1-2. Wayengubani uZadokhi? (U-1 ImiLando 12:​22, 26-28)

 AKUWABONE ngelihlo lengqondo amadoda adlula 340 000 ebuthene. Alande ukuzobeka uDavida ukuthi abe yinkosi yabo bonke abako-Israyeli. Amadoda la asemaqaqeni aseduze leHebroni okwamalanga amathathu. Ingxoxo ziyatsha, ayahleka futhi ayahlabela edumisa uJehova. (1 Imilan. 12:39) Exukwini leli kulelinye ijaha okuthiwa nguZadokhi njalo kumele ukuthi abanengi kabalinanzeleli. Kodwa uJehova uyalinanzelela abesesenza ukuthi kubhalwe ngalo ukuze lathi sifunde ngalo. (Bala u-1 ImiLando 12:​22, 26-28.) Wayengubani uZadokhi?

² UZadokhi wayengumphristi futhi wayesebenza kakhulu loMphristi Omkhulu u-Abhiyatha. UZadokhi wayephinda abe ngumboni, okutsho ukuthi uNkulunkulu wayemenza aqedisise intando yakhe futhi azwisise izinto abanye ababengenelisi ukuzizwisisa. (2 Sam. 15:27) Abantu ababefuna ukucetshiswa babesiya kuye. Kanti njalo wayeyindoda elesibindi. Lokhu yikho esizaxoxa ngakho kakhulu esihlokweni lesi.

3. (a) Kungani kumele izinceku zikaJehova zibe lesibindi? (b) Sizaxoxa ngani esihlokweni lesi?

³ Ezinsukwini lezi zokucina, uSathane uqhubeka esenza konke angakwenza ukuze ahlasele abantu bakaNkulunkulu. (1 Phet. 5:8) Ngakho sisalindele ukuthi uJehova asuse uSathane njalo asuse umumo lo wezinto, kumele sibe lesibindi. (Hubo. 31:24) Sizaxoxa ngezindlela ezintathu esingalingisela ngazo uZadokhi, sitshengise ukuthi silesibindi njengaye.

SEKELA UMBUSO KANKULUNKULU

4. Kungani kumele abantu bakaJehova babe lesibindi ukuze basekele uMbuso wakhe? (Khangela lomfanekiso.)

⁴ Abantu bakaJehova bawusekela ngenhliziyo yonke uMbuso wakhe. Kodwa kwezinye izikhathi kudinga isibindi ukuthi benze  njalo. (Mat. 6:33) Ngokwesibonelo, emhlabeni lo omubi kudinga isibindi ukuthi senze lokho okufunwa nguJehova zikhathi zonke lokuthi sitshumayele izindaba ezinhle zoMbuso. (1 Thes. 2:2) Kanti njalo abantu abanengi abasabambananga ngenxa yezindaba zezombusazwe, yikho kumele sibe lesibindi ukuze singacini sesingena kuzo. (Joh. 18:36) Abantu bakaJehova abanengi sebeke balahlekelwa zimali zabo kumbe batshaywa loba babotshwa ngenxa yokuthi kabavumi ukungena kwezombusazwe kumbe esisotsheni.

5. Kungani kwakumele uZadokhi abe lesibindi ukuze asekele uDavida?

⁵ UZadokhi wahamba eHebroni ehlomile, elungele ukulwa lanxa wayelande ukuyathakazelela ukubekwa kukaDavida ukuthi abe yinkosi. (1 Imilan. 12:38) Wayezimisele ukuya empini loDavida lokuvikela isizwe sako-Israyeli. Lanxa uZadokhi wayengabe engakujayelanga ukuya empini, wayelesibindi.

6. UDavida watshengisa njani ukuthi wayelesibindi? (IHubo 138:3)

⁶ Pho uZadokhi wasithatha ngaphi isibindi njengoba yena wayengumphristi nje? Kulamadoda amanengi ayewazi ayelamandla futhi elesibindi. Yikho akuthandabuzwa ukuthi wafunda okunengi kuwo. Ngokwesibonelo, uDavida wayelesibindi ‘sokukhokhela abako-Israyeli nxa besiya empini’ futhi lokho kwenza ukuthi bonke bamsekele ngenhliziyo yonke. (1 Imilan. 11:​1, 2) Zonke izikhathi nxa uDavida wayehlaselwa yizitha zakhe, wayethembela kuJehova ukuthi amncedise. (Hubo. 28:7; bala iHubo 138:3.) UJehoyada lendodana yakhe eyayiliqhawe uBhenaya kanye lezinye izinduna zezizwana ezingu-22 ezazisekela uDavida ngamanye amadoda ayelesibindi uZadokhi ayengawalingisela. (1 Imilan. 11:​22-25; 12:​26-28) Wonke amadoda la ayezimisele ukubeka uDavida ukuthi abe yinkosi lokumvikela.

