza abakufunayo ngoba abantu bayenelisa ukukhetha abakufunayo ngesikhathi sokuvota. Balamalungelo njalo bayenelisa ukutshaya amatoyitoyi futhi balenhlanganiso zezisebenzi ezibamelayo.
11. Kungani ukubusa kwe-Anglo-America kusenza siqiniseke ukuthi siphila ezinsukwini zokucina?
11 Okwesibili, iBhayibhili lithi umbuso we-Anglo-America omelwa zinyawo zesithombe esikhulu yiwo umbuso wokucina olamandla ozabakhona. Akula omunye umbuso wabantu ozabusa ngemva kwawo. Umbuso lo labo bonke ohulumende babantu bazabhujiswa nguMbuso kaNkulunkulu ngesikhathi se-Amagedoni. e—Isam. 16:13, 14, 16; 19:19, 20.
12. Kuyini okunye esikufunda esiphrofethweni sikaDanyeli okusiduduzayo njalo kusinike ithemba?
12 Isiphrofetho lesi sisinceda njani? Isiphrofetho sikaDanyeli sisinika obunye ubufakazi bokuthi siphila ezinsukwini zokucina. Eminyakeni engaphezu kwengu-2 500 eyadlulayo uDanyeli wathi ngemva kweBhabhiloni kwakuzakuba leminye imibuso emine yomhlaba wonke eyayizabusa abantu bakaNkulunkulu. Kanti njalo waveza ukuthi umbuso we-Anglo-America wawuzakuba ngowokucina. Lokhu kuyasiduduza njalo kwenza sibe lethemba lokuthi sokuseduze ukuthi uMbuso kaNkulunkulu ubhubhise bonke ohulumende babantu ubusubusa umhlaba wonke.—Dan. 2:44.
13. ‘Inkosi yesitshiyagalombili’ kanye ‘lamakhosi alitshumi’ okukhulunywa ngawo kuSambulo 17:9-12 kumelani njalo isiphrofetho lesi sagcwaliseka njani?
13 Bala iSambulo 17:9-12. Umonakalo owabangelwa yiMpi Yomhlaba Yokuqala wenza kwagcwaliseka esinye isiphrofetho esimayelana lensuku zokucina. Ababusi bomhlaba babefuna kube lokuthula emhlabeni yikho ngoJanuary 1920 babumba i-League of Nations eyathathelwa indawo yi-United Nations ngo-October 1945. Inhlanganiso le ibizwa ngokuthi “yinkosi yesitshiyagalombili.” Kodwa ayisiyombuso womhlaba wonke. Inhlanganiso le ilamandla ngoba isekelwa yimibuso yomhlaba. IBhayibhili lithi imibuso le ‘ngamakhosi alitshumi.’
14-15. (a) ISambulo 17:3-5 sisitshelani ‘ngeBhabhiloni Enkulu’? (b) Kwenzakalani enkolweni yamanga?
14 Bala iSambulo 17:3-5. Embonweni umphostoli uJohane awutshengiswa nguJehova wabona isifebe esimela “iBhabhiloni Enkulu” engumbuso womhlaba wonke wenkolo yamanga. Umbono lo ugcwaliseke njani? Okwesikhathi eside inkolo zamanga bezisebenza ndawonye labohulumende njalo zibasekela. Kodwa sekuseduze ukuthi uJehova aqondise izinhliziyo zabohulumende ukuthi “zenze umcabango wakhe.” Ohulumende laba abamelwa ‘ngamakhosi alitshumi’ bazahlasela inhlanganiso zenkolo yamanga bazitshabalalise.—Isam. 17:1, 2, 16, 17.
15 Sikwazi njani ukuthi iBhabhiloni Enkulu isizabhujiswa? Khumbula ukuthi okunye okwakuvikela idolobho leBhabhiloni kudala ngamanzi oMfula uYufrathe. Ibhuku leSambulo lithi amamiliyoni abantu asekela iBhabhiloni Enkulu afanana ‘lamanzi’ ayivikelayo. (Isam. 17:15) Kodwa liphinda lithi amanzi la ‘azakutsha’ okutshengisa ukuthi umbuso womhlaba wonke wenkolo yamanga wawuzatshiywa ngabasekeli bawo abanengi. (Isam. 16:12) Lamuhla isiphrofetho lesi siyagcwaliseka ngoba abantu abanengi sebeyitshiyile inkolo yamanga njalo sebedinga amacebo okuqeda inhlupho zabo kwezinye indawo.
