1. Kuyini uJehova akwenze komunye lomunye wethu?

UJEHOVA udonsele ngamunye wethu kuye. (Joh. 6:44) Lokhu kutsho ukuthi wathi ehlola amabhiliyoni abantu asemhlabeni, wabona into eligugu kuwe, inhliziyo eqotho engenelisa ukumthanda. (1 ImiLan. 28:9) UJehova uyakwazi, uyakuzwisisa futhi uyakuthanda. Lokhu kuyaduduza sibili.

2. UJesu walandisa wuphi umzekeliso ukuze aveze indlela uJehova alendaba ngayo lathi?

² UJehova ulendaba lawe futhi ulendaba labafowenu labodadewenu. UJesu wafanisa uJehova lomelusi ukuze aveze indlela uJehova alendaba ngayo lathi. Nxa imvu eyodwa kwezingu-100 ingalahleka, wenzani umelusi? ‘Uyatshiya ezingu-99 ezintabeni abesesiyadinga leyo elahlekileyo.’ Nxa angayithola, kayicaphukeli kodwa uyathokoza. Sifundani? Imvu ngayinye iqakathekile kuJehova. UJesu wathi: ‘UBaba osezulwini kafisi ukuthi kutshabalale ngitsho loyedwa kulaba abancinyane.’—Mat. 18:12-14.

3. Sizaxoxa ngani esihlokweni lesi?

³ Kasifuni ngitsho lakancane ukwenza abafowethu labodadewethu badane. Singenzani ukuze singakhubi abanye? Kumele senzeni nxa omunye angasizwisa ubuhlungu? Imibuzo le sizayiphendula esihlokweni lesi. Kodwa kasiqaleni ngokuxoxa ‘ngalaba abancinyane’ okukhulunywa ngabo kuMathewu isahluko 18.

4. Ngobani “abancinyane”?

⁴ “Abancinyane” yibo bonke abafundi bakaJesu. Kungelani leminyaka yabo, ‘banjengabantwana abancane’ ngoba bazimisele ukufundiswa nguJesu. (Mat. 18:3) Bavela endaweni ezitshiyeneyo, balamasiko atshiyeneyo futhi balobuntu obutshiyeneyo. Lanxa kunjalo, bonke batshengisa ukuthi balokholo kuKhristu futhi uyabathanda kakhulu.—Mat. 18:6; Joh. 1:12.

5. UJehova uzwa njani nxa umuntu ekhuba kumbe ezwisa omunye wabantu bakhe ubuhlungu?

⁵ Bonke ‘laba abancinyane’ baligugu kuJehova. Ukuze sizwisise indlela uJehova ababona ngayo, cabanga ngendlela thina esibona ngayo abantwana. Baligugu kithi. Sifuna ukubavikela ngoba kabalamandla, kabakahlangani lezinto ezinengi empilweni futhi kabahlakaniphanga njengabantu abadala. Liqiniso sibili ukuthi kasifuni ukubona umuntu ozwisa omunye ubuhlungu, kodwa sizonda kakhulu nxa kungumntwana ozwiswa ubuhlungu. UJehova laye ufuna ukusivikela. Uyazonda sibili nxa umuntu ekhuba kumbe ezwisa omunye wabantu bakhe ubuhlungu.—Isaya. 63:9; Mak. 9:42.

6. Ngokwalokho okutshiwo ku-1 Khorinte 1:26-29, abantu bomhlaba lo bababona njani abafundi bakaJesu?

⁶ Abafundi bakaJesu ‘banjengabancinyane’ ngayiphi enye indlela? Kanti ngobani umhlaba obabona beqakathekile? Ngabanothileyo, abadumileyo labalamandla. Kodwa abafundi bakaJesu bona kabanjalo. Yikho abantu bomhlaba lo bababona ‘bengabancinyane’ abangaqakathekanga. (Bala u-1 Khorinte 1:26-29.) Kodwa uJehova kababoni njalo.