7. (a) Ngobani esingafunda kubo ukuba lesibindi lamuhla? (b) Ufundani kumfowethu uNsilu ombone kuvidiyo?

⁷ Nxa singacabangisisa ngabantu ababa  lesibindi ukuze basekele ubukhosi bukaJehova siyaba lamandla futhi sibe lesibindi. INkosi yethu uJesu Khristu kayizange ingene ezindabeni zombusazwe zomhlaba kaSathane. (Mat. 4:​8-11; Joh. 6:​14, 15) UJesu wayethembela kuJehova zikhathi zonke ukuthi amnike amandla okwenza okulungileyo. Lamuhla kulamajaha amanengi angavumiyo ukuya empini kumbe ukungena kwezombusazwe. Kungakunceda ukuthi ubale ngawo ku-jw.org. a

NCEDA ABAZALWANE

8. Kunini lapho okungadinga ukuthi abadala babe lesibindi ukuze bancedise abazalwane?

⁸ Abantu bakaJehova bayakuthanda ukuncedisana. (2 Khor. 8:4) Kodwa kwezinye izikhathi kudinga isibindi ukuthi bancedisane. Ngokwesibonelo, nxa kungavuka impi endaweni ethile, abadala bayananzelela ukuthi abafowethu labodadewethu bayabe sebedinga ukukhuthazwa lokusekelwa. Bayabancedisa lokuthi bathole amaBhayibhili lamabhuku ethu kanye lokuthi bathole ukudla, lezigqoko lendawo yokuhlala. Abadala bazimisele ukufaka impilo zabo engozini ukuze bancedise abazalwane ngenxa yokuthi bayabathanda. (Joh. 15:​12, 13) Nxa besenza njalo bayabe betshengisa ukuthi balesibindi njengoZadokhi.

9. Ku-2 Samuyeli 15:27-29, uDavida wathuma uZadokhi ukuthi ayekwenzani? (Khangela lomfanekiso.)

⁹ Impilo kaDavida yake yaba sengozini. Indodana yakhe u-Abhisalomu yayisizimisele ukumhluthunela umbuso. (2 Sam. 15:​12, 13) Yikho kwasekumele abaleke asuke eJerusalema ngokucwayiza kwelihlo. Wamemeza izinceku zakhe wathi: “Sukumani sibaleke ngoba akula loyedwa ozaphunyuka ku-Abhisalomu!” (2 Sam. 15:14) UDavida lezinceku zakhe bathi sebesuka, uDavida wacabanga ukuthi kulomunye okumele asale ukuze abe emtshela ukuthi u-Abhisalomu ubumba cebo bani. Yikho wathi uZadokhi labanye  abaphristi babuyele bayekwenza umsebenzi lo.(Bala u-2 Samuyeli 15:​27-29.) Kwakumele bawenze benanzelela sibili ngoba wawungababulalisa. Ubona angani u-Abhisalomu wayengamenzani uZadokhi labanye abaphristi nxa wayengathola ukuthi bazinhloli ezifuna ukuvikela uDavida? Phela u-Abhisalomu wayelolunya, elodlakela futhi ekufuna ngabomvu ukubusa.

10. UZadokhi kanye labanye bamvikela njani uDavida?

¹⁰ UDavida wabumba icebo wasecela uZadokhi lomunye umngane wakhe owayeqotho okwakuthiwa nguHushayi ukuthi bamncedise ukuze icebo lelo liphumelele. (2 Sam. 15:​32-37) UHushayi wakwenza lokho ayekutshelwe nguDavida. Wazitshaya angathi usekela u-Abhisalomu, wasemnika icebo lokuthi wayengalwa njani loDavida. Icebo lelo lalizanika uDavida isikhathi sokuthi alungiselele ukulwa. Ngemva kwalokho uHushayi watshela uZadokhi lo-Abhiyatha ayekwenzile. (2 Sam. 17:​8-16) Amadoda la amabili ahamba ayatshela uDavida ngamacebo ka-Abhisalomu. (2 Sam. 17:17) UZadokhi labanye abaphristi bancediswa nguJehova benza umsebenzi omkhulu wokuvikela uDavida.—2 Sam. 17:​21, 22.