16. Kusinceda njani ukuzwisisa iziphrofetho ezimayelana le-United Nations kanye lokutshabalaliswa kweBhabhiloni Enkulu?
16 Iziphrofetho lezi zisinceda njani? Ukubunjwa kwe-United Nations kanye lokuncipha kwenani labantu abasekela inkolo yamanga kutshengisa ukuthi siphila ezinsukwini zokucina. Lanxa abanengi besuka eBhabhiloni Enkulu lokhu ayisikho okuzakwenza itshabalale. Njengoba sesibonile, uJehova uzakufaka enhliziyweni ‘zamakhosi alitshumi’ okutsho ohulumende abasekela i-United Nations, ukuthi ‘benze umcabango wakhe.’ Ohulumende laba bazabhubhisa iBhabhiloni Enkulu ingalindelanga. f (Isam. 18:8-10) Ukubhujiswa kwayo kuzethusa abantu njalo kungabangela inhlupho kodwa kulezinto ezimbili ezizathokozisa abantu bakaNkulunkulu. Inkolo yamanga osekulesikhathi eside iyisitha sikaJehova uNkulunkulu iyabe ingasekho njalo ukukhululwa kwethu emhlabeni lo omubi kuyabe sekuseduze.—Luk. 21:28.
WOBA LOKHOLO LOKUTHI UJEHOVA UZASIVIKELA
17-18. (a) Singenzani ukuze siqhubeke siqinisa ukholo lwethu? (b) Sizaxoxa ngani esihlokweni esilandelayo?
17 UDanyeli wathi ulwazi lweqiniso ‘lwaluzakwanda’ futhi lokhu kwenzakele sibili. Sesizizwisisa iziphrofetho ezimayelana lesikhathi sethu. (Dan. 12:4, 9, 10) Ukugcwaliseka kweziphrofetho lezi kwenza simthembe kakhulu uJehova kanye leLizwi lakhe eliphefumulelweyo. (Isaya. 46:10; 55:11) Yikho qhubeka uqinisa ukholo lwakho ngokuhlala utaditsha iBhayibhili njalo uncedisa abanye ukuthi babe ngabangane bakaJehova. Uzabavikela labo abathembela kuye njalo uzabanika ‘ukuthula okupheleleyo.’—Isaya. 26:3.
18 Esihlokweni esilandelayo sizaxoxa ngeziphrofetho ezimayelana lebandla lamaKhristu ezinsukwini zokucina. Njengoba sizabona, iziphrofetho lezi lazo zizasitshengisa ukuthi siphila ezinsukwini zokucina. Sizabona lobufakazi bokuthi uJesu iNkosi yethu ebusayo uyabakhokhela abalandeli bakhe abathembekileyo.
INGOMA 61 Qhubekani BoFakazi!
a Kulezinto ezinengi ezimangalisayo ezenzakalayo ngesikhathi esiphila kuso. UMbuso kaNkulunkulu usubusa njengoba kwatshiwo eziphrofethweni ezinengi eziseBhayibhilini. Esihlokweni lesi sizaxoxa ngezinye zeziphrofetho lezo. Zizasinceda siqinise ukholo lwethu njalo singethuki futhi siqhubeke sithemba uJehova khathesi lasesikhathini esizayo.
b UDanyeli 4:16, NWT: “Ingqondo yakhe kayiguqulwe isuke ebuntwini, aphiwe ingqondo yenyamazana, kuze kudlule izikhathi eziyisikhombisa.”
c U-B.C.E., umela ukuthi “Before the Common Era,” okutsho isikhathi uJesu engakabuyi emhlabeni. U-C.E., umela ukuthi “Common Era” okutsho isikhathi uJesu esebuyile emhlabeni.
d Khangela umcijo 4 kusifundo 32 ebhukwini elithi Ungathokoza Kuze Kube Nini Lanini! njalo ubukele ividiyo eku-jw.org ethi UMbuso KaNkulunkulu Waqalisa Ukubusa Ngo-1914.
e Bala izihloko ezikukhasi 14-19 ku-Nqabayokulinda yesiZulu kaJune 15 2012 ukuze uthole okunengi mayelana lesiphrofetho sikaDanyeli.
f Nxa ufuna ukwazi okunengi ngokuthi kuzakwenzakalani esikhathini esizayo bala isahluko 21 ebhukwini elithi UMbuso KaNkulunkulu Uyabusa!