7. UJehova ufuna sibabone njani abafowethu labodadewethu?

⁷ UJehova uyazithanda zonke izinceku zakhe kungelani lokuthi sezilesikhathi esinganani zimkhonza. Bonke abafowethu labodadewethu baqakathekile kuye, yikho lathi kumele sibaqakathekise. Sifuna ‘ukuthanda bonke abazalwane,’ hatshi abanye babo kuphela. (1 Phet. 2:17) Kumele sibenze babone ukuthi siyabathanda njalo sinanzelele ukuthi asibazwisi ubuhlungu. Nxa singabona ukuthi sikhube omunye, akumelanga sithule sizitshele ukuthi kufanele asithethelele futhi akhohlwe ngokwenzakeleyo. Kanti kuyini okungenza abanye bakhubeke? Abanye bazikhangelela phansi ngenxa yendlela abakhula ngayo. Abanye basanda kuba ngoFakazi, yikho kabakafundi ukuthi kumele bathethelele nxa omunye ebaphambanisele. Kodwa kungelani lokuthi kuyini okusizwise ubuhlungu kumbe okuzwise abanye ubuhlungu, kumele sizame ukwenza ukuthi kube lokuthula. Kanti njalo umuntu ojayele ukuphangisa ukucaphuka kumele azame ukulungisisa ubuntu bakhe. Kufanele enze njalo ukuze athokoze njalo abe lobudlelwano obuhle labafowabo labodadewabo.

8. Kuyini okwakusenziwa ngabantu abanengi okwaphambanisa abafundi bakaJesu?

⁸ Kuyini okwenza uJesu wakhuluma ‘ngalaba abancinyane’? Abafundi bakhe babembuze umbuzo lo: “Ngubani sibili omkhulu kulabo bonke eMbusweni wamazulu?” (Mat. 18:1) AmaJuda amanengi ngalesosikhathi ayeqakathekisa izikhundla lokuthi abantu bawabone eqakathekile. Esinye isikhwicamfundo sithi: “Amadoda amanengi ayeqakathekisa ukuhlonitshwa lokuba ngabantu abadumileyo ukwedlula loba yini.”

9. Kuyini abafundi bakaJesu okwakumele bakwenze?

⁹ UJesu wayekwazi ukuthi amaJuda amanengi ayezama ukuba ngcono kulabanye, yikho abafundi kwakufanele basebenze nzima ukuze batshintshe indlela ababecabanga ngayo. Wabatshela wathi: “Omkhulu kulani lonke  kumele abe njengomncane kulani lonke, lalowo okhokhelayo abe njengesisebenzi senu.” (Luk. 22:26) Sitshengisa ukuthi ‘singabancane’ nxa sibona abanye ‘bengcono kulathi.’ (Flp. 2:3) Nxa singazimisela ukukwenza lokhu kasisoze sihlale sikhuba abanye.

10. Yisiphi iseluleko sikaPhawuli okumele sisilalele?

¹⁰ Bonke abafowethu labodadewethu kulalapho abangcono khona kulathi. Lokhu akunzima ukukunanzelela nxa singagxila kokuhle abakwenzayo. Kumele silalele iseluleko umphostoli uPhawuli asinika amaKhristu eKhorinte, wathi: “Kuyini okwenza uzibone ungcono kulomunye umuntu? Kuyini olakho ongazange ukuphiwe? Manje nxa wakuphiwa, uzikhukhumezelani angathi kawuzange ukuphiwe?” (1 Khor. 4:7) Yikho kakumelanga sifune ukubukwa ngabantu kumbe ukuzibona singcono kulabanye. Ngokwesibonelo, nxa umzalwane esenelisa ukwenza inkulumo ezimnandi kumbe udadewethu ephumelela ekuqaliseni izifundo zeBhayibhili, kumele ngamunye wabo adumise uJehova ngalokho ayenelisa ukukwenza.