11. Kuyini okungasinceda ukuthi sibe lesibindi njengoZadokhi nxa sincedisa abazalwane?

¹¹ Nxa singacelwa ukuthi sincedise abazalwane singatshengisa njani ukuthi silesibindi njengoZadokhi lanxa kwezinye izikhathi lokho kusitsho ukuthi sifake impilo zethu engozini? (1) Landela lokho esiyabe sikutshelwa. Ngezikhathi lezo ezinzima, kuqakathekile ukuthi sihlale simanyene. Lalela lokho eliyabe likutshelwa yiwofisi yegatsha. (Heb. 13:17) Abadala kumele bahlale behlola lokho okumele bakwenze ukuze balungiselele umonakalo ongaba khona. Kanti njalo kuyabe kumele balandele lokho abakutshelwa yinhlanganiso ngalokho okumele bakwenze nxa kube lengozi. (1 Khor. 14:​33, 40) (2) Woba lesibindi  kodwa uhlale unanzelela ingozi ezingaba khona. (Zaga. 22:3) Qala ucabangisise ungakenzi lutho. Nxa usenza imisebenzi yakho woba leqiniso lokuthi uvikelekile, ungaphonguzifaka engozini nje. (3) Thembela kuJehova. Khumbula ukuthi uJehova ufuna wena labafowenu labodadewenu lihlale livikelekile, yikho kasoze ayekele ukukuncedisa.

12-13. Ufundani kuViktor loVitalii? (Khangela lomfanekiso.)

¹² Omunye umfowethu okuthiwa nguViktor lomunye okuthiwa nguVitalii, babelomsebenzi wokuyanika abazalwane ukudla lamanzi e-Ukraine. UViktor uthi: “Sasidinga ukudla loba ngaphi. Izikhathi ezinengi sasisizwa imibhobho ikhala eduze lalapho esiyabe sikhona. Omunye umfowethu wathatha ukudla ayekugcinile wasinika ukuthi siyenika abanye. Ukudla lokho kwanceda abamemezeli abanengi futhi batshova isikhathi belakho. Sathi sikufaka emoteni, kwawa ibhomba endaweni engaba ngamamitha angu-20 ukusuka lapho esasikhona. Ilanga lonke lelo ngangilokhu ngikhuleka kuJehova ngimncenga ukuthi anginike isibindi sokuyancedisa abamemezeli.”

¹³ UVitalii uthi: “Kwakumele sibe lesibindi sibili. Uhambo lwami lokuqala lwathatha amahora angu-12 futhi ngangihamba ngikhuleka kuJehova.” UVitalii wayelesibindi kodwa wayenanzelela izingozi ezazingaba khona. Uphinda athi: “Ngangilokhu ngikhuleka kuJehova ngicela ukuthi anginike ukuhlakanipha lokuthi ngikwazi lokho okumele ngikwenze lokungamelanga ngikwenze. Ngangisebenzisa imigwaqo eyayivunyelwa yiziphathamandla kuphela. Kwangiqinisa ukholo ukubona abazalwane besebenza ndawonye. Babesusa izinto ezazivale umgwaqo njalo babeqoqa izinto zokuyancedisa abazalwane baphinde bazifake emoteni. Kanti njalo babesinika ukudla kanye lendawo yokulala.”

HLALA UQOTHO KUJEHOVA

14. Singezwa njani nxa umuntu esimthandayo angatshiya uJehova?

¹⁴ Nxa omunye emulini kumbe umngane angatshiya uJehova sizwa ubuhlungu obukhulu njalo siphelelwe ngamandla. (Hubo. 78:40; Zaga. 24:10) Nxa kuyikuthi ubumthanda kakhulu kungaba nzima ukwamukela ukuthi usesusiwe. Nxa lokho kwake kwenzakala kuwe, okwenzakala kuZadokhi, indoda eyayiqotho, kungakuqinisa.

15. Kungani kwakumele uZadokhi abe lesibindi ukuze aqhubeke eqotho kuJehova? (U-1 AmaKhosi 1:​5-8)

¹⁵ UZadokhi waqhubeka eqotho kuJehova lanxa umngane wakhe omkhulu u-Abhiyatha wakhetha ukungabi qotho. Lokho kwenzakala uDavida esezakufa. Ngalesosikhathi indodana yakhe u-Adonija yazama ukuhluthuna ubukhosi uJehova ayebuthembise uSolomoni. (1 Imilan. 22:​9, 10) U-Abhiyatha yena wakhetha ukusekela u-Adonija. (Bala u-1 AmaKhosi 1:​5-8.) Isenzo sakhe lesi satshengisa ukuthi kakho qotho kuDavida lakuJehova. Ubona angani uZadokhi wezwa njani? Kumele ukuthi wadana kakhulu. Phela yena lo-Abhiyatha babesebenze bonke bengabaphristi okweminyaka edlula 40. (2 Sam. 8:17) Babeke benza umsebenzi wokukhangela “ibhokisi likaNkulunkulu weqiniso” ndawonye. (2 Sam. 15:29) Bobabili babeqale besekela ubukhosi bukaDavida futhi benza lezinto ezinengi ekukhonzeni uJehova.—2 Sam. 19:​11-14.

16. Kuyini okungabe kwanceda uZadokhi ukuthi ahlale eqotho?

¹⁶ UZadokhi wakhetha ukuqhubeka eqotho kuJehova kungelani lalokho okwakwenziwe ngu-Abhiyatha. UDavida wayengathandabuzi ukuthi uZadokhi uzahlala eqotho. Lokho u-Adonija ayefuna ukukwenza kwathi sekuvezwe  egcekeni, uDavida wacela uZadokhi loNathani loBhenaya ukuthi bagcobe uSolomoni ukuthi abe yinkosi. (1 Amakho. 1:​32-34) Kumele ukuthi uZadokhi kwamkhuthaza ukubona abanye ababekhonza uJehova beqhubeka beqotho, ngokwesibonelo uNathani kanye labanye ababesekela iNkosi uDavida. (1 Amakho. 1:​38, 39) USolomoni wathi eseyinkosi, ‘wabeka uZadokhi waba ngumphristi esikhundleni sika-Abhiyatha.’—1 Amakho. 2:35.

17. Ungamlingisela njani uZadokhi nxa isihlobo sakho kumbe umngane angakhetha ukungabi qotho kuJehova?

¹⁷ Ungamlingisela njani uZadokhi? Nxa isihlobo sakho kumbe umngane angakhetha ukutshiya uJehova, kwenze kucace ukuthi wena umi ngaphi. (Josh. 24:15) UJehova uzakunika amandla lesibindi sokwenza okuqondileyo. Tshengisa ukuthi uthembele kuye ngokuthandaza langokuhlala useduze lezinceku zakhe eziqotho. UJehova uyakuqakathekisa kakhulu okwenzayo ukuze uhlale uqotho njalo uzakunika umvuzo.—2 Sam. 22:26.

18. Ufundani kuMarco loSidse?

¹⁸ Ake sixoxe ngoMarco lomkakhe okuthiwa nguSidse. Amadodakazi abo amabili akhetha ukutshiya uJehova. UMarco uthi: “Ngesikhathi ubona umntanakho esanda kuzalwa nje uhle umthande kakhulu. Ungenza loba yini ukuze umvikele. Ngakho nxa angathi esekhulile akhethe ukutshiya uJehova kuba buhlungu kakhulu.” Uqhubeka esithi: “Kodwa uJehova ubelokhu elathi. Ubehlala esiba leqiniso lokuthi nxa mina ngiphela amandla umkami yena uyabe eqinile. Nxa sekunguye osephela amandla mina ngiyabe ngiqinile.” USidse yena uthi: “Aluba uJehova ubengasiniki amandla ebesiwadinga besingasoze senelise ukuqhubeka siqinisela. Ngangicabanga ukuthi yimi engangibangele ukuthi amadodakazi ami atshiye uJehova, yikho lokho kwakungithwalisa nzima. Kodwa ngathandaza ngatshela uJehova ukuthi ngangisizwa njani. Ngemva kwesikhatshana nje omunye udadewethu engasengileminyaka ngamcina wangilanda wafika wangigona wangikhangela wathi: ‘Sidse, khumbula ukuthi kayisuwe obangele ukuthi amadodakazi akho atshiye uJehova.’ UJehova ubengincedisa sibili ngoba ngenelisile ukuqhubeka ngimkhonza ngithokoza.”

19. Kuyini ozimisele ukukwenza?

¹⁹ UJehova ufuna ukuthi zonke izinceku zakhe zibe lesibindi njengoZadokhi. (2 Thim. 1:7) Lanxa kunjalo kafuni ukuthi sizitshele ukuthi lokho singakwenza ngamandla ethu. Ufuna sithembele kuye. Yikho mtshele uJehova nxa ungaba sesimeni esidinga ukuthi ube lesibindi. Kasoze ayekele ukukuncedisa ukuthi ube lesibindi njengoZadokhi!—1 Phet. 5:10.