11. Kuyini uJesu ayesifundisa khona ngesikhathi elandisa umzekeliso wenkosi lenceku yayo?

¹¹ UJesu wathi eqeda ukuxwayisa abafundi bakhe ngokuthi bangakhubi abanye, walandisa umzekeliso wenkosi lenceku yayo. Inkosi leyo yacitsha isikwelede esikhulu inceku eyayilaso eyayingeke yenelise ukusibhadala. Ngemva kwalokho inceku leyo yala ukucitsha isikwelede esincane kakhulu senye inceku eyayisebenza layo. Inkosi yathi ikuzwa lokho yaphosela inceku le engelasihawu ejele. Sifundani? UJesu wathi: “UBaba osezulwini laye uzaliphatha njalo nxa lingabaxoleli abafowenu ngenhliziyo yonke.”—Mat. 18:21-35.

12. Sibazwisa njani ubuhlungu abanye nxa singafuni ukuthethethela?

¹² Okwenziwa yinceku leyo akuzange kuzwise yona kuphela ubuhlungu, kodwa kwazwisa labanye. Okokuqala, ayizange ibe lomusa njalo ayizange itshengise enye inceku isihawu ngoba yathi “iphoselwe ejele, ihlale khona ize ibhadale isikwelede.” Okwesibili, yazwisa ubuhlungu ezinye izinceku ezazibone lokho eyayikwenzile. “Izinceku eyayisebenza lazo zathi sezibone okwakwenzakele zakhathazeka kakhulu.” Lathi izinto esizenzayo zingabaphatha kubi abanye. Kungenzakalani nxa omunye angasiphambanisa besesisala ukumthethelela? Okokuqala, simzwisa ubuhlungu ngenxa yokuthi kasifuni ukumthethelela. Kanti njalo singabe singasafuni ukukhuluma laye lokumtshengisa uthando. Okwesibili, singenza abanye ebandleni bangakhululeki nxa benanzelela ukuthi kasizwanani lomuntu lowo.

13. Ufundani kokwenzakala kwelinye iphayona?

¹³ Nxa sithethelela abafowethu labodadewethu siyabe sizinceda thina futhi sinceda labanye ebandleni. Lokhu yikho okwenzakala komunye udade oliphayona esizamuthi nguCrystal. Wayezwiswa ubuhlungu ngomunye udade ebandleni. Uthi: “Ngezinye izikhathi amazwi ayengitshela wona ayesiba buhlungu okokuthi kwakungathi ngisikwe yingqamu. Ngangingasafuni lokuphuma laye ekutshumayeleni.” UCrystal wayebona angani ulesizatho esizwakalayo sokucaphuka, kodwa kazange ambambele isikhwili udadewabo kumbe ahlale ecabanga ngendlela yena ayezizwa ngayo. Wathobeka walalela iseluleko esiku-Nqabayokulinda yesiZulu ka-October 15 1999 esihlokweni esithi “Thethelela Ngokusuka Enhliziyweni.” Wamthethelela udadewabo. Uthi: “Khathesi sengizwisisa ukuthi sonke  siyalwisa ukugqoka ubuntu obutsha lokuthi uJehova uzimisele ukusithethelela nsuku zonke. Ngizwa angathi sengethulwe umthwalo osindayo emahlombe. Sengithokoza.”

14. (a) Ngokwalokho okutshiwo kuMathewu 18:21, 22, kuyini okwakungabe kuthwalisa nzima umphostoli uPhetro, futhi ufundani empendulweni kaJesu? (b) Kuyini okungasinceda nxa singaba sesimeni esifananayo?

¹⁴ Siyakwazi ukuthi kumele sithethelele abanye, yikho okuqondileyo okumele sikwenze. Kodwa kwezinye izikhathi kungasithwalisa nzima. Umphostoli uPhetro laye wayengabe ezizwa njalo ngezinye izikhathi. (Bala uMathewu 18:21, 22.) Pho kuyini okungasinceda? Okokuqala yikucabangisisa ngendlela uJehova akuthethelele ngayo. (Mat. 18:32, 33) Lanxa singafanelanga ukuthi asithethelele, usithethelela ngenhliziyo yonke. (Hubo. 103:8-10) Kanti njalo “silomlandu wokuthi sithandane.” Yikho kasizikhetheli ukuthi siyafuna yini ukuthethelela loba hatshi, silomlandu wokuthi senze njalo. (1 Joh. 4:11) Okwesibili, cabangisisa ngokuzakwenzakala nxa ungathethelela. Singanceda umuntu oyabe esiphambanisele, senze kube lokumanyana ebandleni, sivikele ubungane bethu loJehova njalo sethule umthwalo osindayo emahlombe ethu. (2 Khor. 2:7; Kol. 3:14) Okwesithathu, thandaza kuJehova onguye ositshela ukuthi sithethelele. Ungavumeli uSathane aphambanise ubudlelwano olabo labafowenu labodadewenu. (Efe. 4:26, 27) Sidinga ukuncediswa nguJehova ukuze singabanjwa ngumjibila lo kaSathane.

15. UKholose 3:13 uthi kumele senzeni nxa umfowethu kumbe udadewethu enze into engasiphathanga?

¹⁵ Kuthiwani nxa umfowenu kumbe udadewenu enze into engakuphathanga? Kumele wenzeni? Yenza konke okusemandleni akho ukuthi wenze kube lokuthula. Tshela uJehova indlela ozizwa ngayo. Mcele ukuthi abusise umuntu okukhubileyo lokuthi akuncedise  ubone ubuntu obuhle alabo, bona kanye uJehova abuthandayo. (Luk. 6:28) Nxa ungenelisi ukukhohlwa ngalokho akwenzileyo, cabanga ngendlela engcono ongakhuluma ngayo laye. Kuhlala kunceda ukucabanga ukuthi umzalwane ubengahlosanga ukukuzwisa ubuhlungu. (Mat. 5:23, 24; 1 Khor. 13:7) Nxa usukhuluma laye, zitshele ukuthi kahlosanga okubi. Kodwa kumele wenzeni nxa engafuni ukwenza ukuthi kube lokuthula? ‘Qhubeka umbekezelela.’ (Bala uKholose 3:13.) Okuqakatheke kakhulu yikuthi ungabambi isikhwili ngoba lokho kungaphambanisa ubungane bakho loJehova. Ungaqali ukuvumela loba yini ukuthi ikukhube. Ungenza njalo, uyabe utshengisa ukuthi uthanda uJehova ukwedlula loba yini.—Hubo. 119:165.

16. Yiwuphi umlandu ngamunye wethu alawo?

¹⁶ Siyasiqakathekisa isibusiso esilaso sokukhonza uJehova simanyene, ‘singumhlambi owodwa’ phansi “komelusi oyedwa.” (Joh. 10:16) Ibhuku elithi Sihlelelwe Ukwenza Intando KaJehova ekhasini 165 lithi: ‘Ulomlandu wokulondoloza ukumanyana kwethu.’ Yikho kumele ‘sizifundise ukubona abafowethu labodadewethu ngendlela uJehova ababona ngayo.’ KuJehova sonke ‘singabancinyane’ abaligugu. Wena ubabona njalo yini abafowenu labodadewenu? UJehova uyakubona konke okwenzayo ukuze ubancede njalo utshengise lokuthi ulendaba labo.—Mat. 10:42.

17. Sizimisele ukwenzani?

¹⁷ Siyabathanda abafowethu labodadewethu. Yikho ‘sizimisele ukungabeki phambi komfowethu into engamkhuba kumbe engamgwenxa.’ (Rom. 14:13) Sibona abafowethu labodadewethu bengcono kulathi njalo sifuna ukubathethelela ngenhliziyo yonke. Kasingavumi ukukhutshwa ngabanye. Kodwa “kasizameni ngamandla ethu wonke ukwenza izinto eziletha ukuthula lalezo ezenza sakhane.”—Rom. 14:19.